Alimlərimiz “Azərbaycan etnoqrafiyası”nın ikinci cildini
qələmə alarkən bir ideologiyadan bəhrələnmiş, onu rəhbər tutmuşlar.
Böyük zəhmətin və gərgin əməyin məhsulu olan bu kitabın
ərsəyə gəlməsində zəngin çöl–etnoqrafik materialları və bu sahədə
aparılan tədqiqatların nəticələri əsas yer tutur. Bununla belə, kitabda
çoxsaylı dəyərli mənbələr, xarici və yerli səyyahların qeydləri,
arxeologiya və tarix elminin nailiyyətləri, arxiv sənədləri, ayrı-ayrı
muzeylərdə qorunub saxlanan kolleksiyalar, ədəbiyyat, folklor, tətbiqi
sənət, memarlıq və s. elm sahələrinə həsr edilmiş araşdırmalardan və bu
sahələri əks etdirən dövri mətbuatdan geniş istifadə edilmişdir.
Böyük elmi, təcrübi və tərbiyəvi əhəmiyyətə malik olan
“Azərbaycan etnoqrafiyası”nın ikinci cildi xalqımızın çoxəsrlik
tarixinin, arxeologiyasının, memarlıq və incəsnət tarixinin hərtərəfli
işıqlandırılmasına öz töhfəsini verəcək, onların daha dolğun və zəngin
olmasına şərait yaradacaqdır.
Təqdim olunan bu cilddə xalqımızın etnoqrafiyası ən qədim
dövrdən başlayaraq, XX əsrin ilk qərinəsinə qədərki dövri əhatə edir.
Lakin, əsas tədqiqat obyekti kimi XIX əsr və XX əsrin əvvəlləri
götürülmüşdür. İkinci cilddə etnoqrafiya elminin mühüm tərkib hissəsi
olan maddi mədəniyyət və ailə məişət məsələləri geniş və hərtərəfli şərh
edilmişdir.
Kitabda ilk öncə maddi mədəniyyətin aparıcı sahələrindən olan
yaşayış məskənləri və yaşayış evləri məsələləri özünün dolğun və
əhatəli şəkildə tədqiqini tapmışdır.
Hələ çox qədim zamanlardan Azərbaycan ərazisinin müxtəlif
bölgələrində ibtidai insanlar ovçuluq və balıqçılıqla məşğul olaraq
yaşayışlarını təmin etmişlər. İsti iqlim şəraitində yaşayan ibtidai
insanlar açıq səma altında güzəran keçirmiş, dövran sürmüşlər. Lakin,
zaman keçdikcə, xüsusən də buzlaşmalar dövründə insanlar sərt hava
şəraitinə uyğun olaraq təbiətlə ölüm-dirim mübarizəsinə başlamışlar.
Onlar davamlı yaşayışlarını təmin və təsdiq etmək üçün ovladıqları
vəhşi heyvanların dərisindən sadə geyim dəsti hazırlamış, müxtəlif
quruluşlu sığınacaq, mağara və düşərgələrdə məskunlaşmışlar.
Ərazimizdə təbii və süni yaşayış məskənlərinin tarixi əsasən qədim daş
(paleolit) dövründən başlayır. Azərbaycanın dağ və dağətəyi
bölgələrində alimlər tərəfindən bu dövrə aid onlarca mağara və digər
sığınacaq yerləri qeydə alınmışdır.
Azərbaycanda əhalinin artması ilə əlaqədar tarixin sonrakı
inkişaf mərhələlərində, daha dəqiq desək, ibtidai icma quruluşunun
dağıldığı və sinifli cəmiyətin yarandığı dövrdən etibarən kənd tipli
yaşayış məskənləri daha geniş intişar tapmışdır. Buraya tarixən
yaranmış oba, şenlik, yurd, düşərgə, qışlaq, yaylaq, yataq, binə və
başqa yaşayış məskəni tiplərini də daxil etmək olar.
Heç şübhəsiz, ənənəvi yaşayış məskəni tiplərindən biri
şəhərlərdir. Azərbaycanda dövlətin yaranması ilə şəhərlər özünün geniş
inkişafına başlayır. Bu tarix təxminən e.ə. I minilliyin başlanğıcına
təsadüf edir. Belə qədim şəhərlər arasında Təbriz, Ərdəbil, Marağa,
Şamaxı, Qəbələ, Bərdə, Dərbənd, Gəncə, Naxçıvan, Bakı, Beyləqan,
Şabran, Şuşa və bir sıra başqalarını misal göstərmək olar. Kitabda
şəhərsalma qaydaları, planlaşdırma, şəhərin daxili və xarici quruluşu,
hakimlərin sayı, inzibati binalar, sənətkarlar və tacirlərin məhəllələri
haqqında dolğun məlumat verilir.
Azərbaycan ərazisində yaşayış məskənləri kimi, yaşayış evləri
də öx müxtəlifliyilə səciyyələnir. Ev insanların rahatlığını, istirahətini,
təsərrüfatını və həyati tələblərini təmin edən abidədir. Yaşayış evlərinin
tiplərinin təşəkkül tapmasında inşaat materiallarının əhəmiyyəti
böyükdür. Xalqımız evlərin tikilməsində ənənəvi inşaat materialı kimi
daş, kərpic, ağac, gil, torpaq, gəc, əhəng, kirəmit, qır, qarğı-qamış,
çubuq və keçədən istifadə etmişdir. Yaşayış evlərinin tikilməsində
mahir sənətkarlar bel, kərpic qəlibi, daş baltası, daş çəkici, daş kərkisi,
dəmir bıçaq, mişar, balta, kərki, çəngəl, dəhrə, rəndə, iskənə, toxmaq,
torpaq şadarası, oraq və dəryazlara üstünlük vermişlər.
Kitabda sadədən mürəkkəbə doğru inkişaf etmiş ev tiplərinin
şərhi verilmişdir. Qazma tipli qaradam, çubuq evlər, kərpic durma,
səlyani, qoclu evlər, kərtmə evlər, alaçıqlar və s. araşdırılır.
Təkmilləşmiş ev tipləri- ağ ev, işıqlı ev XIX əsrin sonu XX əsrlərdə
geniş intişar tapmışdır. Burada evlərin plan quruluşu, daxili səliqə-
sahmanı, qızdırılması və işıqlandırılması haqqında mılumat verilir.
Azərbaycanda tarixən təbii-coğrafi şərait, sosial-iqtisadi
vəziyyət, əhalinin məişət tərzi və təsərrüfat məşğuliyyətinə uyğun bir
sıra təsərrüfat tikililəri də yaranmışdır. Cilddə məişətlə, maldarlıqla
bağlı, istehsalatla əlaqədar təsərrüfat tikililəri ətraflı araşdırılır.
Kitabda xalqımızın tikinti mədəniyyəti ilə bağlı bir sıra adət-
ənənələri diqqəti çəkir və böyük maraq kəsb edir. Dərin məna və
məzmunu ilə seçilən bu adət-ənənələr xalq sənətkarlarının zəngin bilik
və təcrübələrinin göstəricisi olmaqla bərabər, həm də tikinti
mədəniyyətinin üstün cəhətlərini özündə əks etdirir. Adət üzrə yeni
tikiləcək ev yerinin halallığı alınardı. Bir qayda olaraq “el ağzında, sel
ağzında, yol ağzında ev tikmək” məsləhət görülməzdi. Düşər-düşməzi
nəzərə alınardı. Tikinti yerinin halallığı üçün ağsaqallarla, ustalarla
məsləhətləşər, onların xeyir-duası alınardı. Bu işdə qəlbitəmiz, gözütox,
əməlisaleh, əliyüngül, ayağıuğurlu insanlara müraciət edilərdi.
Evi inşa edən bənna hazırlıq gördükdən sonra “xoşbəxt
yaşayın”, “uğurlu olsun”, “içində qayım-qada olsun” kimi arzusunu
bildirərdi. Ev sahibi isə “çox sağ ol”, “işiniz avand olsun” deyərdi. Evin
tikintisinə başlayanda qurban kəsmək, sədəqə-niyaz paylamaq adəti
mövcud olmuşdur. Tikiləcək evlərdə xoşbəxtlik, bolluq və bərəkət
rəmzi kimi bünövrəyə metal pul, buğda, çörək və duz qoyardılar. Evin
tikintisində qohum-qonşu, dost-tanış və yaxınlar iştirak edərdi. Ev
tikilib başa çatdıqdan sonra qonaqlıq verilər, ailəyə səadət arzulanardı.
Etnoqrafiya elmində ənənəvi geyimlər və bəzəklər maddi
mədəniyyətin mühüm tərkib hissəsi kimi qəbul edilir və öyrənilir. Bu
sahələrin yetərincə araşdırılması xalqın milli xüsusiyyətlərinin inkişaf
səviyyəsini, estetik və bədii zövqünü göstərməklə yanaşı, etnik və sinfi
mənsubiyyətinin müəyyənləşdirilməsində qiymətli mənbədir. Təsadüfi
deyildir ki, geyim və bəzəklər öz məqsəd, məram və məzmunu etibarilə
mənəvi mədəniyyətin də tədqiqinə işıq salır, köməklik göstərir. Əsrlərcə
arxaikliyini və dəyişikliyini qoruyub saxlayan geyim və bəzəklər
müəyyən mənada xalqın etnogenezi məsələsinin öyrənilməsində
yardımçı olur.
Geyim mədəniyyətinin ilkin izlərinin tarixi qədim daş
dövrünə aid edilir. Məlumdur ki, geyim mədəniyyətinin inkişafında
təbii-coğrafi şərait, xüsusilə iqlimin rolu böyük olmuşdur. Buraya
əhalinin dünyagörüşü, mənəvi-əxlaqi, sosial-iqtisadi durumu da
daxildir.
Dostları ilə paylaş: |