balasını dirildir [21, s.177 - 179].
Dünya modelinin kosmik düzümünə fikir versək, bu nizamda qurbanın yeri totemizm ilə ilgili olan ölüb-
dirilmənin həyata keçirilməsi prosesində üzə çıxır. Ayrı-ayrılıqda kəsilən hər bir heyvan totem olaraq
mifoloji şüurda qalmaqdadır.
Totem də insanla kosmos arasında əlaqə yaradan real fəaliyyət sferasıdır. Qurbanın funksiyası qəbilə üzvləri
ilə kosmos arasında əlaqə yaratmaqdan ibarətdir. İnsan, kosmos, ağac, dağ, totem və qəhrəman bu çevrəni
birləşdirən kosmik nizam kimi bir-birini tamamlayır. Qurbankəsmə isə bunların hər biri üçün ayrıca
düşünülmüş ritualdır.
Magik akt kimi qəbul edilən qurban mərasimi mifoloji düşüncənin qanunları ilə yaşayan qədim insanın
ruhuna rahatlıq gətirirdi. Qurban verən insan özünü şər ruhlardan qoruyacağını, onu əhatə edən kosmosun
nizamını saxlaya biləcəyini düşünürdü. İbtidai çağlarda qurbanvermə mərasimi qəbilə üzvlərinin iştirakı ilə
həyata keçirilirdi və universal xarakter daşıyırdı.
Qədim türklər qurbanı kəsərkən onun sümüklərini sındırmaz, itlərə verməzdilər. Onlar bu sümükləri bir
torbaya yığıb ağacdan asar, ya da torpağa basdırardılar. Bu sümüklər əkinə qədər saxlanardı. Əkin vaxtı
torpağa səpilərdi [37, s.228].
Qurbanlıq heyvanlarla bağlı inamlar xalq arasında bu gün də yaşamaqdadır. İnama görə hər hansı bir adam
birinin qurbanlıq qoçunu oğurlasa, onun üç heyvanı ölməli, ya da itməlidir. Qurbanlıq heyvanın kəsiləcəyi
yeri tanıması da, yuxarıda dediyimiz kimi, hələ sirr olaraq qalır. «Öysüz piri» əfsanəsində deyilir ki, Uzun
Yasin adlı bir kişi oğluna inək qurban deyir. Oğlu qayıdıb gələn kimi kişi inəyi ocağa gətirir. Yoldan xeyli
aralıda inək adamların əlindən çıxır. Onlar narahat olurlar ki, inək qaçıb gedəcək. Yasin kişi deyir ki, o düz
ocağa gedəcək. Doğrudan da inək ocağa gedir, harda heyvanları kəsirlər, orada dayanır. Salman kişi də
ocağa qoç gətirirmiş. Qoç əllərindən çıxır. Ocağa gəlib onun ətrafında üç dəfə fırlanır. Sonra yenə heyvanlar
kəsilən yerdə dayanır (Bu əfsanələri T.Qurbanov top- lamışdır).
Xalq arasında qurban bayramı ilə bağlı müxtəlif adətlər də vardır. Bayramdan bir gün əvvəl (bayram
axşamı) Zaqatala rayonunda Kosa-kosa mərasimi keçirilir. Cəbrayıl rayonunda qurban kəsildikdən sonra
(adətən qurbanın kəsilmə vaxtı sübh tezdən saat 12-dəkdir) halva bişirilir, dürməyin arasına qoyulub ölülərə
pay çıxılır.
Qurbanın tarixi haqqında söz demək çətindir. Ancaq güman etmək olar ki, totemdən qurbana doğru uzanan
proses, kulta çevrilmək, Allahla qurbanlıq arasındakı sakral əlaqə, heyvanın qurban seçilməsi ilə onun
özünün zor işlətmədən kəsiləcək yerə gəlməsi bu vaxtadək açılması mümkün olmayan təfəkkürdən uzaq,
idrakdan kənar hadisədir.
Qurbankəsmənin sosial strukturu ölüb-dirilmənin fizioloji xüsusiyyətlərini özündə əks etdirir. Yuxarıda
deyildiyi kimi, kosmosu təşkil edən hər bir mərhələnin canlı olaraq başa düşülməsi, insanın özünü onlardan
asılı hesab etməsi qurbankəsməni həmin mərhələlər üçün vacib etmişdir. Həm də qurbankəsmədə icra
olunan mərasim bilavasitə bir zamanlar qəbilə və tayfaların həyatında totem kimi müəyyən rol oynamış
heyvanların kəsilməsini ehtiva edir. Diqqətlə fikir versək, görərik ki, kəsilən qurbanlar toplumun müqəddəs
hesab etdiyi heyvanlardan ibarətdir. Lakin Azərbaycan folklorunda elə mətnlər də vardır ki, bunlar da it və
qurd ilə bağlıdır. Onların totem ola bilməsi mətnlərdə qabarıq deyil, həmin zoomorf heyvanların totemizmin
təşəkkül etdiyi ibtidai çağlardakı rolu hələ öyrənilməmişdir.
Bunu nəzərə alıb problemin şərhində öz mülahizələrimizi irəli sürmək fikrindəyik. Azərbaycan
folklorşünaslığında itlə bağlı mifoloji görüşlər hələ öyrənilməmiş olaraq qalır. İtə olan inam dünyanın bir
çox xalqlarının mifo- logiyasında yaşamaqdadır.
Qədim Misir, yunan və başqa xalqların mifologi- yasında
bu haqda məlumatlara rast gəlirik. Bizim mifologiyada isə itlə bağlı görüşlər daha qədim qatları əks
etdirdiyindən və bu haqda miflər, əfsanələr adda-budda, dağınıq olduğundan bu görüş haqda söz demək bir
qədər çətindir.
Qeyd etdiyimiz kimi, qədim dövrlərdə Misirdə itə böyük sitayiş olmuş, hətta qədim misirlilər öz inanclarını
Anubis adlı tanrının timsalında bütləşdirmişlər. Eyni zamanda itə olan sitayiş qurda olan inancla
eyniləşdirilib. Bu da ondan irəli gəlib ki, dünyanın bir çox xalqlarında olduğu kimi, misirlilər də it və qurdu
bir cinsdən saymışlar. Bu inamı misirlilərdən yunanlar da götürmüş və itə olan inam əsas inanclardan biri
olmuşdur. Platon «Qorqi» dialoqunda Sokratın itə olan inamını, onun itə and içməsini qeyd edir. Sokratın itə
and içməsi nə ilə bağlıdır? Məlum olduğu kimi, Anubis ölümdən sonrakı qaranlıq dünyanın idarəçisi,
qoruyucusu sayılırdı. İtə, yaxud Anubisə and içməklə Sokrat ölümdən sonrakı həyatını, əzablarını
yüngülləşdirməyə çalışırdı [52, s.72]. «Mifoloji lüğət»də Anubisin ölülərin himayəçisi, uzanmış halda olan
qara rəngli çaqqal və ya it kimi təsəvvür olunduğu yazılır. Anubisin qurd şəklində təsəvvür olunan Upuat ilə
eyniləşdirilməsi də diqqət çəkir [196, s.563].
Araşdırmalarımıza rəğmən deyə bilərik ki, türk xalqlarının mifologiyasında Anubisə sırf oxşar olan məbud
yoxdur. Ancaq «Mifoloji lüğət»də Anubis qaranlıq dünyanın qoruyucusu, yunanlarda olan Kerberin
xüsusiyyətlərinin daşıyıcısı kimi qeyd olunur [196, s.563]. Onun bu vəzifəsini, yəni ölülər dünyasını
qorumasını türk mifoloji mətnlərində İt-Barak adlı qorxunc bir it həyata keçirir. Yəni o da qaranlıq dünyanın
qoruyucusudur. Bahaəddin Ögələ görə, Barak, Kumayık - əfsanəvi bir heyvandır ki, heç bir canlı canını
ondan qurtara bilməz [134, s.123]. Prof. Kamil Vəli Nərimanoğlu araşdırmalarında göstərir ki, Barak adı
verilən uzun tüklü caydaq köpəyi şumerlər müqəddəs sayırdı. Şamanlar Barak adlı itə minərək göyə
çıxırdılar. Qırğızlar da cins itə Barak deyirdilər [124, s.21]. «Qədim türk sözlüyü»ndə Barak uzun tüklü,
caynaqları uzun olan, cəld və iti sıçrayışlı cins it kimi təqdim edilir [170, s.83]. Xalq əfsanələrində deyilir ki,
Ağbaba adlı bir qartal qocalanda iki yumurta qoyurmuş, birindən İt-Barak adlı köpək çıxırmış [124, s.23].
«Oğuz Kağan» dastanında da İt-Barak adlı bir qəbilədən bəhs olunur. Onların totemləri quşdan törəmiş bir
köpək imiş.
Rəşidəddinin də «Oğuznamə»sinə görə, İt-Barakın qoruduğu qaranlıq dünya ilə işıqlı dünyanın sərhədində
Qıl-Barak ölkəsi yerləşir. Oğuz kağan bu ölkəyə hücum edib onu özünə tabe etmək istəyir. Əgər biz yunan
mifologiyasında Heraklın qaranlıq dünyaya səfərini və bu zaman Kerber adlı itlə qarşılaşmasını [219] türk
mifoloji görüşünün təsiri kimi qəbul etsək, onda Oğuz xanın da İt-Barakla üz-üzə gəldiyini, vuruşduğunu
təxmin edə bilərik.
Yuxarıda deyilənlər baxımından «Barak» sözünün etimologiyası əhəmiyyət kəsb edir. Qədim türk dilində
«börə» qurd mənasında işlənmişdir. «Qara it ilə Bənək» haqqındakı əfsanədə də qurdun adı Qara Barakdır
(mətn yaddaşdan qeydə alınanda bu ad başa düşülmədiyindən Qarabalıq kimi qeyd olunsa da, onu Qara
Barak kimi qəbul etmək düzgün olardı). Əlimizdə mövcud olan başqa mətnlərdə isə Qara Barak itin adıdır.
Rəşidəddinin «Oğuznamə»sindən də göründüyü kimi, burada da Barak it mənasında işlənmişdir. Eyni adın
həm itə, həm də qurda deyilməsi təsadüfdürmü? V.A.Qordlevski Q.Potaninin Barquzin buryatlarından adına
«Burto» deyilən itin haqqındakı əfsanəni qeydə aldığını yazır. Həmin əfsanədə Veneranın qoyunlarının
qoruyucusu olan bu «Burto»nu buryatlar səma iti adlandırırdılar [167, s.497]. Bizə elə gəlir ki, İt-Barak eyni
məzmun daşıyan iki adın birləşməsindən yaranan addır. Bir çox elmi ədəbiyyatlarda da itlə qurdun eyni
cinsdən olduğu göstərilir. Elə tərəfimizdən toplanan mətndə də bunun şahidi oluruq. Əfsanədə deyilir ki, itlə
qurd qohum imiş. Qurd həyətdə yaşayırmış, it dağda-daşda. İtin balaları xəstələnir. İt gəlib qurda deyir ki,
sənin yerin istidi, balalarım xəstədi, bir həftə biz həyətdə yaşayaq, balalarım sağalan kimi yenə dağa
çıxaram. Qurd inanır, həyətdən çıxıb dağa gedir, bir həftədən sonra gəlir itə deyir ki, uuu... balaların
sağalduuu...