21
bol-bol istifadə etmək məqsədində olmuşlar. Ona görə də, nağılın struktur
potensialı onun mahiyyətində olan bütün məsələlərə diqqət yetirmənin
gərəkliyini işarələyir. Nağıllardakı daxili formullar təkcə qəhrəmanın
xarakterini, daxili və xarici portretinin mahiyyətini açmaqla da
yekunlaşmır. Burada həm də nağıl qəhrəmanlarına aid edilən bütün pred-
metlər, fəaliyyətini, hərəkətini ifadə edən, onunla dialoqa girən bütün qütb-
lər, sehrli və başlanğıc formullara xarakterik olan nə varsa hamısı cəmləşir.
Bütün bunlar keçən əsrin əvvəllərində maarifçi düşüncəsinin, yazıçı
qayəsinin ifadəsində müxtəlifliklə səciyyələnəcək forma və üsul axtarışında
görünürlər.
a)
sırf nağıl sonluqlarına bənzər nümunələr;
b)
nağıl sonluqlarına bu və ya digər dərəcədə yaxınlaşan bədii
nümunələr;
c)
nağıl sonluqları ilə yanaşı, müəllif əlavələrini də özündə ehtiva
edən nümunələr;
d)
bütünlükdə sonluq anlamında nağıl sonluqlarının forma və
prinsiplərinə uyğun gəlməyən nümunələr.
Beləliklə, əsrin əvvəllərində nağıl formullarına müraciətin forma və
üsullarının tədqiqi sonrakı mərhələdə bir ənənə kimi davamının necəliyini
ararşdırmağın zəruriliyini də ortaya qoyur.
İkinci fəslin “Nağıl mövzusuna müraciət mətnaltı manera kimi”
adlı ikinci bölməsində göstərilir ki, XX əsr Azərbaycan ədəbiyyatında nağıl
mövzusuna müraciətin forma və üsullarından danışarkən mətnaltı yazıçı
manerası məsələsinə ayrıca diqqət yetirmək lazım gəlir. Məlum olduğu
kimi, XX əsr mürəkkəb bir epoxa kimi öz başlanğıcından sonuna qədər
ziddiyyətlərlə, problemlərin gərginliyi ilə səciyyələnmişdir. Əsrin
əvvəllərində ictimai-siyasi mühitdə baş verənlər, çarizmin bolşevizmlə
əvəzlənməsi, kollektivləşmə, otuzuncu illərin repressiyası, rus-alman
müharibəsi, müharibədən sonrakı illər və s. hamısı özlüyündə ədəbi
prosesin üzərindən keçirdi. Siyasi mühitdə yaşananların ağırlığı ədəbi
mühitdə izsiz qalmırdı.
Əksinə, daha çox ağırlıq ədəbi mühitin üzərinə düşürdü. R.Rzanın,
İ.Hüseynovun, İ.Şıxlının, B.Vahabzadənin, X.R.Ulutürkün, M.Arazın,
İ.Məlikzadənin, Anarın, Elçinin, S.Azərinin, Y.Səmədoğlunun və bu
silsilədən olan digərlərinin əsərlərində artıq mövcud yasaqların və
baryerlərin pozulmasına cəhdlər vardı. Hətta, bir qədər açıq desək,
müəyyən mətnaltı gedişlərlə, üstüörtülü sətiraltı eyham və işarələrlə etiraz
motivləri görünürdü. Bunlar, onu da etiraf edək ki, birbaşa deyil, mətn
daxilində epizodik şəkildə aparılırdı. Maraqlı olan da həmin düşüncə
22
fərqliliyinin, etirazın, cəmiyyətin çatışmazlıqlarını qabartmağa cəhdin
xüsusi sənətkarlıq məharəti, yazıçı fəndi ilə ortaya qoyulmasıydı. Bu,
özlüyündə bədii-üslubi manera məsələsidir və birbaşa yaradıcı
axtarışlarından irəli gəlirdi. Keçən əsrin altımışıncı, səksəninci illər
ədəbiyyatını, eləcə də imperiyanın dağılmasından sonrakı doxsanıncı illər
ədəbi prosesini müxtəlif müstəvilərdə, yaradıcılıq potensiyasının imkanları
və yeni ruhun mühitdə artan dinamik irəliləyişi maraqlı mənzərə ortaya
qoyur.
Məlum olduğu kimi, “hər bir dövr ədəbiyyatına və ya müəyyən
sənətkar yaradıcılığına müxtəlif nöqteyi-nəzərdən və mövqedən yanaşmaq
mümkündür. Ədəbiyyatşünaslar daha çox bədii yaradıcılığın aparıcı
pafosunu, qayəvi-estetik xüsusiyyətlərini, yenə də dəqiq söyləsək, müəllifin
nə demək istədiyini və ya necə dediyini təhlil etməyə üstünlük verirlər”
1
.
Təsadüfi deyil ki, keçən əsrin altımışıncı illərini ədəbiyyatda yeni bir
mərhələnin başlanğıcı kimi vurğulayırlar. Bunun isə müəyyən reallıq,
həqiqət tərəfləri var. Əlbəttə, bu dövrün təhlilini verən bir-birindən
maraqlı, elmi-nəzəri səviyyəsi ilə diqqəti cəlb edəcək araşdırmalar çoxdur.
Ancaq bizim marağımızda olan sənətkar axtarışlarında nağıl
konstruksiyasından bəhrələnmənin özünəməxsusluq hadisəsidir.
Nağıl, dastan, rəvayət, əfsanə və s. bu mənada istifadə, bəhrələnmə
üçün ən uğurlu baza idi. Ona görə də, keçən əsrin altmışıncı illər
ədəbiyyatında olan nağıl ənənəsinin mahiyyətini geniş müstəvidə bir neçə
istiqamətdə aydınlaşdırmaq zərurəti yaranır. Bunlar aşağıdakılardır:
a)
nağıl etnosun, xalqın bədii düşüncəsini ifadə edən folklor
qaynağı kimi;
b)
nağılın bir forma kimi zəngin epik elementləri özündə ehtiva edə
bilməsi imkanı;
c)
ictimai-estetik təfəkkürü işarələyən hadisə kimi;
Bütün bunlar nağıla geniş mənada həm janr, həm real, irreal
hadisələri əks etdirmək imkanında olan təcəssüm və təsvir vasitəsi, həm də
düşüncə hadisəsi kimi baxmaq imkanı verir.
Nağıl bir forma kimi simvolları, mətnaltı düşüncəni ifadə etməyə
daha çox imkana malik olduğu üçün yazılı ədəbiyyatda bu tükənməz
folklor qaynağına tez-tez müraciət olunması təbiidir. Keçən əsrin 60-cı
illərində ədəbi prosesi xarakterizə edən, ona özünəməxsusluq gətirən
1 Qasımbəyli Y. Milli oyanış və özünəqayıdış lirikası. Bakı: Elm və təhsil, 2012,
s. 47.