38
mübadiləsinin aparılması, əlaqələrə konkret məzmun verilməsi üçün həmin ölkəyə
yüksək səviyyəli səfərlər təşkil edilir.
"Xüsusi dəvət olunmuş" statusunu əldə etdikdən sonra məruzəçilərin
səfərləri daha da intensivləşir və maraqlı dövlətə ünvanlanmış "sorğu vərəqi" ilə
nəzarət olunur. Bu sorğu vərəqinə cavablar məruzəçilər tərəfindən rəy layihəsinin
hazırlanmasında önəmli rol oynayır və təklif olunan öhdəliklər sırasında öz əksini
tapır.
1996-cı il iyulun 12-14-də Avropa Şurası Nazirlər Komitəsinin sədri,
Estoniya Respublikasının xarici işlər naziri S.Kallas və Avropa Şurasının Baş
katibi D.Tarşisin başçılıq etdiyi missiya səfər zamanı Azərbaycanın, demək olar ki,
bütün hökumət üzvləri, habelə respublika Prezidenti Heydər Əliyevlə danışıqlar
apardılar. Danışıqlar nəticəsində Şura üzvləri Azərbaycandakı demokratik
islahatlar proseslərinin dönməzliyini müşahidə etdiklərini bildirdilər. Bu da,
Avropa Şurası ilə Azərbaycan arasındakı əlaqələrin gələcək inkişafına müsbət təsir
göstərdi.
Bütövlükdə isə nümayəndə heyətinin səfəri Azərbaycan ilə Avropa Şurası
arasında əməkdaşlıq əlaqələrini yeni səviyyəyə qaldırdı, ölkəmizin bu təşkilata tam
hüquqlu üzvlərdən olması üçün perspektivlərini gücləndirdi.
Ümummilli lider Heydər Əliyevin rəhbərliyi altında Azərbaycan
diplomatiyasının məqsədyönlü fəaliyyəti nəticəsində ölkəmizdə baş verən
proseslər, qarşılaşdığımız problemlər, Qarabağ münaqişəsi ilə əlaqədar
Azərbaycanın mövqeyi, respublikamızda sosial həyat şəraitinin, əhalinin sosial
rifahının aşağı səviyyəsi, bütövlükdə regionda vəziyyət Avropa Şurasının diqqətini
daha çox çəkməyə başlayır.
1997-ci ilin yanvar ayında Azərbaycan Respublikası Milli Məclisinin Sədri
M.Ələsgərovun başçılıq etdiyi nümayəndə heyətinin iştirakı ilə Avropa Şurası
Parlament Assambleyasının Qafqaz problemlərinə dair seminarı keçirilir. Daha
sonra Cənubi Qafqaz respublikalarına göndərilmiş komissiyaların məlumatları
əsasında aprel ayında regionda vəziyyətə dair müzakirələr keçirilir. Avropa
Şurasının nümayəndəsi J.Setlenjin hazırladığı hesabat əsasında Avropa Şurasının
Parlament Assambleyası elə həmin gün "Zaqafqaziya münaqişələrinə dair" 1119
saylı qətnamə qəbul edir. On bir bənddən ibarət qətnamədə regionun başlıca
təhlükə ocaqları olan Abxaziya və Dağlıq Qarabağ münaqişələrinin həlli
yollarından bəhs olunur və qeyd edilir ki, "xüsusi dəvət olunmuş" statusu almış hər
üç Qafqaz respublikası yalnız münaqişə nizamlandıqdan sonra Avropa Şurasının
daimi üzvləri sırasına qəbul edilə bilərlər.
Qətnamə hər iki münaqişənin nizamlanması üçün çıxış nöqtəsi kimi
1975-ci il Helsinki Yekun Aktının və 1990-cı il Paris Xartiyasının
prinsiplərindən irəli gələn aşağıdakı müddəaların əsas götürülməsini irəli sürürdü:
sərhədlərin toxunulmazlığı;
regionun bütün xalqları üçün, əsasən, çoxmillətli sülhyaratma qüvvələri
tərəfindən dəstəklənən təminatlı
təhlükəsizlik;