Gülüstan müqaviləsi
25
General Qardan İran ərazisində olan missiyasına şah qoşunlarının
yenidən qurulmasına kömək görüntüsü verilsə də, o eyni zamanda
Napoleonun gizli tapşırıqlarını da yerinə yetirməkdə idi. General Qardan
İran ərazisində olduğu zaman buradan Hindistana hücum imkanlarını
araşdırmalı və bu hücumun təşkili üçün zəmin yaratmalı idi. Eyni
zamanda Fransanın düşmənləri olan Rusiyanın və İngiltərənin
zəiflədilməsi üçün lazımi tədbirlərin həyata keçirilməsi də general
Qardanın vəzifələrinə daxil idi. Bu məqsədlə liman şəhərləri, Hindistana
aparan yollar öyrənilməli idi. Napoleon açıq etiraf edirdi ki, İran bizim
üçün bir tərəfdən Rusiyaya qarşı mübarizə meydanıdır, bir tərəfdən də
Hindistan üzərinə hücum meydanıdır.
General Qardanın heyətinin hazırlanıb İrana göndərilməsinə xüsusi
diqqət yetirilirdi. Əvvəla, bu heyətin tərkibinin seçilməsi nəzarət altında
saxlanılırdı. Heyət həm çoxsaylı idi, həm də onun tərkibinə müxtəlif ix-
tisaslı hərbçilər daxil edilmişdilər. Qacar qoşunlarının yenidən qurulması
işi ilə də bu hərbçilər məşğul olmalı idilər. Nümayəndə heyətinin
tərkibinə seçilənlərin öz ixtisasları üzrə lazımi təcrübəyə malik olması
nəzərə alınırdı.
General Qardanın heyəti iki dəstədən ibarət idi. Birinci dəstə
siyasətçilərdən və diplomatlardan təşkil olunmuşdu və bu dəstə Fransanın
Qacar sarayındakı səfirliyi funksiyasını öz üzərinə götürməli idi. İkinci
dəstə isə hərbçilərdən ibarət idi. Bu dəstəyə ümumqoşun zabitləri,
topçular, istehkamçılar, topoqraflar, hərbi həkimlər və başqaları daxil
idi. Şah sarayının xahişlərini nəzərə alaraq Napoleon hələ Finkinşteyn
anlaşması imzalanmazdan əvvəl, 1807-ci il aprel ayının 12-də İrana hərbi
heyət göndərilməsi haqqında əmr imzaladı. Amma belə bir əmrin
imzalanması iyun ayınn əvvəlində elan olundu (56). Finkinşteyn
anlaşmasının imzalanması isə belə bir əmr üçün hüquqi baza oldu. Belə
bir heyətin formalaşdırılması və ona rəhbərlik edilməsi general Qardana
tapşırıldı.
Doğrudur, tarixi araşdırmalarda Finkinşteyn anlaşmasında şah
sarayının öz üzərinə götürdüyü öhdəliklər qeyri-real sayılır. Napoleonun
İranın ağır daxili vəziyyətindən xəbərdar olduğu və şah qoşunlarının
ingilislərə qarşı müharibə etmək iqtidarında olmadığı qeyd edilir (57).
Bununla belə, general Qardanın rəhbərliyi altında hərbi nümayəndə
heyətinin İrana göndərilməsini anlaşmanın əməli əhəmiyyəti kimi
qiymətləndirmək olar. Qacar sarayı ilə Fransa arasında sonradan
tamamilə fərqli münasibətlərin yaranması üzündən general Qardan öz
missiyasını sona qədər yerinə yetirə bilməsə də, hər halda onun heyətinin
Mehman Süleymanov
26
köməyi ilə Qafqaz cəbhəsinə göndəriləcək qoşunların
təkmilləşdirilməsi
sahəsində xeyli əməli işlər görüldü.
General Qardanın heyətinin yola düşməsindən əvvəl Napoleon
tərəfindən onun üçün xüsusi bir təlimat hazırlandı. Finkinşteyn
anlaşmasının imzalanmasından 11 gün sonra imzalanmış bu təlimatda
general Qardanın qarşısında dayanan vəzifə və tapşırıqlar təsbit
olunmuşdu (58). Təlimatda general Qardanın Fransa sarayı ilə əlaqə
saxlamaq yolları və onun hərəkət marşrutu göstərilmişdi. Qeyd olunurdu
ki, general Qardan İstanbuldan keçməklə İrana doğru irəliləməli idi.
Napoleon təlimatın əvvəlində general Qardana topladığı məlumatların
Fransaya göndərilməsi yolları, vasitələri və üsulları haqqında da öz
məsləhətlərini verirdi. Napoleon general Qardana tapşırdığı məsələləri
Rusiya-İran münasibətlərinin xarakteri, Fransanın İrana yardımı və Fran-
sanın Hindistana yürüş planları ətrafında qruplaşdırmaq olar. O xatırla-
dırdı ki, İran Rusiya ilə müharibə vəziyyətindədir, Rusiya Gürcüstanı
işğal edib və rus sarayı indiyə kimi Qacarlar hakimiyyətini rəsmən
tanımayıb. Onun fikrincə, bu məqamları qabartmaqla İran daxilində, şah
sarayında Rusiyaya qarşı təbliğatı genişləndirmək olar. General Qardan
eyni zamanda çalışmalı idi ki, Qacar sarayı ilə Osmanlı dövlətinin
ittifaqına nail olsun və ittifaqa girmiş bu dövlətlər birlikdə Qara dənizlə
Xəzər dənizi arasında Rusiyaya qarşı müharibə aparsınlar. Çünki Rusiya
əslində dövlətlərin hər ikisi üçün eyni dərəcədə təhlükə törədirdi.
Təlimatın sonunda Napoleon bir daha xatırladırdı ki, general
Qardanın qarşısında dayanan başlıca vəzifələrdən biri Fransa, Osmanlı və
İran üçbucağının təşkilinə və Rusiya əleyhinə ittifaqın yaradılmasına nail
olunmasıdır. Napoleon hətta Monqolustana qədər əl uzatmaq arzularını
da gizlətmirdi. Belə böyük ərazilərin nəzarət altına alınması onun
fikrincə, Rusiyanın imkanlarını xeyli məhdudlaşdırmış olardı.
General Qardan, şah sarayının əyanlarının nəzərinə çatdırmalı idi ki,
İran Rusiyanın və ingilis müstəmləkələrinin təzyiqinə məruz qalmışdır.
İngiltərənin və Rusiyanın işğalçılığı nə qədər genişlənsə, İrana olan
təzyiq dı o qədər arta bilər. Napoleona görə şah sarayı ingilis işğalına
qarşı vaxtında müqavimət göstərməsə və ya ingilislərə qarşı mübarizə
aparan Fransaya yardım göstərməsə, onda İran İngiltərənin
müstəmləkəsinin şimal hissəsinə çevrilə bilər. Napoleonun fikrincə, İran
Rusiyanın təbii düşməni idi və general Qardan bunu öz fəaliyyətində
nəzərə almalı idi.
Şah qoşunlarına təlim verilməsi məsələsi də başlıca vəzifə kimi
general Qardana tapşırıldı. Napoleon ondan tələb edirdi ki, döyüşlər
zamanı əldə etdiyi bütün təcrübəni şah qoşunlarına öyrətsin və şah