100
-Naçalnik, bu izlərdən baş açmaq çətindir. Doğrudan, eşitmişdim qaçaq bic
olar, ancaq Nəbi kimisini görməmişdim. O quldur bu yerlərin yol-yolağasına yaxşı
bələddir. Bələd olmasaydı, onun izinə düşüb çoxdan tapmışdıq.
-Məmməd bəy, istəyir bələd olsun, istəyir olmasın, bu gün o kafiri
tutacayıq, vəssalam! Qaçaqlar Həcəri heç hara apara bilməzlər.
Qaçaq Nəbinin dəstəsi qamışları əzmiş, gölməçələrin aynasını sındırmışdı.
Bəylər uzun burunlarını sərhədçi itləri təki bu aynalara uzadırdılar. Lehmədən
keçən köhlənlər ağır bədənlərin altında burğuya dönür, ayaqlarını bataqlıqdan
şappıltı ilə çəkib çıxarırdı.
-Arxamca! O kafirlər bu cəzirədə olacaqlar. Onları əsir almayınca geri
dönməyəcəyik!
Səlim bəyin qışqırtısı quşları yuvasından uçururdu. Arabir qamışlığı yaran
çöl donuzlarının, porsuqların xorultusu eşidilirdi. Bu xəlvətxanalarda xanlıq edən
canavarlar, çaqqallar, tülkülər hay-küydən qorxub özlərini ora-bura vururdu.
Səlim bəy dəstəsi ilə yenidən o taya addadı. O, lilli, qumlu sahildə qalmış at
izlərini görəndə sevindi, elə bil tələsinə ov düşmüşdü.
-Ağalar, bu ləpirlər hara sarı gedib?
-Naçalnik, o taya addayıblar.
-Bəlkə iranlı Qaçaq Nəbidir, yenə xortdayıb?
-Allah bilir, naçalnik!
Bəylər el yolu ilə xeyli irəlilədilər. Qarmaqarışıq ləpirlər onları yenə də
çaşdırdı. Nəbi demişkən, bu ləpirlərdən Səlim bəy nədir, heç şeytan da baş aça
bilməzdi. Bəylər bilmirdilər ki, hansı səmtə getsinlər. Günəş batırdı...
Həcər bərk ağrı çəkirdi. Qaçaqaçda at onu silkələyib ağrısını daha da
artırmışdı. Azad olmaq üçün isə adada, bir qarış da olsa quru yer yox idi. Dalğalar
indi də, yarpızlığı doğrayırdı. “Nə etməli?” Qaçaq Nəbi çarə tapdı. O, dörd atı bir-
birinin yanına çəkdi. Tüfəngləri atların belinə pərdi təki düzdü. Onların üstünə
qamış döşədi, kürkünü də qamışın üstünə sərdi... Yumşaq bir yuva, isti bir bucaq,
kiçik bir sığınacaq, e
,
tibarlı bir səngər...
-Mən hardayam, Nəbi? Elə bil axırıq!
Həcər, doğrudan da, harda olduğunu hiss etmirdi. O, at belində kürkün
üstündə yay kimi qıvrılıb-açılırdı. Gözəl, gəlininin başının üstündə şama
dönmüşdü. Onun bir gözü yenə Həcərdə, o biri gözü Qaradağın başını alışdıran
qara buludlarda idi. Dağın zirvəsindən dəhşətli xırıltı eşidilirdi. Sanki Qaradağ
uçur, dağılırdı. Sanki nəhəng qayalar Həcərgilin başına töküləcəkdi. Nəbi atların
cilovundan bərk yapışıb onları aralanmağa qoymurdu. Araz artıq köhlənlərin
ayağının altını yuyub aparırdı. Qaçaqlar bir qədər aralıda keşik çəkirdilər. Şimşək
tez-tez onların qəzəbli üzünü Araza da göstərirdi. Mehdi bərk təlaş içində idi. O,
hərdən anasının yanına gəlib Həcərdən xəbər tutmaq istəyəndə qardaşı açıqlanırdı:
-Get burdan, Mehdi!.. Sərvaxt olun, bəylər belə ağır dəqiqədə bizi
yaxalaya bilərlər...
Qaçaqların hamısı at belində idi. Qamışlar taclarını onların üzünə hüznlə
toxundurub yırğalanırdı. Atlar bir yerdə qərar tuta bilmirdi. Dalğalar getdikcə
onların ayaqlarının altını oyurdu. Araz cəzirədəki hər şeyi qarət edirdi. Günəş
batdığından kölgələr qarışmış, aləm kömürə dönmüşdü.
101
Arabir güllə səsi eşidilirdi. Körpə, dalğaların əsiri olan atların belində,
buludların odlu oxları altında, güllələrin vıyıltısını eşidə-eşidə dünyaya gəlirdi!..
Gözəl, Həcərin dağınıq saçlarını sığallayır, onun tərli, odlu yanaqlarından öpürdü.
-Qorxma, mənim blam, ilki elə belə olar. Mən də bu cür ağrı çəkmişəm!
Inşallah, indicə qurtararsan!
-şimşək sanki Qaradağın başında kiminsə dünyaya gəlişinə imza atır, onun
adını göylərin sinəsinə həkk edirdi. Kazaklar, sərhədçilər, bəylər artıq qaçaqların
gizləndiyi cəzirəyə doluşmuşdular. Onlar Nəbiyə tərəf gəlirdilər, Arazın uğultusu
hamının qulağını batırmışdı, Mehdigil bəylərin gəlişindən xəbərsiz idilər.
Yenə şimşək oynadı. Nəbi bəylərin ona yaxınlaşdığını görüb Aynalısını
ayağa çəkdi: “Qoy gəlsinlər!... Qoy gəlsinlər!”
Quzğun qanadlı dalğalar dünyaya gələn körpəni “beşiyi” ilə birlikdə
çalxalayırdı. Göylər xırıldayır, gur-gur guruldayırdı, sanki göylərin gözəgörünməz
dəmirçiləri qara buludları xınca-xınca doğrayıb onlardan dolu hazırlayırdı! Fındıq
boyda tökülən doluya baş-göz çətin tab gətirirdi. Səlim bəyin dəstəsi qaban ovuna
çıxmış vəhşi tayfalar təki çığırışırdı. Qaçaq Nəbinin sağ qaşının üstündəki çapıq
şimşək təki alışmışdı: “Aynalı əlimdədir, lap qoşun gəlsin, mən Həcərimi onlara
vermərəm!”
Bu andan Qaradağın zirvəsində çaxnaşan buludlar bir də nərildəyib alışdı.
Sanki Rüstəm Zal pəhləvan nəhəng qılıncı ilə dağın başındakı buludları şaqqaladı.
Araz boyu bir anda gündüzə döndü. Səlim bəy Həcərin at üstündə azad olduğunu
görən kimi bağırdı və iki əl ilə gözlərini qapadı:
-O!... Ağalar, mən nələr görürəm!.. Atların başını geri döndərin! “Mənim
taleyim... Mənim məhəbbətim ... Mənim arzum... bilirəm nə üçün bunlar... mən öz
itmiş məhəbbətimi axtarıram! Onu hökmən tapacağam! O qaçaq qız isə elə bilir
mən ona işgəncə, əzab, əziyyət vermək üçün dünyaya gəlmişəm. Əfsus ki, o hələ
məni yaxşı tanımayıb. Əgər əlaçım olsaydı bu anda onu quduz dağalrın ağzından
alıb mələklərin qanadları üstə atardım. Kaş mən onu belə bir qorxulu vəziyyətdə
görməyəydim”.
... aynalı at belində düşüncəyə dalmış Səlim bəyə tuşlanmışdı. Araz atları
aparırdı. Hərdən yaylım atəşi eşidilirdi. Dünyaya insan gəlirdi!.. Nəbi acı-acı
gülürdü:
-Ha-ha-ha... getdilər, qoy getsinlər, yoxsa...
“İnqa, inqa!..” – çağanın səsi atasının sözünü dilində qoydu. Gözəl əlini
sevincək oğluna uzatdı:
-Nəbi, gözün aydın, tez ol xəncəri ver oğlunun göbəyini kəsim!
...At belində inləyən “arğan” artıq susmuşdu. Sanki bütün fəlakət çağanın
başında imiş. Sanki indi hər şey körpənin xatirinə gülümsəyirdi... Araz elə bil taxt-
tac üstündə oğlunun gözünü çıxaran bə
,
zi şahlar təki peşmançılıq çəkir, ağ saçlarını
yolurdu... Cəzirə göbələk kimi iriləşib üzə çıxırdı. Qaçaqlar hələ bu günkü qədər
şad olmamışdılar. Onlar Nəbini dövrələyib muştuluq istəyirdilər:
-Vallah, qoç kəsməsən, inciyərik.
-Qoç nədi, addayaq İrana, orda böyük dəsgah açacağam. Tez olun atlanın,
balaca süvari səfərə çıxmaq istəyir.