misralarını xatırladım.
* * *
- Ölümünə on beş dəqiqə qalmış Səməd oyandı, - deyə Mirqasım müəllim
göz yaşı içində sözünə davam edir. - Xeyli bir-birimizə baxa-baxa qaldıq.
Bilmirəm nə sözü vardısa dinib-danışa bilmədi. O anlarda, o dəqiqələrdə nə
fikirləşdiyimi indi də xatırlaya bilmirəm. Qorxumdan nə nəfəs alırdım, nə də
gözümü ondan çəkə bilirdim. Elə bilirdim ki, bircə dəfə gözümü ondan
yayındırsam, ya da nəfəs alsam Səmədi əbədilik itirəcəyəm. Hönkürtü ilə özümü
onun üstünə salıb qucaqladım...
Mirqasım müəllim “heyf, heyf, Səmədə” - deyib susdu. Yaşamaq, yaratmaq
istəyən bir sənətkar dostu itirmək - bundan da ağır itki, ağır kədər olarmı? Bütün
həyatı boyu heç kəsə yalvarmayan mərd bir insanın yalvarışına, ümidsizliyinə mən
hələ də inana bilmirdim. Lakin nə etməli, bu, sadiq bir dostun böyük şair haqqında
açıq söhbəti idi..
Ölüm, sənətkar ölümü, dost ölümü. Bu dörd hərfdən ibarət ölüm kəlməsinin
dəhşətini əziz bir adamının yoxluğunu duyanda hiss edirsən.
Səməd Vurğunun özü deyirmiş ki, biz üç qardaşıq: Mehdixan, Mirqasım, bir
də mən. Amma mən bilmirəm bunların hansını çox istəyirəm. Allah eləməsin
bunlardan biri ölüb-eləsə mən dəli olaram. Əgər həyatda Mirqasım və Mehdixan
olmasaydı, mən nə düzlüyə, nə sədaqətə, nə də insanpərvərliyə inanmazdım. O,
Mirqasım müəllimin oğlu Nazimi lap çox istəyirmiş. Şair Nazimi qucaqlayıb
deyərmiş:
- Üç qardaşın böyük oğlu, sənin toyunu özüm eləyəcəm.
- Həqiqətən də şair Nazimin toyunda üzünü məclisdəkilərə tutub demişdir:
Çox toylarda məni tamada seçmək istəyiblər, razı olmayıb boyun
qaçırmışam. Camaat, bu gün oğlumun toyunda özüm özümü tamada seçirəm.
Səməd Vurğunun 1927-ci il yanvarın on beşində Qubadan qardaşı
Mehdixana yazdığı məktubun son sətirləri:
“Məktubunu gözləyirdim. Mirqasıma, Məmmədiyyəyə, Mehdi və
başqalarına salam... Öpürəm...”.
Şairin qızı Aybənizin 1953-cü il mayın on beşində Soçidə, atasına yazdığı
məktubdan sətirlər:
“Mayın birində Mehdixan əmi ilə nümayişə getmişdik. İkisində hamımız
Mehdixan əmigildə idik. Osman əmi də, Mirqasım əmi də orada idilər. Ay, sənin
cavanlığından danışıb gülüblər ha...”.
Səməd Vurğunun Mirqasım müəllimin özunə də məktubları çox olub. Çox
təəssüf ki, Mirqasım müəllim onların heç birini saxlaya bilməyib.
Bir müddət heç birimiz dinmədik. Mən bu ağır sükutdanmı, yoxsa Səməd
Vurğunu qızğın bir məhəbbətlə, həqiqi qardaşlıq hissiylə sevən Mirqasım
müəllimin göz yaşını görməmək üçünmü çıxıb getmək istəyirdim. Ayağa durub
müsahibimə əl uzatdım. Lakin onun əl işarəsindən başa düşdüm ki, o da çıxmaq
istəyir.
Bayırda qaranlıq düşmüşdü. Biz “Gənclik”metrosunun yanında görüşüb
ayrıldıq. Qulaqlarıma hələ də Səməd Vurğunun səsi gəlirdi: “- Sinəm doludu,
Həkim, üçcə il...”.
Düşünürəm, məgər qəlbi gözəl arzularla dolu şairə ürəyindəkilərin hamısını
deməyə üç il çatardımı? Əlbəttə, yox! Bu, yaşamaq, yaratmaq eşqilə dolu şair
qəlbinin vaxtsız ölümə üsyanı idi. Lakin böyük şairin özünün dediyi kimi:
“Ölüm sevinməsin qoy!.. Ömrünü vermir bada,
El qədrini canından daha əziz bilənlər.
Şirin bir xatirətək qalacaqdır dünyada,
Sevərək yaşayanlar, sevilərək ölənlər”.
1974
ARXASIZA ARXA OL Kİ:
(Sənədli hekayə)
Səməd Vurğunun dediyi bir hikmətli bənd xalq arasında çox geniş yayılıb.
Arxasız, köməksiz adamdan söhbət düşənda bu hikmət çox tez-tez işlənir. Bu zərb-
məsələ dönmüş kəlamı harda, kimə deyib Səməd Vurğun?
Artıq otuz ilə yaxındı ki, bu hikmətin yaranma tarixini hərə bir cür yozub
danışır:
Arxalıya arxa olma,
Deyərlər ki, yamaqsan.
Arxasıza arxa ol ki,
Desinlər ki, dayaqsan.
Vurğunun xatirə cığırı ilə oba-oba, kənd-kənd gəzdikcə çox adam mənə bu
əhvalatı qol-qabırğasını sındıra-sındıra danışmışdı.
...Mən illərlə axtardığım adamı tapmışdım. O, mənə ilk baxışdaca tanış
gəldi. - Azərbaycan Dövlət Universitetinin müəllimi, iqtisad elmləri doktoru,
professor Adil Qasımov. Demək tələbə vaxtı onu universitet auditoriyalarında
görmüşəm. Görəsən, Adil müəllim indiyədək niyə susurmuş?
Şairin altmış və yetmiş illik yubileylərində ulu sənətkarı uzaqdan görənlər də
xatirə yazmağı, danışmağı özlərinə fəxr biliblər, ondan mənəvi zövq alıblar.
Söhbətimizin yekununa yaxın bu sualın da cavabını tapdım. Adil müəllimin
təbiətindəki utancaqlıq və təvazökarlıq susdurubmuş indiyədək onu.
* * *
Sevinc insan qəlbinin möcüzəli bir halıdır. Bu anlarda ətrafda nə varsa
adama xoş gəlir, qeyri-adi görünür: tanımadığın adamları belə mehribanlıqla süzür,
onu səmimiyyətlə, nəzakətlə dindirib-danışdırırsan. Adilin uşaqlıqda sevinc payı az
olsa da orta məktəbdə, universitet illərində bu ona çox qismət olmuşdu. Bütün illəri
əla oxuyan Adil 1953-cü ildə universitetin tarix fakültəsinin siyasi iqtisad qrupunu
da əla bitirdi. Həmin ili də onu universitet elmi şurasının qərarı ilə aspiranturaya
göndərdilər. Azərbaycan Elmlər Akademiyasının iqtisadiyyat bölməsində bir yer
üçün altı nəfər ərizə vermişdi. Müsabiqədə altı nəfər arasında təkcə Adil ən yüksək
bal toplamağa nail oldu. Ümumi qaydaya görə qalib kimi o bir yeri də Adil
Qasımov tutmalı idi.
Amma 1954-cü ilin noyabrında Akademiyanın iqtisadiyyat bölməsinin elmi
şurası Adili o bir yerə təsdiq eləməkdən imtina etdi. Ona dedilər ki, guya bu yer
heç yox imiş, qəzetdə də elan səhvən verilib. Cəmi bir neçə ay qabaqkı sevinci alt-
üst olan Adil bilmədi neyləsin, kimə müraciət etsin. Bütün günü qəlbi qəmlə dolu
fikirli gəzdi. Dərdini deməyə, ürəyini açmağa bir adam tapmadı. “Bu da mənim
arzularım, bu da anama verdiyim sevinc xəbərinin sonu. Yazıq arvad borc-xərc
eləyib aldığı toğlunu ayağım altında qurban kəsdi”.
O, anasının əl-ayağa düşməyini, uzaq-yaxın qohumları yığıb olub-
qalanından düzəltdiyi balaca məclisi xatırladıqca xəcalət tərindən od tutub yanırdı.
Durub-oturub bircə oğlunu bir də öpüb qucaqlayan anası Həcərin ürəkdən “allah,
sənə min şükür, bircə balamın işi avand oldu, bunu hamıya qismət elə, ay
özəgörünməz” - deməyi Adilin qəlbinin bütün guşələrini sızlatdı. Böyük şəhərdə,
qərib eldə dərdini deməyə, kömək istəməyə adam tapmadı. Nə bir qohumu, nə də
bir həyanı vardı, bu boyda şəhərdə. Universitet yoldaşlarının hamısı təyinatla
rayonlara göndərmişdi. Arxasız, köməksiz olduğuna görə özünü danlayır,
bəxtindən küsürdü. Bir müdrik atalar sözünün həqiqət olduğunu sanki indi dərk
edib, anlayırdı. “Yetimə ay da qaradı, gün də”.
Qaranlıq qovuşanda yataqxanaya qayıtdı. Qalmağa yeri, ev kirayələməyə
pulu olmadığından hələ də yataqxanada yaşayırdı. İçəri girən kimi anasına oxşayan
xidmətçi Sona xalanı gördü. Salamlaşıb, kirimişcə otağına getdi. “Bunların da
yanında biabır oldum” - deyə fikirləşən Adil iyirmi gün əvvəl aspiranturaya qəbul
olunduğuna görə komendanta və xidmətçilərə şirni də paylamışdı.
Soyunmadan yerinə uzandı. Qollarını boynunun ardında çarpazladı. Elə bil
keyləşmişdi. Nə düşündüyünü də bilmirdi.. “Axı, mən prezident Musa Əliyevin
qəbulunda oldum. Əgər doğrudan da bu yer olmasaydı, prezident məni təbrik
eləməzdi. İmtahana buraxılmaq üçün sənədimə qol çəkib mənə uğur arzulamazdı.
Elə onda deyərdi ki, oğul, belə şey yoxdu. Səhv olaraq elan verilib. Bəlkə yenidən
onun qəbuluna gedim. Yox, onun qəbuluna düşənə qədər vaxt da keçər. Ötən dəfə
hələ özü məni təbrikə çağırmışdı. Yenə düz on gündən çox gedib-gəldim. Bəs, nə
edim, qayıdıb kəndəmi gedim, nə üzlə, bir də ki, mənə ilin, günün bu vaxtı kim
dərs verəcək, göndərişim, heç nəyim də yoxdu. Bəs anam?..”.
Adil hələ bir yaşında olanda ərini itirən Həcər xala həyatda çox əziyyətlər
çəkmişdi. Müharibə illərində kirpiyi ilə od götürmüşdü. Kişilərin əvəzinə yer
əkib, taxıl yığın ana gecələr yuxusuz, gündüzlər dincsiz olmuşdu. Min bir zillətlə
hana toxuyub əlinə qəpik-quruş toplayan ana bircə Adilini böyütmüşdü.
Böyütmüşdü ki, gözünün ağı-qarası bircə oğlu ona-həyatda dayaq olsun.
Dostları ilə paylaş: |