LORD QORİNQ. Bilirəm, ata! Amma mən həmişə yaxama gözəl sancaq taxanda
deyirəm ki, otuz iki yaşım var, ya da otuz bir yarım! Bu yaxamdakı isə çox pis
sancaqdır, dəhşətdir lap!
LORD KAVERŞAM. Mənsə sənə deyirəm ki, otuz dörd yaşın var! Bundan
başqa, bu otaq çox yelçəkəndir! Bu da sənin davranış və hərəkətlərinə pis təsir
edir! Niyə mənə dedin ki, yelçəkən yoxdur burada? Mən güclü külək hiss edirəm!
Lap çox tutur buranı! Düz məni tutur külək!
LORD QORİNQ. Məni də tutur, ata! Nə pis tutur yelçəkən?! Sabah gələrəm, səni
görərəm, ata! Onda nədən istəsən, danışarıq. Qoy paltonu tutum, geyin!
LORD KAVERŞAM. Yox! Mən bura dəqiq bir niyyətlə gəlmişəm! O niyyəti
həyata keçirməmiş buradan gedən deyiləm! Sağlamlığıma zərər gəlsə də! Ya da
səninkinə! Paltomu qoy o tərəfə!
LORD QORİNQ. Yaxşı, ata! Onda gəl keçək o biri otağa! (Qapının zəngi çalınır.)
Bu otaqda yaman yelçəkən var! (Fipps içəri girir.) Fipps, siqaret çəkilən otaqda
sobanı yandırmısınız?
FİPS. Bəli, milord.
LORD QORİNQ. Gəl keçək oraya, ata. Siz elə asqırırsınız ki, adamın ürəyi
paralanır.
LORD KAVERŞAM. Yaxşı, yaxşı! Mənim asqırmağa ixtiyarım yoxdur bəyəm?
LORD QORİNQ (üzrxahlıqla). Əlbəttə, var! Ata, mən yalnız sənə ürəyim yandığı
üçün dedim belə!
LORD KAVERŞAM. Əh! Nəyimə lazımdır? Bu rəhmdillik və mərhəmət bu
bəlalı dünyada, onsuz da, həddən artıq çoxdur!
LORD QORİNQ. Səninlə razıyam, ata! Əgər insanlar bir-birinə az mərhəmət
göstərsəydilər, dünyada bədbəxtliklər, iztirablar da az olardı!
LORD KAVERŞAM (siqaret çəkilən otağa gedir). Bu paradoksdur! Mən
paradokslara nifrət edirəm!
LORD QORİNQ. Elə mən də! Bizim dövrdə kimi görürsən, paradoksdur başdan-
ayağa! Adamın canı sıxılır. Sən cəmiyyətdə hər kəsi apaydın görə bilirsən.
LORD KAVERŞAM (dönür, qalın kirpikləri arasından oğluna baxır). Sən
həmişəmi anladığın şeyləri danışırsan?
LORD QORİNQ (bir qədər tərəddüdlə). Bəli, ata! Diqqətlə qulaq asanda nə
danışdığımı da bilirəm.
LORD KAVERŞAM (əsəbiləşərək). Diqqətlə qulaq asanda... hə? Həyasız küçüyə
bax bir! (Siqaret çəkilən otağa girir. Fipps daxil olur).
LORD QORİNQ. Fipps, indilərdə mənim yanıma bir xanım gələcək! İşlə
əlaqədar! Gələndə onu qonaq otağına apar! Başa düşdün?
FİPS. Bəli, milord.
LORD QORİNQ. O qadının mənimlə vacib işi var!
FİPS. Başa düşürəm, milord!
LORD QORİNQ. Daha heç kəsi qəbul etməyin! Heç bir şəkildə!
FİPS. Başa düşdüm, milord! (Zəng çalınır.)
LORD QORİNQ. Ah! Bu, odur, yəqin! O qadındır! Onu özüm qarşılayacağam!
(Qapıya sarı gedəndə lord Kaverşam o biri otaqdan başını çıxarır.)
LORD KAVERŞAM. Mən səni çoxmu gözləyəcəyəm?
LORD QORİNQ (karıxır). Bu saat, ata, gəlirəm. Üzr istəyirəm! (Lord Kaverşam
görünmür, üzünü Fippsə tutur.) Deməli, Fipps, danışdıq, düz qonaq otağına aparın
onu!
FİPS. Baş üstə, milord!
Lord Qorinq siqaret çəkilən otağa girir. Nökər Harold missis ÇİVLİi içəri
müşayiət edir. Missis ÇİVLİ ilan kimi yaşılımtıl-gümüşü libasdadır. Çiyinlərində
ölgün qızılgül rəngdə zolaqları olan qara atlaz parçadan manto var.
HAROLD. Madam, sizi necə təqdim edim?
MİSSİS ÇİVLİ (ona yaxınlaşan Fippsə). Lord Qorinq buradadır? Mənə dedilər
axı o evdədir?
FİPS. Madam, indi lord Qorinq lord Kaverşamla məşğuldur. (Soyuq tərzdə
Harolda göz ağardır, o da dərhal gözdən itir.)
MİSSİS ÇİVLİ (öz-özünə). Nə yaxşı oğuldur!
FİPS. Madam, milord tapşırdı ki, sizi qonaq otağına aparım. Xahiş elədi ki, bir az
gözləyəsiniz. O, bu saat sizin yanınıza gələcək.
MİSSİS ÇİVLİ (təəccüblə). Lord Qorinq məni gözləyir ki?
FİPS. Bəli, madam.
MİSSİS ÇİVLİ. Siz buna əminsiniz?
FİPS. Milord mənə tapşırıb ki, siz gələn kimi sizi qonaq otağına aparım. (Qonaq
otağının qapılarını açır.) Milordun tapşırığını dəqiqliklə yerinə yetirirəm!
MİSSİS ÇİVLİ (öz-özünə). Necə həssas bir diqqət! Gözlənilməz qonağı
gözləmək əsl müasir təfəkkürün məhsuludur! (Qonaq otağına daxil olur və otağa
baxır.) Offf! Bu subayların qonaq otaqları necə səliqəsiz və narahat olurmuş!
Bunları dəyişdirməli olacağam! (Fipps lampa gətirir.) Yox, yox, lampa lazım
deyil! Onun işığı çox parlaqdır. Yaxşı olar ki, bir neçə şam yandırasınız!
FİPS (lampanı geriyə, yazı masasının üstünə qoyur). Baş üstə, madam!
MİSSİS ÇİVLİ. Güman edirəm ki, şamların yaraşıqlı abajurları var, hə?
FİPS. Hələ ki onlardan heç kəs şikayət etməyib, madam! (Qonaq otağına keçib
şamları yandırmağa başlayır.)
MİSSİS ÇİVLİ (öz-özünə). Maraqlıdır, görəsən, o, hansı xanımı gözləyir? Onu iş
başında yaxalamaq nə olardı! Kişilər yaxalandıqları zaman həmişə axmaq
görünürlər! Kişilər hər zaman yaxalanırlar! (Otağa göz gəzdirə-gəzdirə yazı
masasına yaxınlaşır.) Maraqlı otaqdır! Nə maraqlı şəkildir! Aha, baxaq görək bu
məktublar kimdən gəlib? (Məktubları və vizitkaları eşələyir.) Nə maraqsız
şeylərdir! Hesablar, qaimələr! Bəs bu çəhrayı kağız nədir belə? Çəhrayı kağızda
da məktub yazarlar? Lap gülməlidir! Bu lap orta təbəqənin sevgi romanının
başlanğıcına bənzəyir! Roman hisslərin büruzə verilməsi ilə başlamamalıdır!
Sevgi romanı ayıq başla başlamalı, bəxşişlə nəticələnməlidir. (Məktubu qoyur
yerinə və yenə götürür.) Mən, deyəsən, bu xətti tanıyıram... Aaaa, Gertrudanın
xəttidir. Hə, Gertruda Çilternin, yadıma düşür. Üslub da onunkudur – hər sətirdə
on əmr! Və bütün səhifə əxlaq moizəsi ilə dolu olur! Görəsən, Gertruda bu dəfə
nə yazır? Bəlkə, mənim barəmdə yazıb? Pis sözlər də yaza bilər! Ah, mən o
qadına necə nifrət edirəm! (Başlayır məktubu oxumağa.) “Sizə inanıram. Sizi
görmək istəyirəm. Sizin yanınıza gəlirəm. Gertruda”. “Sizə inanıram. Sizi görmək
istəyirəm. Sizin yanınıza gəlirəm. Gertruda”.
Üzü içıq saçır, sanki, qələbə sevincini yaşayır, elə istəyir ki, məktubu oğurlasın,
Fipps içəri girir.
FİPS. Madam, qonaq otağındakı şamları yandırdım.
MİSSİS ÇİVLİ. Təşəkkür edirəm. (Tələsik qalxır, məktubu isə stolun üstündəki
iri kağız qovluğunun altında gizlədir.)
FİPS. Madam, güman edirəm ki, abajurlar xoşunuza gələcək. Bunlar bizdə olan
ən yaxşı abajurlardır. Bizim milordumuz nahar ərəfəsində həmişə bu işıqlar
altında əynini dəyişir.
MİSSİS ÇİVLİ (gülümsəyir). Onda, əlbəttə ki, mükəmməl olar.
FİPS (ciddi). Təşəkkür edirəm, madam.
Missis ÇİVLİ qonaq otağına gedir. Fipps qapını örtür və çıxıb gedir. Daha sonra
qapı yenə yavaş-yavaş açılır, missis ÇİVLİ yenə yazı masasına yaxınlaşır. Birdən
siqaret çəkilən otaqdan səs gəlir. Missis ÇİVLİin rəngi ağarır. Dayanıb qulaq asır.
Səs-küy daha da artır. Qadın dərhal qonaq otağına qaçır, dodağını çeynəyir.
Lord Qorinqlə Lord Kaverşam daxil olurlar.
LORD QORİNQ (etiraz edə-edə). Ata, ay ata, əgər mənim evlənməyimi
istəyirsənsə, onda icazə ver, heç olmasa, vaxtı, yeri və arvadı özüm seçim də!
Xüsusilə arvadı!
LORD KAVERŞAM (quru). Elə şey yoxdur! Bunlar mənə aiddir! Tanımıram
səni? Sənin seçdiyin adam kim olacaq ki? Bunu mən edəcəyəm! Burada
mülkiyyət maraqları var. Hisslər rol oynamır. Sevgidir, hissdir, bunlar sonradan,
evlilik dövründə gəlir adama.
LORD QORİNQ. Elədir, ata! O hisslər ərlə arvad bir-birinə nifrət etdikləri zaman
gəlir adama... (Lord Kaverşamın paltosunu tutur.)
Dostları ilə paylaş: |