77
qabların üzərində anqobla rəsm çəkilməsi, yaxud anqoblanmış yerlik üzərində müxtəlif boyalarla təsvirin
işlənməsi, eləcə də cızma naxışlı bəzəmə üsulu geniş yayılmışdı.
Orta əsrlərdə keramika ilə yanaşı, şüşə məmulat da hazırlanırdı. Şamaxı, Gəncə, Qəbələ, Mingəçevir və
s. yerlərdən şüşədən məişət əşyaları (kuzə, sürahi, piyalə və s.), hətta zərgərlik nümunələri də aşkar edilmişdir.
Şüşə üzərində səthi, yaxud qabarıq formalı həndəsi və nəbati ornament motivləri ilə yanaşı, yazı nümunələrinə
də təsadüf olunur. Naxçıvan ərazisindən tapılmış bürüncdən atlı fiquru (Ermitaj, Sankt-Peterburq), Mingəçevir,
Lənkəran, Qax rayonu və s. yerlərdən aşkar edilmiş gümüş məcməyilər (Milli Azərbaycan Tarixi Muzeyi) erkən
orta əsrlərdə Azərbaycan dekorativ-tətbiqi sənətinin inkişafı haqqında aydın təsəvvür yaradır. XI-XV əsrlərdə
istehsal olunan saxsı qablarda məmulatı düzəldən ustanın adı göstərilməklə, emalatxana damğası vurulurdu.
Gəncədən tapılmış bir sıra qabların üzərində "Əli Əziz oğlu", "Nəsir", "Rüstəm", "Seyid Əli" və s. adlar
yazılmışdır.
Saxsı qabların oyma, qabartma, cızma və s. üsullarla işlənmiş bəzəklərində zərif ornamentlər, insan,
heyvan və quş təsvirləri ilə yanaşı, təbiət təsvirlərinə, süjetli kompozisiyalara da təsadüf edilir. 1950-ci ildə
Beyləqandan tapılmış və hazırda Ermitajda saxlanılan saxsı nimçə bu baxımdan diqqəti cəlb edir. Nimçənin
üzərində zadəganlara məxsus geyimdə ova çıxmış atlı gəncin təsviri verilmişdir. Kompozisiyanı atın tərkində
təsvir edilmiş bəbir tamamlayır. Süjetli kompozisiyalara bu dövrdə, əsasən,
Beyləqan saxsı məmulatları üzərində rast gəlinir.
XI-XV əsrlərdə Azərbaycanda müxtəlif formalı bədii kaşılar istehsal
edilmişdir. Bu cür məmulatlar, əsasən, məscid, hamam, saray və s. binaların
memarlıq bəzəklərində işlədilmişdir. XI-XV əsrlərdə dekorativ-tətbiqi sənətin
mühüm sahələrindən biri də daş və gəc üzərində bədii oyma sənəti olmuşdur. Oyma
bəzəklər, əsasən, memarlıq abidələrində və qəbir daşlarının üzərində tətbiq edilirdi.
Bakı limanından aşkar edilmiş Şirvanşahların "Bayıl qəsri" (1235) adlanan
memarlıq abidəsinin üzərindəki yazı və relyef təsvirləri bu dövr bədii oyma
sənətinin nadir nümunələrindəndir. Dərin oyma üsulu ilə bəzədilmiş "Bayıl
qəsri"nin maraqlı cəhəti bəzəklərdə yazılarla birlikdə canlı varlıqları təsvir edən
çoxlu rəsmlərin olmasıdır. Daşların üzərində insan başının təsviri olan xeyli
oymalar aşkar edilmişdir. Portretbarelyeflərin birinin üzərində Şirvanşah Fəribürzün
adı, digərində isə "gürcü" sözü həkk olunmuşdur. Memarlıq abidələri zərində
canlıların təsvirinin həkk edilməsinə təkcə Bakıda yox, Azərbaycanın digər
yerlərindəki abidələrdə də rast gəlinir. Lakin bu təsvirlər "Bayıl qəsri"ndə olduğu
kimi qabartma səpgisində yox, xeyli səthi, daha çox cızma üsulu ilə icra edilmişdir. Ağdam rayonunun
Xaçındərbətli kəndindəki türbənin (XIII-XIV) və Laçın rayonunun Cicimli kəndindəki Məlikəjdər türbəsinin
(XIV əsr) memarlıq bəzəkləri bu üsulla işlənmişdir.
XI-XV əsrlərdə Azərbaycanda dekorativ-tətbiqi sənətin maraqlı növlərindən biri olan
metalişləmə sənəti
də yüksək inkişaf mərhələsi keçmişdir. Metaldan hazırlanmış müxtəlif silahlar, ev əşyaları və s. sənət
nümunələri dövrümüzədək saxlanılmışdır. Gəncə, Şamaxı, Naxçıvan və Bakı şəhərləri həmin əsrlərdə
Azərbaycanın metalişləmə mərkəzləri idi. Bədii metal məmulatlarından İbrahim ibn Osmanın 1063-cü ildə
Gəncə şəhəri üçün düzəltdiyi bədii tərtibatlı dəmir darvaza (bir tayı Gürcüstan Respublikasının Gelati
monastırındadır), Osman Salman oğlu Naxçıvaninin hazırladığı bürünc dolça (1190, Luvr, Paris), Əli
Məhəmməd oğlunun "Şirvan lüləyini" adlanan suqabı (1206, Ermitaj,
S.Peterburq), Əbdüləziz Şərəfəddin oğlu Təbrizinin (tunc tiyan, 1399,
Xoca Əhməd Yəsəvi məscidi, Qazaxıstan Respublikası, Türküstan şəhəri),
Şükrüllah Müxlis Şirvaninin (bürünc üstürlab, 1486, Hararinin şəxsi
kolleksiyası, ABŞ) işləri bu sənətin gözəl nümunələrindəndir. Əbdüləziz
Şərəfəddin oğlunun Təbrizdə düzəltdiyi tunc tiyanın ağırlığı 2
t, diametri
2,5
m-dir. Bu nəhəng tiyan Teymurun sifarişi ilə Xoca Əhməd Yəsəvi
məscidi üçün hazırlanmışdı. Gül formasında düzəldilmiş 10 qulplu bu
məmulat Şərqdə ən böyük tiyan olmaqla yanaşı, bədii tərtibatına görə də
nadir sənət əsərlərindəndir.
XVI-XVIII əsrlər Azərbaycan sənətkarlığı tarixinin ən zəngin dövrlərindəndir. Şəhər və kəndlərdə xeyli
toxucu, zərgər, misgər, dulusçu və başqa sənətkarlar fəaliyyət göstərirdi. Səfəvilər dövründə isə Azərbaycanda
əsl mənada bədii parça istehsalı sənayesi təşkil olunmuşdu. O dövrdə Təbriz, Ərdəbil, Şamaxı, Gəncə
sənətkarlarının hazırladıqları ipək parçaların xeyli nümunəsi hazırda Bakı, Moskva, S.Peterburq muzeylərində
saxlanılır. Azərbaycan parçalarının geniş şöhrət qazanmasına səbəb onların incə toxunuşlu və davamlı olması
idi. Parçalar milli naxışlarla bəzədilir və çox vaxt naxışların arasında klassik şairlərin, xüsusilə Nizami
Gəncəvinin əsərlərindəki obrazlar miniatür üslubunda təsvir edilirdi. "Üzlü" adlanan belə parçaların bir sıra
78
nadir nümunələri hazırda dünyanın ən böyük muzey və şəxsi kolleksiyalarında saxlanılır (Parisin Luvr,
Londonun Viktoriya
və Albert, İstanbulun Topqapı, Moskvanın Şərq Xalqlarının İncəsənəti Muzeyi və s.).
Təbriz, Ərdəbil, Naxçıvan, Gəncə, Şamaxı və Bakı sənətkarlarının metaldan düzəltdikləri məişət
əşyaları, silahlar, bəzək nümunələri yüksək qiymətləndirilirdi. Azərbaycan sənətkarlarının hazırladıqları silahlar
(xəncər, qılınc, qalxan) və zirehli geyimlər (dəbilqə, dirsəklik və s.) xüsusilə metalişləmə sənətinin müəyyən
sahələrində nəinki ayrı-ayrı sənətkarların, hətta bütöv şəhərlərin ixtisaslaşmasına rəvac vermişdir. Ərdəbil
şəhərinin inkişaf etmiş bədii metal mərkəzlərindən sayılmasına baxmayaraq, Şeyx Səfi türbəsinin gümüş
barmaqlığını bu sahədə daha səriştəli olan Gəncə sənətkarları, İçərişəhərin dəmir darvazalarmı isə Naxçıvan
ustaları düzəltmişlər. Bədii metal məmulatlarının üzərində adi sənətkarlarla yanaşı, məşhur rəssamlar da
işləmişdilər. Moskvada Kremlin Silah Palatasında saxlanılan bədii qalxan
(təbrizli usta Məhəmməd Mömin, XVI əsr) Azərbaycan metalişləmə
sənətinin nadir nümunələrindəndir. Əvəzsiz sənət əsəri olan bu qalxan
qırmızı poladdan döyülərək üzəri daş-qaş və qızılla bəzədilmişdir. Səthində
42 dairəvi cığır açılmış, bunların içərisində müxtəlif ov, müharibə səhnələri,
heyvanlar aləmindən süjetlər və s. təsvir olunmuşdur. Rəsmlər içərisində
Nizaminin "Leyli və Məcnun" poemasının motivləri ilə bağlı kompozisiyalar
daha maraqlıdır.
Naxçıvan, Laçın, Ağdam, Gəncə, Mingəçevir, Qazax, Lerik və s.
yerlərdən tapılmış XVI-XVII əsrlərə aid daş qoç və at fiqurları, süjetli
qabartma heykəllər Azərbaycan incəsənətinin maraqlı nümunələridir. Daş
fiqurlara Azərbaycanın cənubundan tutmuş şimal-qərb bölgələrinədək bir
çox yerlərdə rast gəlinir. Ermənistan və Gürcüstanın azərbaycanlılar yaşayan
ərazilərində də bu cür fiqurlara təsadüf olunur.
XVI-XVII əsrlərə aid edilən və Azərbaycanın, əsasən, qərb rayonlarının dağətəyi kəndlərində tapılmış
süjetli qabartmalarla bəzədilmiş oyma naxışlı daş sənduqələrin (qəbirüstü daşlar) əksəriyyətində dəfn edilənin
şücaət və məharətini göstərən səhnələr həkk olunmuşdur. Mingəçevir, Laçın və Zəngəzur ərazilərində təsadüf
edilən sənduqələrin üzərində şamanların dini mərasimi, qədim tayfalarda zoomorf anlayışlarla əlaqədar
meydana gəlmiş quş onqonunun (toteminin) və zərdüştiliklə əlaqədar ayinlərin təsvirləri diqqəti cəlb edir.
XVII əsrdə dekorativ-tətbiqi sənətin xalçaçılıq, şəbəkəçilik və misgərlik kimi növləri daha çox
yayılmışdı.
XVII-XIX əsrlərdə Təbriz, Gəncə, Şəki, Şuşa, Şamaxı və
Bakı şəhərlərində xüsusi misgərlər məhəlləsi mövcud idi. Misdən
bəzəkli, orijinal formalı qab-qacaq düzəldilirdi. Azərbaycanda
misgərlik sənətinin mərkəzi Şamaxı xanlığına daxil olan Lahıc idi.
XIX əsrdə Lahıcda 200-dək misgər emalatxanası olmuşdur. Lahıc
ustaları məişət əşyalarmı (dolça, satıl, sərnic, məcməyi, sərpuş,
güyüm, aftafa, aşsüzən, kəfgir, kasa, cam, qazan, çıraq və s.), eləcə
də odlu (tüfəng, müxtəlif tipli tapançalar və s.) və soyuq (xəncər,
qəmə, behbud, qılınc, bıçaq və s.) silahları yüksək sənətkarlıqla
düzəldir, bunların üzərini incə, mürəkkəb ornamentlərlə
bəzəyirdilər. Silahlara sənətkarların möhürü vurulurdu. Hazırda
Azərbaycan İncəsənət Muzeyində və Milli Azərbaycan Tarixi Muzeyində saxlanılan Şirvan, Qarabağ, Təbriz və
Naxçıvanda hazırlanmış məmulatlar gözəl məişət əşyaları olmaqla yanaşı, Azərbaycanda rəsmin, naxışın
inkişafmı əks etdirən nadir sənət nümunələridir. Bunların üzərində düz, əyri və sınıq xətlərdən, onların əmələ
gətirdiyi üçbucaq və rombdan (paxlavadan) ibarət olan qədim həndəsi naxışlarla yanaşı, mürəkkəb yarpaq, gül
rəsmlərinə, müxtəlif formalı butalara, quş, heyvan və insan təsvirlərinə də təsadüf olunur. Ərəb əlifbasının
mürəkkəb hərfləri ustaların əlində ornament elementlərinə çevrilərək məmulatın bədii tərtibatını tamamlamışdır.
Bu yazılar bəzək elementləri olmaqla yanaşı, tarixi məxəz kimi də qiymətlidir.
Dekorativ-tətbiqi sənətin mühüm sahələrindən olan zərgərlik sənəti feodal münasibətlərinin inkişafı
nəticəsində yüksək səviyyəyə çatmışdı. Qızıl və gümüş sikkələrin ticarət dövriyyəsinə daxil edilməsinin də bu
sənətin inkişafında mühüm rolu olmuşdur.
Zərgərliyin ayrı-ayrı texniki üsullarından (basma, qarasavad, döymə, minasazlıq, oyma, pardaxlama,
xatəmkarlıq, həkkaklıq, hörmə, şəbəkə və s.) istifadə etməklə Qarabağ, Gəncə, Şəki, Şamaxı, Qazax, Quba,
Naxçıvan və s. yerlərdə ustalar tərəfindən müxtəlif zinət və bəzək əşyaları hazırlanmışdır. Çağdaş zərgərlik
sənəti sahəsində fəaliyyət göstərən bir çox ustaların işləri xarici ölkə muzeylərində nümayiş etdirilir. Müasir
dövrdə zərgərlik keçmişin ənənələrini davam etdirərək forma və məzmunca zənginləşmişdir.