162
ALMANİYA FEDERATİV RESPUBLİKASININ
AZƏRBAYCANDAKI FÖVQƏLADƏ VƏ
SƏLAHİYYƏTLİ SƏFİRİ KLAUS QREVLİX İLƏ
GÖRÜŞDƏ SÖHBƏT
27 oktyabr 2003-cü il
K l a u s Q r e v l i x: Zati-aliləri, məni qəbul etməyə vaxt ayırdığınız üçün Sizə təşəkkür edirəm. Mən
Almaniya Federativ Respublikasının federal kansleri cənab Şröderin təbrik məktubunu təqdim etmək istəyirəm.
Eyni zamanda,
icazə verin, müqəddəs Ramazan ayının başlanması münasibətilə həm Sizə, həm də
Azərbaycandakı bütün müsəlmanlara Allahdan xeyir-bərəkət arzulayım. Qoy bu ibadət ayı insanlara mənəvi rahatlıq
və əmin-amanlıq gətirsin.
Sizin ölkədə yaşamaq mənim üçün böyük şərəfdir. Bu ölkədə dini icmalar arasında xüsusi dözümlülük və
dostluq münasibətləri vardır.
Almaniya Federativ Respublikasının federal kansleri öz məktubunda Sizi prezident seçilməyiniz
münasibətilə ürəkdən təbrik edir və vurğulayır ki, Azərbaycan demokratiya və bazar iqtisadiyyatı yolunda
böyük vəzifələr qarşısındadır. Zati-aliləri, o Sizə bu işlərin öhdəsindən gəlməkdə uğurlar arzulayır.
Bundan
əlavə, cənab federal kansler öz məktubunda bildirir ki, o, Azərbaycan və Almaniya arasında dostluq
münasibətlərinin və səmimi əlaqələrin gələcəkdə də inkişaf edəcəyinə ümidvardır.
İcazənizlə, şəxsən öz adımdan da Sizə uğurlar arzulayım. Demokratiya və bazar iqtisadiyyatı hüquqi dövlət
quruculuğu ilə bağlıdır. Hüquqi dövlət olmadan heç bir demokratiya ola bilməz. Hüquqi dövlətin şərtlərinə
riayət etmədən müəssisələrin buraya sərmayə qoyması üçün şərait də yaranmır və iqtisadi
inkişafdan da söhbət
gedə bilməz.
Mənim Sizə kiçik bir hədiyyəm də vardır. Almaniyada Kölbel adlı bir rəssam vardır. O bütün dövlət
xadimlərinin portretini çəkmişdir. Cənab Kölbel Sizin atanızın – prezident Heydər Əliyevin də portretini
çəkmişdir. O bunu Sizə hədiyyə etmək istəyir. Ancaq əvvəlcə o bu portreti öz sərgisində nümayiş etdirmək
istəyir və bunun üçün Sizin avtoqrafınızı xahiş edir. Cənab Kölbel bu məktubu da Sizə çatdırmağı xahiş
etmişdir.
Zati-aliləri, ümid edirəm ki, Siz
sülh və sabitlik prezidenti, ölkənizdə iqtisadi və sosial inkişafın prezidenti
olacaqsınız və Sizin prezidentliyiniz ölkədə həmrəylik və milli barışıqla müşayiət ediləcəkdir. Mən Sizin
prezidentliyiniz dövründə həm daxildə, həm də xaricdə sülh olmasını arzulayıram.
Bir daha zati-alilərinizə təşəkkür edirəm.
İ l h a m Ə l i y e v: Hörmətli cənab səfir,
xahiş edirəm, ilk növbədə, hörmətli kansler Gerhard Şröderə
mənə göndərdiyi məktuba görə minnətdarlığımı çatdırasınız.
Almaniya ilə Azərbaycan arasında əlaqələr çox sürətlə inkişaf edir. Biz bütün sahələrdə uğurlu əməkdaşlıq
edirik. Əlbəttə, çox istərdik ki, bu əməkdaşlıq gələcəkdə daha da genişlənsin.
Azərbaycan iqtisadiyyatı bazar iqtisadiyyatı prinsipləri əsasında qurulur. Almaniya isə iqtisadi inkişaf
baxımından dünyada qabaqcıl yer tutur. Ona görə sizin təcrübəniz bizim üçün çox əhəmiyyətlidir. Biz bu
təcrübəni öyrənirik.
Mən əminəm ki, yaxın gələcəkdə Azərbaycan da iqtisadi cəhətdən inkişaf etmiş ölkəyə
çevriləcəkdir. Azərbaycanda özəl sektor inkişaf edir. Ümumi daxili məhsulun formalaşmasında özəl sektorun
payı 70 faizdən yuxarıdır. Siz çox düzgün qeyd etdiniz ki, bazar iqtisadiyyatının inkişafı demokratiyanın inkişafı
ilə bərabər həyata keçirilməlidir. Azərbaycan demokratik prinsiplərə sadiqdir və ölkəmizdə demokratiyanın
inkişafı sahəsində bundan sonra da ardıcıl tədbirlər görüləcəkdir.
Azərbaycan regionda artıq mühüm mövqelərə sahib olmuşdur və iqtisadi cəhətdən daha da inkişaf edəcəkdir.
Bütün bu planları həyata keçirmək üçün,
ilk növbədə, ölkədə sabitlik və milli həmrəylik lazımdır. Mən əminəm
ki, Azərbaycanda sabitlik davam edəcəkdir.
Biz hüquqi dövlət qurulması istiqamətində səylərimizi bundan sonra da davam etdirəcəyik və bu sahədə
aparılacaq işlər yaxın gələcəkdə Azərbaycanı hərtərəfli inkişaf etmiş dövlətə çevirəcəkdir.
Mən hədiyyəyə görə də Sizə təşəkkürümü bildirirəm. Bu mənim üçün gözlənilməz idi. Xahiş edirəm rəssama
da mənim salamlarımı çatdırasınız.
163
TAMARA VƏ KOTE LEŞKAŞELİLƏRƏ
Hörmətli Tamara və Kote Leşkaşelilər!
Oğlunuzun dünyaya gəlişi münasibətilə sizi səmimi- qəlbdən təbrik edirəm.
Ailənizə böyük sevinc bəxş etmiş körpəyə İlham adını verməyinizdən məmnunluq duyur və mənə
bəslədiyiniz belə yüksək münasibətə görə sizə təşəkkürümü bildirirəm.
Balaca İlhama möhkəm cansağlığı,
xoşbəxtlik, ailənizə səadət və xoş günlər arzulayıram.
Hörmətlə,
İLHAM ƏLİYEV
Azərbaycan Respublikasının Baş naziri
28 oktyabr 2003-cü il
164
TÜRKİYƏ RESPUBLİKASININ BAŞ NAZİRİ
ZATİ-ALİLƏRİ
CƏNAB RƏCƏB TAYYİB ƏRDOĞANA
Hörmətli cənab Baş nazir!
Əziz dostum və qardaşım!
Türkiyə Respublikasının milli bayramı – Respublika elan edilməsi günü münasibətilə Sizi və Sizin
simanızda bütün qardaş Türkiyə xalqını ürəkdən salamlayır və təbrik edirəm.
Türkiyənin yüksəlişindən, dünya miqyasında uğurlarından və gündən-günə artan nüfuzundan qəlbimizi fərəh
hissi bürüyür.
Xalqlarımızın qarşılıqlı etibarı, inamı və dəstəyi zamanın sınaqlarından çıxmış qardaşlığımızın və
dostluğumuzun bariz ifadəsidir.
Əminəm ki, möhkəm təməllər üzərində qurulmuş dövlətlərarası münasibətlərimizin və müttəfiqliyimizin
daha da inkişafı, əlaqələrimizin və əməkdaşlığımızın hərtərəfli genişlənməsi üçün
səylərimizi bundan sonra da
əzmlə davam etdirəcəyik.
Hörmətli cənab Baş nazir!
Sizə möhkəm cansağlığı, işlərinizdə uğurlar, qardaş Türkiyə xalqına əmin-amanlıq və xoşbəxtlik arzulayıram.
Hörmətlə,
İLHAM ƏLİYEV
Azərbaycan Respublikasının Baş naziri
27 oktyabr 2003-cü il