- 93 -
NAXÇIVAN DÖVLƏT UNİVERSİTETİ.
ELMİ ƏSƏRLƏR, 2018, № 1 (90)
NAKHCHIVAN STATE UNIVERSITY.
SCIENTIFIC WORKS, 2018, № 1 (90)
НАХЧЫВАНСКИЙ ГОСУДАРСТВЕННЫЙ УНИВЕРСИТЕТ.
НАУЧНЫЕ ТРУДЫ, 2018, № 1 (90)
AYGÜN RÜSTƏMOVA
Naxçıvan Dövlət Universiteti
aygun-rustemova@inbox.ru
UOT:373
KİÇİKYAŞLI MƏKTƏBLİLƏRİN TƏLİM FƏALİYYƏTİNƏ
ADAPTASİYASINDA HAFİZƏNİN ROLU
Açar sözlər: təlim, adaptasiya, hafizə, kiçik məktəbyaşlı, şagird, uşaq
Key words: training, adaptation, memory, little schoolchildren, pupil, child
Ключевые слова: обучение, адаптация, память, младший школьник, ученик, ребенок
Təlim fəaliyyəti kiçik məktəblinin bacarıq və vərdişlər qazanmasına yardım edən mürəkkəb
proses olmaqla, uşaqdan psixoloji xüsusiyyətlərin inkişafını tələb edərək, onun qarşılıqlı
münasibətlər sisteminə daxil olmasını təmin edir. Uşaqlar üçün təlim fəaliyyəti onların həyatının ən
önəmli anlarından biridir. Bu dövr uşağın həyatında yeni əlaqələr, yeni məsuliyyətlər üçün
başlanğıcdır.
Kiçik məktəbyaşı dövrünün əsas istiqaməti öyrənmə fəaliyyətidir. 6-7 yaşlı uşaq üçün
məktəb onun böyüməsi və stressli dövrə keçməsi deməkdir, məhz buna görə də təlimə başlayarkən
uşaqların müəyyən səviyyədə intellektual, nitqi və şəxsi inkişafı vacibdir. Təlim fəaliyyətinin ilk
günlərində kiçik məktəbli məktəbdə kifayyət qədər əziyyət çəkir: Çünki o artıq çantasına
oyuncaqları deyil, kitabları və dəftərləri yığaraq müəllimin verdiyi tapşırıqları yerinə yetirməlidir.
Artıq onun üçün məktəbəqədər dövrdən fərqli olaraq təlim fəaliyyəti, tədris tapşırıqları cizgi
filmlərindən daha vacibdir. Belə ki, kiçikyaşlı məktəbli uzun müddət diqqətini yüksək səviyyədə
mərkəzləşdirməli, müəllimin dediyi hər şeyi yaxşı başa düşməli və yadda saxlamalıdır[3, 1]. Hər
şeydən əvvəl uşağın təlim fəaliyyətinə psixoloji hazırlığı vacibdir. Yəni kiçik məktəblinin təlim
fəaliyyətini mənimsəməsi üçün onun zehni inkişafı təmin edilməlidir.
Öyrənmə prosesi kiçikyaşlı məktəblinin bilik, bacarıq və vərdişlər qazanması ilə onun
psixoloji inkişafını təmin edir. Təlim fəaliyyətinin təsiri altında şagirdin bütün idrak proseslərində
ixtiyarilik, sabitlik, səmərəlilik və məhsuldarlıq inkişaf edərək yeni bacarıq və qabiliyyətlərin
formalaşmasına şərait yaratmaqla onun öyrənməyə adaptasiyasını sürətləndirir.
Kiçikyaşlı məktəblilərin təlim fəaliyyətinə adaptasiyasında hafizənin böyük rolu vardır. Yaşanan
hadisələrin, qazanılan təcrübənin və öyrənilənlərin düzgün və güvənilən şəkildə zehində qorunub
saxlanılması və lazım olduqda xatırlanması hafizə adlanır(Aral 2000, Köknel 2003, Munger 2004)[8, 1].
Hafizə bizim zehnimizin, şüurumuzun, zəkamızın təməlidir. Bəzi alimlər hafizəni sehirli
qutu adlandırırlar. Çünki məhz hafizə sayəsində gələcəyimiz üçün keçmişimizi qoruyub saxlayırıq.
Hafizə insanların aldığı məlumatları saxlayan, xatırlayan və təkrarlayan mürəkkəb idrak prosesidir.
Psixoloq Strenberq (2000) qeyd edirdi ki, hamı hafizənin nə olduğunu açıqlaya bilər, amma digər
tərəfdən heç kim onun nə olduğun anlaya bilməz[6, 13].
Ətraf mühitdə baş verən hadisələrin duyqu orqanlarının köməyi ilə beynin xüsusi
bölməsində hifz olunması və lazım olduqda yenidən işlənib xatırlanması hafizə adlanır[8, 1].
Kiçikyaşlı məktəblilər üçün hafizənin inkişafı uşaqlarda düşünməyi, başa düşməyi,
öyrənməyi öyrədən və nəticədə təlim fəaliyyətinə adaptasiyasını təmin edən idrak prosesidir.
Öyrənmə fəaliyyətində müvəffəqiyyət və adaptasiya əsasən uşaqların hafizələrinin inkişaf
səviyyəsindən asılıdır. Kiçikyaşlı məktəblilərin hafizə prosesinin formalaşma və inkişaf
məsələlərinin nəzəri və tətbiqi aspektlərini bir çox xarici ölkə psixoloqları araşdırmışlar (Qalperin,
P.Y.Kolominskiy, Y.P.Nemov, R.S.Panko, E.A.Smirnov)[4, 1].
- 94 -
Tədqiqatçılar A.A.Smirnova və P, İ.Zinçenko hafizənin inkişafını yeni və mövcud tələblərin
yerinə yetirilməsində uşağın əsas fəaliyyəti kimi qəbul edirdilər. Hafizə uşağın intellektual
qabiliyyətlərinin inkişafını təmin edən zəruri idrak proseslərdən biridir.
Kiçik məktəb yaşı dövründə digər idrak prosesləri kimi hafizə də dəyişikliyə məruz qalır. Belə
ki, məktəbəqədər yaşlı uşaqlarla müqayisədə kiçik məktəblilərin hafizəsi daha mütəşəkkil xarakter
daşımaqla yaddaşlarında tədricən müstəqillik, şüurlu tənzimlənmə yaranır. Onlarda əyani obrazlı hafizə
inkişaf edir. Kiçikyaşlı məktəbli konkret obyektləri üzü, rəngi, faktları daha yaxşı yadlarında
saxlayırlar. Ona görə də uzun-uzadı izahatları yadda saxlamaqda çətinlik çəkən 6-7 yaşlı uşaq əyani
olaraq qavradığı materialı asanlıqla yadda saxlaya bilir. Bu həmin dövrdə uşaqlarda birinci siqnal
sisteminin, o cümlədən obrazlı hafizənin hələ üstünlük təşkil etməsi ilə əlaqədardır[5, 139].
Uşaqların hafizəsi məktəbdə müntəzəm təlim-tərbiyə sayəsində sürətlə inkişaf etdiyinə görə
məktəbyaşı dövrü uşağın yaddaşının, hafizəsinin inkişafı üçün ən məhsuldar dövrdür.
Hafizənin aşağıdakı növləri vardır:
- Sözlü
məntiqi hafizə;
- Əyani obrazlı hafizə;
- Emosional hafizə;
- Hərəki hafizə.
Kiçik məktəb yaşı dövründə, xüsusilə 7 yaşda uşaqda bu hafizə növlərinin demək olar ki,
hamısı inkişaf etməyə başlayır. Buda onu sübut edir ki, kiçik məktəblidə hafizə bütün duyqu
orqanları sayəsində -görmə, eşitmə, iybilmə, toxunma duyquları sayəsində mümkün olur. Bununla
bərabər qeyd etmək lazımdır ki, uşaqda bütün hafizə növlərinin hamısı eyni intensivliklə inkişaf edə
bilməz. Nəzərə almaq lazımdır ki, hər bir uşağın individual xüsusiyyətlərindən asılı olaraq hafizənin
də xarakterik xüsusiyyətləri dəyişir. Yəni uşaqların bəziləri məlumatları eşidərək, bəziləri görərək,
bir
digərləri isə toxunaraq, hiss edərək yadlarında saxlayırlar.
Təlim fəaliyyətində uşağın hafizəsinin ixtiyari və qeyri-ixtiyari kimi növləri də özünü
göstərir. Qeyri-ixtiyari yaddasaxlama zamanı obyektlər uşağın hər hansı bir səy göstərmədən yadında
qalmasıdır. Uşaqlar onlar üçün maraqlı, həyəcanverici materialları, məlumatları, obyektləri qeyri-
ixtiyari olaraq yadlarında saxlayırlar. İxtiyari yaddasaxlama üçün isə kiçik məktəbyaşlı şagird xüsusi
iradi səy göstərir. Uşağın hafizəsindəki ixtiyarilik hələ bağça yaşı dövründə formalaşmağa başlasa da
məktəbə başladığı zaman yenə də çətinlik yaşayır. Nəzərə almaq lazımdır ki, kiçikyaşlı məktəblinin
hafizəsinin inkişafı onda ixtiyari diqqətin yaranması və güclənməsinə səbəb olur. Ümumiyyətlə
uşaqların hafizəsinin inkişafı üçün onların nitqinin inkişafının böyük rolu vardır. Çünki məhz bu
dövrdə uşaqların söz ehtiyyatı az olduğuna görə öyrəndiyi materialları öz sözləri ilə əvəz edə bilmirlər
ki, nəticədə hafizələrində passivlik yaranır. Şagirddə ixtiyari hafizənin formalaşmasında hər şeydən
əvvəl yazılı nitq və rəsmin əlamət və simvolik vasitələrinin rolu böyükdür. Yazılı nitqin inkişafı ilə
bağlı, xüsusilə III sinifdə kiçikyaşlı məktəbli simvolik vasitə olan hərfləri və rəqəmləri hafizəsinin
köməyi ilə xatırlaya və yavaş-yavaş uzun müddət hafizəsində tuta bilir. Ümumiyyətlə kiçikyaşlı
məktəblinin hafizəsinin inkişafı və onun təlim fəaliyyətinə adaptasiyasını təşkil etmək üçün ilk öncə
öyrənilən materialın təkrarı vacibdir. Hafizə ixtiyari və qeyri-ixtiyari olduğu kimi qısamüddətli və
uzunmüddətli də ola bilər. Uzunmüddətli yaddaş olmadan təlim fəaliyyətində müvəffəqiyyət
qazanmaq mümkün deyil.Çünki məhz uzunmüddətli hafizə sayəsində məktəbli öyrəndiyi materialı
miqdar və məlumatın saxlanılması baxımından məhdudiyyətlər yaşamır. Uzunmüddətli hafizənin
inkişafı təfəkkür və güclü iradi səylərdən asılıdır. Əgər hafizə yaxşı inkişaf edibsə, demək ki, təfəkkür
düzgün və sürətli fəaliyyət göstərir. Təlim fəaliyyəti kiçik məktəblidən hafizəsini şüurlu şəkildə
inkişaf etdirməyi qarşısına məqsəd olaraq qoyur.
Kiçik məktəblilərin təlim fəaliyyətinə adaptasiyası üçün onların məntiqi hafizələrinin
inkişafı vacibdir. Məktəbəqədər dövrdə mexaniki yaddaş üstünlük təşkil etsədə, məktəb təliminə
başlamaqla məntiqi hafizə güclənməyə başlayır. Buna baxmayaraq kiçikyaşlı məktəbli üçün
öyrənilmiş materialı əzbərləmək xarakterik haldır. Çünki onda hələ də tam ixtiyari yaddasaxlama və
yadasalma formalaşmamışdır. Kiçikyaşlı məktəblidə semantik hafizə inkişaf etmədiyi üçün məntiqi
hafizə kifayyət qədər formalaşmır. Belə ki, onlar öyrəndikləri materialları mənanı dərk etmədən
əzbərləyərək yadlarında saxlayırlar. Təbiiki mexaniki hafizə sayəsində kiçik məktəbli əlifba sırası,