Maddə 71-1. Maliyyə bazarlarına nəzarət orqanı tərəfindən ləğvedicinin fəaliyyəti üzərində
nəzarət
71-1.1. Maliyyə bazarlarına nəzarət orqanı ləğvedici üzərində fəaliyyətinin bütün müddəti
ərzində nəzarəti həyata keçirir.
71-1.2. Maliyyə bazarlarına nəzarət orqanı:
71-1.2.1. ləğvedicinin fəaliyyəti barəsində məlumatların təqdim edilməsini tələb etməyə;
71-1.2.2. ləğvedicidən hesabat almağa;
71-1.2.3. ləğvedicinin cari fəaliyyətinin həyata keçirilməsi ilə bağlı tövsiyələr və icrası məcburi
olan yazılı göstərişlər verməyə;
71-1.2.4. ləğvedicinin fəaliyyətini yoxlamağa;
71-1.2.5. ləğvedicinin bankın idarəedilməsi ilə bağlı bu Qanun çərçivəsində qəbul etdiyi
qərarlarından maraqlı şəxslərin verdiyi şikayətlərə baxmağa səlahiyyətlidir.
71-1.3. Bankın iflası dövründə ləğvedici öz fəaliyyəti haqqında maliyyə bazarlarına nəzarət
orqanına onun müəyyənləşdirdiyi formada və müddətlərdə hesabat verir, habelə maliyyə
bazarlarına nəzarət orqanının tələb etdiyi sənədləri və informasiyanı təqdim edir.
Maddə 72. Bankın müflis elan olunmasının nəticələri
72.1. Bankın müflis elan olunmasına dair qərar qüvvəyə mindiyi andan:
72.1.1. bankın adından yalnız ləğvedici və ya onun vəkil etdiyi şəxs tərəfindən edilən hərəkətlər
hüquqi qüvvəyə malik olur;
72.1.2. banka qarşı məhkəmə icraatı prosesində olan bütün iddialar dayandırılır;
72.1.3. bank barəsində digər məhkəmə icraatına başlanılmır və banka qarşı bütün tələblər yalnız
bu Qanunda nəzərdə tutulan iflas proseduru çərçivəsində irəli sürülür;
72.1.4. qanunvericiliyə müvafiq hallarda aktivlərin üzərinə qoyulmuş bütün həbslər hüquqi
qüvvəsini itirir;
72.1.5. girovla təmin edilmiş aktivlər barəsində borc məbləği həddində bu Qanunun 81-ci
maddəsinə uyğun icraat istisna olmaqla, bankın aktivlərinə yönəldilmiş icra sənədlərinin icrası
dayandırılır;
72.1.6. bankın öhdəlikləri üzrə faizlərin və digər haqların hesablanması dayandırılır. Bu zaman
bankın aktivlərinə faizlərin və digər haqların hesablanması davam etdirilir.
72.2. Bankın müflis elan olunmasına dair qərar qüvvəyə mindikdən sonra müflis bankın
səhmlərinin ləğvedici tərəfindən digər şəxsə köçürülməsi bu Qanunun 74-cü maddəsinə müvafiq
olaraq, yalnız məhkəmənin qərarı ilə həyata keçirilir.
Maddə 73. Ödəniş sistemlərində hesablaşmaların qətiliyi
73.1. Bu Qanunun 72.1-ci maddəsinin müddəalarından asılı olmayaraq:
73.1.1. ödəniş sistemlərinə daxil edilən və həmin sistemlərin qaydaları ilə gerigötürülməz hesab
edilən hesablaşmalar üzrə ödəniş tapşırıqları, o cümlədən qiymətli kağızlar üzrə ödənişlər bankın
müflis elan olunmasına dair qərar qəbul edildiyi halda hüquqi qüvvədə qalır və üçüncü tərəf üçün
məcburi olur, bu şərtlə ki, ödəniş tapşırıqları həmin qərar qüvvəyə minənədək gerigötürülməz
olsun;
73.1.2. bu Qanunun 73.1.1-ci maddəsində göstərilən köçürmələr bu şərtlə hüquqi qüvvəyə malik
olmur və üçüncü tərəf üçün məcburi olmur ki, ləğvedici sistemin operatorunun bankın müflis elan
olunmasına dair qərar çıxarıldığından ödəniş tapşırıqları köçürmələri həyata keçirən sistemin
qaydalarına görə gerigötürülməz olanadək xəbər tutduğunu sübut edə bilsin.
73.2. Bankın müflis elan olunmasına dair qərar qüvvəyə minənədək bağlanmış müqavilə və
əqdləri ləğv edən və ya təxirə salan hər hansı normativ hüquqi akt və ya sərəncam ödəniş sistemləri
vasitəsilə həyata keçirilmiş klirinqin nəticələrini ləğv edə bilməz.
Maddə 74. Bankın səhmlərinin, aktivlərinin, öhdəliklərinin köçürülməsi və satılması
74.1. Bank sisteminin mənafeyi və bankın dəyərinin onun kreditorları üçün artırılması məqsədilə
maliyyə bazarlarına nəzarət orqanın müraciətinə əsasən məhkəmə qərar qəbul edə bilər ki, bankın
ləğvedicisi aşağıdakıları təmin etmək üçün maliyyə bazarlarına nəzarət orqanın təklif etdiyi və
məhkəmənin təsdiq etdiyi şərtlər əsasında bir və ya bir neçə əməliyyat aparsın:
74.1.1. bankın nizamnamə kapitalının hamısının və ya bir hissəsinin köçürülməsi və /və ya;
74.1.2. bankın aktivlərinin və öhdəliklərinin hamısının və ya bir hissəsinin birlikdə köçürülməsi
və ya satılması.
74.2. Bu Qanunun 74.1-ci maddəsinə uyğun əməliyyatın aparılması üçün, bank müflis elan
edildikdən sonra onun ləğv edildiyi anadək istənilən vaxt müraciət edilə və ona icazə verilə bilər.
Bu barədə məhkəməyə təqdim olunmuş ərizəyə bir həftə ərzində baxılır və müvafiq qərar qəbul
olunur.
74.3. Bu Qanunun 74.1-ci maddəsinə uyğun icazə verilmiş əməliyyatın aparılması üçün bankın
səhmdarlarının və ya onun hər hansı idarəetmə orqanının razılığı tələb edilmir. Öhdəliklərin
köçürülməsi müvafiq bildirişin kütləvi informasiya vasitələrində dərc edildiyi gündən sonrakı
günün əvvəlindən bütün maraqlı tərəflər üçün qüvvəyə minir.
74.4. Bankın iflas proseduru çərçivəsində adi qaydada bank aktivlərinin satılmasına məhkəmənin
qərarı tələb olunmur.
Maddə 75. Əmlakın vəziyyətinə dair hesabat
75.1. Bankın müflis elan olunmasına dair məhkəmənin qərarı qəbul edildiyi tarixdən 30 təqvim
günü müddətində bankın ləğvedicisi məhkəməyə əmlakın vəziyyətinə dair hesabat təqdim edir.
Hesabatda aşağıdakılar göstərilir:
75.1.1. bankın aktivləri, o cümlədən ödənilməmiş bank səhmləri barəsində bankın tələbləri,
verilmiş kreditlər, o cümlədən qarantiyalar və təminatlar üzrə öhdəliklər, icra olunmamış alqı-satqı
müqavilələri, habelə aktivlərin balans dəyəri və qiymətləndirilən satış (bazar) dəyəri;
75.1.2. bankın əmlakının başqa şəxslərin sahibliyində olmasına əsas vermiş müqavilələr, o
cümlədən icarə, lizinq və girov (ipoteka) haqqında müqavilələr;
75.1.3. banka xidmətlər göstərilməsi haqqında müqavilələr;
75.1.4. bankın müflis elan olunmasına dair qərarın qəbul edildiyi gündən əvvəlki 90 təqvim günü
ərzində, aidiyyəti şəxslərlə isə 1 il ərzində bankın bağladığı əqdlər.
75.1.5. bankın inzibatçıları tərəfindən bankın qəsdən müflisləşmə vəziyyətinin yaradılması,
əmlakın və ya əmlak öhdəliklərinin, habelə onlar haqqında məlumatın gizlədilməsi, məhv edilməsi
və digər qanunsuz hərəkətlər barədə aşkar etdiyi faktlar haqqında məlumat.
75.2. Hesabat hər rüb tərtib edilməlidir. Ümumi xarakter daşıyan məlumatlar bu Qanunun 77-ci
maddəsinə uyğun hazırlanan təsdiqli tələblər siyahısına tələbləri daxil edilmiş bank kreditorlarına
tanışlıq üçün təqdim edilir.
Maddə 76. Tələblərin qeydə alınması
76.1. Bu Qanunun 77.1-ci və 77.2-ci maddələrində nəzərdə tutulan hallar istisna olmaqla, müflis
banka qarşı tələblər bankın müflis elan olunmasına dair məhkəmə qərarının kütləvi informasiya
vasitələrində ilk dəfə dərc edildiyi gündən 60 təqvim günü ərzində ləğvedici tərəfindən yazılı
şəkildə qeydə alınmalıdır. Məhkəmə bu müddəti bütün kreditorlar üçün yalnız bir dəfə 30 təqvim
günü müddətinə uzada bilər. Kreditorların sorğusu üzrə onlara tələblərinin qeydə alındığına dair
qəbz verilir.
76.2. Tələblərin qeydə alınması üçün kreditorlar öz tələblərinin hüquqi əsasını sübut edən
sənədləri və aşağıdakı məlumatları təqdim etməlidirlər:
76.2.1. kreditorun adı və ünvanı;
76.2.2. tələbin əsas məbləğinə daxil edilən faizlərin və digər haqların məbləğləri;
76.2.3. tələbin təminatı olan girov (ipoteka) və ya qarantiya barəsində məlumat.
76.3. Bankın müflis elan olunmasına dair məhkəmənin qərarı bankın mühasibat uçotu və
hesabatı sənədlərində əks etdirilmiş depozitlərə aid tələblər üzrə iddia müddətinin axımını
dayandırır. Bütün qalan tələblər üzrə iddia müddətinin axımı həmin tələblər qeydə alındıqda
dayandırılır. Bütün tələblər üçün iddia müddətinin axımı həmin tələblərin bu Qanunun 87-ci
maddəsinə uyğun bölgü cədvəlinə daxil edildiyi gün yenidən başlanır.