14
3 Almenn verkefni
Lögð verður áhersla á jafnrétti til búsetu og að íbúar landsins fái notið þeirrar grunnþjónustu
sem gera á kröfu um í þróuðu nútímasamfélagi.
(Úr stefnuyfirlýsingu ríkisstjórnar Íslands)
3.1 Heilbrigðisþjónusta
Grunnþjónusta eða réttur borgaranna til að njóta ákveðinnar þjónustu á því svæði sem þeir búa á
hefur aldrei verið skilgreindur í íslenskum lögum. Þó má nefna, svo dæmi sé tekið, að almenn
heilbrigðisþjónusta er skilgreind í lögum um heilbrigðisþjónustu nr. 40/2007 með eftirfarandi hætti:
„Heilsugæsla, þjónusta og hjúkrun á hjúkrunarheimilum og hjúkrunarrýmum stofnana og almenn
sjúkrahúsþjónusta“. Í sömu lögum er almenn sjúkrahúsþjónusta skilgreind sem almennar
lyflækningar, hjúkrun, slysamóttaka, endurhæfing og nauðsynleg stoðdeildarþjónusta. Í reglugerð um
heilsugæslustöðvar er „aðalmarkmið með rekstri heilsugæslustöðva að tryggja öllum landsmönnum
fullnægjandi heilsugæslu í heimabyggð“. Þessir grunnþættir geta því átt við alla staðbundna
heilbrigðisþjónustu á Íslandi og verkefni stjórnvalda og stjórnenda heilbrigðisstofnana er að verja og
viðhalda þessum grunnþáttum í samræmi við þarfir og óskir sjúklinga.
Á Heilbrigðisstofnun Vesturlands á Hvammstanga er brýnt að tryggja að hægt sé að nýta þau
sjúkrarými sem eru til staðar en fjármagn vantar fyrir tæp tvö stöðugildi sjúkraliða til að hægt sé að
nýta þau rými sem leyfi eru fyrir. Einnig er bagalegt að þjónusta augnlæknis sem komið hefur tvisvar
á ári á HVE Hvammstanga verði ekki í boði vegna kvóta sérfræðilækna og mikilvægt að þær reglur
verði endurskoðaðar svo sérfræðilæknar fáist til að bjóða þjónustu sína úti á landi.
Húsnæði Heilbrigðisstofnunarinnar á Blönduósi býður upp á góða aðstöðu, fagþekkingu og rými fyrir
endurhæfingu aldraðra, t.d. eftir veikindi eða slys. Hægt væri að nýta 3–4 rými fyrir þessa tegund
heilbrigðisþjónustu og fjölga rýmum með fjölgun sjúkraþjálfara. Einnig er brýnt að fá fjármagn til að
opna aftur sundlaug stöðvarinnar.
Til að grunnheilbrigðisþjónusta á Norðurlandi vestra sé viðunandi er nauðsynlegt að efla
Heilbrigðisstofnunina á Sauðárkróki og bæta við 1 sjúkrarými, 5 hjúkrunarrýmum, auka
sérfræðiþjónustu farandlækna (s.s. á sviði endurhæfingarlækninga, öldrunarlækninga, geðlækninga
og húðlækninga), og efla ungbarna- og mæðravernd – svo brýnustu atriði séu nefnd
3.2 Menntamál
Grundvallaratriði í byggðaþróun og grunnþjónustu íbúa er aðgengi þeirra að menntastofnunum, ekki
aðeins leik- og grunnskólum, heldur einnig framhaldsskólum, háskólum og endur- og símenntun.
Verulega hefur verið vegið að þessari starfsemi á Norðurlandi vestra á liðnum árum. Einkum hefur
verið skorið harkalega niður í starfsemi og rekstri Háskólans á Hólum. Brýnt er að þróuninni verði
snúið við enda sýna rannsóknir að sterk fylgni er á milli menntunar á nærsvæði og búsetuvali þar að
því loknu, og það styrkir innviði samfélagsins. Þá veita öflugar menntastofnanir eftirsóknarverð störf.
Verkefni 3.1 – Efling Háskólans á Hólum
Ný stöðugildi
4
Flutt stöðugildi
0
Áætlaður kostnaður
24 m.kr.
Ábyrgð og framkvæmd
Mennta- og menningarmálaráðuneytið, Háskólinn á Hólum
Tímaáætlun
2015
15
Háskólinn á Hólum hefur endurskipulagt og hagrætt mikið í stoðþjónustu sinni á undanförnum árum.
Í úttekt á gæðum náms við skólann árið 2013 kom í ljós að of langt hefur verið gengið í niðurskurði í
stoðþjónustu, á sama tíma og nemendum hefur fjölgað og auknar kröfur eru gerðar til háskóla um
þjónustu við nemendur.
Háskólanum á Hólum hefur verið bent á nauðsyn þess að bæta þjónustu við nemendur og er brýnasta
þörfin tengd námsráðgjöf, bókasafns-, tölvu- og tækniþjónustu. Núverandi fjárheimild HH skapar ekki
svigrúm til þess að hægt sé að ráðast í ofangreindar úrbætur um fjölgun stöðugilda í stoðþjónustu
skólans, þ.e. að ráða námsráðgjafa í fullt starf, aðstoðarmann vegna tölvumála, bókasafnsfræðing,
alþjóðafulltrúa og sviðsstjóra kennslusviðs. Kostnaður vegna fimm stöðugilda er áætlaður 30,0 m.kr.
eða 6,0 m.kr. á ársverk.
Verkefni 3.2 – Efling Fjölbrautaskóla Norðurlands vestra
Ný stöðugildi
5
Flutt stöðugildi
0
Áætlaður kostnaður
30 m.kr.
Ábyrgð og framkvæmd
Mennta- og menningarmálaráðuneytið, FNV
Tímaáætlun
2015
Til að mæta þörf atvinnulífsins og áhuga nemenda á fjölbreyttum námsleiðum er mikilvægt að
menntamálaráðuneytið vinni með framhaldsskólakerfinu að uppbyggingu nýrra námsleiða.
Fjölbrautaskóli Norðurlands vestra hefur á undanförnum árum unnið að þróun og nýrra námsleiða
eins og plastiðna, kvikmyndagerðar, slátrarabrautar o.s.frv. Er afar brýnt að skólinn fái að skapa sér
sérstöðu og fái heimild til að vinna náið með atvinnulífinu að slíkri uppbyggingu. Það hefur verið erfitt
að koma þessum nýju námsbrautum í gegnum kerfið, fá námsskrár samþykktar og heimildir til að
hleypa náminu af stokkunum.
Jafnframt er nauðsynlegt að framhaldsskólar úti á landi fái áfram að taka inn nemendur sem eru eldri
en 25 ára. Á landssvæðum eins og Norðurlandi vestra er mikil þörf á að hækka menntunarstig og
farsælla að ná því fram í gegnum núverandi kerfi í stað þess að reka tvö framhaldsskólakerfi hlið við
hlið (fullorðinsfræðslu og hefðbundna framhaldsskóla).
Fáist samþykkt námsskrá, fjármagn og aðrar heimildir ráðuneytisins má áætla að til verði 2 ný
stöðugildi í plast- og trefjaiðnum, 1–2 í kvikmyndagerðarnámi og 1 stöðugildi við slátrarabraut hjá
Fjölbrautaskóla Norðurlands vestra á Sauðárkróki. Kostnaður vegna fimm stöðugilda er áætlaður 30,0
m.kr. eða 6,0 m.kr. á ársverk.
Fjölbrautaskóli Norðurlands vestra hefur unnið brautryðjendastarf í uppbyggingu dreifnáms á
landsbyggðinni og stendur nú að dreifnámi á þremur stöðum, Blönduósi, Hvammstanga og Hólmavík.
Dreifnámið hefur sannað gildi sitt og styrkir byggð, aðgengi að námi og búsetujafnrétti á Ströndum og
Norðurlandi vestra. Tryggja þarf fjármuni til lengri tíma til reksturs og frekari þróunar dreifnáms á
þessum stöðum.
Mikilvægt er að styrkja stoðir dreifnámsdeilda á Hvammstanga og á Blönduósi. Það er gríðarlegt
hagsmunamál fyrir sveitarfélögin og íbúa þess að efla starfsemi deildanna en ýmislegt bendir til þess
að hlutfall nemenda í efstu deildum grunnskólans sem ætla sér að nýta sér dreifnámið sé sífellt að
hækka. Það má því draga þá ályktun að það að eiga möguleika á dreifnámi í heimabyggð geri það að
verkum að fleiri nemendur skili sér í nám að loknum grunnskóla. Auk þess eru þeir nemendur sem
nýta sér dreifnámið líklegri til að halda áfram námi við FNV á Sauðárkróki.