122
Kürədaşı,
Od tutmaz kürədaşı,
Dərdim yüklə Araza
Arazla Kürə daşı.
O, dayandı,
Odunnan oda yandı,
Elə həsrətlə baxdım
Həsrətdən o da yandı.
123
Ölüm hey..!
Qumlu bulaq kəsən varmı indi səndə əmliyi?
Yığan varmı şoşanını, yeyən varmı yemliyi?
İçən varmı buz suyundan ayazıya dəmliyi?
De, yoxdursa yetim qalan, o dağlara gəlim hey…!
Bir hay salım, bir qışqırım, sonra orda ölüm hey..!
Keçəl təpə Ərəboğlu qoruyurmu düzləri?
Gələn varmı, gedən varmı, soran varmı sizləri?
El-obasız heç dolurmu Qırxbulağın gözləri?
De, dolmursa o dağların vəfasını bilim hey…!
Sənsiz axan göz yaşımı əllərimlə silim hey…!
Ay Gendərə, yaylağında yaylanırmı ellərin?
Sallanırmı salxım buzun, üşüyürmü əllərin?
Fit çalırmı küləklərin, bir coşurmu sellərin?
De, coşursa xəbər bilim, bükülməsin belim, hey..!
Səndən ayrı el qırıldı, elsiz qaldı elim, hey…!
Ay boylanıb bərələrdən, sallanırmı qayadan?
Gün çırtanda döşdə lalə qızarırmı həyadan?
Mürgü döyən iz-cığırı görən varmı oyadan?
Ayrı düşdük bir-birindən, oldu bizə zülüm, hey..!
Yağ, ay yağış, yağ solmasın mənsiz qalan gülüm, hey…!
124
Bir öpsəydim Seyid Hüseyn bulağının gözündən,
Bir qucsaydım Təkarmudun ətəyindən, dizindən,
Bir yığsaydım turşuməzə Kotannının özündən,
Dada gəlib tamsınardı, dadsız qalan dilim hey…!
Qolum-qıçım bərkiyərdi, titrəməzdi əlim hey..!
Həsrət məni tez qocaltdı , əldən saldı bilmədim,
Ömür ötdü, nə qazandım, nəyim qaldı, bilmədim,
İçimdəki nə sorğudu, nə sualdı bilmədim,
De, bir bilim, dərdlərimə gendən baxıb gülüm, hey..!
Sonra sənlə qucaqlaşıb bir gucaqda ölüm, hey..!
Mən qisməti, qismət məni hey qovladıq, çatmadıq,
Qol götürdük daşlaşmağa, daş da tapıb atmadıq,
Bir ömürə yazılsaq da, bir ömürdə yatmadıq,
Çağır bizi bir barışdır, bir ömürlü olum, hey..!
Vətən yoxsa, qismətimlə bir qucaqda ölüm, hey..!
125
Nəyindən küsüm
Qaçhaqaç,qovhaqov-yalandı dünya,
Kəshakəs sökhasök-talandı dünya.
Alhaal,verhaver-alandı dünya,
Mən alan dünyanın nəyindən küsüm?
Xoruzu,beçəsi dimdik-dimdiyə,
Cavanı,qocası çimdik-çimdiyə,
Olumu-ölümü bircə günlüyə,
Mən,olan dünyanın nəyindən küsüm?
Aqili ayaqda,nadanı başda,
Çirkini gözəldə,gözəli çaşda,
Ayısı sarayda,alimi daşda,
Mən qalan dünyanın nəyindən küsüm?
Fitnədi,fasatdı,kələk qurandı,
Daş atıb qorxuzub,qovub yorandı,
Xortdandı,iblisdi,cindi,şeytandı,
Mən şeytan dünyanın nəyindən küsüm?
126
Yalmansız madyandı,qırxılmış kəhər,
Yüyənsiz dayçadı,götürməz yəhər,
Bu ilan dünyanın dili də zəhər,
Mən ilan dünyanın nəyindən küsüm?
Gah qızmış dəvədi,gah da əjdaha,
O qovur,bu udur gəlir iştaha,
Bu filan dünyadan nə deyim daha
Mən filan dünyanın nəyindən küsüm?
127
Buna dünya neynəsin
Kotannılı, dünya həmən dünyadı,
Öz doğduğun özü əmən dünyadı.
Qışı qarlı, yazı çəmən dünyadı,
Dəyişilən dünya deyil, bizlərik
Alıb, satan günahkarı gizlərik
Buna dünya neynəsin?.
Qucaq açıb hər gələnə can deyər,
İşvə tökər, naz eyləyər, yan deyər,
Əzəl verər, sonda alıb, qan deyər.
Qanmarıqsa biz torpağıq, biz daşıq
Ömrü boyu aldananıq çaş başıq
Buna dünya neynəsin?.
Gündüzü günəşli, gecəsi aylı,
Yaranan bir gündən bulaqlı, çaylı,
Çəməni çiçəkli, dağı haraylı,
Dünyanı biz bölüb, böldürürüksə,
O gülür, biz ölüb, öldürürüksə,
Buna dünya neynəsin?.
Qarı dünya çox üz görüb, qız qalıb,
Çox bəylər soltanlar toruna salıb.
Gələnə də, gedənə də əl çalıb,
Oynamışıq çapanına dünyanın.
Hürümüşük ham-hamına dünyanın
Buna dünya neynəsin?.
128
Fırfırası fırhafırdı, fırlanar,
Qozbel dünya qozbelliyin hey danar,
Gəlib keçən göz qaşına aldanar.
Qoz belinə göz yumarıq, görmərik
Üz gözəlsə tərsə fikir vermərik
Buna dünya neynəsin?.
Dünya özü-öz yükünü çəkəndi,
Haqqı şərə qarışdırıb əkəndi,
Ömürləri ilmə -ilmə sökəndi.
Biz aldanıb naxışına, xalına,
Düşürüksə bü dünyanın dalına
Buna dünya neynəsin?.
Vətən də, namus da, ar da satırıq,
İsmət də, qeyrət də, yar da satırıq
Bilmirik kim alır, harda satırıq
Əvəzdə alırıq ya palan, ya çul
Satdıqca alçalıb qul oluruq, qul
Buna dünya neynəsin?.
Gör biz kimik, kimsələrik, kimlərik,
Əllə atı,otla iti yemlərik.
Yad otunu çay yerinə dəmlərik,
İçə-içə təriflərik yadları.
Söysələrdə dildən düşməz adları
Buna dünya neynəsin?.
Dostları ilə paylaş: |