Fonetik prinsip. Fonetik prinsipə görə, sözlər müasir ədəbi tələffüzə müvafiq yazılmalıdır. Məsələn: ana, ata, get, gəl, gül, gör, çöl, yel və s. Bu prinsipə əsasən deyilən sözləri iki qrupa ayırmaq olar:
1) yazılışı tələffüzünə görə müəyyənləşən sözlər. Məsələn: ana, ata, un, at, ot, al, ol, yol, bal, iş, üz, üç, daş, dil, diş, bal, baş, var, vur, biz, bir, biş, qaş, əl, qol, qar, yağış, çay, şal, xal, xala, alma, axşam, səhər, badam, durna, tonqal və s.;
2) yazılışı tələffüzünə əsasən müəyyənləşməyən sözlər. Məsələn: astar, dəftər, buruq, uşaq, uçdu, keçdi, açdı, kitab, hətta və s. kimi sözlər asdar, dəfdər, burux, uşax, uşdu, keşdi, aşdı, kitap, hətda kimi tələffüz olunur.
Bundan əlavə, bəzi fonetik hadisələrin – məsələn, bəzi sözlərdə kar samitlərin cingiltililəşməsi (otaq – otağa, çiçək – çiçəyin), saitlə bitən sözə samitlə başlayan şəkilçi qoşulduqda sözlə şəkilçi arasına bitişdirici samitin artırılması (ata-n-ı, ata-s-ı, ata-y-a), şəkilçi qəbul edərkən bəzi sözlərin kökündəki müəyyən saitin düşməsi (sinif – sinfin, oğul – oğlun, ağız – ağzı ), ahəng qanununa əsasən şəkilçilərin variantlarla tələffüzü kimi fonetik hadisələrin yazılışı da fonetik prinsiplə əlaqədardır. Çünki belə hallarda sözdə əmələ gələn dəyişiklik tələffüzdə əks olunur və həmin dəyişiklik tələffüzə uyğun surətdə yazıya köçürülür.
Bütün bu faktlar göstərir ki, fonetik prinsipdən daha çox istifadə etmək ədəbi dil normalarının sabitləşməsi, ümumiləşdirilməsi, həm düzgün yazı (orfoqrafiya), həm də düzgün tələffüz (orfoepiya) qaydalarını asanlıqla mənimsəmək nöqteyi-nəzərindən əlverişlidir.
Lakin fonetik prinsipin bir sıra üstünlüklərinə baxmayaraq, bütün dil vahidlərinin yazılışında fonetik prinsipə əsaslanmaq düzgün nəticə vermir. Fonetik prinsipin əsas düsturu belədir: “tələffüz etdiyin kimi yaz”. Lakin burada hər səsin tələffüzü yox, ümumi ədəbi tələffüz nəzərdə tutulur. Elə söz kökləri vardır ki, morfoloji dəyişikliyə uğradıqda tələffüzcə də dəyişmiş olur. Bəzən yazıda müəyyən sözün səs tərkibini mühafizə etmək əslinə uyğunluq, tarixilik, ənənəvilik və s. kimi xüsusiyyətlər baxımından daha əlverişli və məqsədəuyğun sayılır.
Morfoloji prinsip. Morfoloji prinsip müxtəlif çalarlıqda tələffüz olunan söz və şəkilçilərin bir cür yazılması prinsipidir. “Məqam və şəraitlə əlaqədar olaraq müxtəlif çalarlıqda tələffüz olunan dil vahidlərinin, xüsusən sözlərin və şəkilçilərin vahid formada, yəni morfoloji quruluşuna uyğun olaraq bir cür yazılmasına istiqamətverici əsas morfoloji prinsip adlanır1“. Deməli, sözlər və şəkilçilər müxtəlif şəkildə tələffüz olunmasından asılı olmayaraq, vahid bir qaydaya tabe olur, yəni şəkilçilərin tələffüz forması yox, vahid forma nəzərə alınır. Məsələn, deyil sözü müxtəlif variantlarda − degil, dögül, dögür, dögü, dəyil, döyül, döylü, döy, dəyir və s. formalarda; ev sözü − öy, öv, əv, ev və s. variantlarda tələffüz olunmasına baxmayaraq, deyil şəklində yaılır. Yaxud da -lar, -lər şəkilçisi -dar, -dər (atdar, itdər), -rar, -rər (narrar, yerrər), -nar, -nər (qalannar, ölənnər), -zar, -zər (qızzar, gözzər) formasında tələffüz olunsa da, morfoloji prinsipə əsasən -lar2 formasında yazılışı əsas götürülür. Morfoloji prinsipdə bir sıra sözlərin yazılışı morfem tərkibinə əsaslanır. Başqa sözlə, kök və ya əsasın yazılışı bütün törəmə sözlərdə, hallanmada, müqayisə dərəcəsində və mürəkkəb sözlərdə saxlanılır. Tələffüz zamanı sözün mənalı hissələrində də müəyyən dəyişiklik baş verir. Sözün hansı variantının əsas olmasını isə onların işləklik dairəsinə, ahəngə tabe olmasına görə təyin etmək mümkündür.
Morfoloji prinsipdə sözlərin yazılışında onların mənşəyi, əsli və ya şəkilçinin necə formalaşması, necə dəyişməsi nəzərə alınır. Bu prinsipə görə, sözlərin və qrammatik formaların yazılışında yeganə bir variant üstün tutularaq orfoqrafik norma hesab edilir.
Səs tərkibi ilə hərf tərkibi tam eyniyyət təşkil edən mənalı dil vahidlərinin orfoqrafiyası həm fonetik, həm də morfoloji prinsipə müvafiq olur.
Dostları ilə paylaş: |