30
Məhsəti Gəncəvi misralarda süzgün baxışların təsvirindən
doğan dərin məhəbbət hissinin yaranmasını ifadə etmişdir. Bu
məhəbbət hissini ərəb əlifbasında hərflərin yaratdığı iki sözün
müqayisəsi yolu ilə ifadə etməkdə çox böyük ustalıq
göstərmişdir. Belə ki, ikinci misrada adları çəkilən “eyn”, “şin”,
“qaf” hərflərinin birləşməsindən yaranan “Eşq” sözü, üçüncü
misrada adları çəkilən “sin”, “nun” və “kaf” həriflərinin
yaratdığı “səng” (daş) sözü ilə (ərəb əlifbasında sait səslər yazıda
ifadəsini tapmır) müqayisə etmişdir. Lirik parçanın məzmunu
belədir: “Sənin baxışların məndə sənə qarşı olan eşqin
(məhəbbətin) ifadəsidir. Mən daş deyiləm, bu süzgün baxışların
mənasını başa düşürəm: Məhsəti Gəncəvi sözün müxtəlif
çalarlarından məqamında məharətlə istifadə etməyi bacaran bir
şairdir. Eyni sözün müxtəlif mənalarda işlədilməsi Məhsəti
rübailərinin poetik xüsusiyyətlərindəndir. Aşağıdakı rübaini bu
baxımdan nəzərdən keçirməyi lazım bilirik.
Xöşbəxtdir rüxünə rüx qoysa hər kəs,
Rüxün eyləyəni şah edə bilməz.
Mən oyuna baxım, yoxsa rüxünə?
Bu halda neyləyim, mat qalmayım bəs?
Şair həmin rübaidə bu gün də fikri prosesin, düşüncənin
fəallığı üçün çox mühüm vasitə olan şahmat oyununun
xüsusiyyətindən danışır. Cəmi 4 misradan ibarət olan şeir
parçasında rüx sözü bir neçə dəfə təkrar olunur, lakin həmin
sözlər ayrı-ayrı mənalarda işlənir: Birinci misrada rüx sözü fars
dilində üz mənasında işlədilmişdir. İkinci misradakı rüx sözü
gedişi ilə fərqlənən şahmat oyunundakı fiqurun adıdır.
Yuxarıda qeyd edildiyi kimi, Məhsəti Gəncəvinin bədahətən
söz demək qabiliyyətinə malik olmasıdır ki, rübaidə öz əksini
tapır. Belə ki, bütün tədqiqat əsərlərində deyildiyi kimi, Məhsəti
Gəncəvi gözəl şahmat oynamağı sevirmiş. Bu rübainin yaranma
tarixçəsi belə olmuşdur: həyat yoldaşı Xətiboğlu ilə şahmat
31
oynayır. Rübaidən də aydın olduğu kimi, Xətiboğlu simaca
gözəl bir adam olub. Xətiboğlu oyun prosesində rüxlə(vəzirlə)
şah elan edir. Məhsəti xanımın şahı gizlətməyə yeri olmadığı
üçün mat vəziyyətdə qalır. O, pərt olmamaq üçün bədahətən
həmin rübaini deyir. Rübainin lirik məzmunu ondan ibarətdir ki:
sən o qədər gözəlsən ki, sifətinin gözəlliyi mənim diqqətimi cəlb
elədi, fikrim oyundan yayındı. Belə halda mən necə mat
olmayım. Gətirilən nümunələrdən aydın olur ki, Məhsəti
Gəncəvi təsirləndiyi hər kiçik hadisə ilə bağlı bədahətən şeir
deməyə qadir olmuşdur. Həm də bu şeirlər poetikanın
tələblərinə cavab verən ahəngi, qafiyə sistemi, ölçüsü ilə
oxucunun diqqətini cəlb edən, dərin fəlsəfi məna daşıyan
nümunələrdir. Məhsəti Gəncəvi rübailəri başqa klassik söz
sənətkarlarının əsərləri kimi, xalqın milli sərvətidir. Doqquz
əsrin sənət süzgəcindən keçib gələn bu nümunələri gəncliyə
çatdırmaq isə bizim vəzifəmizdir. Hazırda, başqa sahələrdə
olduğu kimi, ədəbiyyatda da kirikulum və dərsliklərin
hazırlanması üzərində iş davam edir. Azərbaycan ədəbiyyatında
M.Gəncəvinin yerini nəzərə alaraq, inteqrasiya yolu ilə Məhsəti
rubailərinin mahiyyətinin gəncliyə çatdırılması məqsədə uyğun
olardı. Belə ki, həmin rübailər şagirdin düşünmə qabiliyyətinin
artırılmasına, nitqinin inkişaf etdirilməsinə fayda verəcəyi
şübhəsizdir.
Orta yaş qrup oxucular arasında Məhsəti Gəncəvinin yubileyi
münasibətilə sual-cavab gecələri, testlər və ya ədəbi viktorinalar
təşkil oluna bilər. Sual-cavab gecəsi kitabxanaçı tərəfindən
təşkil olunur və oxuculara suallar təqdim olunur.
Suallar:
1.Məhsəti Gəncəvi neçənci əsrdə yazıb-yaratmışdır?
Cavab: M.Gəncəvi XII əsrin əvvəllərində yazıb-yaratmışdır.
2. Məhsəti Gəncəvi kimdir?
Cavab: Məhsəti Gəncəvi gözəl şairə, rübai ustası, tarixi
şəxsiyyətdir. Onun tarixi şəxsiyyət olmasını Fəridəddin Əttar,
32
Şəmsəddin Məhəmməd Ben Qeys Razi, Həmdullah Qəzvini,
Dövlətşah Səmərqəndi, Əmin Əhməd Razi, Qiyasəddin
Xondəmir və başqa şairlər təsdiq edirlər.
3. Məhsəti Gəncəviyə həsr olunmuş əsərlər haqqında nə
məlumatınız var?
Cavab: Gövhəri Zərgərin “Əmir Əhməd və Məhsəti” dastanı,
Mirvarid Dilbazinin “Məhsəti” pyesi, Nigar Rəfibəylinin
“Məhsəti” poeması, Kəmalə Ağayevanın “Məhsəti” pyesi,
Fəridə Ləmanın “Məhsəti” şeiri və s.
4. Məhsəti Gəncəvi haqqında yazılmış kitablar haqqında nə
məlumatınız var?
Cavab: Rəfael Hüseynovun “Məhsəti necə varsa”, “Məhsəti
Gəncəvinin özü, sözü, izi”, Frits Meyerin “Gözəl Məhsəti”
kitabları və s.
5. Məhsəti adı nə məna kəsb edir?
Cavab: Məh sözü ay və böyük mənasını, siti isə xanım
mənasında işlənmişdir.
6. Hansı şairlər Məhsəti Gəncəvi ilə eyni dövrdə yazıb,
yaratmışlar?
Cavab: Nizami, Xaqani, Əbül-Üla, Mucirəddin və s.
7. Hansı şairlərin, yazıçıların əsərlərində Məhsətinin adına rast
gəlmisiniz?
Cavab: Məhsəti Gəncəvi haqqında ilk qeyd Nizami Gəncəvinin
“Xosrov və Şirin” əsərində verilmişdir. Bundan başqa M. S.
Fəridəddin Əttarın “İlahinamə” əsərində, M. S.Ordubadinin
“Qılınc və qələm” romanında da tarixi şəxsiyyət kimi
Məhsətinin adı keçir.
8. Məhsəti Gəncəvi şairlikdən başqa, hansı qabiliyyətlərə malik
idi?
Cavab: Gəncənin intibah havalı münbit ədəbi mühitində solmaz
rübailər yaradan Məhsəti həm də mahir musiqiçi və usta
şahmatçı idi.
Dostları ilə paylaş: |