- 38 -
Təcrübə nəticəsində öyrənənlərin təəssürat və reaksiyaları bütün gözləntiləri aşmışdır.
Bəziləri üçün boş vaxt keçirmək, dərslərarası fasilədə sığınacaq yeri olan kitabxana artıq məktəbin
ən maraqlı məkanına çevrilmişdir. Prosesin bu cür tənzimlənməsi müəllimlərə təlim
strategiyalarında çevik dəyişikliklər aparmağa, tədrisi təhsil alanların fərdi xüsusiyyətlərinə görə
diferensiallaşdırmağa imkan verir. Öyrənənlər üçün ən optimal mühit, məkan aşağıda sadalanan
əlamətləri özündə cəmləşdirir:
Təlim prosesi müzakirələrlə müşayiət olunur, öyrənənlər kollaborativ (əməkdaşlıq) mühitdə
fikirlərini divarlara yazaraq metakoqnitiv refleksiya prosesinə cəlb
edilirlər;
Təlim müəllimyönümlüdən
şagirdyönümlüyə istiqamətlənir;
Məkanda fəal
fəaliyyət
göstərmək, özlərini ifadə etmək imkanı kreativliyin
formalaşdırılması və inkişafına zəmin yaradır;
Kreativ layihələrin üzərində fəaliyyət
daha səmərəli olur;
Yeni auditoriyadankənar layihələrin yaradılmasına imkan yaranır.
Belə məkanların mövcudluğu seminar, konfrans, görüşlərin təşkilinə, müxtəlif ideyaların
müzakirəsinə və həyata keçirilməsinə də şərait yaradır.
Açıq təlim məkanının əhəmiyyəti hər kəs tərəfindən lazımi qədər qiymətləndirilmir. Məkanın,
yeni təlim modelinin, təlim mühitinin, çoxseçimliyin informasiya bolluğu dünyasında kreativliyə
müsbət təsirini anlamaqda bəzi insanlar çətinlik çəkirlər. Təhsil ocaqları məkan və interyerdə
mühüm dəyişikliklər etməyə ya çəkinir, ya da bu yolla uğur əldə olunacağına inanmır. Lakin
yuxarıda qeyd etdiyimiz məktəbin nümunəsi belə eksperimentlərin kreativliyin inkişafına müsbət
təsirinin müvəffəqiyətini əyani şəkildə nümayiş etdirir.
Runkonun fikrincə, insanların əksəriyyətində şüuraltı belə fikir formalaşmışdır ki, kreativlik
anadangəlmə xüsusiyyətdir, təlim prosesində inkişaf etdirilə bilməz və bu istiqamətdə istənilən
fəaliyyət zərərlidir. (5) Lakin bu fikirlərin əksini göstərən tədqiqatlar sübut etmişdir ki, müəllimin
düzgün yanaşması öyrənənlərdə kreativ düşüncə tərzini inkişaf etdirə bilər.
Danılmaz faktdır ki, təlim prosesində istənilən fəaliyyət bilavasitə müəllimlə əlaqəlidir.
Müəllim kreativliyin inkişafı üçün nə etməli, tələbələrə necə kömək göstərməlidir, bu məsələləri
təlim prosesinin hansı mərhələsində və necə nəzərə almalıdır? İlk növbədə, müəllim yeni ideyaları
öz təcrübəsində tətbiq etməli, daim araşdırmalar aparmalı, tədqiqatçı, yeni fikirlərə açıq, canlı
təxəyyülə malik və istənilən vəziyyətdə çevik qərar verən, hər zaman öyrənməyə, yeni bacarıq və
texnologiyaların tətbiqinə hazır, bir sözlə, kreativ olmalı, fənnini dərindən və hərtərəfli bilməli,
tələbələrin dərsi, materialı necə qavradıqlarını, mənimsədiklərini anlamalı, müəyyənləşdirməli,
aydın düşünməli, öyrənənlərə səhvlərini, anlaşılmayan məqamları üzə çıxarmağa və təlim prosesini
idarə etməyə yardım göstərməlidir. Ali məktəbdə kreativlik bütün fənlərin tədrisinin bazisi rolunu
oynadığından müəllim fəaliyyətinin aspekti hesab olunur. Digər vacib məsələ kreativliyin
formalaşdırılması üçün müvafiq mühitin yaradılması, müəllimlərin kreativ peşəkarlığının
dəstəklənməsidir. Şübhəsiz, müəllimin kreativliyi üçün müvafiq şərait də mütləqdir. Belə ki,
auditoriyaların darısqallığı, aşağı səviyyəli texniki təchizat yaradıcılığa əngəl törədən faktorlara
aiddir. Kreativlik, ilk növbədə, müəllimin sillabusunda nəzərdə alınmalı, dərslik və dərs
vəsaitlərində öz əksini tapmalıdır. Təlim resurslarının məzmunu kreativ yönümlü olmadığı halda
müəllimin yaradıcı fəaliyyəti çətinləşir. Kreativ təlim mühitinin tənzimlənməsində tələbələrin peşə
xüsusiyyətlərinin formalaşdırılmasına xidmət edən məlumat xarakterli və idraki inkişafa zəmin
yaradan tapşırılqardan istifadə mütləqdir.
Edvard de Bono lateral düşüncə konsepsiyasını irəli sürmüş və “altı düşüncə şlyapası”
texnikasını işləyib hazırlamışdır. (3) Bu strategiya öyrənənlərə müxtəlif istiqamətlərdə problemi
fərqli aspektlərdən araşdırmağa şərait yaradır.
Kreativ düşüncəni sual-cavab vasitəsilə işə salan Sokrat inanırdı ki, ardıcıl, düşünülmüş
şəkildə verilən suallar ideya və fikirlərin dərin araşdırılmasına, mövzunun daha yaxşı
mənimsənilməsinə xidmət edir. Bu texnika “Sokrat sual-cavabı”, “Sokrat tərzi” adını almışdır.
Müəllim və ya tələbə tərəfindən verilən yaxşı sual öyrənənin düşüncə tərzinə güclü təsir göstərir,
müxtəlif məqamlara aydınlıq gətirir, pedaqoji prosesin hər iki tərəfi arasında təbii əks əlaqə yaradır,
dərsi, təlimat prosesini düzgün istiqamətləndirir. Müəllim gün ərzində orta hesabla 300-400 sual
- 39 -
verir. (8) Tədqiqatlar sübuta yetirmişdir ki, müəllim həmin sualların tipini, ifadə tərzini, ardıcıllığını
diqqətlə planlaşdırarsa, öyrənənlərin həm düşüncə tərzi, həm də cavabları tədricən yaxşılaşar. (2)
Qəliz, kompleks mental proseslər tələb edən sualların cavablandırılması kreativliyi stimullaşdırır.
Əgər....nə baş verərdi? Niyə....? səbəb-nəticə tipli suallar tənqidi və kreativ təfəkkürü inkişaf etdirir,
tələbələri araşdırmağa, tədqiqat aparmağa həvəsləndirir. (7)
Öyrənənlərə verilən suallar ətrafında düşünməyi təklif etmək də dəyərli fəaliyyətdir. Qay
Klakston (Skeildən sitat gətirilmişdir) bildirmişdir: “Yaxşı sual vermək uğurlu tələbə olmağın
əsasıdır. (4) Sual verməyi bacarmayan şəxs qaşıqdan yedizdirilməlidir”. Sual formalaşdırmağı
bacaran
tələbə
düşüncə tərzini aydınlaşdırır, müəllimin təlimat verməsinə, təlimin
istiqamətlənməsinə kömək edir və müstəqil kreativ fəaliyyətlə məşğul olur.
Tələbələri sual verməyə həvəsləndirməyin aşağıda sadalanan üstünlükləri mövcuddur:
Fənni daha dərindən öyrənməyə maraq oyadır;
Mövzunu daha dərindən mənimsəməyə zəmin yaradır;
Təlimi stimullaşdırır;
Məzmunun möhkəmləndirilməsini təmin edir;
Mövzuya müxtəlif aspektlərdən baxış imkanı yaradır;
Araşdırmalar üçün plan
və məqsədləri dəqiqləşdirir;
Tələbələri cavabın tapılmasına həvəsləndirir.
Təlim prosesində kreativliyi stimullaşdıran digər bir yanaşma “imkanların düşünülməsi”
adlanır. Bu üsul öyrənənlərdən müxtəlif ideyaların araşdırılmasını və təxəyyüllərindən istifadə
edərək fərqli imkanlar yaratmağı tələb edir. Müəllim dərsdə bir neçə cavablı suallar verirsə, bu,
tələbələrdə özünəinam hissini yüksəldir, yaradıcılıq xüsusiyyətlərini inkişaf etdirir. Öyrənənlərdə
kreativliyi yüksəltməyin vacib şərtlərindən biri də təlim prosesinin problemli tapşırılqlar üzərində
təşkilidir. Problem həlli və tədqiqatların aparılması müasir təhsilin əsas tələblərindəndir. Təlimin
tədqiqat və araşdırmalar üzərində qurulması tələbələri sual və ya problem ətrafında mövcud
biliklərindən istifadə edərək çözüm yolu tapmağa, dərin və hərtərəfli düşünməyə yönəldir. Peşəkar
müəllim tədqiqat sualını, problemi düzgün müəyyənləşdirməklə, tələbələrə lazımi dəstək verməklə
onların düşüncə tərzini inkişaf etdirir. Sualın təqdimat forması tədris olunan fəndən, təhsil alanların
maraq, meyil və tələbatlarından asılıdır. Müəllim müsbət motivasiyanın yaradılması prinsipinə fəal
şəkildə riayət etməli, şəxsiyyətin maraq dairəsini nəzərə almalıdır. Bəzən bir qrup üçün əhəmiyyətli
sayılan problem digərində aktuallıq kəsb etmir. Bu gün təqdim olunan problem müəyyən vaxtdan
sonra aktuallığını itirmək təhlükəsi ilə üzləşə bilir. Bu səbəbdən müəllim təlim vəziyyətlərinin
işlənilib hazırlanmasına, problemin müəyyənləşdirilməsinə xüsusi diqqət göstərməlidir. Problemin
araşdırılması müxtəlif formalarda həyata keçirilə bilər. Belə ki, situasiyadan asılı olaraq kollektiv,
kiçik qruplarla, cütlərlə və fərdi iş formalarına müraciət etmək mümkündür. Seçim təlim
məqsədlərindən asılıdır. Bəzi müəlliflər kreativliyin yalnız qrup işində inkişaf etdirilməsi ilə
əlaqədar fikirlər yürütsələr də, reallıq fərqlidir. Əslində, təhsil alanların diqqətinin sual və problem
ətrafında cəmləşdiyi dəstəkləyici mühitdə auditoriyaya ünvanlanan birbaşa və dəqiq təlimat
kreativliyin formalaşdırılmasına zəmin yaradır. Con Hattl bütün kollektivlə işin əhəmiyyətini
yüksək dəyərləndirmiş və onu təlim prosesində yüksək effektivliyə malik yanaşma kimi
qiymətləndirmişdir. (6) Bütün kollektivlə iş vasitəsilə müəllim auditoriyadakıları düşünməyə
həvəsləndirir, tədris prosesinə cəlb edir, maraqlandırır, yaranan sualları dərhal cavablandırır və
beləliklə, yüksək səviyyəli fəal təlimə şərait yaradır. Müzakirələr tələbələrin suallarından irəli gələn
yeni fikir və konsepsiyalar üzərində qurulur. Müəllim müzakirələri stimullaşdırır, yeni ideya,
düşüncə tərzlərini dəstəkləyir və həvəsləndirir. Pedaqoji prosesin hər iki tərəfi tədricən mövcud
səhvləri də eyni vaxtda üzə çıxarmaq imkanı qazanır.
Tələbələrə problemi düzgün müəyyənləşdirməyi, mövcud bilik və bacarıqları yeni və fərqli
vəziyyətlərdə tətbiq etməyi, məlum faktlarda, hadisələrdə yeni çalarlar üzə çıxarmağı, sintez
aparmağı öyrətmək lazımdır. Təlimdə qeyd olunan əməliyyatların yerinə yetirilməsi əsas anlayış və
qaydaları hazır şəkildə deyil, müstəqil araşdırma nəticəsində təhlil etmək imkanı verir. Tələbələr
problemin müəyyənləşdirilməsində və həlli yollarının axtarılmasında müəllimlə yanaşı fəal iştirak
etməlidirlər. Problem açıq sual şəklində, həmçinin kompleks və bir neçə həll yolundan ibarət ola