Azərbaycan Respublikası Fövqəladə Hallar Nazirliyinin Kiçik Həcmli Gəmilər üzrə Dövlət Müfəttişliyi haqqında Ə S A S N A M Ə I. ÜMUMİ MÜDDƏALAR 1. Azərbaycan Respublikası Fövqəladə Hallar Nazirliyinin Kiçik Həcmli Gəmilər üzrə Dövlət
Müfəttişliyi (bundan sonra - Müfəttişlik) qanunvericiliklə müəyyən edilmiş qaydada Azərbaycan
Respublikasının daxili dəniz və ərazi sularında, çaylarda, su anbarlarında, digər sututarlarda (bundan
sonra - sututarlarda) kiçik həcmli gəmilərin təhlükəsiz hərəkətinə dövlət nəzarətini, habelə gəmilərin
və onların dayanacağı üçün bazaların, qurğuların, yanalma körpülərinin və keçidlərin (bundan sonra -
bazalar) təhlükəsiz istismarına texniki nəzarəti həyata keçirən icra hakimiyyəti orqanıdır.
2. Müfəttişlik öz fəaliyyətində Azərbaycan Respublikasının Konstitusiyasını, Azərbaycan
Respublikasının tərəfdar çıxdığı beynəlxalq müqavilələri, Azərbaycan Respublikasının qanunlarını,
Azərbaycan Respublikası Prezidentinin fərman və sərəncamlarını, Azərbaycan Respublikası Nazirlər
Kabinetinin qərar və sərəncamlarını, Azərbaycan Respublikası Fövqəladə Hallar Nazirliyi haqqında
Əsasnaməni, bu Əsasnaməni, Azərbaycan Respublikası Fövqəladə Hallar Nazirliyinin (bundan sonra -
Nazirlik) əmr və göstərişlərini rəhbər tutur.
3. Müfəttişlik öz vəzifələrini yerinə yetirərkən və hüquqlarını həyata keçirərkən digər icra hakimiyyəti
orqanları, yerli özünüidarəetmə orqanları və qeyri-hökumət təşkilatları ilə qarşılıqlı əlaqədə fəaliyyət
göstərir.
4. Müfəttişlik müstəqil balansa, qanunvericiliyə uyğun sərəncamında olan dövlət əmlakına, xəzinə və
bank hesablarına, üzərində Azərbaycan Respublikasının Dövlət gerbinin təsviri və öz adı həkk
olunmuş möhürə, müvafiq ştamplara və blanklara malikdir. Müfəttişlik Nazirliyin müvafiq qaydada
təsdiq olunmuş bayrağından və rəmzlərindən istifadə edir.
5. Müfəttişliyin saxlanma xərcləri və fəaliyyəti Azərbaycan Respublikasının dövlət büdcəsi və mövcud
qanunvericiliyə zidd olmayan digər mənbələr hesabına maliyyələşdirilir.
6. Müfəttişlik özünə məxsus xidməti gəmi dayanacağı bazasına, patrul xidmətini təşkil etmək üçün
dispetçer məntəqələrinə və ölkənin su hövzələrində istismar olunan kiçik həcmli gəmilərin hərəkətinə
operativ nəzarəti təşkil etmək üçün mərkəzi radio-rabitə stansiyasına malikdir.
7. Müfəttişlik Bakı şəhərində yerləşir.