36
NAZİM HİKMƏTİ SEVƏNLƏR VƏ SEVMƏYƏNLƏR
Mən Türkiyədə, Azərbaycanda, Rusiyada, Orta Asiya respublikalarında Nazim
Hikmət yaradıcılığını araşdıran, öyrənən, bu sahədə elmi əsərlər yazan müəlliflərin
tədqiqat işlərini oxumuşam və öz yazılarımda bu əsərlərə münasibətimi bildirmişəm.
Nəticə etibarilə onu deyə bilərəm ki, Nazimi sevənlər sevməyənlərdən daha çoxdur.
Amma Nazim Hikməti sevməyənlər az deyil və onlar öz fəaliyyətlərini bu günə qədər
davam etdirirlər.
Nazim Hikmət ilk şeirini qələmə alan gündən özünü təsdiq edən şairlərdən olub və
həmin andan etibarən də yaradıcılığı birmənalı qarşılanmayıb. İstər məfkurəsinə görə,
istərsə də türk poeziyasına sərbəst vəzni gətirdiyinə görə. Amma bu bir həqiqətdir ki,
dövrünün Əbdülhəq Hamid kimi nəhəng sənətkarı Nazim Hikməti bəyənib və təqdir
edib. Özü də təkcə Əbdülhəq Hamid yox, yaşadığı dövrün əksər qüdrətli ədəbi simaları
Nazim Hikmətin sənətini yüksək qiymətləndiriblər. Amma onun kommunizm
ideyalarına (xüsusən Moskvada təhsil alıb qayıtdıqdan sonra yazdığı şeirlərinə görə)
sədaqətini bəyənməyiblər, tənqid ediblər, hətta təhqir ediblər. Şair kommunizmə böyük
ümid bəsləyib, inanıb və şeirlərində onu mütərəqqi bir ideologiya kimi tərifləyib.
Amma ömrünün son illərində dərk edib ki, bu ideyalar keçmiş Sovetlər İttifaqının və
sovet kommunistlərinin simasında heçdir, puçdur. Nazim Hikmət ilk dəfə Moskvaya
gəldiyi vaxt sovet cəmiyyətini ideal bir quruluş kimi qəbul etmişdi. 1938-1950-ci illərdə
Türkiyədə həbsxanada yatdığı vaxtlarda “Zoya”, “Moskva simfoniyası” kimi
əsərlərində Sovetlər ölkəsini, faşizmə qarşı sovet xalqlarının mübarizəsini gur səsi ilə
müdafiə etmişdi. Moskva yazıçıları da Nazimin müdafiəsinə qalxmışdılar. Bu yolu
davam etdirən Azərbaycanın söz ustaları da böyük Nazim Hikmətin məhbəsdən azad
edilməsi uğrunda öz səslərini dünyanın mütərəqqi insanlarının səsinə qatmış, şairin
zindandan azad olunmasını tələb etmişdilər.
Sonuncu dəfə Moskvaya gəldikdən sonra isə Nazimi zahiri təmtəraq əhatə etmiş,
keçirdiyi infarkt onu yatağa salmışdı. Sonrakı illərdə Nazim Hikmət kommunizm
ideyalarının, sosializm cəmiyyətinin mahiyyətini artıq yaxşı başa düşmüşdü. Onun hər
37
addımının izlənilməsi şairdə xəyal qırıqlığı yaratmışdı. Bu xəyal qırıqlığı onu ikinci
dəfə yatağa salmışdı. Şair yaxşı başa düşürdü ki, geriyə yol yoxdur. Türkiyəyə qayıda
bilmirdi, sovetlərdə isə yaşamaq artıq mümkün deyildi. Ümid yeri Azərbaycandı.
Mikayıl Rəfili, Süleyman Rüstəm, Rəsul Rza kimi şairlərlə, Əkbər Babayev kimi
tədqiqatçılarla olan dostluğu, səmimiyyəti onu yaşadırdı. Bu dostluq və səmimiyyət
qardaşlıq zirvəsində idi. O illər Azərbaycan mətbuatında Nazim Hikmətə aid çoxlu
məqalələr, resenziyalar çap olunurdu, əsərləri teatr səhnələrində tamaşaya qoyulurdu.
Xalq şairimiz Süleyman Rüstəm belə yazırdı: “İnsan yaşa dolduqca uşaqlıq və
gənclik illərinə qayıtmaq, o illəri bir daha yenidən yaşamaq istəyir. Bəli, insanın uşaqlıq
və gənclik illərində gördükləri, yaşadıqları onun hafizəsinə ömürlük həkk olunur. İllər
keçdikcə o xatirələr daha canlı, daha şirin və əziz olur. Təsadüf belə gətirib ki, qırx beş
illik yaradıcılıq həyatımda bir sıra ədəbi simalarla görüşmüşəm və bunların bəziləri ilə
şəxsi dostluğum olmuşdur.
Türk xalqının böyük oğlu Nazim Hikmətlə dostluğumun qırx illik bir tarixi vardır.
Biz Nazimlə 1927-ci ildə tanış olduq. Nazim Moskvada təhsil alırdı. Mən o illərdə
“Maarif və mədəniyyət” adlı ədəbi, ictimai məcmuənin məsul katibi idim. Nazim
Hikmət bizə şeirlər göndərməyə başladı.
Nazimin şeirlərində bizim oxucular üçün çətin anlaşılan türk sözləri vardı. Mən
Nazimə yazdım ki, məcmuəmizin müəlliflərindən biri kimi azəri oxucularını bu barədə
nəzərə alsın. Nazim mənim xahişimə əməl edib bizə tez-tez gözəl şeirlər göndərirdi. Bu
şeirlər dərhal geniş oxucu kütləsinin nəzərini cəlb etdi. Artıq biz, bir-birimizə tez-tez
məktub yazmağa və poeziya haqqında fikir mübadiləsinə girişdik, hətta şeirlərimizi bir-
birimizə göndərib məsləhətləşirdik də. Nazimin o illərdə yazdığı ən gözəl şeirlər demək
olar ki, bizim məcmuədə dərc edilmişdir.
Nazim Bakıda olarkən ondan xahiş etmişdim ki, bizim məcmuəmizdə çap olunmuş
və digər yazılarını, şeirlərini toplayıb kitab halında nəşr etdirmək üçün bizə göndərsin.
Nazim vədinə əməl edib topladığı otuza qədər şeirini mənə göndərdi. Bunlar 1920-ci
ildən 1927-ci ilə qədər yazılmış şeirlər idi.
38
104 səhifədən ibarət “Günəşi içənlərin türküsü” kitabı 3.000 nüsxə tirajla nəşr
edildi. Bu kitab bir neçə günün müddətində mağazalardan evlərə, evlərdən isə ürəklərə
köçdü.” (“Bakı” qəzeti, 30 iyun 1967-ci il)
Türkiyədə Nazim Hikmət Kültür ve Sanat Vakfının fəaliyyəti də diqqəti cəlb edir.
Vaxtilə əsərləri Türkiyədə yasaq edilmiş Nazim Hikmət bu gün televiziya kanallarında
görünür, kitabları nəşr olunur, pyesləri tamaşaya qoyulur. Şairin 100 illiyi qarşısında
Türkiyədə Nazim Hikmətə həsr edilmiş televiziya verilişi (”Kanal-D”) daha böyük
maraq doğurmuşdu. 2002-ci il yanvar ayının 15-də mavi ekranda göstərilmiş bu
proqramdan bəzi məqamları nəzərinizə çatdırmaq istəyirəm.
Türkiyənin teatr sənətçisi Gənco Erkalın dediklərindən: “Şairlər bir az zor
anlaşılan kişilər olur. Nazim də belə idi. 7-dən 70-ə kimi hər kəs Nazimi sevirdi. Məni
bir sual düşündürür: belə sevilən şairdən niyə bu qədər qorxurdular? Niyə onu “vətən
xaini” elan etmişdilər? Nazimin bütün cəhətləri bir-birini tamamlayan özəlliklərdir.
Nazimi sevdirən məncə, onun daxili aləmi ilə zahirinin bir vəhdət təşkil etməsi idi.
Nazim bütöv bir şəxsiyyət idi.
Mən Nazimin bütün şeirlərini sevirəm.”
Aparıcı: İndi də sözü, amansız bir xəstəlikdən vaxtilə yatağa düşmüş, özünün
dediyi kimi, Nazim Hikmət şeirlərinin gücü ilə həyata qayıtmış Nazim bəy Səlimdara
veririk.
Nazim Səlimdar: Mən zatən həyatımı onun şeirləri ilə yaşadım. Gəncliyimdən
bəri Nazim Hikmət, xüsusən onun “Qurtuluş savaşı dastanı” mənim ürəyimdə yaşayır.
Onun şeirlərini araşdırmışam, dəfələrlə oxumuşam, birər-birər öyrənmişəm. Elə bil ki,
böyük ustadın ölümsüz əsərləri mənim xəstəliyimi uçurdu. Nazim Hikmət dastanı mənə
arkadaş oldu, dost oldu. “Qurtuluş savaşı” dastanı yoxdan var olan bir millətin
salnaməsidir.
Aparıcı: Sözü Nazim Hikmət heyranlarından Ümid Sağlıka verirəm.
Ümid Sağlık: Nazim Hikmət həqiqət uğrunda mübarizə aparırdı. Bu mübarizə ona
əkməkdən də üstündü. Təəssüf ki, onun vətəndaşlığını xəyanət kimi zənn edirdilər. İndi
o, bütün dünyanın vətəndaşıdır. Mən Nazimi bəyənməyənlərə cılız adamlar kimi
baxıram. Onların haqqında danışmağa heç ehtiyac yoxdur.
Dostları ilə paylaş: |