35
salamatçılıqla qurtaracağına inam bəsləyirdi. Sonra da hərzəçənə adamlara qulaq asdığı
üçün özünü danlayırdı. Əslində ona ürək-dirək verənlər yalan danışdıqlarını bildikləri
halda, özlərini də öz yalanlarına inandırmaq istəyirdilər. Öz yalanlarına inananlar da
olurdu, inanmayanlar da. Həyat doğru ilə yalanın birgəliyində davam edirdi.
Gülüşlərdəki gözyaşları, gözyaşlarındakı gülüş gecələrdəki səhər, səhərlərdəki gecə
kimi idi. İnsan yarandığı gündən göylərə əl açır, yerlərə səcdə edirdi. Dünyanın hər
yerində insanlar xoşbəxt və bədbəxt idilər. Hindli çoxüzlü, çoxgözlü, çoxqollu,
çoxayaqlı Buddanın qabağında oynamayaydı, nə edəydi? Yəhudu Allaha dua etdikcə
başını daşa döyməyəydimi? Xristian ikonalar qarşısında xaç çevirməyəydimi?
Müsəlman yeri və göyü yaradana əl açmayaydımı?
Bəs insan insanın qarşısında özünü necə aparsın? Məsələnin çətin yeri də elə
burasıdır. Salamlaşma insani ünsiyyətin başlanğıcı hesab edilir. Birisi başı ilə, digəri
əlini ürəyinin başına qoyub baş endirməklə, bir ayrısı ayağını gen qoyub kiməsə yol
verənlər sayağı sağ əlini tam açaraq yarı qatlanmaqla, nə bilim, daha nə kimi pozalarla
qarşısındakını salamlasa da, bu hələ hamısı deyildir. Axı, varlı kasıbın, güclü gücsüzün,
qalib məğlubun, müstəntiq müttəhimin, ağa nökərin ilk olaraq salam verməsini gözləyir.
Həm də el içində böyük kiçiyə, yuxarıdan gələn aşağıdan gələnə salam verməlidir
deyirlər. Elin gözü tərəzi, sözü düz olsa da, tarazlığın pozulduğu, düzün əyildiyi şəraitdə
yaşayan insanlar necə də miskin görünürlər! Hər kəsin öz tərəzisi və öz daşı olsa da, heç
kimin tərəzisi və daşı heç kimin tərəzisinə və daşına uyğun gəlmir. Uyğunluq
məqamında da nəsə olur. Zor və zorakılıq öz işini görür. İnsan həmişə ehtiyatlı olmaq
zorunda qalır.
Bu axşam da eləydi. Qızı Kubra və yeznəsi Mirəli Axundov onlara gözaydınlığına
gəlmişdilər. Onlar da görən olmasın deyə özlərini axşam qaranlığına saxlamışdılar.
Hamı süfrə başında idi. Dövrə vurub oturmuşdular. Əbdüləli, Əbdülməcid yan-yanaşı
idilər. Hamidi bacısı Kubra dizləri üstə oturdurmuşdu, arabir başını sığallayırdı. Güllü
xanım sınıqlığını üzə vurmamaq üçün hərdənbir gülümsəyirdi. Hacı Lətif kişi də özünü
Güllü xanım kimi sevincək göstərmək istədiyindən yumşaqlıqla soruşdu: “Bala, Mirəli,
universtəni qurtardın, eləmi?”
-Bəli, qurtardım.
- Nə yaxşı ki, familinə dəymədilər, Axundovluğunda qaldın.
Bu qəribə sözlərdən hamının dodağı qaçdı. Qaynatasının sözləri qəribliyə düşməsin
deyə Mirəli Axundov bir az ətraflı danışmaq istədi:
-Mən 1923-1926-cı illərdə həm Zaqatala şəhər ibtidai məktəbinin müdiri idim, həm
də Zaqatala Sənaye və Kənd təsərrüfatı texnikumunda dərs deyirdim. İndi bizim bu
Şəkidə 2 №-li uşaq evinin yaradıcısı və direktoru, mərhum Firidun bəy Köçərlinin həyat
yoldaşı Badisəba xanım 1926-cı ildə səbəbkarlıq edib maarif komissarı bolşevik Şəkili
Mustafa Quliyevdən mənim alı təhsilimi davam etdirməyimə razılıq almasaydı, mən
keçən il Universitetin
biologiya
fakültəsini
.
qurtarıb yenidən Zaqatalaya qayıda bilməyəcəkdim. Onda Badisəba xanım Köçərli
Zaqatala qız seminariyasının müdiri idi. O ki, qaldı mənim familiyama, bəlkə də,
Mustafa Quliyevin razılığı ilə təhsilimi davam etdirmişəm deyə dəyməyiblər. Nə yaxşı
ki, Mirəli Axundov olaraq qalmışam.
36
Yenə də gülümsədilər. Hüsniyyə xanım ərklə əlavə etdi: “Az özünü təriflə. Güya
ki, dədəm səni tanımır.”
Əməkdar elm xadimi,
professor
Mirəli Abdulla oğlu Axundov(1902-1992)
Sözün-söhbətin bu məqamında Əbdüləli öz yerində sakitcə oturan Əbdülməcidi
göstərərək dedi: “Ay yeznə, heç deməzsənmi ki, papaq altında oğullar var. Qoy böyüsün,
Əbdülməcid lap böyük kişi olacaqdır.”
Hamı birağızdan cavab verdi: “Allah ağzından eşitsin. Gün o gün olsun!”
Mirəli Axundov Əbdüləliyə müraciətlə əlavə etdi:”Əbdüləli, sən müəllim adamsan.
De görüm, yolçu harda gərəkdir?”
Əbdüləli tələm-tələsik cavab verdi: “Yoçu yolda gərəkdir.”
Hamı ayağa qalxdı. Salamatlaşdılar. Kubra xanım atasının boynunu qucaqlayıb
ağladı. Hacı Lətif kişi özünü toxdadıb acıqlanırmış kimi Kubra xanımı danladı:”Ay
qızım.Ölüyə ağlayarlar. Mən ki, hələ ölməmişəm. Özünü ələ alsana!” Güllü xanım da
öz növbəsində ərinin sözlərinə qüvvət verdi: “Hələ ki, ağlamalı bir şey yoxdur. Qızım,
Allah da var, rəhmi də vardır. Gedin, yolda-izdə ehtiyatlı olun!”
Darvazanın ehmallıca üç dəfə döyülməsi adamların təəccüblə bir-birinə
baxmasına səbəb oldu. Mirəli müəllim dərhal dilləndi:
-Narahat olmayın, fayton kirayələmişəm. Faytonçudur. Dediyim kimi eləyir. Bəlkə,
hələ mən gedəndən sonra o biri yeznəniz Mirhəsən qızınız Hüsniyyə xanımla sizə gəldi.
Vaxtında gəlsəydilər, bacılar da bir-birini görərdilər. Di salamat qalın.
37
Güllü xanım qonaqların arxasınca bir fincan su atdı. Əbdüləli isə onları
darvazayacan ötürüb qayıtdı.
**********
*****
Gəncəyə doğru
XI
Hacı Lətif kişinin evdə göz dustağı olduğu bir aya çatırdı. Güllü xanım vaxtın
uzanmasından xeyli ürəklənmişdi. Arabir deyirdi: “Ay kişi, bəlkə, heç məhkəmə-zad
olmayacaq. Bəlkə, səni daha heç çağırmayacaqlar da.” Hacı Lətif kişi arvadının bu
sözlərindən bəzən ürəklənirdi də. Onda təsbehini bir dəfə çevirib deyirdi: “Allah
ağzından eşitsin, ay arvad! Amma elə nağıllara daha mən inanmıram.”
Elə də oldu.Aprelin 19-də verilən çağırış vərəqəsi hər şeyi alt-üst etdi. Çağırış
vərəqəsini oxuyan Əbdüləli müəllimin rəngi dəyişdi. Bunu hiss edən atası ona dedi: “Ay
oğul, oxu, görək nə yazıblar.” Anası da, qardaşları da Əbdüləli müəllimə zillənmişdilər.
Əbdüləli müəllim köksünü ötürərək cavab verdi:” Nə yazacaqlar? Yazıblar ki,
Məmmədov Hacı Lətif Rəsul oğlu, Məmmədova Güllü, Məmmədov Əbdülməcid Hacı
Lətif oğlu 20 aprel 1931-ci il tarixdə Gəncədə olacaq məhkəmə iclasında iştirak etmək
üçün Şəki dustaqxanasının qarşısında, qala qapısının ağzında səhər saat 9-da hazır
olsunlar. Məmmədova Güllüyə azyaşlı uşağını və zəruri əşyalarını özü ilə götürməyə
icazə verilir.”
Əbdüləli müəllim susdu. Hamının köksü qalxıb endi. Hacı Lətif kişi sükutu
pozdu: “Neyləməli? Onsuz da mən bəzi nağıllara inanmırdım.”
Yır-yığış çox da uzun çəkmədi. Onlar Gəncədə olacaq məhkəmənin hansı qərarı
çıxaracağını, yollarının Gəncədən daha haralara düşəcəyini bilmirdilər. Onların
qarşısında dumanlı bir vadi uzanırdı. Bu vadidə ümidlər, arzular, hətta, xəyallar da
dumana bürünmüşdü.
**********
*****
Qala qapısının ağzı qələbəlik idi. İynə atsaydın yerə düşməzdi. İşi olan da, olmayan
da, adam yola salan da, salmayan da oraya yığışmışdı. Çoxdan idi ki,Nuxada qala
qapısının ağzı səhnəyə, insanlar isə tamaşaçıya çevrilmişdilər. Orada elə adamlar var
idi ki, səhnədə oynanılan tamaşanın komediya, yoxsa faciə olması onlar üçün
əhəmiyyətli deyildi. Onlar üçün maraqlı olan o şey idi ki, görək hansı kişi hökuməti
söyəcək, hansı qadın hökuməti qarğıyacaqdı. Onlar da söz alıb, söz satacaqdılar.
Səhnədə olanlar isə poqonlular idilər. Qaradinməz, zabitəli, zəhmli olan bu adamlara
nifrətlə baxırdılar.Tamaşaçıların çoxu onlara inanmırdı. Amma neynəməli ki, tamaşanı
onlar qurmuşdular, onlar da idarə edirdilər.
Budur, güzgüsünə qara kələğayı bağlanmış qara maşın gəldi. Qara maşın, qara
kələğayı həbs və sürgün simvolu idi. Poqonlu və zəhmli aktyorlardan biri səhnəyə çıxdi
və uca səslə siyahını oxumağa başladı: