Yaxşılığın qabağında yamanlıq durur.
Yaxşılıq et, yaxşılvarın başı üstündə
Yamanlığa qəhqəh çəkən insanlıq durur.
05.03.03.
ÖZÜMLƏ SAVAŞDAYAM
Özümlə savaşdayam, özümlə
Saflaşmaq istəyi,
Saflaşmaq arzusu ilə
Aşıb-daşıram.
Ömrüm boyu
Özümə ortaq olan
Nəfs adlı düşmandan
Qurtarmaq üçün savaşıram.
Qəzəb, kin, küdurət,
Məkr adlı şeytandan
Qurtarmaq üçün savaşıram.
İçimdəki tufan mənə,
Fırtına mənə "saflaş" deyir.
"İnsan oğlu, nə qədər saflaşsan yenə saflaş"
deyir.Saflaşmaq istəyirəm,
Elə buna görə də
Özümlə savaşa çıxmışam.
Öz ədalətimi,
İnsaf və mərhəmətimi
İçimin divarına sıxmışam.
İçimdə olan
Xeyirlə şər üz- üzə.
Zülmətlə aydınlıq,
Vüsalla ayrılıq diz-dizə.
Yaxşını yamandan,
Doğrunu yalandan
Qurtarmaq istəyirəm.
Sevinci kədərin,
Xeyiri şərin əlindən,
Aydınlığı zülmətin,
Qaranlığın felindən
Qurtarmaq istəyirəm.
Saflaşmaq üçün
Öz dünyamda
Mizan- tərəzi,
Bir səbr, qərar olmalıyam.
Saflaşmaq,
Durlanmaq üçün
Ürəyimin içində
Əbədi bahar olmalıyam.
Özümlə savaşdayam,
Qaranlığı boğmaqçün
Zər saçaqlı günəşdən
İçimə nur istəyirəm.
Özüm özümə qalib,
Üstün gəlməkdən ötrü
Tanrıdan sur istəyirəm.
23.03.03.
BİR İGİD İTİRDİK
Ramizin əziz xatirəsinə
Bəd xəbər başımın üstünü aldı,
İçimdə bir dəli yel əsib getdi.
Tüstümü təpəmdən çıxardı mənim,
Səbri-qərarım, o kəsib getdi.
Dünya dedikləri ürəyi daşdan,
Yaxşını-yamanı seçməz bu başdan.
Ayrıldı tay-tuşdan, qohum-qardaşdan,
Dağ boyda bir qeyrət, bir təsib getdi.
Yaxşılıq axtardı, bula bilmədi,
Necə gəldi xata-bala bilmədi,
Əcəldən özünü ala bilmədi,
Bu gidi dünyadan o küsüb getdi.
Bir igid itirdik Ramiz adında,
Bu ağrı bir elin yaşar yadında.
Yandı anasının həsrət odunda,
Ana qucağına tələsib getdi.
8.05.2003.
QOŞULMA
Dost olmaq istəyən, lakin onu
bacarmayan "dostlara"
Dost deyəndə dost adını uca tut,
Böhtanlara, yalanlara qoşulma.
Hər nöqsanı üzə danış, üzə de,
Topuq daşı atanlara qoşulma.
Zaman bizi sınaq edib, yoxlayıb.
Əsil dostun təqsirində yox ayıb.
Yalquzaqtək dişlərini qıcayıb,
Yolun üstə yatanlara qoşulma.
Tərlanların ovuna çıx, ha ovla.
Şir ovlanmaz cələ ilə, tilovla.
Şər qüvvəni öz əlinlə cilovla,
İki başlı ilanlara qoşulma.
Ocaq sinəm kürələnib, közlənib,
Çıxan külüm təpələnib, düzlənib.
Şirin dilin arxasında gizlənib.
Əqrəb kimi çalanlara qoşulma.
Ər kişilər yamanlığı itirib,
İblis qapıb bəd əməli götürüb.
Bir sirrini yüz qapıdan ötürüb,
Zurna edib çalanlara qoşulma.
Düçar olma töhmətinə Eldarın,
Tablamazsan hiddətinə Eldarın.
Gəl qulaq as söhbətinə Eldarın,
Bizi alıb- satanlara qoşulma.
19.05.2003.
BİR DƏ MƏN
Bu tənhalıq içində
Bir aləmdi, bir də mən.
Yerin, göyün altında
Bir ələmdi, bir də mən.
Piltə donub çıraqda,
Sözüm susub varaqda.
Bir qaranlıq otaqda
Bir qələmdi, bir də mən.
Eldar, dərdi sorulan,
Eşqinə dar qurulan...
Külü göyə sovrulan
Bir Kərəmdi, bir də mən.
25.05.2003.
BU GECƏ YUXUMU DAŞA BASIBLAR
Bu gecə xəyalım oda yüklənib,
Bu gecə qəlbimdən zindan asıblar.
Yoxsa ümidimin səsi təklənib?
Bu gecə yuxumu daşa basıblar?
Bu gecə sədləri aşıb keçirəm,
Ölkələr, şəhərlər, kəndlər baş-başa.
Hər yerdə yaxşını pisdən seçirəm,
Dünya bir səhnədi, dünya tamaşa.
Bu gecə çox çılğın, kefli məclislər,
Həddinə sığmayan sevinc görürəm.
Nə qədər torpağa, qana hərislər,
Nə qədər güclünü gülünc görürəm.
Hələ qapanmayıb fikrimin gözü,
Qatı qaranlıqda çırağban olur.
Qanlı dəryaların sayrışan üzü,
Bu gecə yuxumun gözünə dolur.
"Hər ömrün bir gecə növbə qisməti",
Pisliyin yoluna çöysümüş çənəm.
Bu gecə dünyadan qorxmayın qəti,
Bu gecə dünyaya keşikçi mənəm!
13.01.86.
ƏLLƏR GÖYƏ UZALI
Əllər göyə uzalı,
Hamı tanrıdan kömək,
Bir sədəqə diləyir.
Hər kəsin bir niyyəti,
Hamı haqqa yalvarır.
Hamı dua eləyir.
Əkinçi taxıl əkir,
Üz tutub yaradannan
Nurlu yağış istəyir.
Bağban bağın içində
Tanrıya dua edib
Bağından bar gözləyir.
Alverçi bir müştəri,
Balıqçı tor gözləyir.
Vəzifəli məmurlar
Rüşvət verən axtarır.
Bir şirvandan milyona
Nə bacarsa qoparır.
Yol polisi toqquşan
İki maşın axtarır.
Qarınqulu müdirlər
Yağlı aşın axtarır.
Qəbristandan ötürəm
Bir budağın üstündə
Bülbül gülü gözləyir.
Bir hasarın üstündə
Əli göydə duada
Molla ölü gözləyir,
Nə təzadlı dünyadı.
Hərə bir pay diləyir.
Aşıq isə evində
Tanrıdan toy diləyir.
22.09.99.
GEDƏNİ ÇİYNİMDƏ APARIRAM Kİ...
Bir ağac əkmişəm, çətirli ağac,
Kiməsə kölgəlik olacaq bir gün.
Bir çiçək hardasa qayğıya möhtac,
Qayğını görməmiş solacaq bir gün.
Dostları ilə paylaş: |