Filologiya məsələləri, № 7, 2017
244
Nadima, etmə şikayət belə ildən həqqə,
Nə xudavənd bilir fəsli, nə də peyğəmbər
- deməsi, onun düşmənlərinə fürsət verdi ki, şairi xalq arasında
hörmətdən salsınlar. Mollaların əlindən təngə gələn Nadim “Sənə nə” rədifli
uzun bir mənzuməsini qələmə alır. Bu addım mollaları daha da fəallaşdırdı
və onlar Nadimi ləkələyib aradan götürmək üçün əməli işə keçdilər. Tezliklə
Nadim “ailəsini müflis bir vəziyyətdə buraxıb naçar Nəvahiyi tərk etdi”
(5.s.30). Nadimin uzun zaman haralarda olması barədə heç bir məlumat
yoxdur. Ancaq şairin əldə olan bəzi şeirlərindən məlum olur ki, o, bir
müddət qürbətdə yaşamış, son dərəcə ağır güzəran keçirmiş, vətən bəsrətiylə
od tutub yanmışdır:
Kimsənəm yox mənə yazsın bir namə,
Qürbət içrə bu diyara bənimçün,
Məlum olsun sizə-əhli möhübban,
Dua qılın sahibkara bənimçün.
Malü əmlakımı etdilər təraş,
Tökər mərdümlərim müdam qanlı yaş,
Əlac edin mənə, ey qohum-qardaş,
Bir yerdən olmadı çarə bənimçün.
Yaxud:
Gecə-gündüz qan-yaş töküb ağlaram,
Vətən tərkin qılıb eldən ayrıldım.
Bibəhərdür heç görmədim səfasın,
Bağban idim qönçə güldən ayrıldım.
Bu hisslər onun “Düşdüm”, “Ayrıldım”, “Bazarıdır”, “Bənimçün” rə-
difli qoşmalarında qabarıq şəkildə özünü göstərir.
A.Canıbəyli Nadimin bir müddət zindanda olmasını qeyd edir. Lakin o
bunu faktlar əsasında deyil, güman və fərziyələrə söykənərək söyləyir ki, bu
da inandırıcı deyil.
Tədqiqatçının fikrincə, Nadim yaradıcılığında dini mövzulu şeirlərə,
növhəyə, qəsidəyə əslən əhəmiyyət verməmiş və bu yolda da pək az vaxt
sərf etmişdir. Müəllif bu fikrini “növhə və qəsidəsi gözə çarpacaq qədər
azdır” – deyə, əsaslandırır (5.s.9).
A.Canıbəylinin bu fikri ilə razılaşmaq olmaz. Görünür, o, Nadimin
digər əlyazmalarından, ən azı hal-hazırda AMEA Məhəmməd Füzuli adına
Əlyazmalar İnstitutunda B-4275/5900 şifri altında mühafizə olunan 354
səhifədən ibarət əlyazmasından xəbəri olmamışdır. Mirzə Baxış Nadimin bu
Filologiya məsələləri, № 7, 2017
245
əlyazmasın bəzi xüsusiyyətlərinə görə avtoqraf nüsxə hesab etmək olar.
Cüng əvvəldən 29-cu səhifəyə qədər səhifələnsə də 30-cu səhifədən sonra
ərəb rəqəmləri ilə yenidən səhifələnmişdir. Səhifə 20-dən səhifə 225-ə qədər
verilmiş şeir nümunələri qırmızı rəngli mürəkkəblə haşiyəyə alınmışdır.
Burada şairin müxtəlif janr və mövzuda yazdığı 100-dən artıq şeiri
verilmişdir. Bu şeirlər içərisində onun dostları və tanışlarına yazdığı
mənzumələr xüsusi yer tutur. Təbii ki, Nadim ünvanına müraciət etdiyi
tanışlarının hamısına eyni münasibət bəsləməmiş, onlardan bəzilərinə həcv
də yazmışdır.
Əlyazmanın giriş hissəsində ümumi qəbul edilmiş qaydaya uyğun
olaraq müasirləri kimi Nadim də böyük Yaradanın, Peyğəmbər və imam
Əlinin şərəfinə söz demiş, dinin aliliyini, ibadətin vacibliyini təbliğ etmişdir.
Bununla yanaşı o, sırası gəldikcə müxtəlif tarixi hadisələrə, nəzəri-fəlsəfi
fikirlərə toxunmuş, şeir, sənət haqqında mülahizələr yürütmüşdür.
Əlyazmada şair qəzəliyyat üçün məxsusi yer ayırmış və səhifə 134-dən
səhifə 201-ə kimi 60-a qədər qəzəlini ardıcıl olaraq vermişdir. Həmin
bölmənin başlığında şair farsca
ﮫﻧﺎﻘﺷﺎﻋ تارﺎﻌﺷا
ﺎﻣ دﻮﺧ ﯽھاﻮﺧاﺮﻔﺑ
....
(öz könül
xoşluğumuz üçün yazılmış aşiqanə şeirlər) sözlərini yazmışdır. Bu qəzəllər
onun təkcə satirik deyil, həm də gözəl lirik şeirlər müəllifi olduğunu əyani
şəkildə sübut edir. Səhifə 298-dən əlyazmanın son vərəqinə (səhifə 354-ə)
kimi şairin dini mövzuda, əsasən, Kərbəla hadisəsinə həsr olunmuş şeirləri
verilmişdir. Bu şeirlərində məxsusi olaraq Əlini, Fatimeyi- Zəhranı, Zeynəbi,
Hüseyni, Qasimi, Əliəsgəri, həzrət Abbası və onların başına gətirilən
müsibətləri təsvir etməklə şairin şiə məzhəbinə mənsub olduğunu görürük.
Əlyazmanın əvvəlində olduğu kimi, bu hissəsində də dini məzmunlu şeirlər
arasında (səhifə 298, 299, 300, 301, 302, 310, 311, 313, 315 və 341-də)
şairin məhəbbət mövzusunda yazdığı on iki qəzəli də verilmişdir. Mirzə
Baxış bir neçə təxəllüslə yazıb-yaratmışdır. Əldə olan iki əlyazmasında onun
“Nadim”, “Xəstə Baxış”, “Xəstə Baxış Nəvahi”, “Nəvahi Baxış”, “Şikəstə
Baxış”, “Miskin Baxış” və “Baxış” təxəllüsləri ilə şeir yazdığının şahidi
oluruq. O, klassik nəzm şəkillərində yazdığı şeirlərində əsasən “Nadim”,
heca vəznli şeirlərində isə daha çox digər təxəllüslərindən istifadə etmişdir.
Şairin irsinin ilk tədqiqatçısı A.Canıbəyli göstərir ki, onun gənclik illərində
yazdığı əsərlərin bir çoxunda “Xəstə Baxış”, “Nəvahi Baxış” kimi təxəllüslərinə
rast gəlirik” (5.s.3). Bu fikrin nə qədər dəqiq olduğunu söyləmək çətindir. Lakin
fakt olaraq o da məlumdur ki, Nadim təkcə gənclik illərində deyil, ömrünün
müxtəlif dövrlərində, hətta qoca yaşlarında da bu təxəllüslərin hər birindən
istifadə etmişdir. Xüsusilə onu da qeyd etmək lazımdır ki, şair qürbətdə
olanda (təqribən ahıl yaşlarında) daha çox qoşma janrında şeirlər yazmış və
həmin şeirlərdə əsasən yuxarıda qeyd etdiyimiz təxəllüslərdən istifadə
Filologiya məsələləri, № 7, 2017
246
etmişdir. Bu da maraqlıdır ki, heca vəznli şeirlərin heç birində o, “Nadim”
təxəllüsünü işlətməmişdir.
Əlyazmada şairin müxəmməs, müsəddəs, müstəzad, rübai və sair
janrlarda yazdığı şeirləri də vardır. Bu əlyazmanın əsas hissəsini (təxminən
üçdə iki hissəsini) dini mövzuda yazılmış qəsidə, minacat, növhə və s. təşkil
edir. Təbii ki, Canıbəyli bu şeirlər toplusu ilə tanış olsaydı şairin dini
görüşləri haqqında öndə söylədiyi fikrindən imtina edərdı. Nadimin dindar
bir şəxs olması hətta onun dünyəvi mövzuda yazdığı şeirlərindən də aydın
şəkildə görünür. Ola bilər ki, A.Canıbəyli də əksər müasirləri kimi repressiya
ərəfəsində ölkə daxilində hökm sürən ab-havaya uyğun olaraq yaradıcılığını
tədqiq etdiyi sənətkarın dini görüşlərini qəsdən kölgədə saxlamışdır. Bu da
faktdır ki, şair dindar olduğu qədər də yalançı din xadimlərinə, xüsusilə
yarımçıq molla və mollanümalara qarşı həmişə mübarizə mövqeyində
dayanmışdır.
Canıbəylinin verdiyi məlumata görə, “Nadim rusların istilasından sonra
müxtəlif qulluqlarda olur. O, əsasən hökumət idarələrində (divanxanalarda)
katib (münşi) vəzifəsini ifa edərmiş. Ömrünün çox hissəsini də həmin vəzifə ilə
keçirərək axırda, özünə ixtisas qərar verir. O, uzun bir müddət qürbətdə yaşadıq-
dan sonra kənd katibliyi vəzifəsində Nəvahiyə müraciət edir” (5.s.34-35).
Yenidən Nəvahiyə qayıdan şair camaat, el arasında öz keçmiş hörmət
və izzətini bərpa edir. Düşmənləri onun vəzifə başında olmasından
ehtiyatlanaraq zahirən də olsa sakit durmağa üstünlük verirlər.
Nadim bir neçə ildən sonra tutduğu vəzifəsindən azad edilir. O özünə
yeni iş yeri axtarır, bunun üçün müxtəlif şəxslərə, o cümlədən, polkovnik
İsmayıl bəy Qutqaşınlıya da müraciət edir. Lakin dostlarından heç kəs ona
kömək edə bilmir. Məcburiyyət qarşısında qalan şair yenidən İsmayıl bəyə
müraciət etməli olur. İyirmi iki beytdən ibarət olan bu mənzuməsində şair
əlindən münşilikdən (katiblikdən) başqa bir iş gəlmədiyini ürək ağrısı ilə
qələmə alır və ondan kömək diləyir:
Əgər gəleydi əlimdən bir özgə kəsb mənim,
Bu zəhməti sana verməzdim, ey həmidəxisal.
Ticarət eyləyə bilməm və nə kəştü zər etmək,
Nəçarə ədlü tərazu qurum, olum baqqal.
İşimdi münşiyi-divan olub qələm yazmaq,
Kəmalə sinnə yetib ta ağartmışam saqqal.
Əlac yoxdu, dəxi, bu işə sərəncam et,
Bidune-mayə dögüldür ki, həq verü həqq al.
Ümidi-Nadim odur, məlcai-pənahidən,
Bu əmrə rövnəq əncam edə, olam xoşhal(5.s.39).
Dostları ilə paylaş: |