50
özünü bu yolda fəda edən insan? Dramaturq öz qəhrəmanları ilə
birgə yaşayır, nəfəs alır, həyatın acısını, şirinini onlarla birgə duyur.
Dramaturqun “Yollara iz düşür” pyesi və onun tamaşası da
məhz bu baxımdan əhəmiyyətlidir. Müəllif burada belə bir fikri
təlqin edir ki, insan təbiəti etibarı ilə yaradıcıdır, lakin iş burasındadır
ki, o, nə yaratdığının fərqində olmalıdır.
Pyesin əsas ideyası onun adında simvolikləşmişdir: “Yollara iz
düşür”. Əsər bir növ insanlara xitab kimi mənalanırdı: dayan, hər
hərəkətini bir də düşün, bir də ölç. Çünki, insanın hər atdığı addım,
hər dediyi söz onun bütün həyatında və ən başlıcası, onu əhatə edən
adamların talelərində iz qoyur. İnsan elə hərəkət etməlidir ki,
üstündən illər keçəndən sonra da öz hərəkətindən utanmasın.
B.Vahabzadənin fəlsəfi dərinlik, həyat və insan haqqında mütəfəkkir
şair və vətəndaş mövqeyindən qələmə alınmış pyesinə teatr kollektivi
həssas yanaşaraq, onun özünəməxsus dramaturq üslubunu bir daha
nümayiş etdirə bilmişdi.
“Yollara iz düşür” tamaşası rejissor Əşrəf Quliyevin
B.Vahabzadə dramaturgiyası ilə ilk görüşü deyildi. Poeziya ilə
dramaturgiyanın Vahabzadə yaradıcılığında bir-biri ilə qovuşması,
üzvi birliyi bundan əvvəlki pyeslərində olduğu kimi, burda da
mühüm olub, tamaşanın vacib amilinə, emosional təsir mənbəyinə
çevrilirdi. Pyesdə “Səs” obrazı vasitəsilə təmsil olunan Şair mövqeyi
gah qayğılı, təqdiredici, gah qəzəbli poetik-fəlsəfi ahəng kəsb edərək,
tamaşada bilavasitə iştirak edir, dramatik münaqişənin inkişafına
təsir edirdi. Dramaturji hərəkətlə yanaşı, poetik fikrin mündəricəsinə
də diqqət edən rejissor dramaturq niyyətini tamaşada hadisələrin
məntiqi və real inkişafında gerçəkləşdirə bilmişdi.
Pyesdə təsvir olunan hadisələr Neft Daşlarında baş verir.
Fabula belədir ki, ezamiyyətdə olan Loğmanlının mədənində yanğın
təhlükəsi yaranır. Sahəyə kranlı gəmi göndərilməsini ləngidən
Əlixanın biganəliyi üzündən yanğın baş verir. Usta Nicat öz həyatı
bahasına təhlükənin qarşısını alır, beş nəfər iş yoldaşını ölümdən
xilas edir. Əlixanı vəzifəcə kiçildirlər. Bundan inciyən Əlixan ərizə
verib işdən çıxır. Loğmanlıya əsassız qısqanclıq zəminində arvadı
Aynuru və körpə oğlu Daşqını tərk edərək Başqırdıstana, Ufaya gedir
və oradan arvadına boşanmaq haqqında ərizə göndərir.
51
İllər keçir… ölkədə və beynəlxalq miqyasda Alxan adı ilə
tanınan Əlixan Bakıya - Neft daşlarında işləməyə qayıdır. Tamaşa da
bu hadisə ilə başlayır. Alxan Loğmanlının tədbiri ilə Neft daşlarında
məsul vəzifədə çalışan oğlu Daşqınla birlikdə işləməli olur; hər iki –
təcrübəli və cavan mütəxəssisin birgə çalışması səmərəli olur, onlar
arasında dərin insani münasibətlər yaranır. Günlərin birində bu
fədakar gəncin öz doğma oğlu olduğunu bildikdə, eyni zamanda
Aynurun ona heç vaxt xəyanət etmədiyini eşitdikdə Alxan ağır
mənəvi sarsıntılar keçirir.
Ümumiyyətlə B.Vahabzadənin pyeslərində əsas psixoloji
konflikt obrazların qəlb aləmində, daxili dünyasında baş verən
mənəvi ziddiyyətlərin sosial problemlərlə üz-üzə qoyulması
şəklindədir. Bu mənada, şair-dramaturqun yaratdığı obrazlar
müəyyən A.P.Çexovun qəhrəmanlarına bənzəyir. Onun əsərlərində
qəhrəmanların daxilən ikiləşməsi, özlərinə, öz əməllərinə qıraqdan
qiymət vermələri, obrazların açılmasında məhz “ikinci səs”in, daxili
səsin oyanması həlledici rol oynayır. Bu, “Yollara iz düşür” pyesində
də belədir. Tənqidçilərin doğru müşahidə etdiyi kimi: burada ikinci
səs, vicdanın səsi usta Nicatın kölgəsidir (67, 150). Alxan başa
düşməsə də, bu kölgəni özündən qovsa da, usta Nicatın kölgəsi
həmişə onu narahat edir, öz əməllərinə qiymət verməyə çağırır, onu
qayğısız yaşamağa, etdiklərini unutmağa qoymur. Ufadan qayıdan
Alxanı ilk növbədə ölümünə səbəb olduğu usta Nicatın kölgəsi
qarşılayır. Bu kölgə Alxanı hər addımda təqib edərək keçmiş
əməllərini xatırladır, vicdan əzabı çəkməsinə, səhvini anlayaraq
qəflət yuxusundan oyanmasına çalışır. Alxan ürəyinin dərinliyində
tutduğu işdən xəcalət çəksə də, bunu nəinki başqalarının qarşısında,
heç öz qarşısında da boynuna almaq istəmir. Usta Nicatın kölgəsinin
“Sənin günahın qanun məcəlləsinə düşmədi, bəs vicdan məcəlləsinə
necə? Vicdanın səni incitmir?” - sualına Alxan “yox” deyə cavab
verir.
“Usta Nicat: - Onda boynuna al ki, sən diri ikən ölmüsən.
Alxan: - Ölü sənsən, sən!
Usta Nicat: - Xeyir! Mən nə üçün öldüyümü bilirəm. Amma
sən nə üçün yaşadığını bilmirsən. Unutma ki, nə üçün yaşadığını
bilməyənlər diri ikən ölü, nə üçün öldüyünü bilənlər isə ölü ikən
52
diridirlər… (124, 205). Lakin əsərin sonunda Alxan Usta Nicatın
kölgəsinin sözlərində bir həqiqət olduğunu başa düşür və səhvlərini
etiraf edərək yenidən Ufaya qayıdır. Lakin yeni bir insan kimi:
Vətənə dönüş onun həyatında mənəvi katarsisə səbəb olur.
“Yollara iz düşür” ilk növbədə “aktyor tamaşası” kimi diqqəti
cəlb etmiş, təqdir olunmuşdu. Rejissor Əşrəf Quliyev pyesin
mündəricəsindən çıxış edərək tamaşada hər bir obrazın ayrılıqda
səhnə şərhinə nail olmuşdu. Tamaşanın ansambl bütövlüyü - Bürcəli
Əsgərovun (Alxan), Sofiya Bəsirzadənin (Aynur), Kamal
Xudaverdiyevin (Loğmanlı), Əlabbas Qədirovun (Daşqın), Vəfa
Fətullayevanın (Göyərçin), Ramiz Məlikovun (Səlim), Şahin
Cəbrayılovun (Tərlan), Lalə Bağırovanın (katibə) gərgin yaradıcılıq
işi sayəsində ortaya çıxmışdı. Bu barədə tamaşadan sonra dərc
olunan rəylərdən birində oxuyuruq: “İfaçılıq ansamblının birgə
yaradıcılıq səyinə, məharətinə görə “Yollara iz düşür” - əsil mənada
aktyor tamaşasıdır. Bununla biz quruluşçu rejissorun rolunu qətiyyən
kiçiltmir, əksinə tamaşada hər obrazın qabil aktyora tapşırıldığını və
ifaçıların müstəqil axtarışlarını, ümumi müvəffəqiyyətini xüsusi qeyd
edirik” (77).
Alxan obrazını, qeyd olunduğu kimi, tamaşada Bürcəli
Əsgərov oynayırdı. Aktyor Alxanın xarakterini dərindən duyaraq,
onun daxili sarsıntılarını, hiss və həyəcanını təbii boyalarla açıb
göstərə bilirdi. B.Əsgərov öz düşünülmüş oyunu ilə tamaşaçıya belə
bir fikir aşılayırdı ki, təkəbbürlük, lovğalıq heç də qoçaqlıq demək
deyil. İnsanın gözəlliyi onun əməlində, daxili mənəvi
keyfiyyətlərində olmalıdır. Hadisələrin ümumi axarında Alxanın -
Bürcəli Əsgərovun daxili iztirabları, həyəcanları obrazı gərgin
dramatik vəziyyətə qaldırırdı. “Bürcəli Əsgərov məğrur mühəndis
Alxanın mənəvi sifətlərini təbii canlandırır. Aktyor inandırır ki,
ümumiyyətlə, məğrurluq gözəl keyfiyyət kimi köhnə təsəvvürlərlə,
yanlış əqidə ilə birləşdikdə bizim zəmanədə, bizim mühitdə nə qədər
eybəcər
sifətlərə
çevrilir
-
lovğalığa,
xudpəsəndliyə,
mənsəbpərəstliyə gətirib çıxarır” (77).
Dostları ilə paylaş: |