Gəlin “Meydanda satarlar heyvanı, malı” – deyərək qızı ucuz şöhrətə, saxta parıltılara
aludə olmamağa çağırır. Saf və qarşılıqlı məhəbbət əsasında qurulan ailə həyatı daha mənalı olur.
Odur ki, gəlin deyir:
Gəlin der ki, ağlı nöqsan, bivəfa,
Həmdəmsiz dünyada sürülməz səfa.
Aşıq Şenlik qadın gözəlliyinin tərənnümündə ənənəyə söykənmişdir. Sələfi Aşıq Valeh,
müasiri Xəyyat Mirzə kimi, o da qız-gəlin bəhsləşməsinə müraciət etmişdir. Aşıq Valehin
“Məndədi” şeiri 5 bənddən, Xəyyat Mirzənin “Qızla gəlinin bəhsi” şeiri isə 11 bənddən ibarət
olub, əsasən qız və gəlinin özünəməxsus zahiri gözəlliklərinin tərənnümünə həsr edilmişdir. Aşıq
Şenlikdə isə yuxarıda qeyd edildiyi kimi, gəlinin dili ilə müəyyən əxlaqı nəticə nəzərə çarpdırılır.
Şeir müasir gənclik üçün çox böyük tərbiyəvi əhəmiyyətə malikdir. Qızları var-dövlətə
aldanmamağa, əsil məhəbbətin müqəddəsliyini qorumağa çağırır.
Aşığın məhəbbət lirikasında ata-ana, övlad-valideyn, dosta məhəbbət hissləri ən müqəddəs
hisslər kimi qorunub saxlanılması tövsiyə olunur:
Anaya, babaya sən olma asi,
Asi olanların çoxdur cəzası.
Əlindən gəldikcə et iltiması,
Əgər ki, gəlirsə mehmanın sənin.
Yaxud:
Dost dostuna etsə iqrar imanı,
Qiyamətə gedər müddət zamanı,
Könül uman yerdən kəsməz gümanı,
Çünki əzəldən etibarın görübdü.
Aşıq Şenliyin lirikasını zənginləşdirən mövzulardan biri də təbiətdir. Aşığın
yaradıcılığında təbiətin özünəməxsus əsrarəngiz gözəlliyi, füsunkarlığı insanların fəaliyyəti ilə
bağlı tərənnüm olunmuş, təbiətə qayğıkeş münasibət bəsləmək hissi təbliğ olunmuşdur.
Aşıqların təbiətə münasibətlərindən bəhs edən akad. H.Araslı yazır: “Azərbaycan aşıqları
təbiət gözəlliklərini ən xırda incəliklərinə qədər tərənnüm etməyə can atmışlar. Onlar qartalın
uçuşuna, ceyranın yerişinə, qızılgülün xoş görünüşünə, bənövşənin bükülmüş boynuna ayrıca
şeir həsr etdikləri kimi, yazın, yayın, payızın və qışın da Azərbaycan şəraitindəki
xüsusiyyətlərini təsvir etmişlər”.
Bu baxımdan Aşıq Şenliyin iyirmi üç bənddən ibarət olan “Qış ilə baharın deyişməsi” şeiri
maraq doğurur. Deyişmə şəklində qurulan hər bir bənddə qışın və baharın özünəməxsusluğu,
gözəlliyi ən xırda incəliklərinə qədər tərənnüm olunur. Şeirdə qış öz hökmü, hikkəsi, qəzəbi,
“dərələri dondurması”, “sarı qayalar ovgahını kəsməsi”, “dağlarla ədavət etməsi” ilə öyünür.
Bahar həlim təbiəti, nəzakəti ilə diqqəti cəlb edir, “süsən, sünbül, mor bənövşə” bitirməsi,
“cilvəli qızların seyrəngahı” olması ilə fəxr edir.
Qış ilə növbahar düşdülər bəhsə,
Bahar dedi nəbahatım var mənim,
Qış dedi ki, zəhmi-zəhər kanıyam,
El içində ədalətim var mənim.
Bahar der ki, mən özüm yetirrəm,
Zövqi-ziynət, nuri-rəhmət bitirrəm.
Süsən, sünbül, mor bənövşə bitirrəm
Əlvan-əlvan nəbatatım var mənim.
Qış dedi ki, mənəm fitnə xaini,
Donduraram dərələrin suyunu.
Çox görmüşəm Əbu-Sinan oyunu,
Əfsun olmaz təriqətim var mənim.
Bahar dedi, mən qiymətsiz bahayam,
Savalan yaylağı, el evgahıyam,
Cilvəli qızların seyrangahıyam,
Can almağa nəzakətim var mənim.
Qış ilə baharın deyişməsi qışın məğlubiyyəti ilə nəticələnir. Bahar öz isti nəfəsi, “abü-
zülalı” ilə qışı təslim edir. Təbiət öz yaşıl donunu geyir, insanlara xoş əhvali-ruhiyyə bəxş
etməklə onlara daha çox xeyir verir. Elə buna görə Şenlik yaradıcılığında bahar fəslinə dönə-
dönə müraciət edir, təbiətin oyanış dövrü kimi bahar fəsli aşığın ilhamını qanadlandırır:
Salsalın bağına uğrayanda yol,
Baxdıq ki, xoş oynar gül ilə bülbül.
Şiddəti-müzəyyən, bənövşə, sünbül,
Sanarsan açılıb fəsli növbahar.
Əzəli-əbədi təbiətə məhəbbət, onun flora və faunasının qorunması aşığın “Qartal”
qoşmasında öz əksini tapmışdır. Qartal istər yazılı ədəbiyyatda, istərsə də folklorda həmişə
məğrurluq, ucalıq rəmzi kimi diqqəti cəlb etmişdir. Qoşmanın ideya-məzmunundan göründüyü
kimi, Aşıq Şenlik təbiətin bu vüqarlı quşunun məhv edilməsinə qəzəblənir, qartalın ölümü ilə
sanki aşığın ürəyinə dağ çəkilir:
Nə baxırsan məlul-məlul üzümə,
Qoydun ürəyimə vərəmi, qartal.
Qanad çaldın, pərvaz etdin uçmağa,
Zalım güllə kəsdi aranı, qartal.
Aşıq qartalın özünəməxsus xüsusiyyətlərini bədii boyalarla ifadə edir. Uca, yalçın, şiş
qayaların zirvəsində dayanmış qartal həmişə öz ovuna qarşı amansız olmuşdur.
Zəhmin ağır, pəncən aslan pəncəsi,
Qorxundu quşların zor işgəncəsi,
Ovçusan, ovçunun olmaz gecəsi...
Gör saldın yadıma haranı, qartal?
Lakin “sarı gözlü, məğrur başlı” qartalın insafsızcasına öldürülməsi oxucuda təəssüf hissi
oyadır.
Sarıdı gözlərin, məğrurdu başın,
Caynaqlıdır pəncən, kəskindir dişin,
İnsafsız, zülmkar zabit yoldaşın,
Öldürməkdi səni məramı, qartal.
Aşıq Şenlik qartalın ölümünü şerin poetik anlamında zülm-sitəm kimi qiymətləndirir.
Aşığa görə ən qüdrətli loğmanlar belə qartalın yarasını sağaltmaqda acizdirlər:
Səfil Şenlik zülm eylədi sənə,
Çalardın, çapardın, batardın qana,
Dərdin həddən aşıb, ta gəlməz sana,
Loğman da sağaltmaz yaranı, qartal.
“Qartal” rədifli qoşma oxucuda təbiətə, onun nadir faunasına qarşı qayğıkeş münasibət
bəsləməyi təbliğ edir. Qoşma sənətkarlıq baxımından Aşıq Şenliyin ən yaxşı şeirlərindən biridir.
Aşığın qartal haqqında işlətdiyi bənzətmələr təbii və inandırıcıdır. Qoşmada qartalın pəncəsi
aslan pəncəsinə bənzədilir. “Ovçusan, ovçunun olmaz gecəsi...” misrası xalq məsəli kimi elat
deyimində-duyumunda məşhurdur. Aşıq Şenliyin məhəbbət lirikası öz bəşəriliyi ilə
səciyyələnməklə bərabər, insanın zahiri gözəllikləri daxili-mənəvi aləmlə vəhdətdə tərənnüm
edilmişdir. Saf, ülvi məhəbbət, təmiz ad-san bəşəri mahiyyətli əmanət kimi gələcək nəsillərə
ərməğan verilir.
İctimai-siyasi motivlər. Aşıq Şenliyin poeziyasında ictimai-siyasi motivlər öz kəskinliyi
ilə diqqəti cəlb edir. Bu, hər şeydən əvvəl aşığın cəmiyyətdə baş verən ictimai, sosial-siyasi
hadisələrə obyektiv münasibəti ilə səciyyələnir. Dərin həyati müşahidələrin nəticəsi kimi yaranan
şeirlərdə aşığın hadisələrə olan fəal vətəndaşlıq mövqeyi diqqətəlayiqdir.
Aşıq Şenlik xalqının övladı kimi yaradıcılığı boyu zəhmətkeşlərin hüquq və mənafeyi
uğrunda mübarizə aparmış, haqqın, həqiqətin, sosial ədalətin carçısı olmuşdur. Aşığın
yaradıcılığında ictimai-siyasi motivləri araşdırarkən, həmin dövrün ictimai-siyasi mühitinə nəzər
yetirmək lazımdır.
Məlumdur ki, yalnız Zaqafqaziya xalqları deyil, Türkiyənin Qars-Anadolu bölgələri də Çar
Rusiyasının işğalına məruz qalmışdır. Xüsusən, aşığın yaşadığı dövrdə Qarsı öz hakimiyyətinə
tabe edən çar çinovniklərinin, pristavlarının özbaşınalığı, zülm, mühacirlik, 1905-1907-ci illərdə
erməni-müslman ixtilafları, yerli bəylərin istismarı və s. hadisələr Aşıq Şenliyin yaradıcılığında
öz əksini tapmışdır. Elə Aşıq Şenlik yaradıcılığının mütərəqqi cəhətlərindən biri də onun
dövrünün vətəndaşlıq borcu kimi ictimai hadisələrə fəal münasibətindədir. El sənətkarı Aşıq
Şenlik də xalq üçün yaşayıb-yaratmışdır. O da bir çox müdrik sələfləri kimi, vətəndaşlıq
mövqeyinə sadiq qalmış, bütün yaradıcılığı boyu bu cəhəti şeirlərinin işlək məqamında
yaşatmışdır:
Yoxsulluq çətindir fani dünyada,
Səni möhtac edər düşmənə, yada,
Dostları ilə paylaş: |