Microsoft Word Qebele-Son variant
Yüklə 0,61 Mb. Pdf görüntüsü
|
- Bu səhifədəki naviqasiya:
- “Gilan Holdinq”
- “vedrə bazarı”
Təbiəti, suyu saf olan rayon camaatı elə mühitdə yaşayırlar ki, onların tərbiyəsi də ayna kimi şəffaf, mənən pak olur. Doğrudan da dünyanın mürəkkəb fəlsəfəsini öyrəndikcə elə bu həyat həqiqətinin şahidi oldum ki, bütün paklıqlar, düzlüklər olduğu kimi ancaq kənd həyatında mümkün imiş. Balaca bir məkanda düz necə varsa elə, əyri isə olduğu kimidir. Hər şey göz qabağında olduğundan kimisə aldatmağa nə ehtiyac var, nə də insanlar bir-birinə kələk gəlmək fikrinə düşürlər. Yediyi qidalar, içdiyi su kimi, danışığı, sözü də təmiz olur, rayon camaatının. Bəlkə ona görədir ki, Nic kəndindəki “həftə bazarı”nın ömrü belə uzundur. Alış-satış mərkəzi olsa da burada insanlar ticarətdən başqa həm də baş verən olaylardan tez xəbər tuturlar. İldırım sürətiylə yayılan xəbərlər müxtəlif olsa da maraqla dinlənilir. Toyu olanlar dəvətnamələrini elə orada paylayıb, xeyir məclisindən kənd əhlini hali edir, yaxud qəfil yas yerinin ünvanı bilməyənlərə bəlli olur. Nə isə xeyir və şər işi ilə qapılarının dolu olduğu Qəbələ camaatı üçün bura həm də ünsiyyət mərkəzi sayılır. Bu “həftə bazarı” bizə tarixdən ərmağandırsa, “Gilan Holdinq” ticarət mərkəzi müasir səviyyədə inşa edilmiş, yerli əhali ilə bərabər turistlərin də alış-veriş etdiyi ən böyük məkanlardan biridir. Burada bazar kompleks şəkildə qurulub. Bir-birinin yanında silsilə şəkilində olan obyektlər həm zövqlə tikilib, həm də spesifik xüsusiyyətləri özündə cəmləşdirdiyindən zəngin mağazalar şəbəkəsi ilə müştərilərə xidmət göstərir. Qəbələyə yolu düşənlər yol kənarındakı “vedrə bazarı”ndan da xəbərdardırlar. Digər ticarət məkanlarından fərqi odur ki, burada tərəzi ilə mal satılmır. Rayonun təbii nemətləri yol kənarında sanki nümayiş etdirilir. Meyvələri vedrələrdə, bəhməzi şüşələrdə, mürəbbələri balonlarda müştərilərə təklif olunur. Bir neçə dəqiqə ərzində ürəyin istəyən hər nə varsa və o da Qəbələdə bitirsə burada onu tapmaq, dadına baxmaq mümkündür. Gül suyu, mürəbbələr, əllə çəkilən şərablar və dadlı meyvələr yolla ötənləri bir anlıq da olsa ayaq saxlamağa vadar edir ki, Qəbələ təbiətindən soraq verən bu açıq səma altındakı sərgiyə tamaşa etsinlər... ŞƏHƏRDƏN GƏLƏN OVÇU VƏ ANAMIN TƏBİƏT DƏRSİ İndiyədək analar haqqında yazılanlar, deyilən kəlamlar kifayət qədər çox olsa da mənə elə gəlir ki, bu müəmmalı qadın obrazının daxili aləmini insan övladı tam açmaq iqtidarında deyil. Qadın başdan-başa yaradanın özü qədər sirrdir. Ola bilsin ki, əksər keyfiyyətləri özündə birləşdirdiyindən ümumi obraz yaratmaq mümkündür və ana surətinə xas cəhətlər eyni olduğundan bu incə məxluq haqqında model anlayış qəbul etdiyimiz kimidir. Qadın ömrünü vərəqləyəndə, bir-birindən fərqli hadisələrin təhlili araşdırılanda, anaların iç dünyası açılanda, qəlbində tanrının böyüklüyü qədər ulu hisslərin olduğu aşkarlanır. Canından can ayrılanda, nəfəs verdiyi insan həyata göz açanda ana olduğundan elə qururlanır ki, bu hisslər də o anda baş qaldırır. Yəni analara fəhm də, ülvi duyğular da ilahidən gəlir, qəlbindəki yeni cücərtiləri də tanrı səpir və yer üzünün yeni səcdəgahı yaranır... Haqqında danışacağım qadın adi insanlardan biridir. Vaxtından qabaq ailə həyatı qurduğundan özü deyir ki, qarşıdakı illərin ağırlığına tab gətirə biləcəyini gümanına gətirməzmiş. On beş yaşın tamamında gəlinlik paltarı geyinib, özgə ocağının çırağını yandırıb. Bir-birinin ardınca doğulan körpələr isə başını elə qarışdırıb ki, gənc ananın ev qayğıları gözünü açmağa imkan verməyib. Ər evinə gəlişinin heç on ili tamam olmamış cavan ərinin qəfil ölümü, vaxtsız əcəl ailəni başsız qoyanda beş körpəsi ilə birlikdə qəbiristanlığın elə beş addımlığında yaşamağa məhkum olub. Üzərinə düşən ağır yükü daşımağa bəlkə də bu hala düçar olan hər bir ana qadir ola bilərmiş... Həyətimiz balaca olsa da, kol-kos basmış ata yurdumuz geniş idi və anamın əlindən məngal, yaba düşməzdi, biz də onunla birlikdə torpaqda çalışır, bağımızı kolluqdan təmizləyirdik. Özümüzlə bərabər bağımızdakı yeni ağaclar da böyüyürdü. Anamın çiyinlərinə götürdüyü meyvə dolu kisələr isə çəkisindən bəlkə də daha ağır idi, 50 kiloluq tayaları bazara aparardı və evin dolanışığını təmin edərdi... Uşaqlıq illərindən sonrakı həyatımızın da bələdçisi olduğundan şam kimi əriyən ömrü yolumuza işıq salıb... Ailəmiz kimi kəndimiz də problemlərlə dolu idi. Dağ kəndi sayıldığından geridə qalan yurd yerlərindən olub... 1990-cı ilin 20 yanvar hadisəsi baş verəndə Bakıda təhsil alan qızından nigarançılığı, rayon mərkəzindəki poçtda səhə-rəcən növbə gözləməsi, telefon-danışıq məntəqəsində keçirdiyi həyəcan, eyni hadisədən təlaş keçirən digər insanların da nəzərindən qaçmır. Qızı ilə danışdıqdan sonra necə sevindiyinin şahidi olanlar “gözün aydın, ay gəlin” deyə gözaydınlığı verirlər... Həmin məlum hadisədən sonra, Rusiya ordusunda hərbi qulluğun azərbaycanlılar üçün çətin olduğu vaxtda oğlanlarının sağ-salamat geri qayıtması üçün əlləri tanrıya açılı qalır. Bu illər ərzində ən çox getdiyi yer, üz tutduğu məkan həmin danışıq məntəqəsidir ki, ana bura gəlişindən, övladları ilə əlaqə saxladıqdan sonra özündə təsəlli tapır, qismən də olsa nigarançılıqdan qurtulur... Yurdumuza baharın gəlişi hiss olunanda anam bağımızdakı Novruz gülünü və bənövşəni elə köklü köməcli qaba qoyub Bakıya gətirir. Şəhərin soyuq-sazaq martında qəfil qonağımız olan dağ çiçəklərinin görünüşü, dörd tərəfində öz əliylə hazırladığı nemətlər mənim üçün dünyanın ən qiymətli bəxşişidir. Xüsusən də yerindən, yurdundan olan bənövşənin yazıq görkəmi, döşlərdə bitən bu ağ çiçəyi görəndə kəndimizin qoxusunu hiss edirəm və duyğusal anamın bu çiçək sovqatını hazırlayarkən qəlbinin döyüntülərini eşidirəm. Qardaşlarım əsgər olanda da anam bağımızda gördüyü ilk bənövşəni zərfə yığıb Rusiyaya yola salardı. Universitetdə oxuyanda da ilbəil aldığım bahar güllərinin qurumuş maketi indi də kitablarımın arasındadır. Ümidlər gətirən, arzuları işardan bu fəsli çox sevirik və onun hər ilindən gözlədiyimiz nə varsa hamısı çin olur... Qardaşlarım sağ salamat uzaq ellərdən geri döndü, odun alovun içindən qurtulan vətən oğullarından biri el yolunda göstərdiyi şücayətilə fəxr edir və bütün bunlardan qürur duyan qadın nəvələrinin əhatəsində əvvəllər olduğu kimi yenə özünü çox xoşbəxt sayır. Tanrıdan aldığı ən şirin nemətlərə görə “dünyanın ən bəxtəvər anasıyam”- deyə öyünür... Yüklə 0,61 Mb. Dostları ilə paylaş:
|