Vaqif aslan seçİLMİŞ ƏSƏRLƏRİ

Milli Kitabxana

 

 

 

38

 

                                 Gecə keçir,əsir sərin-sərin meh, 

                                 Çiçəklərin gözlərinə qonub şeh. 

                                 Vüsalın da ömrü gödək olur,eh! 

                                 Bu qanunu pozan əlim olaydı, 

                                 Nə ayrılıq,nə də ölüm olaydı. 

DÜNYA 

 

                                 İməklədik, yeriməyə alışdıq, 

                                Yeridikcə yürüməyə alışdıq. 

                                Yıxılanda için-için ağladıq, 

                                Qalxan kimi kiriməyə alışdıq. 

                                Dünya bizi salıb tora, – söylədik, 

                                Dünya beşdir,beşi də qara, – söylədik. 

 

                                Toy elədik,dedik: – Dünya toy imiş. 

                                Zurna-qaval,balabanmış,ney imiş. 

                                Sərxoş durub dedi: – Dünya mey imiş, 

                                Bir mən varam,bir də mey var burada. 

                                Baş qarışıb,məzhəb itdi,arada 

                                Vaxt olmadı,bilək dünya nə imiş. 

 

                                Yaz çiçəyi gözümüzü oxşadı, 

                                Yay küləyi üzümüzü oxşadı. 

                                Payız gəldi,havalandıq: – Bar belə! 

                                Qış olanda şairləşdik: – Qar belə! 

                                Yarpaqları xəzəl görüb dayandıq, 

                                Elə bil ki, yatmış idik,oyandıq. 

 

                                Yerə baxdıq,gördük yerin üzü buz. 

                                Göyə baxdıq,gördük göyün üzü boz, 

                                Dünya bizi salıb tora, – söylədik. 

                                Dünya beşdir,beşi də qara, – söylədik. 

 

          BEŞİYİMİ İSTƏYİRƏM 

 

                                    Beşiyimi verin mənə,  

---

Milli Kitabxana

 

 

 

39

                                          süd qoxulu beşiyimi, 

                                              bircə anlıq uşaq olum. 

                                    Beşiyimi verin mənə,    

                                                 süd yuxulu beşiyimi. 

      

                                    Paxılların qəzəbindən,  

                                               tənələrin əzabından   

                                                                böyüdükcə 

                                                                    uzaq olum. 

                                    Qoltuq altda böyüyənlər, 

                                                           donuram mən. 

                               Ucaldıqca əyilənlər, 

                                                             yanıram mən. 

                               Sərtləşirəm,kövrəlirəm  

                                                                 dönə-dönə. 

                               Beşiyimi verin mənə. 

                               Nə müddətdir bir mehriban  

                                         nəfəs üçün göynəyirəm. 

                               Beşiyimi verin mənə. 

                               Ayrı şeyi neynəyirəm? 

                               Körpəlikdə doymadığım, 

                                        böyük olub duymadığım  

                                                bir nəfəsi duya bilim. 

                               Nifrətimi,hiddətimi  

                                                               yuya bilim. 

                               Böyük olum sonra yenə. 

                               Beşiyimi verin mənə. 

                                                                               28dekabr 1976 

DÜNYA 

 

                           Anam məni doğdu, sən övladımı, 

                           Gördünmü uc-uca calandı dünya? 

                           Aldım bu dünyadan hər muradımı, 

                           Mən necə deyim ki,yalandı dünya? 

 

                           Körpə gülüşündən açıldı könlüm, 

                           Dünya sevilməli gözəldir,gülüm. 

---

Milli Kitabxana

 

 

 

40

                           Sevincdən ağzımda dolaşdı dilim, 

                           Şadlıqdan başıma dolandı dünya. 

 

                           Dönsün adətiylə,dəyişsin aləm. 

                           Sən ki,mənimləsən nə kədər,nə qəm? 

                           Sən ki,mənimləsən demərəm ölsəm, 

                         “Biz gəldi gedərik,qalandı dünya.” 

26iyun 1978 

TANIYIN MƏNİ 

 

                          Mənim mətanətim,mənim mərdliyim, 

                          Yenilməz iradəm,kişi sərtliyim, 

                          Bu şahanə vüqar,şahanə baxış 

                          Mənə torpaqdandır,torpağa alqış! 

 

                          Sevinci sevincim,qəmi qəmimdir, 

                          Yaxşısı mənimdir,pisi mənimdir. 

                          Məndə dağ ətri var,aran odu var, 

                          Ey məni yaxından tanımayanlar! 

                          Bu ulu dağların gücü,qüdrəti 

                          Biləyimdədir. 

                          Bu əsrin qayğısı ürəyimdədir. 

                          Bilirəm nədir eşq,nədir etibar, 

                          Ey məni yaxından tanımayanlar! 

                          Mən sizə yaxınam,tanıyın məni. 

                          Axı doğulmayır gündə bir şair, 

                          Sabahın eşqinə sınayın məni. 

                          Sanmayın qızışıb özündən deyir, 

                          Sınaqdan çıxmasam,qınayın məni. 

                          

23sentyabr 1975 

KEÇ 

 

                          Bir yanı olumdur,bir yanı ölüm 

                          Bizim dünyanın. 

                          Olum da,ölüm də cürbəcür olur. 

                          Olumun çox yerdə heç səsi çıxmır, 

---