- 28 -
çəkilən heç bir materiada izləmirik. “Pişik” felyetonunda isə Tolstoy şəxsiyyəti Məhəmməd, Musa,
İsa kimi peyğəmbərlərlə eyni tutulur, lakin felyeton daxilində peyğəmbərlər belə ideallaşdırılmır və
Tolstoydan öncə Qalileydən, İbn Rüşddən, Midhəd paşadan söz açıllır.
Formaca “Pişik” felyetonu “Molla Nəsrəddin” jurnalının iki əməkdaşının – Məşədi
Mozalanla Lağlağının mükaliməsi şəklində qələmə alınmışdır. Mükalimədə əsas məsələ isə ictimai
həyatda dünyabaxışları, yaşayış tərzlərini dəyişdirməyin üsuludur. Və bu problemə münasibətdə
mahiyyətcə Lağlağı inqilab, Məşədi Mozalan isə təkamül tərəfdarı kimi çıxış edir. Lağlağının
fikrincə, bəşər tarixində həzrət Məhəmməd, Musa, İsa kimi peyğəmbərlər, Qaliley, Tolstoy, İbn
Rüşd, Midhəd paşa kimi böyük şəxsiyyətlər, elan etməsələr də, məhz inqilab yolu ilə getmişlər. Öz
mövqeyini Lağlağı aşağıdakı cümlələrlə əsaslandırır: “Əgər həzrət Məhəmməd öz ata-babasının, öz
qonşu və camaatının əziz və müqəddəs olan əqidələrinə, adətlərinə, dolanmaqlarına toxunmayıb,
onların xoşuna gedəcək surətdə yavaş-yavaş rəftar etsəydi, camaatın öldürməyindən qurtulmaq
üçün gecə ilə Mədinədən qaçmağa məcbur olarmıdı?
Əgər həzrət Musa Firon və camaatı ilə mülayimanə dolansaydı, daha Tiyə çöllərində
qalarmıdı?
Əgər həzrət İsa milləti ilə xoş keçinsəydi, onların əqidəsinə toxunmasaydı, dar ağacından
asılıb ölərmidi?
...Əgər həkim Qaliley dünyanın hərləndiyini inkar edib xoş rəftar etsəydi, dırnaqlarından
çəkilərmidi?
Əgər İbn Rüşd, İbn Sina mollaların və əvamın ziddinə söz danışmasaydılar, təkfir
olunarmıdılar?
Əgər Midhət paşa ümumun fikrinə riayət etsəydi, Taif zindanında köməksiz qalıb
boğularmıdı?
Əgər Tolstoy öz əqidəsi üstündə durmasaydı, kəlisalardan qovularmıdı?” ( 8, s. 21-24)
Göründüyü kimi, felyetonda yalnız bir cümlədə Tolstoyun adı çəkilsə də, onun kilsədən
qovulma səbəbləri, yaxud Tolstoyla din nümayəndələri arasındakı qarşıdurmanın mahiyyəti
açıqlanmır. Bununla belə, oxucu rus ədəbiyyatının bu qüdrətli nümayəndəsini də insanlıq tarixində
ciddi dönüşlərə imza atmış dahi şəxsiyyətlərdən biri olaraq tanıyır.
“Molla Nəsrəddin” məcmuəsində Lev Tolstoydan nisbətən geniş danışıldığını “Tolstoy”
(“Molla Nəsrəddin”, 16 mart 1908, № 11), “Teleqraf” (“Molla Nəsrəddin”, 13 aprel 1908, № 15),
“Xabi-qəflət” (“Molla Nəsrəddin”, 6 dekabr 1909, № 49), “Qraf L.Tolstoy” (“Molla Nəsrəddin”, 20
noyabr 1910, № 37), “Teleqraf xəbərləri” (“Molla Nəsrəddin”, 12 iyul 1913, № 19) başlıqlı
materiallarda izləyirik.
Əlbəttə, elmi fikrin “Tolstoy” məqalə-felyetonuna, “Qraf Tolstoy” nekroloq-felyetonuna
dair nisbətən geniş təhlilləri təqdirəlayiqdir. Bununla belə, həmin materiallarla tanışlıq deməyə əsas
verir ki, sanki ənənə halında tədqiqatçılar birbaşa Tolstoydan bəhs edən cümlələri nəzər nöqtəsinə
çəkmiş, öz elmi dəyərləndirmələrini həmin cümlələr həddində yekunlaşdırmışlar. Məsələn,
X.Əlimirzəyevin “Dahi sənətkar, böyük vətəndaş” kitabında hətta mənbə göstərlimədən “Tolstoy”
məqalə-felyetonundan aşağıdakı şəkildə söz açılır: “C.Məmmədquluzadə “Molla Nəsrəddin”
jurnalını nəşrə başladıqdan sonra Tolstoy irsindən öyrənmək və onu geniş təbliğ etmək işini daha
səmərəli bir şəkildə davam etdirmişdir. Xüsusilə 1908-1910-cu illər arasında, əvvəllər Tolstoyun
anadan olmasının 80 illiyi, daha sonra isə vəfatı münasibəti ilə bir neçə məqalə verilmişdir. Tolstoy
yaradıcılığının böyüklüyü, qüdrəti və genişliyi haqqında oxuculara ətraflı məlumat verən belə
məqalələrdən birində deyilirdi: “Rus ədiblərindən aləmə məşhur olan qraf Tolstoyun bu yaxınlarda
həştad yaşı tamam olur. Demək olar ki, yer üzündə nə qədər millətlər varsa, hamısı Tolstoyun
həştad illik bayramına şərik olacaqdır... Demək olar ki, bəlkə, yer üzündə indiyədək heç bir kəs
yazıçılıqda qraf Tolstoy kimi hörmət və şöhrət qazanmayıb.” (2, s. 603)
Fikrimizcə, “Tolstoy” başlıqlı məqalədə müəllifi düşündürən heç də bir rus yazarının ömür
və sənət yolu deyil, əsasən qəflət yuxusunda uyuyan təfəkkürlərin bəşər fikri tarixindəki son
dərəcədə əhəmiyyətli hadisələrə biganəliyi, laqeydliyidir. Haqqında danışılan məqalə-felyeton həcm
etibarilə hər birində bir və ya bir neçə cümlə olan 11 abzasdan ibarətdir. Əsərlə tanışlıq deməyə əsas
verir ki, bu balaca əsərdə müəllif mövqeyinin aydınlaşdırılması üçün xüsusi təhlilə ehtiyac vardır.
- 29 -
Məqalə-felyetonda satirasız və mübaliğəli kinayəsiz cəmi bir-iki cümlə qələmə alınmışdır. Daha
doğrusu, müəllif Tolstoy böyüklüyü haqqında təsəvvür yaratmaqdan ötrü özünəməxsus şəkildə
mübaliğəyə yer vermiş, eyni zamanda doğma həmvətənlərinin Tolstoy irsinə, o cümlədən,
ümumiyyətlə, böyük sənətə münasibətlərində müşahidə olunan laqeydliyi satira alovunda külə
döndərmək istəmişdir. Bəli, “Tolstoy” məqalə-felyetonunda böyük rus ədibinin sənətinə dair hər
hansı bir məlumata rast gəlmədiyimiz kimi, Tolstoyun yaradıcılığı, əsərləri haqqında cüzi bilgi belə
almırıq. Əlbəttə, məqalədə fikrin bu formada təqdimi müəllif üslubunun özünəməxsusluğu, yeniliyi
kimi diqqəti cəlb edir və sanki bu üsulla ictimai şüur birbaşa Tolstoy irsinə istiqamətləndirilir. Digər
tərəfdən, məqalə-felyetonun məhvedici satiradan ibarət son yarısı sanki səfərbəredici mahiyyət
daşıyır, oxucuları dünya ilə ayaqlaşmağa səsləyir. Budur, müəllif bildirir ki, Qafqaz
müsəlmanlarından da yeddi vəkil Tolstoyun 80 illiyində iştirak etmək üçün Yasnaya Polyanaya
gedəcək. Eyni zamanda vəkillərədən birinin ordubadlı Hacı Əşrəf Əli oğlunun, digərinin naxçıvanlı
Məşədi Qasımın, üçüncünün Danabaş kəndindən Kərbalayı Heydərqulunun, dördüncünün Sürməli
mahalında Aralıxbaş kənd qlavası Məşədi Bilalın olması artıq satiranın dolğunluğundan xəbər
verməkdədir.
Bununla
kifayətlənməyən “Hərdəmxəyal” imzalı yazıçı doğma həmvətənlərinin
Tolstoy irsinə münasibətini daha aydın şəkildə belə canlandırır: “Bundan əlavə, Şamaxıda mərhum
Həsənbəy Məlikovun yadigarı üçün açılan altı şöbəli məktəbdə Tolstoyun naminə bir şöbə də
artıracaqlar. Bakı müəllimləri Tolstoyun kitablarından bir neçəsini türk dilinə tərcümə edib İrəvanda
müsəlman mətbəələrinin birində çap eləyib ucuz qiymətə paylayacaqlar müsəlman qardaşlara.
Tiflisdə avqustun 28-də müsəlmanlar cəm olacaqlar Sumbatov küçəsinə və orada “Tolstoy axşamı”
düzəldib nitqlər söyləyəcəklər və çaxır içib keflənəcəklər və bir-birini kötəkləyəcəklər.
Bakıda avqustun 28-də və ondan bir az qabaq müsəlmanlar Tolstoyun sağlığına bir az
atışacaqlar, müsəlmanların teatr dəstəsi avqustun 28-də oynayan vaxt müsəlmanılar teatr dəstəsini
daşa basacaqlar.
Xülasə, biz də inşallah, Tolstoyu layiqincə yad edərik.” (6, s. 89)
Fikrimizcə, məcmuənin 13 aprel 1908-ci il tarixli 15-ci sayında yer tutan “Teleqraf”
sərlövhəli satiranı da “Tolstoy” məqalə-felyetonunun davamı kimi dəyərləndirmək lazımdır. Əgər
“Tolstoy” yazısında müəllifin kinayəli arzuları qələmə alınmışsa, “Teleqraf” sərlövhəli materialla
tanışlıq nəticəsində oxucu bir daha yəqinləşdirir ki, mövcud məkan və zaman daxilində
mollanəsrəddinçi yazara məxsus arzuların həyata keçməsi qeyri-mümkündür. Teleqrafın mətnində
rus filosof yazıçısının səksən illiyi ilə bağlı Bakı camaatının bir yerə yığışması, Seyid Haram
Halalzadənin yazıçının tərcümeyi-halına dair nitq söyləməsi xəbər verilir, eyni zamanda natiqin
əsasən öz şəxsi mənafeyi üçün çalışması bildirilir. Yəni mollanəsrəddinçi sənətdə tənqid
hədəflərindən biri də böyük qələm sahiblərinin yubileylərindən, əsərlərindən öz var-dövlətlərini
artırmaq üçün istifadə edən yalançı oxumuşlardır.
Mollanəsrəddinçilərin Lev Tolstoy irsinə münasibətindən bəhs edən hər bir tədqiqatçı bu və
ya digər dərəcədə məcmuənin 20 noyabr 1910-cu il tarixli 37-ci sayında çap olunmuş “Qraf
L.Tolstoy” nekrolok-felyetonundan da bəhs etmişdir.
Azərbaycan ədəbiyyatşünaslığında “Qraf L.Tolstoy” nekrolok-felyetonuna dair daha geniş
təhlillərlə F.Hüseynovun “Satirik gülüşün qüdrəti” kitabında qarşılaşırıq. Doğrudur, “Satirik
gülüşün qüdrəti” kitabındakı təhlillər elmi obyektivliyi ilə səciyyələnsə də, bəzi mülahizələrlə
razılaşmaq çətindir. Məsələn, müəllif yazır: “Qraf L.Tolstoy” məqaləsi bir neçə cəhətdən
maraqlıdır. Burada dərin kədər hissi ilə yanaşı, Tolstoy irsi yüksək qiymətləndirilir və təbliğ olunur.
...Məqalənin əvvəlində həmçinin Tolstoy ədəbi irsi və təliminin cəmiyyətin müxtəlif təbəqə və
zümrələri tərəfindən öz xeyrinə istifadə edilməsinə işarə olunur. Məqalənin əsas hissəsi L.Tolstoyun
“Şərq hərəkətsizliyi” barədə təliminin tənqidinə həsr edilmişdir.” (4, s. 66)
Fikir aydınlığı üçün qeyd etməyə ehtiyac vardır ki, “Coməri” imzası ilə çap olunan “Qraf
L.Tolstoy” məqaləsi məşhur rus ədibinin vəfatı münasibətilə qələmə alınsa da, müəllifi düşündürən
əsas məsələ Qərbdə və Şərqdə insanlıq tarixində yeni mərhələlərə imza atmış dahi şəxsiyyətlərə
münasibətin köklü surətdə fərqli olmasıdır. Əslində mollanəsrəddinçi müəllif bütün göstəricilər üzrə
Asiyanın Avropaya nisbətən geri qalmasının səbəbini dünyanın bu qitəsində böyük təfəkkür
sahiblərinə ictimai münasibətin qeyri-sağlam olmasında görərək yazır: “...Asiyada bir nəfər insan