paltarlar, yuvadakı yumurtaların zığı-pılçığı anamın isti-ilıq
nəfəsinin evdən çəkilməsinin
dəhşətini bizə anladardı. Evin arxasına çəkilib uşaqlığımın kövrək-göyçək xatirələrini bətnində
saxlayan yepyekə çay daşının üstündə oturar, siqaret tüstülədərdim. Atam görəndə özünü o yerə
qoymazdı, şaftalı ağacının altına çəkilib ağlayar, yanağının nəmini oğlanlarından gizlədə
bilməyəndə barmağının ucunacan utanardı. Anamın ili çıxmamış kişinin bədənində ağrılar
başladı; dava-dərman, tükəçarə, sanatoriyalarda kurs-kurs müalicələr hədər getdi. Həkimlər kəsə
demişdilər: evlənsən, yaxşı olar! İli yola salandan altı ay sonra bacım gəldi ki, yalan-gerçək,
anamı yuxumda görmüşəm, deyir, Pənah tək qalmasın, halallığın verirəm. Altı ay lazım oldu
kişini yola gətirək. Böyük bacım diribaş çıxdı. Qonşularındakı qarımış qızın
əlindən tutub
evimizə gətirdi: atama həyan olsun. O çağdan neçə il keçib, amma mən qulluğumu kəniz kimi
tutan bu zavallı və bədbaxt Allah bəndəsinə bircə xoş söz deyə bilməmişəm; adını çağıranda
səsimdə həmişə bir hikkə, kin-küdurət olub: Səlminaazzzz!!!
Əsmərin toxuduğu köynəyi geyib güzgünün qabağına keçdim. Əlaydı, vallah, lap eşşəyə palan
yaraşan kimi. Qolları, çiyinləri, ətəyi... elə bil əynimə biçilmişdi. Köynək var adamı cüllütə
oxşadır, bu eləsindən deyildi; sinəmin, çiyinlərimin əzələləri gendən çağırırdı. Saçıma daraq
çəkib şeşələndim: yox, göz dəyməsin,
pis deyiləm, boy-buxun, yar-yaraşıq məndə; özüm də
ölkənin adlı-sanlı, məşhur müğənnisiylə sevişməyə iddialı... Və comərdtəki boynuma almaqdan
çəkinmirəm, beynimi məşğul edən tək fikir buydu: görən, kişi kimi Leylanın qəlbinə xoş
gəldiyimdən mənimlə yatağa girməyə razılıq verdi, yoxsa əlacsızlıqdan?!
Nigaranlıq kürkümə birə salmışdı. Otaqda nə qədər ora-bura getmək, siqaret tüstülətmək olar?!
Birbaş Leylanın evinə yollanıb qapını döyəcəm ki, bağışla, səbrimi basa bilmədim. Evdən
çıxmaq istəyəndə üzbəüzdəki binanın tininə bərkidilən projektorun gur işığında daxmama sarı
gələn qaraltını gözüm aldı. Kölgəsini qabağına qatıb yeyin addımlarla irəliləyirdi. Gözüm məni
aldatmırdısa, əlində telefon vardı, nəsə qurcalanırdı. Ürəyimə damdı: bəlkə Leyla ola?! İsmayıl
dayıya demişdi məni axtarmasın, özüm zəng vuracam. Amma çətin ağlım
kəsir ki, zəngsiz-
filansız durub yanıma gələ. Çıraq yanan vaxt olsa da, çöl-bayırdan əl-ayaq tam kəsilməmişdi,
işdən gec çıxan, yolda yubananlar acqarına şam yeməyinə tələsirdilər. Bu çağda tək başına yolun
ağına düşüb gələrdimi, yəni?!
Telefonuma sms gəldi. Oxudum. Dəhşət. İçimi çəkə-çəkə qalmışdım. “Mən sənə demişdim, axı,
indi heç kimə güvənmək olmur. Riyakarlıq etməyin kimə lazımıydı? Siqareti halal edirəm, amma
məsələ bunda deyil. Nə isə... ”. Bir göz qırpımında beynimdən min cür fikir keçdi. Lənətə
gələsən, bu siqaret hardan çıxdı? Evə girən kimi qutunun üstünə cummuşdu? Lap tutaq ki
belədir, içi acı tüstüyə tamarzı qalıb yanırmış. Yaxşı, sayını hardan bilirdi? Demək, siqaret
çəkdiyimdən xəbər tutandan sonra tapançanın yerində olub-olmadığını yoxlamışdı. Sonra topa
açarları incələmək gəlirdi...
Qapı döyüldü. Aramla,
incə-incə, ustufca... Bu, qadın əliydi. Taxta, sarımtıl boyası qabıq verib
tökülən qapı cırıltıyla açıldı. Uzaqdan gələndə gözüm məni aldatmamışdı... Leylaydı! Qara
eynək, başında papaq, tünd göy köynək geymişdi. Eynəyini alnına qaldırdı. Qaşlarını qadına
yaraşmayan tərzdə düyünləmişdi. Üz-gözündəki zabitəli, zəhmli ifadədən hürkdüm. Bir-birimizi
birinci dəfə görürmüş kimi başdan-ayağa süzdük. Oktyabr səması kimi qapqara, qaşqabaqlı idi.
Nə olub görən? Beynimdən keçirdim. Onun bu acıqlı, ədabaz görkəmi ürəyimə hədsiz qorxu
salmışdı.
- Bəlkə, içəri dəvət edəsən? - Kirpik qırpmadan gözümün içinə uzun-uzadı baxdı. Elə bil
yuxudan ayıldım, diksinib gülümsəməyə çalışdım.
- Buyur, gəlişinə şad oldum.
- Yenə yalan danışırsan, başa düşmürəm, axı, bu əclaflıq nə üçündür?
“Əclaflıq?” - Udqunub dillənmədim. Daha doğrusu, nədən başlayacağımı kəsdirə bilməmişdim.
Bircə “xoşgəldin” deməyə cəsarətim çatmışdı, onda da səsimi içimə qısmışdım, elə bil quyudan
eşidilirdi. Leylanın gözümün içinə baxa-baxa məni təhqir etməsi qüruruma toxunmuşdu. Hiss
edirdim, əzalarıma hərarət yayılır.
- Niyə qanın qaradır, elə bil acıqlısan?
- Bəlkə, atılıb boynuna sarılmalıyam?
- İsmayıl dayı dedi, Leylanın kefi kökdür.
Sevindim ki, demək, hər şey yaxşılığa doğrudur.
- Bekara, sevinməli heç nə yoxdur. Sənə ürək qızdırmışdım, əvəzində evimdən oğurluq etdin.
Daha doğrusu, bu oğraşlıqdır. Başa düşdün? - Qız gözlənilmədən üstümə səsi çatan qədər
bağırdı. Boğazının damarları gərilib pırtlamışdı. Hirsdən dil-dodağı əsim-əsim əsirdi.
Bir ağlıma gəldi ki, ona deyim sakit, təmkinli olsun. Fikrimdən daşındım. Belə hallarda ağlı
başında olmayan adamlar daha da coşur, onları sakitləşdirmək əsl məşəqqətə çevrilir. Ortalığa
sərin su səpmək üçün daha münasib yollar tapmaq olardı. Bunun ən yaxşısı etiraz etmədən, hər
şeyi günahkarcasına öz boynuna götürməkdi. Dəfələrlə sınamışam, sonrakı gedişatda hər şey
adamın ürəyincə olur. Sanki ovsunçusan, qarşındakı insanın hisslərini istədiyin sayaq idarə
etmək su içmək qədər asan olur.
- Razıyam, - dedim, - belə etməməliydim. Düzünü deyim ki, qarşında vicdan əzabı çəkirəm.
- Yaxşı ki, səhvini boynuna götürürsən.
Amma bilmək olmaz, səninlə çox ehtiyatlı olmaq
lazımdır.
- Mən verdiyim sözün üstündə durdum. - Yazını nəzərdə tuturdum.
- Elə bilirsən, - səsini yenidən qaldırdı. Bu dəfə hirsi-hikkəsi açıq-açığına adamın əsəblərinə
toxunurdu, - sənin üçün hər şey yaxşı olacaq? Sənə xəbərdarlığımı etmişəm. Başın bəla çəkəndə
məndə günah görmə. - Oğrun-oğrun evin künc-bucağına göz gəzdirdi. Güman ki, tapançanın
yerini öyrənməyə çalışırdı.
- Bir sağ ol düşmür? - Ortadakı ağır ab-havanı mülayimləşdirmək üçün səsimə həlimlik qatıb
gülümsədim.
Dillənmədi. Köks ötürüb pəncərədən bayıra boylandı. Üzbəüzdəki binanın tininə bərkidilən
projektorun işığında çəpəki yağış damlaları oynaşırdı. Yasamalın səs-küylü küçələrinə sakitlik
çökmüşdü. Külək qıy çəkib coşur, bir-birinin üstünə dartınan ağacların, ulayan yiyəsiz itlərin səsi
eşidilirdi.
- Düzünü
bilmək istəyirsənsə, sənin yanına iki şey üçün gəlmişəm.
- Maraqlıdır! - Gözümü ağzına zillədim.
- Əvvəla, axşam götürdüyünü bu dəqiqə qaytar özümə.
Uzun-uzadı gözümün içinə baxıb deyəsən, məndən hərəkət gözləyirdi.
Tərpənmədiyimi görəndə köynəyinin sağ cibindən “kent”, alışqan çıxarıb arın-arxayın siqareti
odladı. Qəsdən dillənmədim ki, danışmağına ara verməsin. Bu, həm də Leylanın mənimlə hansı
şəkildə raftar edəcəyini öyrənmək məqsədi güdürdü. Amma hiss edirdim, içinə yığılan qəzəb
vulkan kimi püskürməyə bəhanə gəzir.
- Başa düşmədin? Təkrar edirəm, axşam götürdüyünü qaytar özümə!
Hikkəylə üstümə çəmkirdi. Gözlərində yalquzaq vahiməsi vardı.
Boynuma alım ki, üşəndim, çox üşəndim.
- Qaytaracam, Leyla...
- Qaytaracam yox, bu dəqiqə, elə bu dəqiqə qaytar!- Stolun üstündəki çay fincanını qapıb üstümə
tolazladı. Bu qəfil, ağılsız hərəkətini gözləmədiyimdən üstümə şığıyan fincandan yayınmağa
ləngidim. Xoşbəxtlikdən zərbə başımı yox, çiynimi tutdu. Fincan yerə düşüb dörd bölündü.
- Qaytaaaarr!!!... - Siqareti yerə atıb vəhşi bağırtıyla üstümə yeridi. Təngnəfəs adamlar kimi
tövşəyirdi. Rəngi qapqaraydı. İki addımlığımda dayanıb gözlərini üstümə bərəltdi.
- Qonşular var, ayıbdır.
Sakit ol, eşitsələr, sənə ziyan gətirər.
- Tfu sənin üzünə, şərəfsiz! - Üz-gözümə yayılan tüpürcək damcılarından iyrənsəm də, səbrimi
basdım. Hardasa möhkəmcə içmişdi, ağzı alkoqol qoxurdu.
- Leyla, dedim ki, səhvimi boynuma alıram. Götürdüyümü də qaytaracam. Səbrin olsun! İkincini
de, sakitcə söhbət edək - Əlindən tutmağa cəhd etsəm də, qolunu
ikrahla geri çəkib dişlərini
yenidən üstümə qıcıdı.
- Sən, deyəsən, mənimlə oyun oynayırsan, hə? Sənə göstərərəm başqasının evindən oğurluq
etmək nə deməkdi.
- Özün bilirsən, bu oğurluq deyil. Sənin xeyrinədir.
- Mənim dərdimi çəkməyin lazım deyil, başa düşdün? - Sifətimdə şillə açıldı.
Ardınca çiynimi yumruqlamağa başladı. Qolundan tutub az qala yalvara-yalvara sakitləşməyini
istəyəndə bir az da coşurdu. Boyun-boğazımda uzun dırnaqlarının ağrısını hiss etdim. Başqa
yolum yoxuydu. Qolumun qüvvəsini işə salıb qızı özümdən kənara itələdim. Yüngülcə həmləylə
stula yıxılıb zarıdı. Zibilə qalsın, stul elə bil amana bəndmiş, döşəmənin çürük taxtasının