Microsoft Word Sirler Xezinesi doc

Hacı yola düzәldi, nәsibi qan-tәr oldu, 
Zәr aşiqi bu şeyxә girov qalan zәr oldu: 
Yarәb, mәn nә uzağa, nә yaxına sığındım, 
Yoxsulluqda hәmişә dәrgahına sığındım. 
Kәrәminlә ucaltdın gör ki, mәni hara sәn, 
Bir yoxsulu yetirdin istәdiyi vara sәn. 
Tez xәrclәyim, yeyim ki, yüzü alar әlimdәn, 
Tanrı özü versә dә özü alar әlimdәn. 
Açan kimi kisәni, aman, necә şellәndi, 
Kef-damağı cağ oldu, neçә gecә şellәndi. 
Haman müftә qızılla tezcә harın oldu şeyx. 
Gödәnini doldurub xaşalqarın oldu şeyx. 
"Әritdiyi" qızıllar qursağını yağladı, 
İpәk telli sәnәmlәr qurşağını bağladı.  
Axır cini hürkütdü әbasının yırtığı, 
Dönüb oldu elindә sırtıqların sırtığı. 
"Şikarını" hülüdüb ac-yalavac qaldı o, 
Çırağına tökmәyә yağa möhtac qaldı o. 
Gәlib çıxdı axır ki, ziyarәtdәn bu hacı, 
Xәbәrsizdi qızıldan, o qarәtdәn bu hacı 
"Әmanәti özümә qaytar" deyib - dindi o. 
Şeyx dedi ki: batıbdır, yoxsa çıxıb indi o? 
İnad etmә, dilimә haçan yalan gәlibdir, 
Haçan viran bir kәndә xәrac alan gәlibdir? 
Mәnimtәk arif hara, sәn atdığın şәr hara? 
Hava gәlib başına? Müflis hara, zәr hara? 
Türkü soymaq mümkünmü? Türk soyubdur hamını. 
Hindu paltar güdәndir? Lüt qoyubdur hamını. 
Can evimdә qızılın dirәyimi sındırıb. 
Dirәk nәdir, belimi, kürәyimi sındırıb. 
Dözdü belә qarәtә yazıq hacı gülüşlә, 
Göz yaşını sel kimi tökdü acı gülüşlә. 
Comәrdliyin varsa da, bil ki niyә peşmanam. 
Müsәlmanam, etdiyim kafirliyә peşmanam. 
Dünya xata doğmağa yaranıbdır әzәldәn, 
Xatakarı boğmağa yaranıbdır әzәldәn. 
Comәrdliyi hökm etdi: yandırmasın zәr sәni, 
Qoy yumşaltsın o şeyxin üzündәki tәr sәni. 
Tanrı özü vermişdi, özü aldı qızılı, 
Sәxavәti, mәrdliyi gözdәn saldı qızılı. 
Öz-özünü danladı: niyә zalım olum mәn? 
O, yoxsulun biridir, nәyi var ki, alım mәn? 
Bir çöpü dә yox onun, nәyә çatır gümanı? 

---

Girovunu vermәyә imanadır gümanı 
Әmanәtdәn qalıb ki, o, qıya qaytarmağa 
Nәmәnәsi qalıbdır hacıya qaytarmağa. 
Dedi: - Qәddin sınmasın günah yükündәn sәnin, 
Haram pullar halalın olsun bu gündәn sәnin. 
Fәlәk kimi dolanıb özün qazan nemәti, 
Әldәn qapıb әtәyә yığma asan nemәti. 
Hәrisliklә vurmayan ürәk varmı dünyada? 
Etibarlı bir insan görәk, varmı dünyada? 
Din-imanın qızıldır, onu şeytana qıyma, 
Xaqanın qolbağını itsaxlayana qıyma. 
Başdan-başa günahdır inlәmәyi yoxsulun, 
Aldığını vermәyә yox heç nәyi yoxsulun. 
Dünyanın hәr eybinә qәh-qәh çәkib gül gündә, 
Mәslәk eşqi yaşatsın sәni könül mülkündә. 
Sığın könül mülkünә, öz yerini bilәn ol, 
Hünәrinlә dünyanın hәr eybinә gülәn ol. 
Bu dünyanın darğası ancaq varı taladır, 
Yoxsullara toxunmaz varlıları taladır. 
Nә veribdir kasıba göz qoydursun bu fәlәk? 
İstәr-varlı karvanı tez soydursun bu fәlәk. 
Düşündürmәz әzәldәn öz әhvalı arını, 
Şirin candan eylәyәr şirin balı arını. 
Şirin deyil, acıdır deyә әti aslanın, 
Bir vәhşi dә әtini yemәz qәti aslanın, 
Ucalsa da, alçalıb günәş göydә sönәndir, 
Bәdirlәnib axırda Ay hilala dönәndir. 
Yalquzaqtәk gәzmәyi yerә xoşdur külәyin, 
Arxayındır boş gedir, әli boşdur külәyin. 
Öz pulları göstәrәr ayna sudan balığı. 
Bircә anda ovlayar balıqudan balığı. 
Arzu, istәk tәrәzin qızıl çәkәn olmasın, 
Müqәddәssәn, qәlbindә çalış lәkәn olmasın. 
İstәyinin yolunda saf çeşmәtәk çağla sәn, 
Nizamitәk könlünü ülviyyәtә bağla sәn. 
 
 
ON DÖRDÜNCÜ SÖHBӘT 
 
HAQSIZLIQ VӘ DOĞRULUQ 
 
Ey öküzә, ulağa harınlıqda tay olan! 

---

Ömrü, günü qәflәtdә, gecә-gündüz zay olan! 
Batıb-çıxan Günәşin gәrdişindәn xәbәrsiz! 
Bu lacivәrd göylәrin hәr işindәn xәbәrsiz! 
Müdriklәr әmәliylә şöhrәtidir alәmin, 
Nadanlar qәflәtiylә möhnәtidir alәmin. 
Hünәr, qeyrәt dәmidir, yatma әbәs hәyatda, 
Ülviyyәtә çatmağa göstәr hәvәs hәyatda. 
Niyә kefli yatırsan? Qәsdindәdir bu fәlәk, 
Aqillәrtәk ayıq ol, bil ki, nәdir bu fәlәk. 
Yatanlara yaxşı bax, bu qәflәti tәrk elә. 
Gör ki, hara gedirsәn, axırını dәrk elә. 
Ağlın huşsuz qocadır, anmaz sәni heç zaman. 
Kimliyini bildirsәn, danmaz sәni heç zaman. 
Kamalına görәdir şan-şöhrәtin dünyada, 
Onsuz adın, hünәrin olar çәtin dünyada. 
Öz ağlındır İsatәk möcüzәni yaradan, 
Ulaq görmәk istәmәz, bil ki, sәni yaradan. 
Ya ağlınla ucalıb al Günәşә qovuş sәn, 
Ya da uca dәrgahın qapısından sovuş sәn. 
Yol göstәrәn ağılı mәst elәmәk yaramaz, 
Sәrçә üçün tәrlana qәsd elәmәk yaramaz. 
Halaldır demişdilәr hәr mәqamda, bu meyә, 
Sonra haram etdilәr ağla düşmәndir deyә. 
Çox da dünya qәmini pәrәn salan şәrabdır, 
Ağa, içmә, ağlını әldәn alan şәrabdır. 
Çaxır duztәk ciyәrdә yanan odu söndürәr, 
Әyyaşların bağrında, inan, odu söndürәr. 
İçmә, huşyar eylәmәz o içdiyin mey sәni. 
Yaddan çıxar varlığın, şәrab eylәr key sәni. 
Sәrxoşluğa uyan kәs әlәm çәkәr ömürlük, 
Aqilliyin üstünә qәlәm çәkәr ömürlük. 
Xülyaların gözlәri qoy milinlә kor olsun, 
Meyxanәnin meyiylә qoyma ciyәr qor olsun. 
"Әlif" kimi öyünmә düzdür deyә qamәtin, 
Lovğalıqdan әyilәr bu fәlәyә qamәtin. 
"Әlif" olsan, qanadsız quşa dönüb uçmazsan, 
"Bey" kimi әyilmәsәn, bu torpağı qucmazsan. 
"Әlif" qәddin olsa da hәr mәclisә yaraşıq, 
Yaraşarmı "әlif"tәk sәn müflisә yaraşıq? 
Sәn ki, tikan deyilsәn, dikbaş görә el sәni, 
Gülә bәnzә, oxşasın hәzin әsәn yel sәni. 
Hәyat kimi dünyada çox qalmağa can atma, 
Uşaqtәk oyuncağa sәn dә başını qatma. 

---