37
-Düz deyirsən, dostum, musiqi başqa aləmdir. Isgəndər zülqərneyin
boynuzunu da bütün dünyaya yayan bu qamış tütək olmuşdu... Mən bu tütəkdən
təzəsini düzəldərəm. Bunu sən götür. Qoy yadigar olsun.
Vasili sevincək tütəyi alıb diqqətlə baxdı, baxdı... Dodağına yaxınlaşdırdı,
çalmaq istədi, bacarmadı.
-Al, qardaş, lalın dilini anası bilrə.
Tütəyin ahı zəmilərin xışıltısına qarışdı. Elə bil kimsə vaxtı ilə millətin
bütün kədərini, dərdini bu qamış tütəyə doldurubmuş. Zəmilər də, xınalı qayalar
da, çiçəklələyən torpaq da sanki dilə gəlib Nəbiyə deyirdi: “ Bu ağır kədəri
əritməkdə sən tək deyilsən,indi sənin məslək dostun var, böyük arxan var! ”
Vasili fikirləşirdi: “Bəs mən nə bağışlayım ki, dostumun ürəyincə olsun?”
Axı onun nəyi vardı aynalıdan başqa! O, cəld tüfəngini çiynindən aşırıb Nəbiyə
uzatdı:
-Al, qardaş, gərəyin olar.
Vallah, almaram. Gecən-gündüzün çöllərdə keçir. Insafdır sənin yarağını
götürəm?! Mənim özümündə tüfəngim var. Evdə qalıb.
-İnciyərəm, al!
Dostların başı söhbətə qarışmışdı. Fürsət gözləyən çalağan şığıyıb təzə
doğulmuş quzunu anasının döşündən qopardı. Nəbi aynalını üzünə aldı. Güllə
açılan kimi çalağan yelpic təki qanadlarını yığdı. Quzu onun caynağından
qopub şappıltı ilə sıldırım qayalara çırpıldı, dalıncada çalağanın özü.
-Əhsən, qardaş. Gözdən yaman itisən! Vay Kərbəlayı Cəfərin halına...
-Qardaşım Vasili, belə silah ələ düşməz. Qiyamət atır.
Nal səsləri dostların söhbətini yarımçıq qoydu. Qaratikanların arasından
əvvəlcə Kərbəlayı Cəfərin buxara papağı, sonra isə atının qaşqası göründü. O,
atını çapa-çapa ağzının söyüşünü hara gəldi dağıdırdı:
-İt uşaqları, it! Afat çəyirtkəsi kimi yenə daraşıblar mərzlərə. Ona bax, lüt
İsmayıl gör necə şələ ot biçib?! Ölüb də yiyəsi!... Mən köpəkoğlunun çörəyinin
duzu yoxdur, özüm də bilmədən qoynumda canavar bəsdəmişəm!
Qoca qabağına keçən kəndlilərin baş-gözünü qapazlayır, ot şələlərini
dağıdır, onları atdöşü eləyirdi. O, Qəmər dayı mərzdə görəndə az qaldı
hirsindən patlasın:
-Bu yabı kimindir? Gəlsin öryünü bağlasın qılçına! Yoxsa... axmaq çobana bir
bax, az qalıb mənim övladlarımın süd payına da şərik çıxsın!
Nəbi addımlarını yeyinlətdi:
-Dostum Vasili, sən qəti danışma, o, azğınla özüm hesablaşacağam!
Hürüşünü qanmayan it, yuvasına qurd gətirər!
CANAVAR TÖVLƏYƏ SOXULUB
İl şaftalı ağacı kimi necə də tez qocalarmış! Nəbi bir səhər durub gördü ki,
Kərbəlayının ot tayaları atasının başı təki ağarıb. Dağlar qar, düzlər qar!
Mollunun alçaq miskin komaları çurumuş göbələyə bənzəyirdi. Hər yandan
qarın xışıltısı eşidilməkdə idi; qoca, cavan deyinə-deyinə evlərin üstündə
kürüyürdü.
38
-Bu qar deyil, bəladır, bəla!
-Zəhrimar heç kəsmək bilir ki!... Mal-qaramız tövlədə acından batır!
-Allah Kərbəlayı Cəfərin evini yıxsın. Qoydu ki, vaxtında ot-alaf
toplayaq?! Kol-kosun içindən cəngə-cəngə yolduğumuz otu da şallaq zoruna
tutub əlimizdən aldı. Yazıq Nəbi az qalmışdı bizim üstümüzdə xətaya düşə.
Qış bərk gəldiyindən ac köpəklərin bayramı idi. Hər gün tövlələrdən neçə-
neçə mal cəmdətini sürüyüb dərəyə tökürdülər. Yalquzaqaların qorxusundan
Yazı düzündən keçmək olmurdu. Həkəri də, Bəgüşad da buzlamışdı.
Dəyirmanlar işləmədiyi üçün qız-gəlinlər kirkirə işlədirdilər.
Kərbəlayı Cəfərin isə araz aşığından, Kür topuğundan idi. Hələ taxıl
quyularına əl vurulmamışdı. Anbarları unla dolu, ilxılarının, sürülərinin, mal-
qarasının isə yeri isti, otu da bol idi.
Nəbi axşamlar tövlədə, sürünün yanında qalırdı. Bir dəfə gecəyarı qapı
yavaşca döyüldü.
-Kimsən?
-Mənəm, oğul...
Nəbi İsmayıl kişinin tutqun səsini tanıdı. Taxçadakı saxsı çırağı yandırıb
qapını açdı. Içəri qar töküldü. Qoyun iyi buğa qarışıb bayıra axdı. İsmayıl
kişinin lopa bığları sırsıra bağlamışdı. Çənəsi çənəsini sındırırdı. Çuxası
şaxtadan taxtaya dönmüşdü. O, papağının qarını çırpanda sürü hürküşüb
tövlənin küncünə yığıldı. Çırağın işıığında qoyunların gözləri zümrüd təki
yanırdı.
Nəbi titrəyən qonağını başdan-ayağa gözdən keçirib onun belinə doladığı
qəzil çatını açmaq istədi.
-Bala, sən zəhmət çəkmə, bir az qızınım, özüm açaram.
-İsmayıl dayı, zəhməti yoxdur... Bəs niyə belə gödək çatı gətirmisən?
-Oğul, elə bunun arası tutunca ot versən bəsimdir. Inəyim acından ölür.
Allah səni min budaq eləsin.
-Ot sarıdan fikir eləmə. Arxamca gəl. Amma ayağını izimə qoy ha, yoxsa
Zalım duyar, qazdan da ayıqdır.
Ismayıl hərdən sürüşürdü. Yazıq qoca iməkləyə-iməkləyə qalxıb Nəbinin
yapıncısından tutur, özünü ayaq üstə güclə saxlayırdı.
Onlar üstünü qar basmış yonca tayasının yanında dayandılar. Tayanın
sökülən yeri qaranlıq mağaraya bənzəyirdi. Nəbi tayada bir neçə iri yonca bağı
çəkib çatının üstünə qoydu. Şələnin bərk-bərk sıxdı:
-Di, İsmayıl dayı, tez ol,gəlib-eləyən olar.
-Gedək, oğul, gedək. Görüm, gözəgörünməz allah səni eldən əskik
eləməsin. Boynumda çox haqqın var. Allah qoysa bu ildən atanla ortaq
olacağam. Zəhra xalan səndən yaman razılıq eləyir. Deyir ki, Nəbi dana-
buzova gedəndə bizdən qəti süd almazdı. Torpağı sanı yaşayasan, rəhmətlik
dayına, İldırıma çıkmisən...
Nəbi qayıdanda tövlədə tappıltı eşitdi. “Nə olub görəsən?”
Çıraq sönmüşdü. Tövlə qaranlıq idi, yalnız bacadan işıq gəlirdi. Qoyunlar
küncə təpilmişdi. Sürünün içində bir cüt göz yanırdı. Nəbini təəccüb bürüdü.