Bazarın tələblərinə uyğun olaraq Kifayət xanım müəssisəni yenidən qurmaq
qərarına gəlir və ʺXalıʺ Kiçik Müəssisəsinin maddi-texniki bazasında ʺPoladʺ KM-ni
yaradır. Şirkətin əsas gücünü yumşaq inventar - yataq dəstləri, ev üçün tekstil
məhsulları, işçi geyimləri və s. istehsalına yönəldir. Bundan əlavə müəssisədə yeni
istiqamət - təmir xidməti sahəsi təşkil edir. Rəhbərliyin çevikliyi və uzaqgörənliyi
nəticəsində həyata keçirilmiş yenidənqurma işləri öz bəhrəsini verir. Müəssisənin
məhsuldarlığı artır. Hal-hazırda müəssisədə 15 işçi çalışır. Kollektiv çox böyük
müfəvvəqiyyətlə müxtəlif tenderlərdə iştirak edir. Yerli xammaldan istifadə etməklə
səhiyyə və təhsil şöbələrinin sifarişlərini təmin edir. Kifayət xanım yeni istehsal sahəsi -
ipək məhsulların
istehsalını təşkil etməklə müəssisənin fəaliyyət dairəsini genişləndirmək
fikrindədir. Bunun üçün avadanlıqların yeniləşdirilməsinə və əlavə iş yerləri açılmasına
ehtiyac var. Məsələlərin həlli maliyyə, kommunal xidmətlər və bir sıra digər
problemlərlə üzləşir. Elə əvvəldən, özünün dediyi kimi, onun sahibkarlıq yolu çətin
olub. Bürokratik maneələr, qadın sahibkar kimi özünə qarşı kişilərin qısqanc və qeyri-
ədalətli münasibəti ilə rastlaşıb. Bunlara tab gətirməkdə ona yalnız inadkarlığı və
qətiyyəti kömək edib.
Deyir ki, ölkədə, xüsusilə də regionlarda sahibkarlıq fəaliyyəti üçün yaradılmış
şərait hələ istənilən nəticəni vermir, maliyyə qurumlarının işində, sahibkarlar üçün
ayrılan vəsaitin verilməsində dəqiq işləmə mexanizmləri yoxdur və s.
Kifayət xanım sahibkarların ictimai birliklərinə üzvlüyü yüksək qiymətləndirir.
Belə hesab edir ki, bu cür təşkilatların köməyi ilə yeni işgüzar əlaqələr qurmaq, dünya
təcrübəsini öyrənmək, yeni tərəfdaşlar tapmaq, müxtəlif treninq və seminarlarda, sərgi
və yarmarkalarda iştirak etməklə yaxşı iş təcrübəsi əldə etmək mümkündür.
Kifayət xanım 3 uşaq anasıdır, övladlarına qayğı və diqqətlə yanaşmağa çalışır.
Bununla belə ʺVaxtımın çoxunu biznesə sərf edirəm. Sahibkar üçün vaxt qızıldan
qiymətlidir. İşim mənə zövq verir. Bilirsiniz, öz əllərinlə yaratdığın işin son nəticəsini
görmək nə qədər maraqlıdırʺ-deyir. Ona hər bir işində uğurlu nəticələr arzulayırıq!
Tamilla Bağırova
ʺGirdiman ʺ şirkətinin prezidenti
ʺBakı fəhləsiʺ üzüm emalı zavodunun direktoru
Həmsöhbətim ʺGirdimanʺ şirkətinin prezidenti və ʺBakı fəhləsiʺ üzüm emalı
zavodunun direktoru Tamilla Bağırovadır. Yaşından çox cavan görünən bu yaraşıqlı
qadını dinlədikcə torpağın səxavətini, insanın torpaqla ünsiyyətini, dostluğunu
düşünürəm. ʺTəbiəti zəngin olan elin işığı da gur olarʺ-deyiblər. Bu isə insanın torpağa
bəslədiyi məhəbbətin işığıdır. Bu işıqda işgüzar insanların arzuları, qayğıları, sabaha
doğru atılan inamlı addımları aydın görünür.
Tamilla Bağırova 1958-ci il iyunun 28-də Fizuli rayonunda anadan olmuşdur.
1974-cü ildə orta məktəbi bitirib.1978-1983-cü illərdə D.Bünyadzadə adına Xalq
Təsərrüfatı İnstitutunun əmtəəşünaslıq fakültəsində qiyabi təhsil alıb.
Əmək fəaliyyətinə 1974-cü ildə başlayıb, Bakı tikiş müəssisəsində usta, ali məktəbi
bitirdikdən sonra isə direktor işləyib. O zaman Tamilla xanımın rəhbərliyi altında 60
nəfər işçi çalışırdı. Onun rəhbərlik etdiyi müəssisə yüksək göstəriciləri ilə fərqlənib,
ölkənin aparıcı müəssisələrindən birinə çevrilib. Burada istehsal olunan məhsullar
ittifaq miqyaslı sərgilərdə nümayiş etdirilib və dəfələrlə yüksək mükafatlara layiq
görülüb.
1997-ci ildə Tamilla xanım İsmayıllı rayonuna köçür. O illəri belə xatırlayır: ʺO
dövrdə mən səhhətimlə əlaqədar İsmayıllı rayonuna köçməli oldum. Doğrudur, mən
bu yerlərdə doğulmamışdım, amma bura tez isnişdim. Bu regionun gözəl, füsunkar
təbiəti məni özünə bağladıʺ.
1999-cu ildə İsmayıllıda ʺBakı fəhləsiʺ üzüm emalı zavodunun direktoru təyin
olunur. Bu fəaliyyətsiz müəssisəni öz hesabına təmir etdirib, işə salmaq istəyir. Lakin
maliyyə vəsaiti alınması ilə bağlı çətinliklər ucbatından zavod işləmir.
O, kənd təsərrüfatı ilə məşğul olmaq qərarına gəlir və ʺZərgəranʺ KFT-nı yaradır.
20 nəfər adamın çalışdığı təsərrüfat heyvandarlıq - ətlik mal-qara yetişdirilməsi və satışı
ilə məşğul olurdu.
2000-ci ildə Tamilla xanım təsərrüfatı sənaye ilə birləşdirmək və daha geniş
fəaliyyətlə məşğul olmaq qərarına gəlir. 7 hektar ərazidə yerləşən ʺBədoʺ susüzmə
sexinin yarımçıq tikilisini özəlləşdirir və orada ʺGirdimanʺ şirkətini açır.
Şirkətin fəailyyət istqaməti çoxşaxəlidir kənd təsərrüfatı məhsulları istehsalı və
satışı, turizm və kommersiya fəaliyyətlərini özündə birləşdirir. ʺGirdimanʺ şirkətində
30 nəfər adam çalışır.
Baxmayaraq ki, şirkətin iqtisadi potensialı, buranın təbii sərvətləri və digər
imkanları yüksək səviyyədədir, müəssisə hələ tam gücü ilə işləyə bilmir.
Məsələn, bu torpaqda insan orqanizmi üçün hədsiz faydalı və müalicəvi
əhəmiyyətli mineral su çıxır. Maliyyə çatışmamazlığı üzündən bu suyu istehsal edəcək
sexin tikintisi yarımçıq qalıb. Əgər sex istifadəyə verilərsə, daha 70 nəfəri işlə
təmin
etmək mümkün olacaqdır. Tikintini başa çatdırmaq üçün kreditə və investisiya
qoyuluşuna ehtiyac var.
Tamilla xanımın bizneslə bağlı planları böyükdür. O, turizmi dünya standartları
səviyyəsinə qaldırmaq üçün bu sahəni genişləndirmək və inkişaf etdirmək fikrindədir.
Bundan əlavə, bu torpaqda üzümçülüyü inkişaf etdirmək üçün gözəl təbii şərait
var. O, üzüm sahələri almaq və onları bərpa etmək, bu diyarın əsas peşəsi olan
üzümçülüyü inkişaf etdirmək istəyir.
Tamilla xanımın fikrincə, sahibkarlığa dövlət tərəfindən diqqət və qayğı bir qədər
də artırılsa, bütün bu arzular heç də əlçatmaz deyil.
Sahibkarlığın qarşılaşdığı problemləri o, keçid dövrünün xüsusiyyətləri ilə
bağlayır və qadın sahibkarlığı haqqında fikrini belə izah edir: ʺAzərbaycan iqtisadiyyatı
keçid dövrünü yaşayır. Belə bir şəraitdə çətinlik hər bir işdə var. Amma qadın üçün
sahibkar olmaq asan deyil. Doğrudur, rəhbərlik etmək vərdişləri məndə lap
gəncliyimdən meydana gəlib. Lakin, bəzən kişilərin eqoist, paxıl münasibəti,
məmurların maneələri ilə rastlaşıram. Həm də bir azəri qadını kimi, bir sıra ənənəvi
etik normaları gözləməli olursan. Bununla belə şikayət etmirəm, həyatımdan razıyam.
Mənim müvəffəqiyyətlərim uğursuzluqlarımdan qat-qat çoxdurʺ.