SƏNƏMİ QALIB
Mehim olub əsibsən,
Könlümə qəm düzübsən.
Heç olmaya küsübsən,
Küsmək sənəmi qalıb?!
Bir tutmadın əlimi,
Gödək etdin dilimi.
Mənim şair könlümü
Üzmək sənəmi qalıb?!
Tapdamadın şöhrəti,
Səni uddu xəlbəti.
Hörməti, məhəbbəti
Kəsmək sənəmi qalıb?!
Sinən altı köz, Eldar!
Dərdini aç, yaz, Eldar!
Döz deyirlər döz, Eldar
Dözmək sənəmi qalıb?!
4.03.86.
VAXTIM YOX HƏLƏ
- Niyə işləmirsən?
- Necə işləyim?
Vallah iş başımdan
aşıbdır mənim,
Hələ yaddan çıxıb
çörəyim-dənim.
Hələ iç dünyamın
içinə keçib,
Orda çıxış yolu
arıyıram mən.
Dilsiz bir sükutun
qoynuna köçüb,
Qəlbimdən qüssəni
darıyıram mən.
İndi işim də bu,
əməlim də bu,
Fikir qayığında
tənha qalmışam.
Sonsuz qayğım da bu,
əngəlim də bu,
Qəmin daş boynuna
mən qol salmışam.
İşim böhtanları
dəf eləməkdi,
Nahaqqı haqq ilə
boğmaq istərəm.
Məqsədim bir qəlbə
nur ələməkdi,
Zülmə endirməyə
toxmaq istərəm.
Bir gürzə ilan tək
girib marığa,
Şər hələ yolumdan
yayınmayıbdır.
Bu gecə bir qaban
düşüb qoruğa,
Gözlərim yuxudan
ayılmayıbdır.
Doğrudur ot biçib,
yer şumlamıram,
Yol çəkib, daş yonmaq
çıxıb yadımdan.
Vallah, iş başımdan
aşıbdır mənim,
Çölüm alovlanır
öz iç odumdan.
Bir lal sükut ilə
verib əl-ələ,
Gizlicə haqq-hesab
bölüşürəm mən.
Özgə iş görməyə
vaxtım yox hələ,
İçimdə dərdimlə
güləşirəm mən!
1989.
XƏTRİNƏ DƏYMƏSİN
Öz daşına özün hədəf
Gülüm, xətrinə dəyməsin...
Mürgü yağan sözlərin çox,
Dilim, xətrinə dəyməsin...
Öz vaxtında oyanmadın,
Məramında dayanmadın.
Desəm yerində yanmadın,
Könlüm, xətrinə dəyməsin...
Mən demirəm təklənibsən,
Bu nə qəmdi yüklənibsən?
Daha bəmə köklənibsən,
Zilim, xətrinə dəyməsin...
İnandınmı hər yad səsə,
Nə qazandın küsə-küsə?
Hicran adlı yolu kəsə,
Gəlim, xətrinə dəyməsin...
Çiyninə qoyub başını,
Niyə çatmısan qaşını?
Dağlar, qoy bu göz yaşını
Silim, xətrinə dəyməsin...
Bu nə yurddu Eldar gəzmir?
-Nə obadı yeli əsmir?
Ağlım səndən heç nə kəsmir,
Ölüm, xətrinə dəyməsin...
1988.
NƏ SÖZÜN VAR
Sən babanın
Kotanını saxlamadın.
Qılıncını,
Kamanını saxlamadın.
Göy məxməri çuxasını,
Papağını saxlamadın.
Sən babanın sapandını,
Çomağını saxlamadın.
Göylə gəzən kəhərini,
Bər-bəzəkli yəhərini...
Gümüş qaşlı
kəmərini saxlamadın.
Mən nə deyim...
Öz işindi,
Saxlamadın, saxlamadın...
Bilirəm ki, deyəcəksən:
- Təzdən kotan əkənikmi?
Təzdən çuxa tikənikmi?
Mən nə deyim...
Öz işindi,
Saxlamadın, saxlamadın.
Bəs baban tək
Təmiz ilqar, əhd-peyman
Bağlamağa nə sözün var?
Bəs babandan miras qalan
o namusu, o qeyrəti
Saxlamağa nə sözün var?!
1986.
TƏLƏSİRİK
Tələsirik səhər işə,
Axşam evə.
Tələsirik, axşam evə
Səhər işə.
Nə qəribə qurğudur bu,
tələsirik biz həmişə.
Ömür adlı su yolumuz
çözələnir bax beləcə.
tələsirik gündüz-gecə.
Səhər işə, axşam evə...
Sanarsan ki, bu ömrümüz
qayğı yüklü ağır dəvə.
Heç bilmirsən bu nə
toydu-nə düyündü?
Düşündükcə görürsən ki,
bu özü də
Bir oyundu,
Bir oyun!
10.02.89.
O YANA
Təcnis Qürbət eldə bilinərmiş yurd dərdi,
Nə zülümmüş qərib olmaq oy, ana.
Mən istərdim bu qürbətin oduna
Kim baisdi, səbəbkardı o yana.
Səfər üstə qorxdum birdən çən gələ,
Qəfil yerdən yaxam keçə çəngələ.
Bir səs gəldi bu cığırı çəngələ,
Yolu azdım, yonum düşdü o yana.
Eldarındı bu soy adı, boy adı,
Bu çöl-çəmən rəssam çəkən boyadı.
Torpağımı düşmən qana boyadı,
Harayladım bəlkə bu xalq oyana.
17.11.2003.
ÖMÜR
Sən sönəndə günəş tək sön,
Gəl ay kimi solma, ömür.
Tufan görmüş palıda dön,
Vecsiz ulğun olma, ömür.
Din Dilqəmin sazı kimi,
Yan Kərəmin özü kimi.
Çox özündən razı kimi
Boş xəyala dalma, ömür.
Eniş- yoxuş görüb bir yol,
Sən döşünə döymə bol-bol.
Əməlinlə qiymətli ol,
Ucuz şöhrət alma, ömür.
Ürəyini bağla elə,
Ayım- ilim ötsün belə.
Görəcəyim çoxdu hələ,
Yarı yolda qalma, ömür!
10.01.82.
YAZIBMIŞ
Oxudum fələyin qanun kitabın,
Bilmədim insafı hara yazıbmış?!
Cəllada verdiyi misri qılıncı
Məzlumun başına "çara" yazıbmış!
Düşdüm min heyrətə gördüyüm zaman,
Tamam yalan imiş ədalət, divan.
Acgöz yalquzağı sürüyə çoban
Ahunu çöllərdə tora yazıbmış!
Bu fani dünyaya sinəsin gərib,
Zalimin yoluna xalılar sərib.
Cənnəti lotuya, babıya verib,
Hatəm səxalını nara yazıbmış!
Dostları ilə paylaş: |