18
səbəbləri var, açıqlamağa dəyməz. Yapon Yaqublardan birisi elə ilk günlərdən yoxa
çıxdı. Digərini isə 7 saylı məktəbin həyətində dar ağacından asdılar. Görmədinmi?
-Daha bizim üzümüz görməyən bir şey qaldımı, ay oğul? Bəlkə, sabah yaxşı
oldu deyirəm.
-Mən bu hökumətin yaxşı sabahına inanmıram, çünki bunun mayasında haram,
yalan və böhtan vardır. Göyüşuşağı İsfəndiyarı güllələdilər. Nə var? Nə var? Türkiyədə
hərbi təhsil alıb. Zülfüqarovu güllələdilər. Nə var? Nə var? Sahibkardır. Hacı Qədiri
güllədilər. Nə var? Nə var? Zavodu vardır. Belə bir məmləkətdə sabahların xeyirliyə və
yaxşılığa açılacağına ümid etmək olarmı? Yenə də ən etibarlı yer Türkiyədir.
- Allah işini unqad etsin, ay oğul. Hələ ki, başımız dincdir. Abduləli də dərsini
deyir. Məcid də ki, görürsən də! Kitab-dəftərdən əl çəkmir. Çox vaxt qarnına çörək
yemək də yadına düşmür. Çağırmasaq, o yankı evdən bu yankı evə keçmir. Bayaq sənə
xoş gəldin deyib o yankı evə keçəndir.
Elə bu vaxt həyət qapısı döyüldü. Hacı Lətif kişi bir qədər uca səslə çağırdı:
“Məcid, bir qapıya çıx, görək, gələn Əbdüləlidirmi?
Məcid o yankı otaqdan çıxıb həyətə düşdü. Bir azdan Məcidin Əbdüləliyə
hündürdən dediyi sözlər apaydın eşidildi:
- Qonağımız var!
-Kimdir?
- Mirhəmzə dayıdır!
- Ay xoş gəlib, səfa gətirib deyə-deyə içəri girən Əbdüləli salamlaşıb qonaqla
ikəlli görüşdü.
Ortaya gələn plov süfrəni daha da şirinləşdirdi.
Nəhayət, qonaq ayağa qalxdı. Salamatlaşdılar. Hacı Lətif kişi dedi: “A bala,
qorxub eləyərsən. Əbdüləli səni ötürsün!”
Mirhəmzə gülümsəyərək cavab verdi:
- Narahat olmayın, özüm gedəcəyəm. Amma Hacı Lətif Əmi, mən deyənləri
fikirləşin.
- Yox, a bala, fikirləşməkdən keçib. Mən yerimdən tərpənən deyiləm.
Mirhəmzə bir söz demədən Güllü xanıma yaxınlaşdı, əl uzatdı:”Zəhmətini halal
elə, Güllü xala!
Vaxt gələr, Əminəni də gətirib gələrəm. Salamat qal!”
Güllü xanım özünə xas olan mülayimliklə cavab verdi:”Ananın südü kimi halal
xoşun olsun! Ata-anana da, Türkiyəyə gedəndə Əminəyə də bizdən salam deyərsən!”
-Salam deyən sağ olsun!
Mirhəmzə hamı ilə bir-bir görüşüb ayrıldı. Onu darvazaya qədər ötürən
Əbdüləli evə döndü.
**********
*****
Şəki 1930-cu ilin əvvəllərini yaşayırdı. Ermənilər və ruslar yeni il şənlikləri
keçirsələr da, yerli əhali üçün yeni il o zaman olacaqdı ki, Günəş Balıq bürcündən Qoç
bürcünə keçəcək, yaz gecə-gündüz bərabərliyi anı başlanacaq, Novruz bayramının gəlişi
elan ediləcəkdi.
19
Əbdüləli müəllim atası Hacı Lətif kişinin könlünü almaq istəsə də, söhbət başqa
bir qanqaraldıcı məcraya yönəlirdi. Onlar yaşadıqları evin həyətində idilər. Bu ev
Nuxanın Bağbanlar məhləsində inşa edilmiş ikimərtəbəli, on otaqlı bir ev idi. Hacı Lətif
kişinin Bağbanlardakı bağını isə 1926-cı ilin sonunda əlindən alınıb dövlətə verilmişdi.
Yazqabağı olduğundan havada gah qış kimi soyuq, gah da bahar kimi ilıq nəfəsli mart
ayının nəfəsi duyulurdu. Əbdüləli müəllim nəyi isə sübut etmək istəyirdi. Hacı Lətif
kişinin narahatçılığı isə açıq-aydın bilinirdi.
-Oğul,üzümüzə gələn bu yeni ildən gözüm heç su içmir. Elə bil, Mirhəmzə
nəyisə bilirmiş.
- Eh, ay ata,
nə olacaq, olacaq. Göydən nə yağdı ki, yer götürmədi?
- Düz deyirsən, ay oğul, yerin işi göydən yağanı götürməkdir. O ki qaldı bizim
yerlərə, başqa yerlərə yağası yağasılar da bizim başımıza yağır. Daha bizim işimiz
Allaha qalıb.
- Nə yaxşı ki, bizim işimiz erməniyə, rusa deyil, Allaha qalıb. İşimiz onlara
qalan kimi onlar Dağlıq Qarabağı erməni muxtar vilayətinə çevirdilər. Budur, onlar
illərdir ki, bizləri qırırlar, yenə də ürəkləri soyumur. Ata, bunu demək istəmirdim,
amma deyəcəyəm. Naxçıvanda Kərbəlayi İsmayıl, Gəncədə Yaqub deyilən bir
üsyankar başının dəstəsi ilə hökumətə silahlı müqavimət göstəriblər. Bakı dairəsinin
Əmircan, Bülbülə, Binə kəndlərində, Zəngilan və Qubadlı dairəsinin bir
çox yerlərində
silahlı etirazlar olmuş, Zaqatala-Nuxa mahalının Balakən rayonunda kolxoz quruluşuna
qarşı çıxmışlar.
-Ay oğul, deyiblər, eşitmişəm, bu komuna deyirlər, nə deyirlər? Bu nə olan
şeydir? Dilənçilk də olar, amma təhərində. Bu-təhərsiz dilənçilikdir. Bunlar üzlü
dilənçilərdir. Birindən kürək, birindən külüng. Birindən yaba, birindən şana dilənirlər.
Birindən xış, birindən kotan, birindən boyunduruq, birindən də o boyunduruğa qoşmaq
üçün boyun istəyirlər. Öküzü olanın öküzünü, kəli olanın kəlini, hətta, tövləsi olanın
tövləsini əlindən alırlar. Ay oğul, bu necə hökumətdir? Bu ki lütün birisidir. Bunun heç
nəyi yoxmuş.
-Eh, ay ata, bu hələ harasıdır? Allah bizi görəcəklərdən saxlasın. Qadın azadlığı
adıyla min cür oyunlardan çıxırlar. Adını yaza bilməyən bir qadını kommunist edib
camaata elm və əxlaq dərsi keçirlər. Fəhləni partiyaya keçirib rəhbər işə təyin edirlər.
Arvad ərinə sosialistcəsinə yaşamağı və qısqanc olmamağı, oğul atasına dindən və
imandan uzaqlaşmağı, nadan alimə fransız utopik sosializmi, ingilis siyasi iqtisadı və
alman klassik fəlsəfəsini necə öyrənməyi, dəli ağıllıya ağıllı olmağın yollarını öyrədir.
-Oğul, mən öldüm, sən qaldın. Bu hökumətin axırı yoxdur.
-Axırı olmayanlardan qorxmaq lazımdır, atacan.
- Mən Əbdülməciddən və Hamiddən daha çox narahatam. Güvəndiyim bir adam
varsa, o da sənsən, Əbdüləli. Başıma bir iş gəlsə, onları qoruyarsan. Nə yaxşı ki, sən
oxudun, müəllim oldun. Allaha min şükür olsun!
- Atacan, mən kökümüzə vurulacaq zərbələrin haradan gələcəyini bilirəm.
İmkanım daxilində o zərbələrin qarşısını alacağam.
-Allah ağzından eşitsin, ay oğul!