Azərbaycanda tikinti sənayesi sürətlə inkişaf edir, buna görə də bu firmanın
xidmətlərinə ehtiyac böyükdür. Gələcəkdə özü də tikinti şirkəti yaratmaq
arzusundadır.
Onun bizneslə bağlı planları çoxdur. Əgər respublikada aqrar sektora qayğı
artırılsa, sahibkarlıq fəaliyyətinə qanunsuz müdaxilələrin qarşısı alınsa və
rüşvətxorluğun kökü kəsilsə, çox işlər görə bilər.
Məsələn o, şəkər çuğunduru plantasiyası salmaq, yetişdirdiyi heyvanları yemlə
təmin etmək məqsədilə yonca əkinini genişləndirmək istəyir.
Əzizə xanımın həmçinin əl işlərində ailəsindən gələn böyük təcrübəsi var. Odur ki,
İmişli şəhərində cehizlik məhsullar istehsal edən müəssisə açmaq fikrindədir.
O, ailəlidir, iki övladı var. Oğlu Fransada təhsil alıb. Maliyyə və İqtisad Mühəndisi
peşəsinə yiyələnib, indi Londonda işləyir.
ʺHəyatınızdan, işinizdən razısınızmı?ʺ - sualına ʺXoşbəxtlik nisbidir. Elə şeylər var
ki, arzulayırsan, amma həyata keçirə bilmirsən. Bu isə xoşbəxtliyin üzərinə kölgə salırʺ-
deyə cavab verir.
Əzizə xanım bir sıra Şərq və Avropa ölkələrində olub, aparıcı şirkətlərin iş
təcrübəsini öyrənib. ʺGetdiyim ölkələrin hər birindən yeni ideyalar gətirirəm. Mən də
onlar səviyyəsində olmaq, dünyaya çıxmaq istəyirəm. Görürsünüz nə qədər arzularım
var. Amma istədiklərimin hamısına nail olmağa imkanlarım yol vermirʺ -deyir.
Əzizə xanıma butün arzularının çin olmasını arzulayırıq!
Səadət Həsənova
ʺSahibkar qadınlarʺ MMC İdarə Heyətinin sədri
İnsan və təbiət arasındakı harmonik bağlılıq və qarşılıqlı mövcudluq əsrlərdən bəri
bəşəriyyətin diqqətini cəlb edən tədqiqat obyekti olmuşdur. Təbiət insanlara saysız-
hesabsız nemətlər bəxş edir, bütün gözəlliklərini onun üzünə açır. Əvəzində isə
insanlardan qayğı və müdafiə istəyir. Onu sevən, ona qayğı göstərənlərə qarşı təbiət çox
xeyirxah və səxavətlidir. ʺMən yalnız təbiətlə təmasda olduğum anlarda yaşayıram.
Özümü onun bir parçası kimi dərk edirəm. Axı həyatımın ən sevindirici anları, rifah və
səadətim üçün bu torpağa borcluyamʺ - sözlərinin müəllifi Şəkidə fəaliyyət göstərən
ʺSahibkar qadınlarʺ MMC-nin rəhbəri Səadət Həsənovadır.
O,1948-ci il iyulun 1-də Şəkidə anadan olub. 1966-cı ildə Şəki şəhər 1№-li orta
məktəbini bitirib, 2 il yarım Balakən Tikinti Texnikumunda, sonra Gəncə Sənaye
İnstitutunda oxuyub.
O, əmək fəaliyyətinə 1969-cu ildə 4№-li səyyar Mexanikləşdirilmiş dəstədə
başlayıb.
Dövlət müəssisəsində işləməklə bərabər şəxsi ev təsərrüfatında da - heyvandarlıq
və quşçuluq sahəsində məşğul olub. Hələ sovet dövründə - 1986-cı ildə iri təsərrüfat
yaradıb. Təsərrüfatın fəaliyyət istiqaməti - donuzçuluq - donuz ətinin yetişdirilməsi və
dövlətə satışı idi. Yüksək keyfiyyətli məhsul istehsalına görə dəfələrlə mükafatlara layiq
görülüb.
Təsərrüfat uzun müddət fəaliyyət göstərir. 2002-ci ildə isə, ölkədə sahibkarlıq
fəaliyyəti üçün yaradılan imkanlardan istifadə edərək ʺSahibkar qadınlarʺ MMC-ni təsis
edir. Cəmiyyətin fəaliyyət istiqamətlərindən biri - heyvandarlıq - donuz, iri buynuzlu
mal-qara, qoyun, keçi yetişdirilməsi, ət və süd məhsullarının istehsalı və satışı, kolbasa
istehsalıdır.
İkinci fəaliyyət istiqaməti müalicəvi əhəmiyyətli yabanı meşə meyvələrinin emalı
və satışıdır. Burada itburnu, çaytikanı, əzgil, zirinc meyvələrinin ekstratı, qoz, gül,
gavalı mürəbbələri hazırlanır. Məhsullar yüksək keyfiyyəti və insan orqanizmi üçün
faydalı olması ilə fərqlənir.
İstehsal edilən məhsulların realizə edilməsi üçün cəmiyyətin nəzdində 2 mağaza
fəaliyyət göstərir.
Məhsullar yerli bazarda satılmaqla bərabər Rusiya bazarlarına da çıxarılır. Lakin
Rusiya bazarlarına göndərilmiş məhsul üçün pul vaxtlı-vaxtında ödənilmədiyindən bu
o qədər də sərfəli deyil.
Bu il Bakı şəhər İcra Hakimiyyəti ona Bakıda mağaza tikmək üçün 100 kv. metrlik
ərazi ayırıb. Səadət xanım orada üç mərtəbəli mağaza tikmək və istehsal etdiyi
məhsulların burada satışını təşkil etmək niyyətindədir.
Həmçinin o, Şəki şirniyyatının Bakıda istehsalını və satışını həyata keçirəcək
müəssisə açmaq istəyir.
Şəki şəhər ərazisindən icarəyə götürdüyü torpaq sahəsində isə taxıl əkmək
niyyətindədir. Bunun üçün ʺTuranbankʺ Kommersiya bankından kredit götürüb.
Səadət xanım bir xeyriyyəçi kimi təbiətin qorunması işində yaxından iştirak edir.
O, Şəki meşələrində 200 qoz ağacı əkdirib və bu işi müntəzəm davam etdirəcəyini
söyləyir.
ʺSahibkar qadınlarʺ MMC-in istehsal etdiyi məhsullar müxtəlif sərgi və
yarmarkalarda nümayiş etidirilir və ekspertlər tərəfindən yaxşı qiymətləndirilir.
2002-ci ildə Bakıda keçirilən ət məhsulları, 2003-cü ildə qida sərgisində iştirak
etmiş və Fəxri Fərmanlarla təltif edilmişdir.
Səadət xanım bəzi yerli icra orqanlarından narazılığını da gizlətmir: ʺYerlərdə
Prezidentin Fərmanlarına əməl olunmur, əgər hər yerdə qanun işləsəydi çox işlər
görmək olardıʺ-deyir.
Səadət xanımın bir qızı və iki oğlu var, oğlanları onun yolunu davam etdirir,
bizneslə məşğul olurlar.
O öz işini çox şərəfli və ləyaqətlə yaşamağın ən yaxşı yolu adlandırır.
Zemfira Həsənəliyeva
ʺGreen Villeʺ İstirahət Kompleksinin meneceri
Müasir gənclik həyata fərqli baxışı, yeni dünyagörüşü ilə seçilir. O, xəyal və
həqiqətin sərhədini daha aydın görə bilir, göylərdən yerə enərək əlçatmaz xülyalarla
yaşamaqdan çox-çox uzaq olur, uca zirvələrə daha real yollar arayır. Sehrli nağıllardan
bildiyi ʺcənnətiʺ öz əlləri ilə yaratmağı arzulayır. Bu cənnəti Xəzərin qumlu sahillərində
görmək və qurmaq istəyən çağdaş gəncliyimizin ən bariz nümayəndələrindən biri
Zemfira Həsənəliyevadır.
Zemfira Həsənəliyeva 1973-cü il noyabrın 24-də anadan olmuşdur.