Sələm yeyənlərdən, rüşvətxordan,
Mənim saz çalmağım ondan yaxşıdı.
Aşıq Şenliyin bu şeiri isə belədir:
Bir kəs könül sənə etmad etsə,
Biliynən ki, onun zatı yaxşıdı.
Namərd leyli nahar plov yedirtsə,
Mərdin quru məhəbbəti yaxşıdı.
Hərcayi əlindən dəng oldum başdan,
Baş qafa adamdan,
ürəyi daşdan,
Bədnəzər qonşudan, kötü yoldaşdan,
Qədirbilənlərin iti yaxşıdı.
Dad həzar əlindən pərgarsız sazdan,
Ver qurtar özünü nəzir-niyazdan,
Gəyəzən gəlindən, güləyən qızdan,
Söyləyən arvaddan lotu yaxşıdı.
Qul Şenlik sözünü söylədi sağdan,
Piltəli çıraxdı şamdanı yağdan,
Çörəksiz otaqdan, meyvəsiz bağdan,
Çayır çəmənlərin otu yaxşıdı.
Yuxarıda göründüyü kimi, Azərbaycanın qüdrətli şairi Ələsgər Şenliyin şeirlərindən geniş
ölçüdə etkilənmişdir” qətiyyən düz deyil.
E.Aslanın Aşıq Şenliyin adına verdiyi qoşma ondan yaşca böyük olan Aşıq Hüseyn
Şəmkirlinin /1811-1891/ məşhur “Yaxşıdır” rədifli qoşmasının üç bəndində də bir əsaslı fərq
yoxdur. Lakin qoşmanın son misrası başqa şeydir.
Aşıq Hüseyn söylər kəlməni teydən,
Dərsimi almışam əlifdən beydən,
Bəzəksiz otaqdan, gözəlsiz öydən,
Çölün, biyabanın otu yaxşıdır.
Aşıq Şenliyin adına verilmiş qoşmada misralara yeni söz və ifadələr artırmaqla şeirin
ahəngdarlığına xələl gətirilmişdir.
Digər tərəfdən Aşıq Ələsgər yaşca Aşıq Şenlikdən böyükdür. Əgər Aşıq Şenlik Aşıq
Ələsgərə təsir etmiş olsaydı, onda Aşıq Ələsgər də öz yaradıcılığında heç olmazsa lirik-epik
janra-dastançılığa ciddi meyl edərdi. Göyçə aşıq mühitində yetişən Aşıq Ələsgər qüdrətli
sənətkardır. O, aşıq sənətinin aparıcı, yaradıcı söz ustasıdır. Novator sənətkar kimi aşıq
poeziyasını yeni şeir şəkilləri ilə zənginləşdirmişdir. Şübhəsiz, eyni dövrdə yaşayan iki ustad
sənətkarın qarşılıqlı yaradıcılıq ilgiləri var idi.
Aşıq Şenlik də yaradıcı sənətkardır. Lakin o, Aşıq Ələsgərdən yaradıcı faydalanmışdır,
lakin heç vaxt onu təkrar etməmişdir.
Qeyd etmək yerinə düşərdi ki, Ensar Aslanın “Təcnis Aşıq Şenliyə qədər ədəbiyyatımızda
pek kullanılmazdır. Bu türkü ədəbiyyatımıza tam mənasıyla mal edən və bunun ən gözəl
örnəklərini verən Şenlikdir”. -mülahizəsinə görə prof. V.Vəliyev onu qınağa çəkimişdir. Ensar
Aslan “ədəbiyyatımız” dedikdə, Azərbaycan aşıq ədəbiyyatını deyil, türk ədəbiyyatını nəzərdə
tutmuşdur. Bu fikri E.Aslan daha da genişləndirərək yazır: “İştə səscə eyni anlamları fərqli olan
bu kəlmələrə yapılmış olan böylə şerlərə aşıqlar “təcnis” derlər. Əgər bizim örnəkdə olduğu kimi
qoşma, yəni yedəkli qoşma olunca buna da aşıq dilində “cığalı təcnis” deyilir. Azərbaycan sahəsi
aşıqlarının kullandığı bu türü bizə mal edən, aşıq ədəbiyyatımıza gətirən Aşıq Şenlikdir”.
Bizim əlimizdə olan materiallardan göründüyü kimi, Aşıq Şenlik ömrünün sonlarında
təcnisin bir neçə nümunəsini yaratmışdır. Bu da şübhəsiz ki, Aşıq Ələsgərlə onun görüşündən
sonrakı dövrlə bağlı olan hadisədir. Aşıq Şenliyin “Mövlam” rədifli cığalı təcnisi elə ölüm
ayağında /zəhərləndiyi vaxt/ yaranmışdır.
Şübhə etmirik, Aşıq Şenliyin yaradıcılığının forma və məzmun rəngarəngliyi baxımından
zənginləşməsində Aşıq Ələsgərin, ümumiyyətlə, Azərbaycan aşıq məktəbinin güclü təsiri
olmuşdur.
Türk forlklorşünasları folklorun bu və ya digər nəzəri məsələlərindən danışanda həmişə
Aşıq Şenliyə müraciət etmişlər. Folklorşünas Hikmət Dizdaroğlu Aşıq Şenliyin qəzəl janrında
şeirlər yazdığını söyləyir: “Ancaq oxuma, yazma bilmədikləri, örgənim görmədikləri halda, bu
kuralın dışına çıxan, aruzla söyləyən aşıqlar da vardır. /Summani, Aşıq Şenlik kimi/”. Demək
lazımdır ki, aşıq ədəbiyyatı tarixində qəzəl yazan aşıqlara /Aşıq Ələsgər, Molla Cuma, Dollu
Mustafa və s./ təsadüf olunur. Lakin Aşıq Şenliyin istər Azərbaycan, istərsə də Türkiyədə nəşr
olunmuş əsərlərində qəzələ təsadüf olunmur. Əsasən heca vəznli şeirlər sazın pərdə düzümünə
ahənglə kökləndiyində, əruz vəznli şeirlərə aşıqların yaradıcılığında nadir hallarda təsadüf
olunur. Aşıq Şenlik də sələfləri və müasirləri kimi aşıq ədəbiyyatında geniş yayılmış şeir
formalarından gen-bol faydalanan ustadlardandır. Xüsusilə, onun da Abbas Tufarqanlı, Koroğlu,
Aşıq Valeh, Məlikballı Qurban, Molla Cümə kimi aşıq ədəbiyyatında az-az təsadüf olunan
vücudnaməyə müraciət etməsi, divanının ölçü, qəlibindən fərqli Şəki sicilləməsi yaratması,
yaradıcılığının ideya, məzmun xüsusiyyətləri, özünəməxsusluğu Aşıq Şenliyin kamil el sənətkarı
olmasına vəkalət verir.
Aşıq Şenlik XIX əsr saz aşıqları içərisində öz dəsti-xətti olan sənətkardır. Onun ədəbi
irsinin toplanması, nəşri, geniş oxucu kütlələrinə çatdırılması xeyirxah bir iş olardı. Ustadın el
arasında müdrik qocaların sinədəftərində olan irsinin toplanılması, çap nüsxələri ilə
tutuşdurulması folklorşünaslığımızın qarşısında duran başlıca vəzifələrdən biridir.
AŞIQ ŞENLİYİN LİRİKASI
Aşıq Şenlik də sələfləri kimi, klassik aşıq şeiri ənənələrindən bəhrələnərək zəngin
yaradıcılıq yolu keçmişdir. Aşığın lirik poeziyası öz bəşəriliyi, xəlqiliyi ilə diqqəti cəlb edir.
Ustad Şenlik real həyati müşahidələrinə əsaslanaraq yaşadığı dövrün tələblərinə cavab verə bilən
ən aktual, məzmunca ən kamil sənət əsərləri yaratmışdır.
Lakin aşığın lirik poeziyası öz ideya-məzmun xüsusiyyətlərinə görə fərqlənir. Ənənəvi
olaraq saf məhəbbəti tərənnüm etməklə bərabər, o həm də dövrünün ictimai-siyasi hadisələrinə
də öz sənətkar mövqeyini bildirir. Digər tərəfdən aşıq ustad kəlamları ilə insanları doğru yola,