112
da gedəcəyik Şeytanlı dərəyə. Dünən körpə kefsiz olmasaydı, biz də gedib qalardıq
Şeyxgildə...
-Şeytanlı dərə hardadır? Nəbinin gecə vaxtı orda nə işi var?
-Gözəl xala, var ki, gedib də...
-Vallah, bilməsəm, ürəyim partlar. Nəbinin məndən gizli işi olmazdı. Nə
əcəb bunu mənsiz tutub? Həcər boynuna aldı ki, bu işdə Nəbinin günahı yoxdur,
mən qoymamışam sənə bir söz desin.
Gözəl oğlanlarından ayrı düşəndə az qalırdı başına hava gəlsin. Məgər qərib
ellərdə baş saxlamaq asandır?! Neçə aydır ki, rus padşahı İran şahı ilə, Türkiyə
sultanı ilə əlaqəyə girib, Qaçaq Nəbinin dəstəsini yerdə də axtarırlar, göydə də.
Səlim bəy tacir Hacı Fərəcoğlu ilə birlikdə Qaçaq Nəbinin arxasına casus salmışdı.
Səlim bəy Qara Nəbiyə min onluq qızıl boyun olmuşdu ki, Qaçaq Nəbini aradan
götürsün. Kərbəlayı Cəfər bu tayda Qaradağ mahalının xanı ilə üç dəfə
görüşmüşdü. O görüşlərdə tacir Hacı Fərəcoğlu da olmuşdu.
At bərk havalanmışdı. Cilovunu yığmaq mümkün deyildi. Atlı palıdın
yanından çaparaq ötdü. Həcər öz-özünə: “Mənim, bu atlıdan heç gözüm su içmədi.
Görəsən, o kimdir?”
-Tanımadın! Canavarpapaqdır!
-Canavarpapaq?!
-Bu Canavarpapaqdan hamı qorxur.
Həcər xanım bütün İranda Canavar papaq ləqəbi ilə məşhur olan quldurbaşı
Qara Nəbi barəsində bildiyini, eşitdiyini, gördüyünü qayınanasına danışdı. Gözəlin
ürəyinə qorxu doldu.
Kimsəsiz bir dərədə Qara Nəbinin papağını görən olsaydı, bağrı çatlardı.
Koppuş, ətli qara sir-sifəti də zəhmli idi, anası sanki onu qara zəhərdən
yoğurmuşdu. Hirslənəndə monqol gözlərinə bənzər balaca gözləri qəzəbdən
alacalanırdı. Pələng biləkləri sanki qılınc vurmaq üçün yaranmışdı. Darvaza
kürəyinin dalında beş adam gizlənərdi. Deyirdilər ki, Qara Nəbi on adamla
təkbaşına qılınclaşa bilir. Deyirdilər ki, hələ indiyəcən güləşməkdə, xəncər
oynatmaqda, tüfəng atmaqda, at çapmaqda onun qabağına şahın heç bir sərbazı də
çıxa bilməyib. Qara Nəbinin sallaq bığları, ətli dodaqları, donqar burnu və
qulağından asdığı nal boyda qızıl sırğaları onu daha zəhmli göstərirdi.
Gözəl belə bir əcayib məxluqu təsəvvürünə gətirdikcə canına üşürtmə
gəlirdi. “Lap əzrayıldır, əzrayıl...” – deyib özü-özünə pıçıldayırdı.
Qara Nəbi kefi çəkəndə tacir olurdu, çəkməyəndə quldur. Əsas işi İrandan
bu taya mal addatmaq idi. Sərhədçilər neçə dəfə onu Xudafərin körpüsündə
gülləyə basmışdılar, yenə sudan quru çıxmışdı. Deyirdilər ki, o quldurun
bədənində əllidən çox çapıq yeri var, son vaxtlar Qaçaq Nəbinin adı ilə
soyğunçuluq edir.
Atlı karvansaraya çatan kimi hamı yuxudan qalxdı. Tacirlər tələsik geyinib
“hörmətli qonağın” qabağına çıxdılar. Yoğun bir tacir onu qabaqladı, əlini bərk-
bərk sıxdı:
Pəh... pəh... kimi görürük!... Həmişə Siz gələsiniz, ağayı Nəbi! – Tacir əlini
ərklə onun çiyninə qoydu. – Ağayı Nəbi, əntiqə tirmə şal məndə, ingilis mahudu
113
məndə, hacımənəbax məndə...Nə istəsəniz, taparam, mənim əlim çox yüngüldür,
inanın allaha, bu dəfə də mənimlə alver etsəniz, ziyan çəkməzsiniz.
Topasaqqal, yastısifət tacir isə hündür qamətini Qara Nəbinin qabağında
kamana döndərib sırtıq-sırtıq irişirdi:
-Ağayi Nəbi, bizim sövdəmiz həmişə baş tutub, inşallah, yenə də baş
tutacaq. Mənim əlim çox xeyirlidir. Tehrandan, Təbrizdən yenə əntiqə darçın,
mixək, sarıkök, hil, zəncəfil alıb gətirmişəm... Arazın o tayına gərək elə şey
addadasan ki, üstündə baş yarıla.
Qara Nəbinin seyrək, saqqal, bığlarının hər tükündən elə bil bir şeytan
asılmışdı. Onlara nə “hə”
deyirdi, nə də “yox”.
Palıd xışıldayır, çay axır, gecə əriyirdi. Gözələ elə gəlirdi ki, gördükləri,
eşitdikləri xəyaldır.
-Həcər, dedin ki, o “əzrayıl” mənim oğlanlarımın düşmənidir? Görüm
onun yəhəri qanla dolsun!
-Bəli, Gözəl xala. Ancaq biz elə düşmənlərdən qorxmuruq!
...Qara Nəbi tacirlərdən hirsli-hirsli soruşdu:
-Qaçaq Nəbi bu tərəflərə gəlməyib ki?
-Ağayı Nəbi, heç o quldur bir saat bir yerdə dayanır ki...deyə topa saqqal
tacir yanıqlı-yanıqlı cavab verdi. – Bozatına minib İrandan vurub Turandan çıxır.
O günü Təbrizdən mal gətirəndə onun dəstəsini Enyalı dağının Payan gədiyində
gördüm, az qalmışdılar bizi soyalar. Güclə qaçıb yaxamızı qurtardıq. Keçən duz
günü isə qaçaqları Qaradağ mahalının Xürrəmyurd yaylağında görüblər. Dünən də
o quldur öz dəstəsi ilə Kəleybər kəndində Şeyxə qonaq imiş. Indi də, nə bilim,
deyirlər ki, addayıb Şeytanlı dərəyə.
-Şeytanlı dərəyə?!
-Bəli, o yana, Bəzz qalasından o tərəfə.
-Orda nə edir?
Tacirlər “əzrayılı” qızışdırdılar. Şişman tacir Qara Nəbinin düz çənəsinin
altına girmişdi.
-Nə bilim, ay başına dönüm, deyirlər o taydan Qaçaq Nəbinin dalınca
adam gəlib, qaraçı Lotu Kərimdi, kimdi.
Deyirlər o tayda nə olubsa, hamısını çatdırıb Qaçaq Nəbiyə. Nəbi də düşüb tacir
Hacı Fərəcoğlunun izinə.
-Demək, o quldur indi Şeytanlı dərəsindədir?!
-Elədir, ağayı Nəbi. Allahın qılıncını götürüb o qulduru bizim İrandan
qovan bir igid olsaydı, biz zavallı tacirlər də bir asudə nəfəs alardıq. Şuşadan
buradək gözümüzü yummamışıq. Şıqqıltı eşidən kimi ürəkk-göbəyimiz düşürdü.
O quldur yetənə yetir, yetmiyənə də bir daş atır. Deyirlər indi də İran xanlarının
torpağını yoxsullara paylayır... Biz fağır tacirlər də onun qorxusundan
alverimizdən qalmışıq, daha kəndlərə çıxa bilmirik.
-Fikir eləməyin, o quldurun əcəli yaxınlaşıb. “Demək Qaçaq Nəbi indi
düşüb bizim izimizə. Yəqin, qaraçı Lotu Kərim hamısını onlara danışıb. Qaçaq
Nəbi indi bilir ki, Səlim bəylə tacir Hacı Fərəcoğlu onun başına min onluq qızıl
qoyub. Sağlıq olsun, Qaçaq Nəbinin başını kəsib o qızılları qoparacağam”.