Microsoft Word Sirler Xezinesi doc

Demә niyә qoynuna cillik çәkәr qamışı? 
Şәkәriylә ad alıb çünki şәkәr qamışı. 
Çәkişmәyә uymazsan hünәrinә güvәnsәn, 
Sәnәt olsun şikarın, hünәrinә güvәn sәn! 
Sular bol-bol çoxda ki, axıb dolar sәdәfә, 
Bircә yağış damlası inci olar sәdәfә. 
Cummalısan dәryaya sәn bir inci tapınca, 
Taca layiq incini sәn birinci tapınca. 
Baxtın әli uzatsa sәnә tәrәf bayrağı. 
Möhkәm saxla, düşmәsin әldәn şәrәf bayrağı. 
Yıxan hanı dünyanın sarayını dünyada? 
Kәsmә sәnәt mülkündә harayını dünyada. 
Darğa olma heç zaman yaradanın mülkündә, 
İblis kimi qamçıyla çıxar canın mülkündә. 
Yaradanın hökmündәn kim ki, qaçan olubdur, 
Fәlәk onun başına oyun açan olubdur. 
 
 
ŞAHZADӘ HEKAYӘTİ 
 
Deyirlәr ki, hakimdi uzaq Mәrvә bir cavan. 
Boy-buxunda bәnzәrdi uca sәrvә bir cavan. 
Dövlәt adamlarından inciyirdi, bezirdi, 
Onlar onun әksinә külәk kimi әsirdi. 
Köhnә şahlar bәslәdi tәzә şaha әdavәt, 
Lәrzә saldı canına, hәm dәrgaha әdavәt. 
Bu qovğadan beynini tәlaş yedi bir gecә, 
Bir ixtiyar yuxuda ona dedi bir gecә: 
"Ey tәzә Ay, nurunla köhnә bürcü boğ daha, 
Ey tәzә gül, köhnә şax qoyma versin zoğ daha. 
Belә etsәn, şahlıqda başın daim sağ olar. 
Qaş qabağın açılar, kef-damağın çağ olar." 
Qalxan kimi yuxudan öz işini bildi şah. 
Kim ki, ona qәnimdi yer üzündәn sildi şah. 
Yıxıb köhnә sarayı yeni saray qurdu o, 
Şahlığıyla bәzәdi sәltәnәti, yurdu o. 
Mәmlәkәti dağıdan başsız qalsa yaxşıdır. 
Xain ordu basılıb tarmar olsa yaxşıdır. 
Buda köhnә budağı, yeni pöhrә görәrsәn. 
Tәzә, cavan budaqdan tәzә bәhrә görәrsәn. 
Sel qoymasa işlәsin kökü yerә çinarın, 
Uzanarmı әllәri fәlәklәrә çinarın?  
Göz açmasan kor qalar öz yerindә bulaqlar, 

---

Coşmaz yerin qәlbindә, gözlәrindә bulaqlar, 
Mәnliyinin hakimi sәninlәdir hәmişә. 
Qulağına dediyi, bil ki, nәdir hәmişә. 
Paslandırma qanında xәncәrini kamalın, 
Xәncәriylә doğrasın daim kini kamalın. 
Ağıl-kamal mücrüsü ülviyyәtә bağlıdır. 
Kin xәncәri sanma ki, pak niyyәtә bağlıdır. 
Kamalındır dövlәtin, kamalına arxalan, 
Amalındır comәrdlik, amalına arxalan, 
Güvәniblәr hәyatda sәxavәtә varlılar, 
Qovuşublar әbәdi sәadәtә varlılar. 
Qurtuluşun tarlası kәrәm dәni bәslәyәr, 
Vaxt gәlәr ki, nemәtlә kәrәm sәni bәslәyәr. 
O comәrdlik xәznәni görüb mini, ilahi! 
Nemәtinlә barındır Nizamini, ilahi! 
 
 
ON ALTINCI SÖHBӘT 
 
ZİRӘKLİK 
 
Bir nәsimin gücüylә, әrzi bәzәr bayrağın, 
Basılanda özüntәk yerdә gәzәr bayrağın. 
Kәndin var ki, "Kәndxuda mәnәm kәndә" deyirsәn? 
Mülkün var ki, "Süleyman taxtı mәndә" deyirsәn? 
Sәn ki, qılınc deyilsәn, qırhaqırın bәs nәdir? 
Sәn ki, tәbil deyilsәn, gurhagurun bәs nәdir? 
Qılınc dilin od saçsın odlu ilham-tәb ilә, 
Bәnzә köksü şadlıqdan enib-qalxan tәbilә. 
Doğru yoldan azaraq şiltәk enmә iblisә. 
Ölü deyil, canlısan, sürüklәnmә iblisә. 
Atәşpәrәst önündә xaça dönmәk yaraşmaz, 
Xәtib kimi qılıncla öyünmәkdәn kar aşmaz. 
Şaha xütbә oxumaq natiqlәrә nәsibdir, 
Adәm İsa xәtrinә asqırığı kәsibdir. 
Eşq oduna hansı kәs pәrvanәtәk yanandır, 
Varlığını әridәn oda o, tәk yanandır. 
Hәr anını sevinclә kef-damaqla yaşa sәn, 
At әbanı, vur ömrü halallıqla başa sәn. 
Aldıqların sәlәm ki, vardır tamah yolunda, 
Qәsәm olsun allaha, deyil allah yolunda. 
Şir ol, mәtbәx mәstanı şiri çәtin teylәyәr, 

---

Olsan balıq qursağı mәhşәr odu neylәyәr? 
Olsan saxta qızıltәk külçәni od yandırar, 
Olsan yaqut, saf qızıl, heç sәni od yandırar? 
Saxtalığın bәllidir, tәkәbbürü at daha, 
Neçә ovuc sümüksәn, az tәşәxxüs sat daha. 
Bizdәn әzәl dünyaya gәlib-gedib çoxları, 
Çatmaq üçün mәnsәbә nәlәr edib çoxları, 
Söylә, hanı, qalırmı bu dünyada şöhrәti? 
Ucalsa da alçalıb, gedib bada şöhrәti. 
Bir zәrrәsәn, göylәrә ucalası olsan da, 
Göydәn Günәş, Ay kimi öc alası olsan da, 
Sanma enәn deyilsәn, bir hakimsәn göyә sәn, 
Enmәlisәn torpağa Yer oğlusan deyә sәn. 
Öz başını әlinlә saçın kimi kәsmisәn, 
Mәhәccәrli dәrgahın qapısını kәsmә sәn. 
Quş deyilsәn, qanadsız, bil, uçmağın çәtindir, 
Can vermәsәn, vüsala qovuşmağın çәtindir, 
Heyran qalsın hünәrin öz әrinә bu fәlәk, 
Tәslim olsun gücünә, hünәrinә bu fәlәk. 
Zәhәrlәyib mey sәni, ağı sәnә, neylәyib? 
Günahkarsan, günahsız yağı sәnә neylәyib? 
Comәrdsәnsә, demәzsәn: çox xәbisdir bu dünya. 
Biz özümüz pisiksә, sanma pisdir bu dünya. 
Heyrәtdәyik aramsız gәrdişinә alәmin, 
İnsan istәr yarasın hәr işinә alәmin. 
Günahkarıq hamımız, demә, hanı günahkar? 
Eylәmәyәk nahaqdan bu dünyanı günahkar. 
Cilasıyla tanıyar mahir sәrraf incini, 
Sultan ancaq bәyәnәr cilalı, saf incini. 
Hansı yerindә daşı tapılmazdır dünyanın? 
Sinәsindә lәl olan daşı, azdır dünyanın. 
Yasәmәn dә, tikan da çölә, düzә sancılar, 
Biri gözә mәlhәmdir, biri gözә sancılar. 
Sanma çayın suyuyla açar çәtri güllәrin? 
Könüllәri susuz da oxşar әtri güllәrin. 
Su - bәxş edib sәhraya, göy çәmәnә tikanı, 
Su döndәrә bilәrmi yasәmәnә tikanı?! 
Belә qurub әzәldәn gәrdişini kainat. 
Yoxsa, çoxdan pozardı vәrdişini kainat. 
Taleyin әlindәdir hәr adәti alәmin, 
Kimә nәsib olubdur sәadәti alәmin?! 
Bәdbәxtlikdәn zәlildir comәrd әri cahanın, 
Bәxtiyarlar olublar bәxtәvәri cahanın. 

---

Kim ki, baxtı әzizlәr yatmaz baxtı, iqbalı, 
Baxtın qulu olanın atmaz baxtı, iqbalı, 
Bәxtiyarlıq mülkünü mәslәk әri alıbdır, 
Zirәkliyi, mәrdliyi, alın tәri alıbdır. 
Xoşbәxtlәrin başına canla, başla dolan sәn, 
Dolanmadan dünyanı naz-nemәtlә dolan sәn. 
Bәdbaxtlarla xoş keçmәz xoşbaxtların xoş vaxtı, 
Ad qazanıb, ol eldә xoşbaxtların xoşbaxtı. 
Bağlayaraq fәlәyin Cövzasına baxtını, 
Qoz sındırıb, cevizdә, qozda sına baxtını. 
Hәlimliklә üzünә qapı açar taleyin, 
Yeddi göyün qәsrinә olar açar taleyin. 
Su saflığıyla canda odu külә döndәrәr, 
Öz düyünü atәşdә udu külә döndәrәr. 
Bağlan könül dünyana, atma elә dünyanı. 
Can qoyaraq bu yolda, gәtir әlә dünyanı. 
Yad mülkünü soymağın, talamağın bәs deyil 
Hәrislikdәn oda can qalamağın bәs deyil? 
Tutaq, tutdun gücünlә neçә aya cahanı, 
Aparmağın mümkünmü, o dünyaya cahanı? 
Yanar mәhşәr kürәsi, burar tamah boynunu, 
Qәnaәtin qılıncı vurar tamah boynunu. 
Göy qübbәnin altında - Yerdә yerin var sәnin? 
Varlığına gensә dә, düşüncәnә dar sәnin. 
Ya düşünmә, talayıb soyduqca soy alәmi, 
Ya düşünüb heyrәtdә qoyduqca qoy alәmi. 
İnsan adı daşıyan hanı, varmı dünyada? 
Bircә könül hәmdәmi tapılarmı dünyada? 
Doqquz katib yazıbdır iki hünәr dastanı, 
Şәrlә başlar, şәrlә dә qurtarar hәr dastanı. 
Bu fәlәyin oxundan, söylә, sapmaq olarmı? 
Әjdahanın ağzından hәyat tapmaq olarmı? 
Fәlәk açsa başına nә pәstaha, yaxşıdır, 
Nadan dostdan ağıllı düşmәn daha yaxşıdır. 
 
 
AĞILLI UŞAĞIN HEKAYӘTİ 
 
Qayğı bilmәz bir uşaq bir gün başda tay-tuşu, 
Çıxdı evdәn yanında özü yaşda tay-tuşu. 
Düşәr-düşmәz getdiyi yola izi oğlanın, 
Qaçan zaman burxuldu birdәn dizi oğlanın. 
Ayağından bir yolluq әli sanki üzüldü, 

---