14
populyarlıq gözləyən məsuliyyətsiz şəxslərlə, bu və ya başqa yolla mərkəz qarşısında ad qazanmaq arzusunda olan
fırıldaqçılarla qarşılaşdıq”.
Sovetlərə inam məsələsində vaxtilə Nərimanovla eyni mövqedə, davranışlarda dayanan Zəki Vəlidi
Toğanın “Lenin beynəlmiləlçi fikrində sona qədər səmimimi” sualına, inqilab dahisini yaxından tanıyan, onun 25
illik dostu, mübarizə yoldaşı Petrovski belə cavab vermişdi: “Lenin kommunizmi cahan miqyasında həyata
keçirmək istəyində səmimidir. Ancaq o, milliyyət xaricində beynəlmiləlçidir. Fəqət tarixi, coğrafı və iqtisadi
baxımından, böyük Rusiyada yaşayan qövümlərə qarşı beynəlmiləlçilikdən bəhs etməsi, sadəcə saxtakarlıqdır. O,
kommunizmi kiçik millətlərə dayanaraq həyata keçirməyi daha asan yol qəbul edir”. Zəki Vəlidi Toğan
Petrovskiyə belə bir tərs sual da ünvanlayır: “Georgi Andreyeviç, siz 25 ildir ki, partiyadasınız, Leninlə dostluq
etmisiniz. Lenin “böyük rus” milli mənfəətlərini müdafiə edirmi? Yoxsa Şərq məsələsində bəzi şovinist rusları
tutması, üstünlük verməsinin səbəbləri nədədir?”
Petrovskinin cavabı xeyli maraqlı görünür: “Lenin “böyük rus” mənfəətlərini I Pyotrdan daha yaxşı müdafiə
edir”. Nərimanov Leninin bu siyasətini, proqramını və taktikasını onun ölümündən sonra daha düzgün dərk etməyə
başladı və Stalinə yazdı: “Gedəcək yolumuz yoxdur”. Artıq bu yolun sonu var idi. Elə ona görə də oğlu Nəcəfə
“bəlkə də sən bunları oxuyanda bolşevizm olmayacaq”dır deyir. Nərimanov bolşevizmin süqutunu görür və dərk
edirdi. Sadəcə o, bu siyasi yola millətinə xeyir vermək üçün gəlmiş, ideya yolçuluğu etmiş, aldanmış və
aldadılmışdır.
Nəriman Nərimanovun Türkiyə siyasəti
“Paşam, qardaş qardaşa borc verməz, əl tutar”
(Atatürkə məktubundan)
Nəriman Nərimanovun Türkiyə siyasəti indiyə qədər incələnməmiş, toxunulmamış mövzulardandır.
Rusiyanın əyalət qismində münasibət göstərdiyi Sovet Azərbaycanın müstəqil xarici siyasət kursunun həyata
keçirilməsi mümkünsüz görünsə də, son dövrlər əldə olunan fakt və sənədlər belə siyasətin varlığına işarədir.
Şamil Qurbanov türkiyəli dostlarının təqdim etdikləri bəzi faktlara söykənərək bu mövzunun başlanğıcını qoyub.
Davamını tarixçilərimiz, nərimanovşünaslarımız arşdırsaydılar, tariximizin bu səhifəsi də boş qalmaz, fakt qıtlığı
ilə üzləşməzdik. Nərimanovun Atatürklə yazışmaları Rusiya-Türkiyə münasibətlərinin çox təzadlı, qaranlıq
mərhələsində və ziddiyyətli proseslərin içərisində Azərbaycanın çəkisini müəyyənləşdirmək bizə ancaq xeyir
gətirə bilər.
İstiqlaliyyət uğrunda müharibənin ilk günlərində türk milliyyətçiləri Sovet Rusiyası ilə yaxşı qonşuluq
münasibətləri qurmaq, onların həm hərbi, həm də maddi yardımlarına nail olmaq, Qərb imperializminə qarşı birgə
mübarizə aparmaq istəyirdilər. 1919-cu ilin iyunun 18-də Mustafa Kamal Amasiyada gizli bir toplantı çağıraraq
düşmənə müqavimət tədbirlərini planlaşdırdı və qərara aldı ki, Anadoluda de-fakto rəhbərlik yaratmaq gərəkdir.
Bu müzakirələrlə yanaşı, rus bolşeviklərim ilə əlaqə yaratmaq da müzakirəyə çıxarıldı. Bolşeviklər də türk
milliyyətçilərinin bəzi şərtləri qəbul edəcəkləri təqdirdə hərbi və maliyyə yardımı edəcəklərini bildirdilər. Leninin
timsalında rusların tələblərindən biri Cənubi Qafqazın sovetləşməsinə türklərin mane olmaması və hətta bölgədə
olan hərbi birləşmələrin bu prosesə yardım etmələri idi. Məhz buna görə Azərbaycan Xalq Cümhuriyyətinin
süqutunun səbəblərini araşdıranlar Amasiya toplantısında qəbul olunan qərarlara da daimi diqqət yönəldirlər. Belə
ki, XI Qızıl Ordunun Azərbaycanı istilası Anadoluya kömək məqsədi adı altında həyata keçirilmişdir. Həmin
dönəmdə fəaliyyətdə olan türk hərbi birləşmələri, Bakıda Xəlil Paşa olmaqla bolşeviklərə yardım gostərirdilər.
Azərbaycanın sovetləşməsi prosesindən sonra türk milliyyətçilərinin Sovet Rusiyası ilə əlaqələri danışıqlar
müstəvisinə keçdi. İlk belə heyət Semyon Mixayloviç Budyonnunun vasitəçiliyi ilə reallaşdı, Mustafa Kamalla
Havuzda danışıqlara başlanıldı. Həmin görüşdə Azərbaycanın sovetləşməsi məsələsi də müzakirə olunaraq ümumi
razılıq alındı. Budyonnı Mustafa Kamala imperialistlərə qarşı başladığı müharibədə Sovet Rusiyası adından pul və
silah yardımı təklif etdi. Fürsətdən yararlanan rus generalı Mustafa Kamalın Anadoluda hansı rejimi qurmaq
istəyini öyrənməyə çalışır, türk milliyyətçi rəhbərinə bolşevik sistemini qəbul etdirmək istəyirdi. Mustafa Kamal
bolşevik yardımından imtina etmir, ancaq bolşevizmi yaxına buraxmayaraq, diplomatik tərzdə ona cavablar
verirdi. Sovet Rusiyasının Xarici işlər naziri, Nərimanovun təbirincə desək, “Şərq məsələsində dolaşıqlıq yaradan”
Çiçerin 1920-ci ilin iyunun 3-də Mustafa Kamala məktub göndərərək, Türkiyə ilə Rusiya arasında təcili diplomatik
münasibətlər qurulmasını təklif etdi. Sovet Rusiyası ilə ilk rəsmi əlaqə Upmal Anqarskinin sədrliyi ilə rus
diplomatlarının 1920-ci il oktyabrın 4-də Ankaraya gəlişi ilə başladı. 200 nəfərdən çox olan bu heyət özü ilə çoxlu
radiomaterialı, teleqrafçı və 500 kq-a qədər qızıl gətirmişdi. U.Anqarski Ərzurumda Kazım Qarabəkirlə görüşü
zamanı Türkiyədə Kommunist Partiyasına qoyulan qadağaları aradan götürməyi tələb etdi. Çünki Mustafa Kamal
bolşeviklərin yardımına ehtiyac duysa da, Türkiyənin istiqlalını kommunizmə yuvarlatmaq fikrində deyildi. Lenin
də M.Kamalın sosialist olmadığını deyirdi. Ancaq sovet Rusiyasının Türkiyəyə yaxınlaşmasının bir çox səbəbləri
vardı. Bu elə bir dönəm idi ki, türklər bir millət olaraq toparlanır, erməni və yunanlar üzərində qələbələr
borc