13
NAXÇIVAN DÖVLƏT UNİVERSİTETİ.
ELMİ ƏSƏRLƏR, 2016, № 5(79)
NAKHCHIVAN STATE UNIVERSITY.
SCIENTIFIC WORKS, 2016, № 5 (79)
НАХЧЫВАНСКИЙ ГОСУДАРСТВЕННЫЙ УНИВЕРСИТЕТ.
НАУЧНЫЕ ТРУДЫ, 2016, № 5 (79)
VİDADİ MURADOV
AMEA Naxçıvan Bölməsi
vidadimuradov@gmail.com
UOT: 94 (479.242)
XVIII-XX əsrin əvvəllərində Ordubad şəhərinin iqtisadi həyatına dair
Açar sözlər: Ordubad şəhəri, ticarət, dövriyyə, satış bazarı, karvansara, dükan,
sənətkarlıq, emalatxana, istehsal, tənəzzül, meyvə
Keywords: Ordubad city, trade, circulation, sales market, caravanserai, shops,craftsmanship,
workshop, production, decline, fruit
Ключевые слова: город Ордубад, торговля, оборот, базар, каравансарай, ремесло,
мастерской, производство упадок, фрукты
Azərbaycanın orta əsr və yeni dövr şəhərlərinin əksəriyyəti kimi, Ordubad şəhərinin də iqtisadi
həyatının əsasını ticarət, sənətkarlıq və əkinçilik, ilk növbədə isə bağçılıq və üzümçülük təşkil edirdi.
Şəhərin iqtisadi həyatında ticarət xüsusilə mühüm rol oynayırdı. Bunu hələ 1727-ci ildə tərtib edilmiş
“Naxçıvan sancağının müfəssəl dəfətəri”ndə verilən məlumatlar da təsdiq edir. Həmin məlumatlardan
aydın olur ki, bu dövrdə Ordubadda ticarət əməliyyatları şəhərdə fəaliyyət göstərən 6 karvansara və 210
dükan vasitəsilə həyata keçirilirdi [4, s.125-14]. Doğrudur, sonrakı 100 il ərzində baş vermiş
müharibələr və çəkişmələr şəhərdə ticarətin inkişafına ağır zərbə vurmuşdu. Rus müstəmləkə dövrünün
başlanğıcında şəhərdə əvvəllər fəaliyyət göstərmiş 6 karvansaradan yalnız ikisi salamat qalmışdı.
Ticarət və sənətkar dükanlarının sayı isə XVIII əsrin əvvəlləri ilə müqayisədə 3 dəfədən də çox azalaraq
80-ə enmişdi [8, s.194]. Bu dükanlardan 30-da ipək və pambıq parçalar, mahud, çay, qənd, qəhvə, metal
məmulatları, 20-də isə yeyinti məhsulları satılırdı [4, s.201-202].
Naxçıvan diyarının Rusiya imperiyasının tərkibinə qatılması ilə bölgədə yaranmış siyasi
sabitlik Ordubad şəhərində də ticarətin inkişafına müsbət təsir göstərdi. XIX əsrin 60-cı illərində
şəhərdə ancaq ticarət dükanlarının sayı 93-ə çatmışdı. Bu dükanlardan 32-ni illik ticarət dövriyyəsi
25 min rubl təşkil edən bəzzaz dükanları, 29-nu ancaq Asiya ölkələrində istehsal edilən məhsulların
satışı ilə məşğul olan və ümumillik ticarət dövriyyəsi 15 min təşkil edən xırdavat dükanları, 28-ni
isə meyvə və digər kənd təsərrüfatı məhsullarının satışı ilə məşğul olan və ümumi illik dövriyyəsi 9
min rubla bərabər olan baqqal dükanları təşkil edirdi [12, s.52].
Ordubad şəhəri həm onu əhatə edən kəndlərlə, bir çox iri şəhərlərlə sıx ticarət əlaqələri
saxlayırdı. Mənbələrin verdikləri məlumatdan aydın olur ki, ordubadlı tacirlər Rusiya ilə İran
arasında gedən tranzit ticarətdə mühüm rol oynayırdılar. Onlar Rusiyanın Moskva, Həştərxan və
digər şəhərlərindən rus mallarını alaraq İranda satırdılar [8, s.201]. Ordubadlı tacirlər Təbriz şəhəri
ilə daha sıx əlaqə saxlayırdılar. Onlardan 10 nəfəri Təbrizdən gətirilən malların ancaq topdansatış
ticarəti ilə məşğul olurdu [8, s. 201]. XX əsrin əvvəllərində Ordubad şəhəri Naxçıvan, Bakı, Nuxa,
Şuşa, Tiflis, İrəvan kimi şəhərlərlə də sıx ticarət əlaqələri saxlayırdı [10, s. 24; 14, s.93].
Ordubadın daxili və xarici ticarət əlaqələrində yerli istehsalın məhsulları, ilk növbədə
sənətkarlıq və bağçılıq məhsulları əsas yerlərdən birini tuturdu. Yerli sənətkarların istehsal etdikləri
müxtəlif növ misgərlik məmulatları, ayaqqabı, xam ipək, dabbağ məmulatları yerli tələbatı
ödəməklə yanaşı, qonşu ölkələrə və kəndlərə də göndərilirdi. Onların bir qisminin əsas satış bazarı
Naxçıvan və İrəvan şəhərləri idi. Üzümçülük və bağçılığın yüksək dərəcədə inkişaf etməsi müxtəlif
növ bağçılıq məhsulları ilə ticarətin inkişafı üçün əlverişli şərait yaradırdı. Təkcə o faktı göstərmək
kifayətdir ki, 1857-ci ildə Ordubad şəhərində ümumi dəyəri gümüş pulla 36 min rubl olan meyvə
istehsal edilmişdi. İstehsal edilmiş bu meyvənin əsas satış bazarını Naxçıvan, İrəvan, Tiflis,
14
Aleksandropol və digər şəhərlər təşkil edirdi. Hər il Ordubaddan Naxçıvan şəhərinə ümumi dəyəri
12 min rubl təşkil edən 20
min pud üzüm, ərik, şaftalı, alma və s. meyvələr göndərilirdi [12, s.52].
Ordubad meyvələrinin əsas satış bazarlarından birini də İrəvan şəhəri təşkil edirdi. XIX əsrin
sonlarına aid olan
məlumata görə, hər il Ordubaddan İrəvan şəhərinə 15 min pud ancaq qurudulmuş
ərik göndərilirdi [11, s.158]. Ümumiyyətlə götürdükdə, XIX əsrin 60-cı illərində Ordubaddan ixrac
edilən məhsulların ümumi dəyəri gümüş pulla 60-70 min rubl təşkil edirdi [12, s.52] ki, bunun da
əsas hissəsi bağçılıq məhsullarının payına düşürdü. Ordubad şəhərinin apardığı ticarət əlaqələrinin
həcmi hətta əhalisi daha çox olan Naxçıvan şəhərini üstələyirdi. Mənbələrdən birində bunun başlıca
səbəbi kimi Ordubadda taxılçılığın zəif inkişaf etməsinin ticarət və sənətkarlığın inkişafına güclü
təkan verməsi göstərilir [12, s.52]. Əlbəttə, Ordubad şəhərinin istər daxili, istərsə də xarici ticarət
əalqələrinin inkişafına digər faktorlar da ciddi təsir göstərirdi.
Əhalinin sayı baxımından Ordubad şəhəri Naxçıvan şəhərindən geri qalsa da, sənətkarlıq və
sənaye məhsulları istehsalına görə onu xeyli üstələyirdi. Mənbələrdə istehsalın bu sahələrinin də
inkişafı Ordubadda taxılçılıq məhsullarının istehsalı üçün zəruri olan münbit torpaqların azlığı ilə
izah olunur [12, s. 52]. Çox təəsüf ki, mənbələrdə Ordubadda sənətkarlığın vəziyyəti haqqında
məlumatlar tədqiq etdiyimiz XVIII-XX əsrin əvvəllərini tamamilə əhatə etmir. Xüsusilə XVIII
əsrdə bu sahənin vəziyyətini özündə əks etdirən məlumatlar, demək olar ki, yox dərəcəsindədir.
Hətta “Naxçıvan sancağının müfəssəl dəftəri” kimi mötəbər mənbədə də Ordubad şəhərinin
sənətkarlıq həyatı haqqında heç bir məlumata rast gəlmək mümkün deyil.
Ordubad şəhərində sənətkarlığın vəziyyəti haqqında sistemli və daha müfəssəl məlumatlara
yalnız XIX əsrin 30-cu illərindən, daha doğrusu, Naxçıvan diyarının Rusiya tərəfindən işğalından
sonra rast gəlmək mümkündür. Ordubad şəhərinin bu dövrdə rus məmurları tərəfindən
tərtib edilmiş
kameral təsvirində, eləcə də V.Qriqoryevin və İ.Şopenin əsərlərində şəhərdə sənət istehsalının
vəziyyətini özündə əks etdirən xeyli faktiki materiala rast gəlmək mümkündür. Bu məlumatlardan
aydın olur ki, bütün XIX əsrdə və XX əsrin əvvəllərində Ordubad şəhərində sənət istehsalının
demək olar ki, bütün sahələrində sənətkarlar fəaliyyət göstərirdi. Bununla belə, tam inamla
söyləmək olar ki, şəhərdə ilk növbədə yerli xammala əsaslanan sənət sahələri daha çox inkişaf
etmişdi. Buna misal olaraq misgərlik sənətini göstərmək olar. Ordubadın ətrafında zəngin mis
yataqlarının olması şəhərdə misgərlik sənətinin inkişafına güclü təkan vermişdi.
XIX əsrin 30-cu illərinə aid məlumatlar əsasında Ordubad şəhərində daha çox
inkişaf etmiş və
geniş yayılmış sənət sahələrini müəyyənləşdirmək olar. Şəhər sənətkarları arasında saylarının
çoxluğuna görə toxucular öndə gedirdilər. Ümumi sayı 177 nəfər olan toxucular [1, v.14-16],
əslində həmin dövrdə şəhərdə fəaliyyət göstərən bütün sənətkarların, az qala yarısını təşkil edirdilər.
Sonrakı yerlərdə çəkməçilər (44 nəfər), müsgərlər (32 nəfər), həllaclar (29 nəfər), boyaqçılar (19
nəfər) və digərləri dayanırdı [1, v.14-16; 9, cəd.5; 16, s.343-346]. Onu da göstərmək lazımdır ki, bu
sənətkarların böyük hissəsi, daha doğrusu 225 nəfəri bazarda və karvansaralarda yerləşən
emalatxanalarda işləyirdilər [1, v.14-16].
Ordubadda sənət istehsalının daha bir fərqli cəhəti onun satış bazarının daha geniş olması idi. XIX
əsrin 60-cı illərinə aid mənbələrdən birində göstərilir ki, Ordubadda “Sənətkarlıq sənayesi Naxçıvanla
müqayisədə çox inkişaf etmişdi və yalnız yerli bazarla məhdudlaşmır; məsələn, dəmirçilik və misgərlik
məmulatları satış üçün Naxçıvan qəzasına və qismən İrana göndərilir”. Oxşar vəziyyət ayaqqabı, ipək,
qaytan və lent (şərid) istehsalı sahəsində də müşahidə edilirdi [12, s.53].