1.3. Müəllimin pedaqoji ustalığı və onun xüsusiyyətləri
“Öz üzərində işləməyən müəllim yaxşı müəllim ola bilməz”.
Heydər Əliyev
Pedaqoji ustalıq nədir, o nələrdən təşkil olunur? “Usta” müəllimi başqalarından hansı keyfiyyətlər fərqləndirir? Bütün müəllimlər pedaqoji ustalığa yiyələnə bilərmi? Bu və bunun kimi onlarca suallar pedaqoji yaradıcılığa yenicə başlayan gənc mütəxəssisləri düşündürən məsələlər kimi diqqəti cəlb edir.
Azərbaycan Respublikasının təhsil sahəsində İslahat Proqramında deyilir: “Pedaqoji ali və orta ixtisas müəssisələrində hələ də əsas diqqət tələbələrə fənn üzrə elmlərin nəzəri əsaslarının dərindən öyrədilməsinə yönəldilmişdir. Lakin onların pedaqoji ustalıqla bağlı vərdişlərə yiyələnməsinə, psixologiya elmini dərindən mənimsəmələrinə lazımi əhəmiyyət verilmir”.1
Pedaqoji fəaliyyət (müəllimin fəaliyyəti) digər fəaliyyətin (şagirdlərin fəaliyyətinin) idarə edilməsi kimi çətin və mürəkkəb bir prosesdir. Tərbiyə olunanların şəxsiyyətinə, onun formalaşmasına doğru istiqamətlənən bu fəaliyyət çoxcəhətli və məqsədyönlü fəaliyyət kimi müəllimdən dərin bilik, bacarıq, səriştəlilik, mahirlik, işinə dərin maraq tələb edir. Pedaqoji ustalıq bu xüsusiyyətlərin kompleksi olub, müəllimin peşə biliklərinin, pedaqoji qabiliyyətlərinin və pedaqoji texnikasının vəhdətindən ibarətdir. Bu xüsusiyyətlər bir-biri ilə sıx surətdə bağlı olub, pedaqoji ustalığın ahəngdarlığını təmin edir.
Pedaqoji fəaliyyət biristiqamətli proses deyildir. Eyni zamanda bu fəaliyyətin obyekti olan insana-şagirdə bir deyil, onlarla, yüzlərlə gözə görünməyən amillər təsir edir: bir tərəfdən, şagirdin özü, onun fərdi psixofizioloji xüsusiyyətləri, pedaqoji prosesdə iştirak səviyyəsi, digər tərəfdən isə, onu əhatə edən sosial mühit. Bütün bunlar isə heç də həmişə müsbət təsirə və nəticələrə səbəb olmur. Buna görə də müəllim yaradıcı düşünməli və fəal fəaliyyətə qoşulmalıdır. Bu baxımdan pedaqoji fəaliyyətin aşağıdakı əsas istiqamətlərini qeyd etmək olar:
– şagirdlərin elmlərin əsasları ilə silahlandırılması, onlarda elmi dünyagörüşün formalaşdırılması;
cəmiyyətin müəyyənləşdirdiyi əxlaq normaları ilə şagirdlərin tanış edilməsi, onlarda əxlaqi davranışın tərbiyə edilməsi;
şagirdlərin gələcək müstəqil həyata hazırlanması məqsədilə onlarda bacarıq və vərdişlərin formalaşdırılması;
gənc nəsildə mənəvi əqidə və inamın formalaşdırılması;
şagirdlərin intellektual səviyəsinin və psixi xüsusiyyətlərinin inkişaf etdirilməsi;
mühitin neqativ təsirinə qarşı fəaliyyətin təşkili və onların təshih edilməsi;
valideynlərlə pedaqoji əməkdaşlığın təşkili, şagird şəxsiyyətinin inkişafında birgə fəaliyyətin təşkili və s.
Bu istiqamətlərdə fəaliyyətin məzmunlu və məqsədəyönlü təşkili müəllimdən yüksək pedaqoji ustalıq tələb edir.
Bir sıra alimlər belə hesab edirlər ki, pedaqoji ustalıq intuisiya ilə biliklərin, hər bir pedaqoji çətinliyi dəf edə bilən rəhbərliyin, uşaq qəlbinin duyğularını hiss edə bilmək bacarığının, daxili aləmi kövrək və incə olan uşaq şəxsiyyətinə nəcib və qayğı ilə yanaşmanın, müdriklik və yaradıcı cəsarətin, elmi təhlil bacarığı, təxəyyül və təsəvvürün birləşməsidir.
Professor M.Həmzəyev müəllimin pedaqoji ustalığını şərtləndirən xüsusiyyətləri iki qrupa ayırır. Uşaqlara məhəbbət və seçdiyi ixtisasa marağı daxil etdiyi birinci qrupu – müəllim şəxsiyyətinin peşə-pedaqoji istiqaməti, müəllimin bir sıra pedaqoji, psixoloji bacarıq və qabiliyyətini daxil etdiyi ikinci qrupu – müəllimin pedaqoji bacarıq və qabiliyyətləri adlandırır. Müəllif burada bir sıra pedaqoji qabiliyyətlərin üzərində xüsusi olaraq dayanır, onları pedaqoji ustalıq üçün başlıca xüsusiyyətlər hesab edir və çox doğru olaraq, bunların hamısını müəllim şəxsiyyətinin formalaşmasının əsas əlamətləri kimi izah edir.1
Başqa bir pedaqoji ədəbiyyatda isə bu xüsusiyyətlərin bir-biri ilə əlaqədar olan aşağıdakı dörd elementdən ibarət olduğu göstərilir: a) müəllim fəaliyyətinin humanist istiqamətliliyi; b) peşə bilikləri c) pedaqoji qabiliyyətlər; ç) pedaqoji texnika. Bunun da hər biri öz növbəsində müəyyən komponentlərə ayrılır və pedaqoji ustalığın məzmununu və pedaqoji fəaliyyətin ahəngdarlığını təmin edir. Belə ki, müəllim fəaliyyətinin humanist istiqamətliliyi onun fəal mövqeyində ifadə olunur: 1) özünəinamda; 2) vasitələrə qarşı pedaqoji təsirdə; 3) şagirdlərə və uşaq kollektivinə qarşı humanistlikdə və 4) pedaqoji fəaliyyətin məqsədinə qarşı strategiyada vasitələrə, fəaliyyət obyektinə yaradıcı təsirdə qiymətlilik təmayülü kimi aşkara çıxır.
Pedaqoji ustalığın fundamental əsasında peşə bilikləri, pedaqoji biliklərin formalaşmasının əsasında isə pedaqoji şüur və düşüncə, yəni fəaliyyət və yanaşmanın prinsip və qaydaları durur. Pedaqoji qabiliyyətlər – konstruktiv, kommunikativ, perseptiv, qnostik, təşkilatçılıq, suqqestiv və s. qabiliyyətlərə ayrılaraq həm tədris olunan fənn üzrə dərin biliklərə yiyələnməklə, həm də təlim-tərbiyə işlərini səmərəli surətdə həyata keçirməklə həlledici rol oynayır. Pedaqoji texnikaya gəldikdə isə o, müəllim davranışını təşkiletmə forması kimi özündə iki qrup bacarıqları: 1) öz orqanizminə sahib olmaq, emosional vəziyyət, ünsiyyət texnikası və 2) didaktik, təşkilatçılıq, qarşılıqlı təsirin əlaqə texnikasına malik olmaq bacarıqlarını birləşdirir.1 Tərbiyənin məqsədinin gələcəyə yönələn olması ilə əlaqədar olaraq müəllimin də fəaliyyəti ilk növbədə tərbiyə etdiyi şəxsiyyətin gələcəyinə yönəldilir. Başqa sözlə desək, müəllimin fəaliyyəti şagirdlərin təlim-tərbiyəsinin gələcək nəticəsinin bu gün məqsəd kimi qarşıya qoyulub, gələcəyə istiqamətlənən olması ilə səciyyələnir.
Müəllimin peşə fəaliyyəti çoxcəhətli bir prosesdir. Təhsil, müəllim və məktəb haqqında bir sıra dövlət sənədlərində və pedaqoji ədəbiyyatlarda bu prosesin üç mühüm istiqaməti: öyrədici, tərbiyəedici və ictimai-pedaqoji istiqaməti daha qabarıq şəkildə qeyd edilir. Müəllim o zaman tam, yetkin və yaxşı müəllim kimi özünü göstərə bilir ki, onda bu üç mühüm vəzifə, istiqamət vahid yönümdə bir-birini tamamlasın və sıx surətdə əlaqələnə bilsin. Buna görə də müəllim həm öyrətməli, həm tərbiyə etməli, həm də ictimai-pedaqoji istiqamətdə fəal iştirak etməlidir. Bunun üçün müəllimdən bir sıra peşə keyfiyyətlərinə malik olmaq tələb olunur.
Pedaqoji ustalığın əsasında peşə bilikləri durur. Peşə bilikləri müəllimi ilk növbədə müəllim kimi tanıdan və xarakterizə edən keyfiyyətdir. Peşə biliyinin zəifliyi müəllimi nüfuzdan salır, onu öz işinin ustası-yaxşı müəllim olmaqdan “saxlayır”. Heç şübhəsiz ki, öz işinin ustası və novator kimi tanınan, xalq içərisində hörmət və nüfuz qazanan müəllimlər ilk növbədə özlərinin dərin peşə-ixtisas bilikləri ilə fərqlənən müəllimlərdir.
A.S.Makarenko qeyd edirdi ki, şagirdlər müəllimlərinə ciddiliyi, soyuqluğu, quruluğu və hətta yersiz irad tutmalarını bağışlayar, lakin zəif peşəkarlığını bağışlamazlar. Hər şeydən əvvəl, onlar müəllimlərində aydın və dəqiq bilik, bacarıq, səriştə, qabiliyyət, təmkin, işə daim hazırlıq, məntiqi düşüncə, tərbiyə prosesini bilmək, tərbiyəetmə bacarığını üstün tuturlar.
Peşə bilikləri iki istiqamətdə özünü göstərir: 1) müəllimin pedaqogikanı, psixologiyanı dərindən bilməsi, pedaqoji şüura, düşüncəyə malik olması və pedaqoji qaydaları dərindən mənimsəməsi; 2) müəllimin öz ixtisasını onun incəliklərinə qədər dərindən bilməsi.
Təcrübə göstərir ki, bunların hər ikisi birləşdikdə və müəllimin yiyələndiyi təcrübə ilə zənginləşdikdə müəllim özünün fərdi üslubunu yaradır, onun peşəkarlıq səviyyəsi yüksəlir.
Peşə bilikləri pedaqoji ustalıqda mühüm yer tutur. Peşə biliklərinin dərinliyi pedaqoji ustalığa geniş meydan açır. Lakin bu biliklərin necə, hansı səviyyədə verilə bilməsi, şagirdlərə çatdırılması heç də bunlardan az əhəmiyyət kəsb etmir. Buna görə də burada bir neçə vacib məsələnin nəzərə alınması olduqca vacibdir:
Dostları ilə paylaş: |