311
AZƏRBAYCAN MİLLİ ELMLƏR AKADEMİYASI
FOLKLOR İNSTİTUTU
______________________________________________
QARABAĞ:
FOLKLOR DA BİR TARİXDİR
IX KİTAB
(Beyləqan, İmişli, Tərtər, Bərdə və Cəbrayıl rayonlarından
toplanmış folklor örnəkləri)
BAKI – 2014
2
“Qarabağ folklorunun toplanması,
sistemləşdirilməsi və araşdırılması” adlı layihə
əsasında çap olunur.
LAYİHƏNİN RƏHBƏRİ: AMEA-nın müxbir üzvü, fil.ü.e.d.
Muxtar KAZIMOĞLU (İMANOV)
TOPLAYIB TƏRTİB EDƏN
VƏ SÜJET GÖSTƏRİCİSİNİN
MÜƏLLİFİ:
fil.ü.f.d. İlkin RÜSTƏMZADƏ
REDAKTOR:
fil.ü.f.d. Elçin ABBASOV
NƏŞRİNƏ MƏSUL:
fil.ü.f.d. Əziz ƏLƏKBƏRLİ
Qarabağ: folklor da bir tarixdir, IX kitab (Beyləqan, İmişli,
Tərtər, Bərdə və Cəbrayıl rayonlarından toplanmış folklor
örnəkləri). Bakı, “Elm və təhsil”, 2014.
Folklorinstitutu.com
İSBN – 9-789952-810851
Q
4603000000
Qrifli nəşr
N-098-2014
© Folklor İnstitutu, 2014
3
TƏRTİBÇİDƏN
Bu cildə daxil edilmiş materialların böyük əksəriyyəti Beylə-
qan və İmişli rayonunda məskunlaşmış tərəkəmə camaatından top-
lanıb. Bölgədə iki böyük tayfa məskunlaşıb: təhlə və muğanlı. Bu
ərazidəki təhlə camaatı özünü qara təhlə və ya çöl təhlə adlandırır.
Yerli sakinlər təhlənin iyirmi qolu olduğunu söyləyirlər. Həmin qollar
bunlardır: aşıqlı, eyvazalılar, tatalılar, əlnəzərli, binnətli, sərxanlı,
bulutlu, boşçallar, gödəklər, qaralılar, talıbxanlı, şahqulular, canqu-
lular, əlqulular, əlpənahlı, murtulu, budaqlı. Bu kəndlərin ləhcə
xüsusiyyətləri də bir-birinə yaxınlığı ilə seçilir. Dodaq ahənginin
möhkəmliyi, indiki zamanın -er, -or, -ör şəkilçiləri ilə ifadəsi, bir çox
dialektoloji sözlər Qazax-Borçalı zonasına məxsus əhalinin danışı-
ğını xatırladır. Həmçinin, Qazax-Borçalı zonası üçün xarakterik bir
çox süjetlərin variantlarına məhz bu bölgədə rast gəlinməsi bu fikri
daha da gücləndirir. Əcdadlarla bağlı söylənən mətnlərdə də bu
kəndlərdən əksəriyyətinin babalarının həmin zonadan gəldiyi öz
təsdiqini tapır.
Bölgədə sayına görə ikinci böyük tayfa muğanlıdır. Özlərinin
dediyinə görə, üç muğanlı tayfası var: Körpükənd muğanlısı, Qarqar
muğanlısı və Vəlağa muğanlısı. Əslində bu əhalinin hamısı Xoca-
vənd rayonundan çıxmadır. Yaşlı sakinlərin əcdadları ilə bağlı söy-
lədikləri xatirələrdə deyilir ki, Çar Rusiyası dövründə erməni ailələ-
rinin Qarabağda yerləşdirilməsi nəticəsində həmin tayfalar Xonaşendən
(indiki Xocavənd rayonundan) çıxarılıb və bir qismi Ağcabədiyə,
digər qismi Qarqar çayı sahilinə, böyük bir qismi isə Mil düzünə
köçüb. İmişli rayonunda məskunlaşanlar özlərini Vəlağa muğanlısı
adlandırırlar. Yerli sakinlərin dediyinə görə, Vəlağa muğanlısı on
iki tirədən ibarətdir: məmmədli, əliyetməzli, telişli, allahmədətli,
ağammədli, oruclu, axıcanlı, cəfərli, papaxçı, təmrəzli, hacı hüseyn-
qulular, nurəhmədli. Muğanlı camaatının danışığı sırf Qarabağ ləh-
cəsidir və ədəbi dilə yaxınlığı ilə seçilir. Yerli sakinlərin özləri də
ləhcələrinin ədəbi dilə ən yaxın ləhcə olduğunu vurğulayırlar.
4
Söhbət tərəkəmədən gedirsə, onların oturaq əhaliyə münasibəti
maraq doğurmaya bilməz. Bunu nəzərə alıb, ezamiyyə dövründə bu
amili diqqətdə saxlamağa, tez-tez onlara oturaq əhali ilə münasibət-
lərinə dair suallar verməyə çalışmışıq. Bölgəyə yaxınlığı ilə seçilən
Saatlı rayonundan toplanmış lətifələrdə oturaq əhali tat adı ilə təq-
dim edildiyi halda, bu bölgədə ünsiyyətdə olduğumuz adamlardan
yalnız bəziləri oturaq əhaliyə tat dediklərini təsdiqlədi. Əksəriyyət
tatı daha çox milli mənsubiyyət bildirən söz kimi işlədir. Oturaq
əhaliyə isə çox vaxt arazqıraxlı və ya onların yaşadığı kəndin və
yerin adı ilə (yalavaclı, qalalı və s.) müraciət edirlər.
Bölgədən cin, hal anası, qaraçuxa kimi məlum mifoloji per-
sonajlarla yanaşı, Allah hoy kimi yeni personajlar aşkar edilib.
Cinin keçi dönərgəsinin yer qulacı adlandırılmasına ilk dəfə bu böl-
gədə rast gəlirik. Bundan başqa, kitabda Hacı Qulu, Kalbay Kazım,
Saday bəy, Qaçaq Məhəmməd kimi bölgənin məşhur adamları
haqqında rəvayətlər də yer alıb.
Folklor örnəkləri ilə yanaşı, bölgənin etnik tərkibinə, etnoqra-
fiyasına dair məlumatları toplamaq, bununla da region barədə ümumi
təsəvvür yaratmaq ezamiyyələr zamanı qarşıya qoyulan əsas məqsəd-
lərdən biri idi. Bu baxımdan, təhlə və muğanlı elinə bağlı tayfaların
öz tarixləri və adət-ənənələrinə dair verdiyi məlumatların oxucuların
marağına səbəb olacağı qənaətindəyik. Bölgəyə ilk ezamiyyəmizin
Novruz bayramı ərəfəsinə təsadüf etməsi və Novruz adət-ənənələri-
nin aktivliyi bu bayrama dair maraqlı nümunələrin yazıya alınmasına
səbəb olub. Belə adətlərdən biri “Padşah oyunu”dur. Bu adətə Beylə-
qan rayonunun Günəşli kəndində rast gəldik. Həmin kəndin əhalisi
keçən əsrin ortalarında dolanışıq dalınca Cəbrayılın Sirik kəndindən
gələn ailələrdən ibarətdir. Vaxtilə Sirikdə böyük təmtəraqla qeyd
etdikləri həmin adəti bu gün də yaşatmaqda davam edirlər. Kitabda
kəndin yaşlı sakinlərinin “Padşah oyunu” haqqında verdiyi məlumat-
lar, həmçinin 2014-cü il martın 21-də kənddə keçirilən və bizim də
iştirak etdiyimiz mərasimin təsviri verilib.
Kitabda 25 nağıl təqdim olunub. Həmin nağıllar tanış süjetlər
əsasında qurulsa da, söyləyici təhkiyəsinə, variant xüsusiyyətlərinə