51
BÖYÜK İPƏK YOLUNUN BİR HİSSƏSİ OLAN ƏLƏT–QAZIMƏMMƏD AVTOMOBİL
YOLUNUN TƏNTƏNƏLİ AÇILIŞI MƏRASİMİNDƏ NİTQ
28 fevral 2004-cü il
Hörmətli xanımlar və cənablar!
Əziz dostlar!
Bu gün Ələt–Qazıməmməd avtomobil yolunun açılışını qeyd edirik. Mən bu münasibətlə sizin hamınızı
ürəkdən təbrik edirəm.
Bu, tarixi İpək yolunun bir hissəsidir və artıq bu gün istismara verilir.
Burada qeyd olundu ki, bu yolun tikin-
tisinin həyata keçirilməsində prezident Heydər Əliyevin müstəsna xidmətləri olmuşdur. Məhz onun təşəbbüsü
ilə bu yolun tikintisinə başlanmış və bundan ötrü çox böyük hazırlıq işləri görülmüşdür. İlk növbədə, yolun
tikintisi üçün maliyyə mənbələri tapılmalı idi və bu iş uğurla başa çatdı. Bu fürsətdən istifadə edərək, yolun
tikintisinə maliyyə dəstəyi vermiş qurumlara, Küveyt Ərəb İqtisadi İnkişaf Fonduna, İslam İnkişaf Bankına öz
minnətdarlığımı bildirirəm. Əmin olduğumu bildirmək istəyirəm ki, bu qurumlar yolun qalan hissəsinin maliyyə
problemlərinin həll edilməsi istiqamətində də öz dəstəyini verə biləcəklər.
Yol iqtisadiyyatın, iqtisadi inkişafın əsas amillərindən biridir. Əgər müasir infrastruktur, yol olmasa,
iqtisadiyyat inkişaf edə bilməz. Xüsusilə, regional iqtisadiyyat çox böyük çətinliklərlə üzləşə bilər. Bizim
məqsədimiz isə ondan ibarətdir ki, Azərbaycanın hər bir bölgəsi, hər bir regionu sürətlə və hərtərəfli inkişaf
etsin. Əlbəttə,
bu məqsədə çatmaq üçün, ilk növbədə, müasir yollar olmalıdır. Bu gün istismara verilən bu yol
ən yüksək müasir standartlara cavab verir. Demək olar ki, dünyanın ən yüksək standartları səviyyəsindədir.
Buna görə, yolun tikintisi ilə bilavasitə məşğul olan "Turan Xəzinədaroğlu" inşaat-ticarət anonim şirkətinə,
eyni zamanda, yerli şirkətlərə öz minnətdarlığımı bildirmək istəyirəm.
Çox sevindirici haldır ki, bu yolun tikintisində yerli şirkətlər də iştirak edirdilər. Onlar müasir təcrübə
əldə edirlər və görülən işlər də onu deməyə əsas verir ki, Azərbaycanda artıq yüksək dünya standartları
səviyyəsində çalışa bilən şirkətlər mövcuddur. Bizim vəzifəmiz bu şirkətlərə daha gözəl şərait yaratmaqdan
ibarətdir. Mən hesab edirəm, son müddət ərzində, ümumiyyətlə, sahibkarlığın inkişafına verilən
dəstək bu
məqsədlərə çatmağımıza imkan yaradacaqdır.
Bu yolun digər hissələrində də inşaat başlanıbdır. İndi istismara verilən yol Bakıdan Gürcüstan sərhədinədək
olan yolun bir hissəsidir. Həmin yolun Azərbaycan ərazisindəki digər hissələri də tezliklə inşa ediləcəkdir.
Beləliklə, Azərbaycanı şərqdən qərbə doğru birləşdirən yeni müasir yol istismara veriləcəkdir. Ancaq eyni
zamanda, digər istiqamətlərdə də işlər getməlidir və gedəcəkdir. Bu, regional inkişaf proqramında da öz əksini
tapıbdır. Bakıdan Rusiya və İran sərhədləri istiqamətlərindəki yollar da ən yüksək səviyyədə çəkilməlidir.
Beləliklə, Azərbaycanın çox əlverişli coğrafi vəziyyəti bizə imkan verəcək ki, ölkəmizin ərazisi ilə daha
böyük həcmdə yüklər daşınsın.
Azərbaycanın çox böyük təbii ehtiyatları var. Azərbaycanın çox gözəl gələcəyi var. Amma eyni zamanda,
nəqliyyat sahəsində də böyük perspektivlər vardır. Şimal–Cənub və Şərq–Qərb dəhlizləri də məhz Azərbaycan-
dan keçir. Əlbəttə, biz bu imkandan səmərəli istifadə etməliyik. Əminəm ki, belə də olacaqdır.
Ümumiyyətlə, Azərbaycanda nəqliyyat infrastrukturu sürətlə inkişaf edir. Yeni yollar salınır, dəmir yolu
infrastrukturu yeniləşir, yeni vaqonlar alınır və Azərbaycanın özündə də vaqonlar təmir olunur. Yeni təyyarələr,
gəmilər, tankerlər alınır.
Bu isə onu göstərir ki, Azərbaycanda nəqliyyat sektoru çox sürətlə inkişaf edir və bu,
Azərbaycan prezidenti kimi, məni çox sevindirir.
Azərbaycanın nəqliyyat infrastrukturu güclənməlidir. Azərbaycan regionun mərkəzinə çevrilməlidir. Bunu
etmək üçün bütün əsaslar vardır. Təbii sərvətlər vardır. Azərbaycanın intellektual potensialı çox yüksək
səviyyədədir. Bizim coğrafi vəziyyətimiz bu məqsədə nail olmaq üçün gözəl şərait yaradır.
Eyni zamanda, yolların salınması Azərbaycanda yeni iş yerlərinin açılması baxımından çox böyük rol
oynayır. Bildiyiniz kimi, bizim iqtisadi proqramımızın əsas vəzifələrindən biri odur ki, Azərbaycanda minlərlə,
yüz minlərlə yeni iş yerləri açılsın. Bu proqram artıq həyata keçirilir. Yeni iş yerlərinin açılması üçün müvafiq
fərmanlar, sərəncamlar verilir, qanunlar qəbul ediləcəkdir.
Əlbəttə, yol inşaatında da yeni iş yerlərinin açılması mümkün olacaqdır. Mənə verilən məlumata görə, təkcə
Bakı–Gürcüstan istiqamətində çəkiləcək yolun tikintisində 3500 yeni iş yeri açılacaqdır.
Ümumiyyətlə, bu layihələr bundan sonra da davam etdiriləcəkdir. Azərbaycanın digər yolları da, şəhərlər-
arası, rayonlararası yollar da təmir olunmalı və yüksək səviyyəyə çatdırılmalıdır.
Ölkəmiz güclənir, yeniləşir, müasirləşir. Əlbəttə,
biz istərdik ki, Azərbaycanda hər bir sahədə görülən və
görüləcək işlər ən yüksək dünya standartları səviyyəsində olsun.
Əziz dostlar!
52
Bu gün bu yolun açılışı Azərbaycanın müasir tarixində əlamətdar bir hadisədir. Mən bu hadisə münasibətilə
sizi bir daha təbrik edir, hamınıza uğurlar arzulayıram.
Xeyirli olsun, uğurlu olsun!
Mərasim başa çatdıqdan sonra
jurnalistlərə müsahibə
S u a l: Cənab Prezident, fevralın 19-da Macarıstanda baş vermiş hadisə ilə əlaqədar nə deyə
bilərsiniz?
C a v a b: İstintaq gedir. İstintaq qurtarsın, ondan sonra bəlli olacaqdır. Hələ heç kimi təqsirləndirmək lazım
deyil. İstintaq göstərəcəkdir.
S u a l: Cənab Prezident, vəkilin təyin olunması üçün rəsmi olaraq hansı addımlar atılıbdır?
C a v a b: Bizim Xarici İşlər naziri bu məsələ ilə məşğul olur. Mən hadisə baş verəndən sonra Xarici İşlər
nazirinə tapşırıq vermişdim. Bilirsiniz ki, bizim Avstriiyadakı konsulumuz oraya ezam olunmuşdur. Xarici İşlər
Nazirliyi bu məsələ ilə məşğuldur. Nə kimi kömək lazımdırsa, o da ediləcəkdir.
S u a l: Cənab Prezident, xaricdə fəaliyyət göstərən erməni təşkilatları və Ermənistan rəhbərliyi
çalışırlar ki, bu hadisədən gələcək danışıqlar prosesində öz məqsədləri üçün istifadə etsinlər. Sizcə bu,
danışıqlar prosesinə təsir göstərə bilərmi?
C a v a b: Mən
hesab etmirəm ki, təsir etsin. Düzgün qeyd edirsiniz, Ermənistan və ermənipərəst qüvvələr
bundan istifadə etmək istəyirlər. Amma sizə deyə bilərəm ki, beynəlxalq təşkilatlar da Ermənistan tərəfindən
aparılan kampaniyaya çox mənfi münasibət bildirirlər.
Bu günlərdə mənim Terri Devislə söhbətim olubdur. Ona bildirdim ki, hər il təmas xəttində belə hadisələr
çox olur. Ona görə bu hadisəni şişirdib şou yaratmaq heç kimə şərəf gətirmir. Mən məsləhət görərdim ki, bu
məsələdən istifadə etmək istəyənlər bundan əl çəksinlər. Bu, adi bir hadisədir. Fərdi qaydada baş vermiş
hadisədir. Deməyə əsas var ki, bu məişət zəminində baş vermiş hadisədir. Buna başqa bir siyasi don geyin-
dirmək düzgün deyildir.
S u a l: Cənab Prezident, dəfələrlə bəyan etmisiniz ki, əgər sülh danışıqları nəticə verməsə və
torpaqlarımız danışıqlar nəticəsində azad olunmasa, Azərbaycan öz torpaqlarını güc yolu ilə geri
alacaqdır. Bu baxımdan danışıqlara hansısa bir vaxt həddi qoymaq olarmı?
C a v a b: Müddət qoymaq çətindir. Əlbəttə, elə ən asanı o olardı ki, müddət qoyulsun. Amma hər şey
danışıqların gedişindən asılı olacaqdır. Hələlik ümidlər var ki, danışıqlar hansısa bir nəticəyə gətirib
çıxaracaqdır. Bilirsiniz ki, beynəlxalq ictimaiyyət son aylar ərzində bu məsələyə çox ciddi yanaşmağa
başlayıbdır. Avropa Şurası, Avropa Birliyi, digər qurumlar artıq bu məsələ ilə əlaqədar öz qəti fikirlərini
bildirirlər. O fikirlər də reallığı,
həqiqəti, beynəlxalq hüquq normalarını əks etdirir. Bizim də məqsədimiz odur
ki, bu münaqişəyə yalnız beynəlxalq hüquq normaları prizmasından baxılsın. Hesab edirəm ki, hazırda
Azərbaycan üçün əlverişli şərait yaranır. Ona görə münaqişənin həlli istiqamətində yeni addımlar da olacaqdır.
Mən ümid edirəm ki, biz buna danışıqlar yolu ilə nail ola bilərik.
S u a l: Cənab Prezident, Xocalı faciəsi ilə bağlı Azərbaycan parlamentində hansı addımlar atılmalıdır
ki, bu faciəni başqa dövlətlərin parlamentlərində tanınmasına nail ola bilək. Bunun üçün bizim
parlamentdə, demək olar ki, heç bir praktiki addım atılmayıbdır.
C a v a b: Bilirsiniz, gərək bununla bütün ictimaiyyət məşğul olsun. Əgər Ermənistanın iddia etdiyi uydurma
“soyqırımı” ilə analogiya aparsaq, görərik ki, bunun bəzi
parlamentlərdə müzakirəsində, yanlış qərarların qəbul
olunmasında heç də Ermənistan parlamentinin rolu olmayıbdır. Ermənistanın müxtəlif qurumlarının, qeyri-
hökumət təşkilatlarının, lobbi təşkilatlarının, ictimai təşkilatlarının fəaliyyəti olubdur. Əgər bizim qeyri-
hökumət təşkilatları bu vəzifəni öz üzərlərinə götürsələr, hesab edirəm, bu daha yaxşı olardı. Təəssüf edirəm ki,
onların bəzilərinin fəaliyyəti digər istiqamətə yönəlibdir. Düşünürəm ki, ilk növbədə, ictimai təşkilatlar,
ictimaiyyət, qeyri-hökumət təşkilatları və xaricdə yaşayan azərbaycanlılar bu istiqamətdə fəal olmalıdırlar.
S u a l: Cənab Prezident, ABŞ Dövlət Departamentinin hesabatında Azərbaycanla bağlı tənqidi
fikirlər vardır. Bununla əlaqədar nə deyə bilərsiniz?
C a v a b: Hesabatla tanış oldum, mənə məruzə elədilər. Burada elə bir böyük problem görmürəm. Eyni
zamanda, digər ölkələrə aid olan hissələri də oxudum. Deyə bilərəm ki, orada MDB ölkələri və digər ölkələr
tənqid olunur. Mən buna böyük önəm verməyi məsləhət görməzdim. Bu hər il baş verən bir hadisədir. Demək
olar ki, hər il hesabatdakı fikirlər təkrarlanır
və təkcə biz tənqid olunmuruq, digər ölkələr də tənqid edilir. Əgər
bu tənqid əsaslıdırsa, əlbəttə, hər bir ölkə özü üçün nəticə çıxarmalıdır. Yox, əgər qərəzlidirsə, əlbəttə, buna
əhəmiyyət verilməyəcəkdir. Mən məsələyə bu prizmadan yanaşıram. Sağ olun.