59
Zəkəriyyə Sərtəl
Zəkəriyyə Sərtəl Türkiyənin məşhur jurnalisti idi. 1924-1931-ci illərdə “Rəsimli
ay” adlı məcmuənin redaktoru olmuşdu. Həyat yoldaşı Səbihə Sərtəl onun ideya
silahdaşı idi. Tanınmış filosof idi.
Yəqin ki, türk ədəbiyyatı ilə maraqlananlar Zəkəriyyə
Sərtəlin Nazim Hikmət haqqında yazdığı “Mavi gözlü Dev”, ”Nazim Hikmətin son
illəri” və Səbihə Sərtəlin “Roman kimi” kitablarını oxuyublar. Onların hər ikisi
mütərəqqi ruhlu şəxsiyyətlərdi. N.Hikmət Zəkəriyyə Sərtəli, özünün müəllimi hesab
edirdi. Çünki şair “Rəsimli ay” da məqalələr çap etdirəndə Zəkəriyyə ona çox böyük
qayğı göstərir, məsləhətlər verirdi. Tale elə gətirmişdi ki, Zəkəriyyə Sərtəl və Səbihə
Sərtəl Türkiyədən qovulmuşdu. Onların mətbəəsini dağıdıb, özlərini öldürmək
istəmişdilər. O vaxtlar qəzetlərin birində belə bir karikatura da verilmişdi: qırmızı atın
üstündə Səbihə, arxasında da Zəkəriyyə təsvir olunmuşdu. Zəkəriyyə Səbihədən
soruşurdu: “Səbihəciyim, biz nərəyə koşuyoruz ?” ( Yəni biz hara gedirik?). Səbihə ona
belə cavab verirdi: “Bu qırmızı at nərəyə koşsa, oraya...”.
İlk dəfə Zəkəriyyə Sərtəli radioda xarici verilişlərin Baş redaktorunun otağında
gördüm. Mənə deyəndə ki, “tanış ol, Zəkəriyyə Sərtəldir”, gözlərimə inanmadım.
Zəkəriyyə haqqında çox eşitmişdim. Amma onu belə qoca təsəvvür etmirdim. Baş
redaktor mənə tapşırdı ki, bundan sonra Zəkəriyyə Sərtəllə sən məşğul olacaqsan.
Əvvəlcə muzeylərimizi, görməli yerlərimizi ona göstərməlisən, ümumiyyətlə, nə xahişi
olsa, yerinə yetirməlisən. Sözün düzü, çox sevindim. Çünki belə bir şəxsiyyətlə
ünsiyyətdə olmaq mənim üçün böyük şərəfdi. O vaxt radioda işləməyimlə bərabər
Azərbaycan Dövlət Universitetində türk filologiyası üzrə aspirant idim.
Zəkəriyyə radionun türk redaksiyasında üslub redaktoru kimi işləməyə başladı.
Maraqlı verilişlər də hazırlayırdı. O, bir müddət, ömür dostu Səbihə xanım
mühacirətdən Bakıya gələnə qədər, “İnturist” mehmanxanasında yaşadı.
Xarici verilişlərin “Xəbərlər” redaksiyasında işləyən jurnalist dostum Fətəli Sahib
Zəkəriyyə Sərtəli öz maşınında aparıb gətirirdi. Hər gün səhər Fətəli ilə bərabər
“İnturist” mehmanxanasına gedər, Zəkəriyyə bəyi işə gətirər, günortadan sonra da onu
60
müxtəlif görməli yerlərlə tanış edərdik. Nazim Hikmətlə bağlı namizədlik dissertasiyası
yazdığım üçün ona müxtəlif suallar verər, maraqlı məlumatlar alardım.
Hər dəfə “İnturist” mehmanxanasının qarşısına gələndə Zəkəriyyə bəy Fətəliyə
deyərdi: “Sənin bu araban olmasaydı, məhv olardıq biz”. Fətəli də heç nə deməz , elə
sakitcə gülümsəyərdi. Axırı bir gün Fətəli dözmədi. Biz “İnturist”ə gedəndə mənə dedi:
“Aqşin, səndən çox xahiş edirəm, Zəkəriyyə bəyə denən ki, mənim maşınıma daha
“araba” deməsin. Maşınım, bilirsən ki, təzədir. Onu hər səhər silib təmizləyirəm, par-
par parıldadıram, nə qədər qulluq edirəm, olmur ki, olmur. Hər dəfə Zəkəriyyə Sərtəl
ona “araba” deyir. Mən uğunub getdim. “Ay Fətəli, - dedim -türklər maşına “araba”
deyirlər”.İndi bilirəm, bu sətirləri oxuyanda sizə qəribə gələcək.”Yəni Fətəli bilmirdi ki,
türklər maşına ”araba” deyirlər?” Xeyr, bilmirdi.
O vaxt Türkiyə Azərbaycan üçün bir xəyal idi. Ümid dolu bir xəyal. Kim ağlına
gətirə bilərdi ki, Türkiyə ilə Azərbaycan arasında əlaqələr elə bir səviyyəyə gəlib
çatacaq ki, nə vaxt istəsən, təyyarəyə minib İstanbula və ya Ankaraya uçacaqsan. Özü
də Bakıdan! Bir müddətdən sonra Z.Sərtəlin xanımı Bakıya gəldi. Zəkəriyyə
sevincindən quş kimi uçurdu. Onlara Mirzə Fətəli Axundzadə bağının yanında bir otaqlı
mənzil verdilər. Səbihə Sərtəl haqqında mən çox eşitmişdim. Görüşümüzdən,
söhbətlərimizdən sonra mənə məlum oldu ki, o, eşitdiklərimin fövqündə imiş.
Türklərdə
bir ifadə var: “Əli öpüləsi qadın”. Səbihə məhz belə xanım əfəndi idi. Sözü-söhbəti,
davranışı, zəkası, mədəniyyəti ilə... Deyib-gülən, hazırcavab, məclissevər, süfrəli
insandı. Onların bir otaqlı evində ədəbiyyat, incəsənət xadimlərimiz çox tez-tez
toplaşardılar. Xatirələr vərəqlənərdi. Daha çox Nazim Hikmətdən danışardılar. Səbihə
xanım yeni əsərindən bizə parçalar oxuyardı... Bu parçalarda, hər şeydən əvvəl, Vətən
həsrəti, Türkiyəyə gec-tez qovuşmaq ümidi əks olunmuşdu. O vaxt ağlıma da
gətirməzdim ki, Səbihə xanım çox tez bir vaxtda dünyasını dəyişəcək...
Z.Sərtəl türk redaksiyasında canla-başla çalışar, türkcə mətnləri redaktə edərdi.
Qiymətli məsləhətlər də verər, tənqidi fikirlərini də deyərdi. Bir dəfə Zəkəriyyə
Sərtəldən bir veriliş barədə fikrini öyrənmək istədim. Veriliş bir gənc bəstəkar haqqında
idi. Müəllifi də konservatoriyanın müəllimi idi. Həmin proqram barədə fikrini
soruşanda Zəkəriyyə gülə-gülə dedi: “Çox tərifləmisiz. Sabah Üzeyir Hacıbəyli