OZAN DÜNYASI № 3(6), 2011
46
birindən ayrı tutmayan, “çeşməsindən abi-həyat car olan”, “yayın
əvvəlində xana” dönən, son ayda “yetkin bostana” bənzəyən, “payızda
çəni-çiskini ilə adamı pərişan eləyən, qışda ağ xələt geyinən”, yalqız
qalsa belə kimsəyə əyilməyən, vüqarını sındırmayan, şaha baş əyməyən
dağlar qarşısında öz heyrətini gizlədə bilmir, onun daxili dünyası, duyğu
və düşüncələri peyzaj fonunda ilmə-ilmə, yarpaq-yarpaq açılır və son
nəticədə lirik qəhrəmanın bədii portreti xarakterik cizgilərlə zənginləşir,
dolğunlaşır. Həssas oxucu aydınca görür ki, burada təkcə fəsillər bir-
birini əvəz etdikcə libasını dəyişən dağlar poetik təsvirin mərkəzinə
gətirilmir, həm də peyzaj onu heyranlıqla müşahidə edən lirik
qəhrəmanın daxili dünyasını açmaq vasitəsinə çevrilir.
Köçər ellər, düşər səndən aralı,
Firqətindən gül-nərgizin saralı.
Ələsgər Məcnun tək yardan yaralı,
Gəzər səndə dərdli, nalalı dağlar.
Bu bəndi oxuyanda “Füzuli dərd əlindən dağa çıxdı, dedilər
bəxtəvər yaylağa çıxdı” misralarının müəllifi ilə “Dağlar” qoşmasının
lirik qəhrəmanının əhvalı-ruhiyyəsi arasında bir eyniyyət, uyğunluq
tapmaq çətin deyildir.
Aşıq Ələsgərin peyzaj lirikasında sadəcə təbiətin füsunkar lövhələri
poetik sözün gücü ilə canlandırılmır, həm də həmin mövzulu şeirlərin
daxili qatında insanları narahat edən problemlər, mənəvi-əxlaqi
konfliktlər öz bədii əksini tapır. Dağlar yoxsulu, varlını, şahı, gədanı bir-
birindən fərqləndirməyən, bütün hadisələrin, münaqişələrin fövqündə
dayanan bir ilahi qüvvənin simvolik obrazı təsiri bağışlayır. Dağların
pərişan görkəmi təkcə ona doğru gələn yolların önünü kəsən payız və
qışla əlaqədar deyildir. Dağların yolunu bağlayan digər səbəblər də
vardır:
Xaçpərəstlə düşdü bund inqilabı,
Onunçün bağlandı yolların, dağlar!
Təəssüf ki, Aşıq Ələsgərin ilham quşunu pərvazlandıran dağlar,
yaylaqlar indi doğmaların, əzizlərin nəfəsinə, hənirinə həsrətdir. İndi də
“başı qarlı, eldən aralı” dağlarda Aşıq Ələsgərin tənha ruhu
dolaşmaqdadır.
Aşıq Ələsgər poeziyasında dağlar, yaylaqlar vətənin simvolik
obrazıdır. “Sürülərin mələşməsi, atların kişnəməsi, boş qalan yurdlar”
OZAN DÜNYASI № 3(6), 2011
47
dağların pərişan görkəminin xarakterik cizgiləridir. “Görəndə gözümdən
car oldu sellər” misrası, “Hanı mərd igidlər, boş qalıb yurdu?” harayı isə
lirik qəhrəmanın daxili dünyasının aynasına çevrilir. Sarı Nər, Qısır
Murğuz, Kəpəz, Murov, Qoşqar dağlarının adını çəkən el aşığı qoşmanı
aşağıdakı bəndlə bitirir:
Həsənnənə, Həsənbaba qoşadı,
Xoşbulaq yaylağı bir tamaşadı.
Arsız aşıq elsiz necə yaşadı? –
Ölsün Ələsgər tək qulların, dağlar!
Süsən, sünbül, lalə, nərgiz, duman, çiskin, yayın ortasında yağan
qar, kəkotu, qırxbuğum, qaymaqçiçəyi, bənövşə, qantəpər, igid nərəsi,
güllə səsi, qoyun-quzu mələşməsi, tütək səsi, türfə gözəllər, çiçəkdən bal
çəkən arı və s. Aşıq Ələsgərin peyzaj lirikası üçün səciyyəvi detallar,
ştrixlərdir.
Aşıq Ələsgərin portret cizgilərində də təbiət cisimləri səciyyəvi
bədii detal rolu oynayır. Gözəllərin portretini yaradarkən çiçəklə, güllə,
ayla, ulduzla, çeşmə ilə müqayisələr aparmaq Aşıq Ələsgərin bədii
üslubu üçün səciyyəvidir. Məsələn:
“Tay olmaz dağlarda lala
Gülgəz yanağa, Gülxanım!”
“Ay üzdə xalın bənövşə,
Az qalır bağrımı deşə”.
“Bir yaqut yanaqlı, yasəmən xallım”...
Aşıq Ələsgər öz şeirlərində maraqlı, milli koloriti ilə seçilən,
diqqəti cəlb edən portretlər yaratmışdır. Onun təsvir etdiyi gözəllər real
həyatda yaşayan, zahiri görkəmləri, geyimləri ilə bir-birindən fərqlənən
insanlardır. Hətta bu gözəllərin adları da məlumdur: Gülxanım, Maral,
Ceyran, Bəyistan, Güləndam, Güllü, Gülpəri, Leyli, Müşgünaz, Telli,
Xurşid, Səlbi...
“Bəstə boy”, “ağ əndam”, “gül üz”, “ay qabaq”, “şahmar zülf”,
“büllur buxaq”, “lalə yanaq” epitetləri Səhnəbanunun, “dodağı qönçə”,
“dişləri sədəf”, “qara qaşlar”, “ala gözlər” epitetləri Bəyistanın, “gözəllər
soltanı”, “sürahi gərdən” Səlbinin, “siyah tel”, “nazik barmaq”, “şümşad
əl”, “günəş camal” Salatının, “qara göz”, “qələm qaş”, “alma yanaq”,
OZAN DÜNYASI № 3(6), 2011
48
“bal dodaq”, “ala gözə vurulan siyah sürmə” Güləndamın, “tuti dil”,
“sərv boy” Salatının portretinin cizgiləridir.
Elə portretlər də vardır ki, onları yaradarkən Ələsgər epitetlərdən
yox, bənzətmələrdən istifadə etmişdir:
“Sona tək silkinib, gərdən çəkəndə,
Bənzəyirsən quya, qaza, Müşgünaz”.
Daha sonra Müşgünaz aya, Züleyxaya, onun üzü aynaya, qaşları
çəkilən yaya bənzədilir.
Doymaq olmur işvəsindən, nazından,
Fərə kəklik kimi xoş avazından.
Yel vurdu, rübəndin atdı üzündən,
Elə bildim doğdu ay, sarıköynək...
Burada portret statik yox, dinamikdir, bənzətmələr hərəkət
vasitəsilə reallaşır, portretə bir aydınlıq, milli kolorit gətirir.
Milli kolorit daha çox geyimin təsvirində üzə çıxır. Aşıq Ələsgər
öz lirik qəhrəmanlarının portretini yaradarkən geyimlərinin təsvirinə də
xüsusi önəm verir.
Ay qız, sənin nə vədəndi,
Kəsilib qısa tellərin?
Kəlağayı əlvan, qıyğacı
Üstündən basa tellərin.
Burada kəlağayı milli geyim elementi kimi portretin koloritini
artırır.
“Qırmızı” qoşmasında “mərcan boyunbağı”, “Yaraşır”da “qızıl
bazubəndələr”, “başa örtülən şal”, “heyratı kəlağayı”, “gümüş kəmər”;
“Görürsənmi oğrun baxan gözəli” qoşmasında “qızıl düyməli yaxa”,
“gümüş kəmər”; “Gülpəri”də “yaşmaq”; “Sarıköynək”də “zər kəmər”;
“Xurşid”də “güşvarə”, “qızıl tana” milli geyim elementləri kimi portreti
daha da görümlü, baxımlı, yaddaqalan edir.
Aşıq Ələsgərin yaradıcılıq nümunələri
bədii təhlil üçün çox zəngin
material verir. Elə buna görə də onun əsərlərini yeni
dövrün tələbləri
səviyyəsində yenidən araşdırmağa, tədqiq etməyə xüsusi ehtiyac duyulur.