|
Azərbaycan əDƏBİ DİLİNİn normalari
|
səhifə | 12/20 | tarix | 04.01.2023 | ölçüsü | 146,24 Kb. | | #98168 | növü | Qaydalar |
| NORMALAR2. Yazılı nitqdə vergül. Yazılı nitqdə vergül bir çox sintaktik məqamlarda işlənir və bütün hallarda fasilə məqsədini güdür. Bu, aşağıdakı məqamlarda özünü göstərir:
a) cümlənin həmcins üzvləri arasında. Məsələn:
Elə bil ki, Məsməxanımın bütün hirsi soyudu və elə bil ki, bu ucaboylu, göygöz oğlan birdən-birə onun lap az qala doğma bir adamı oldu; elə bil ki, cəmi bir saat bundan əvvəl yox, lap qabaqlardan, lap uşaq vaxtlarından tanış idilər və o zaman hələ bu cür boylu-buxunlu olmayan bu göygöz oğlan boynuna qırmızı pioner qalstuku taxıb çantasını yelləyə-yelləyə məktəbə gedən, məktəbdən qayıdan, barmaqları mürəkəbə bulaşmış Məsməxanımı çox görmüşdü. (Elçin, “Bir görüşün tarixçəsi”)
Bu qarışıq tipli tabesiz mürəkkəb cümlənin həmcins üzvləri arasında 5 vergül işarəsi işlənmişdir. Bu o deməkdir ki, həmin cümlənin oxunmasında 5 dəfə fasilədən istifadə edilir;
b) tabesiz mürəkkəb cümlələrin komponentləri arasında. Məsələn:
Hərdən o kənd üçün, onun güllü-çiçəkli torpağı üçün burnunun ucu göynəyir, varlığını bir həsrət yandırırdı, ancaq işinin çoxluğu, vaxtının azlığı tezcə bu göynərtini, bu həsrəti yuyub aparır, unutdururdu (Ə.Hacızadə, “Əfsanəsiz illər”);
c) tabeli mürəkkəb cümlələrin komponentləri arasında. Məsələn:
Çayxanada oturanlar çox yaxşı başa düşdülər ki, Baladadaş niyə özünü saxladı, niyə çayxanadan çıxıb getdi, dava-dalaş salmadı. (Elçin, “Baladadaşın toy hamamı”);
ç) qoşmalı xüsusiləşmələrdən sonra. Məlum olduğu kimi, qoşmalı xüsusiləşmələr ikinci dərəcəli üzvlərə aiddir. İkinci dərəcəli üzvlərdən isə tamamlıq və zərfliyin xüsusiləşməsi dildə daha çox müşahidə olunur. Məsələn:
tamamlığın xüsusiləşməsi: İndi buldozerçinin üzündə işgüzar qayğıdan başqa, heç bir ifadə yox idi. (İ.Əfəndiyev, “Körpüsalanlar”);
zərfliyin xüsusiləşməsi: Texnik olduğuma baxmayaraq, Adilin yazdığı rəqəmlər mənə birdən-birə son dərəcə cansıxıcı göründü (İ.Əfəndiyev, “Körpüsalanlar”); Xeyr, möcüzələri öyrənməklə bərabər, möcüzə yaratmaq üçün də meşələrdə gəzməyi sevirəm (M.S.Ordubadi, “Qılınc və qələm”);
d) dəqiqləşdirici xüsusiləşmələrdən əvvəl. Məsələn:
Mehman bəzi cari işləri, o cümlədən Məmmədxanın işini də ona tapşırdı (S.Rəhimov, “Mehman”);
e) “o”, “bu” əvəzlikləri ilə ifadə olunan mübtədalardan sonra isim, sifət, say gələrsə. Məsələn: O, gözlərini yumub zənnlə bu solğun çöhrəyə baxırdı və təəccüb edirdi ki, bu zəif vücud o qüvvəni, o ehtirası hardan aldı… (Elçin, “Bülbülün nağılı”); Əlbəttə, İsgəndər Abışovun Cavanşirin bu fikirlərindən xəbəri yox idi və Cavanşirin sifətindəki bu üstünlük təbəssümünü də o, çox adi bir işi və məlum məsələ hesab edirdi… (Elçin, “Şuşaya duman gəlib”); … bu, ötəri bir hiss idi… (Elçin, “Şuşaya duman gəlib”) və s.;
ə) alçaq tonla tələffüz edilən xitabların müxtəlif tərəflərində, yəni cümlənin əvvəlində gələn xitabdan sonra, cümlənin ortasında gələn xitabdan əvvəl və sonra, cümlənin sonunda gələn xitabdan əvvəl vergül qoyulur. Məsələn:
Güc ədalətin yoldaşıdır, mister İsfahani, işinizdə olun (M.İbrahimov, “Gələcək gün”); Ağa Şirəli: — Ağa Saleh, eşitdim bu gün raboçilərin zabastovka ediblər? (S.S.Axundov, “Çərxi-fələk”); Nizami: — Ey böyük tanrı, biz öz məhəbbətimizlə insanları əsrin çamurluğundan nəhayətsiz göylərə, dibsiz fəzalara qədər yüksəltmək istərkən, sən öz fitnənlə nə üçün bizim səadət sarayımızı uçurursan? Ey fələk, sənin gərdişin nə üçün rəqqasələr kimidir? … (H.Mehdi, “Nizami”);
f) ara sözlərin, ara cümlələrin müxtəlif tərəflərində, yəni ara söz və ya cümlələr cümlənin əvvəlində gəldikdə onlardan sonra, cümlənin ortasında gəldikdə onların hər iki tərəfində, cümlənin sonunda gəldikdə isə onlardan əvvəl vergül qoyulur. Məsələn:
― Doğrusu, Eyvaz, ― dedi, ― bu barədə heç fikirləşməmişəm… (İ.Əfəndiyev, “Su dəyirmanı”); Düzü, mən də doktora tərəfdar oldum (İ.Əfəndiyev, “Yaylaq qonşumuz”); ― Sonra bir balaca gülümsədi və bu gülümsəmə, əlbəttə, başqa gülümsəmə idi, amma bir az Cavanşirin İsgəndər Abışovun yanında gülümsəməsinə oxşayırdı (Elçin, Şuşaya duman gəlib”); Kim bilir, indi baş-başa verən bu körpə şitillərdən hər biri hansı bağda çiçək açıb bar verəcək? (İ.Əfəndiyev, “Su dəyirmanı”);
g) alçaq tonla deyilən cümlələrdə nidaların müxtəlif tərəflərində:
― Vay, evin yıxılsın, ― heyf, heyf (İ.Əfəndiyev, “Şəhərdən gələn ovçu”); ― Bıy, başına dönüm… axır ki, gəldin… ― deyə arvad qollarını açıb oğlunu qucaqladı (İ.Əfəndiyev, “Görüş”); ― Ay, bir də xoş gəlmisən, ― deyə Nəriman əmi nəşə ilə səsləndi (İ.Əfəndiyev, “Söyüdlü arx”); ― Oy, allah eləməsin, ― deyə mən düşünmədən səsləndim (İ.Əfəndiyev, “Söyüdlü arx”);
h) bəli, xeyr, yox sözlərini ayırmaq üçün. Məsələn:
O, bir an ara verib soruşdu: ― Deyəsən bayaq deyirdin işə gəlmisiniz?
― Bəli, bu yerlərin bitkilərini öyrənmək istəyirik (İ.Əfəndiyev, “Yaylaq qonşumuz”);
― Qardaş-bacın necə, var?
― Xeyr, təkəm (İ.Əfəndiyev, “Su dəyirmanı”);
Mühəndis mənim nə demək istədiyimi başa düşərək eyni ciddi ifadə ilə:
― Yox, ― dedi, ― razılıq verməsə çətin olacaq (İ.Əfəndiyev, “Su dəyirmanı”);
i) təkrar olunan sözlər və sintaktik konstruksiyalar arasında. Məsələn:
Solmaz: Yox, yox, mən bu sönməz odlardan ayrıla bilmərəm (C.Cabbarlı, “Od gəlini”); Tez ol, tez ol, gedək qəzetə xəbər verək! (Mir Cəlal, “Muştuluq”); — Mən artistka olacağam!.. İndi məktəbin səhnəsinə çıxıram, bu üzümüzə gələn il də dramanın studiyasına yazılacağam… Qoy salondan səhnəyə sarı o qədər əl vursunlar ki, o qədər əl vursunlar ki! (S.Rəhimov, “Mehman”).
Dostları ilə paylaş: |
|
|