Hafizə xanımın fikrincə ölkədə son zamanlar sahibkarlığın inkişafı üçün şərait
yaradılır, lakin kredit əldə olunması ilə bağlı hələ də maneələr çoxdur.
O, yaxşı iş adamı kimi şöhrət qazanmaqla yanaşı, xeyriyyəçi bir insan kimi də
tanınmışdır. Səmimi və yumşaq xasiyyətli, zahiri kimi daxili aləmi də çox gözəl olan bu
səxavətli xanım ehtiyacı olan ailələrə daim yardım göstərir. Bir neçə il bundan qabaq
Qarabağ hadisələrində əlil olmuş gəncin sağalıb yataqdan qalxmasına yardım edib. İndi
onun ailəsinə himayəçilik etməkdə davam edir.
Hafizə xanım ailəlidir, iki övladı var. Həyat yoldaşı biznesdə ona kömək edir.
ʺÖzəl fəaliyyətlə məşğul olmağın həm çətinlikləri, həm də üstün cəhətləri var. Bu,
böyük məsuliyyətdir, hər şey-həm müvəffəqiyyət, həm də risklər üçün sən özün
cavabdehsən. Amma bununla belə, öz vaxtının da, gəlirinin də sahibi insan özüdür, bir
də biznes - halal pul qazanmağın yeganə yoludurʺ -deyir.
Gülşən Orucova
ʺŞamilʺ Kiçik Müəssisəsinin direktoru
Onu iş yerində tapa bilmədik. Dedilər ki, özünü yaxşı hiss etmədiyi üçün işə
çıxmayıb. Odur ki, onunla evində görüşdük. Böyük, müasir üslubda tikilmiş yaraşıqlı
bir evi var. Zəif görünsə də bizi görüb çox sevindi. Gəlişimizin səbəbini açıqlayıb ondan
yazmaq istədiyimizi biləndə sevincini gizlətmədi: ʺGözəl layihədir. Respublikada qadın
sahibkarlığın inkişafına diqqət yetirilməsi çox vacib bir məsələdir. Axı qadın cəmiyyətin
əsas aparıcı qüvvəsidir. Artıq həyat sübut edir ki, Azərbaycanda da qadınlar bizneslə
məşğul olub müvəffəqiyyət qazana bilərlər. Əslində onlar iqtisadi məsələlərdə
kişilərdən daha çevik, daha qənaətcil olur, pulu hara xərcləməyi daha yaxşı bilirlərʺ.
Bizi çay süfrəsinə dəvət edib biznesə başlamağının səbəblərini və bu yolda
üzləşdiyi qayğı və problemləri bölüşdü.
1950-ci il sentyabrın 13-də Quba rayonunun Yelenovka kəndində anadan olub.
Orta məktəbdə oxuduğu vaxt qeyri-adi istedadına görə onu 8-ci sinifdən Moskva
Dövlət Universitetinin nəzdində nadir istedada malik uşaqlar üçün təşkil olunmuş
xüsusi məktəbə göndərirlər.
1968-ci ildə orta məktəbi bitirir və Moskva Dövlət Universitetinin Mexanika-
riyaziyyat fakültəsinə daxil olur. Lakin vətəndən uzaqda yaşamaq onun üçün çətin idi,
doğma torpağa bağlılıq onu geri - Azərbaycana çəkirdi. Moskvada 2 il oxuduqdan
sonra təhsilini yarımçıq qoyub vətənə dönür.
1973-cü ildə Azərbaycan Dövlət Universitetinin tarix fakültəsinə daxil olur və
1973-ci ildə oranı bitirib öz kəndlərində tarix müəllimi işləməyə başlayır.
Ailə vəziyyəti ilə bağlı 1981-84-cü illərdə Rusiyanın İrkutsk şəhərində yaşamalı
olur və orada müəllimlik fəaliyyətini davam etdirir.
Vətənə qayıtdıqdan sonra Xaçmaz şəhər 1№-li orta məktəbdə tarix müəllimi
işləyir.
Müəllimlik fəaliyyəti ilə məşğul olsa da onun daxili potensialı, bacarıq və iş
qabililiyyəti daha böyük işlərə qadir idi. Ölkədə gedən sosial-iqtisadi proseslərin təsiri
altında 1993-cü ildə 2 ha torpaq sahəsi alır. Hələ uşaqlıqdan kənd həyatına alışdığından
və təsərrüfatla bağlı olduğundan heyvandarlıqla məşğul olmaq qərarına gəlir.
Sumqayıt Çernobıl Əlilləri Assosiasiyasının filialı kimi ʺŞamilʺ Kiçik Müəssisəsini açır.
Cəmi 3 nəfər işçisi olan müəssisə heyvandarlıq məhsullarının istehsalı ilə məsğul
olurdu.
1997-ci ildə ʺŞamilʺ Kiçik Müəssisəsi özəlləşdirilir. Bununla da Gülşən xanımın
sahibkarlıq fəaliyyəti üçün imkanlar yaranır. Maliyyə və bir sıra prosedur çətinliklərinə
baxmayaraq öz imkanları hesabına müəssisəni genişləndirir.
Müəssisənin fəaliyyət istiqaməti heyvandarlıq məhsullarının istehsalı və satışı,
ətlik mal-qara yetişdirilməsi, ət -emalı və satışıdır. Bundan əlavə burada bazar
xidmətləri də həyata keçirilir. Zona üzrə hər həftə mal-qara bazarı təşkil edilir. Ətraf
rayonlardan, Bakı və Sumqayıt şəhərindən gələn müştərilərə xidmət göstərilirdi.
2 hektarlıq ərazidə yerləşən müəssisədə mal-qara bazarı, tikinti materialları,
əsasəndə daş bazarı, ferma fəaliyyət göstərir, dayanacaq və yeməkxana xidmətləri
təqdim olunur. Təqdim olunan məhsul və xidmət növlərinə tələbat yüksəkdir.
Müəssisədə 25 nəfər işçi çalışır, ərazidə olan mövcud tikililərin dəyəri təxminən üç
yüz milyon manat həcmindədir.
Gülşən xanım hazırda tikiş sexinin yaradılması ilə bağlı layihə üzərində işləyir.
Belə sexin açılması ilkin dövrlərdə daha 15 nəfərin işlə təmin olunmasina imkan
yaradacaqdır.
Bütün bunlarla yanaşı müəssisə tam gücü ilə işləmir. Müəssisənin tam gücü ilə
fəaliyyət göstərməsi üçün kreditə və sərmayə qoyuluşuna ehtiyac var.
Onun fikrincə ölkədə sahibkarlığın inkişafına yönəldilən yaxşı fərmanlar verilib,
lakin onların icrasına nəzarət hələ də zəifdir, sahibkarların hüquqları kifayət qədər
qorunmur, yerli icra orqanlarının bu istiqamətdəki fəaliyyəti nəzarətsizdir.
Mövcud çətinliklərə baxmayaraq o, həyatını işsiz təsəvvür etmir. ʺƏgər ikinci dəfə
dünyaya gəlsəydim, yenə də bu işlə məşğul olardım. Doğrudur, ədalətsizlik, iş görən
qadına qarşı qeyri-ciddi münasibət məni əzir. Bununla belə biznes insana, xüsusilə də
qadına sərbəstlik, maddi və mənəvi yüksəliş verir. Bu gözəl hissdirʺ-söyləyir.
Bu vaxt içəri gözəl gənc bir qız daxil olur. ʺQızım Sevildir, bu il ali məktəbə daxil
olub, çox sevinirəmʺ. Ananın sevincinə biz də şərik olur, onu təbrik edirik.
ʺBəxtim ən çox övladlarımda gətirib, onlardan çox razıyam. İstərdim ki, mənim
biznesimlə məşğul olsunlar. Amma hələlik heç biri buna maraq göstərmir. Yəqin ki,
mənim bu yolda rastlaşdığım çətinliklər onları qorxudurʺ - deyir.
Gözüm qeyri-ixtiyari onun hələ də məlahətini itirməmiş mehriban çöhrəsi ilə
təzad təşkil edəndən düşmüş saçlarına sataşdı. Yəqin ki, mənim düşündüyümü
gözlərimdən oxudu. Bir neçə il qabaq gənc qızını itirdiyini kədərlə danışdı.
Qəhərini içində boğmağa çalışan anaya Tanrıdan səbir və dözüm, sahibkarlıq
fəaliyyətində uğur diləyərək ondan ayrılırıq.
Nəzakət Nəzərli
Fermer təsərrüfatının rəhbəri
Nəzakət Nəzərli 1947-ci il iyun ayının 1-də Lerikdə anadan olub. Qız böyüdükcə
atası Ayaz kişi onun gələcəyi haqqında düşünürdü.