26
9 sentyabr - 15-ci piyada firqəsinin bütün hissələri Bakı ətrafına gətirildi. 9-dan 10-a keçən gecə QİO
qoşunları Bakı ətrafında hücum üçün müəyyən edilmiş mövqeləri tutmağa başladılar.
10 sentyabr – QİO-nun komandanlığı başda Nuru paşa və Ə.Şıxlinski olmaqla bütün cəbhə xəttini
dolaşmış, düşmənin müdafiə mövqeləri ilə tanış olmuş və şəhərin tutulmasının son planını tərtib etməyə
başlamışdılar.
13 sentyabr - ingilis zabiti Raulinson təxribat qrupu ilə Lənkərana yollanmalı, daha sonra Muğandan
QİO-nun arxasına keçməli və körpüləri dəmir yolları, anbarları partlatmalı idi. QİO-nun cəbhədəki fəallığı və
son hücuma hazırlaşması buna imkan vermədi. Komandanlıq Bakıya hücum əmrini imzaladı.
14 sentyabr - ayın 14-nə keçən gecə QİO-nun qoşunları hücuma başladı saat 3-də ilk müdafiə xətti
tutuldu, saat 3.30-da Qurd qapısı mövqeləri ələ keçirildi. Bütün gün ərzində gedən döyüşlərdə ingilis və
Sentrokaspi qoşunları sıxışdırıldılar. General Denstervil öz qoşunları haqqında yazırdı: "Bütün üstünlüklərə
malik olan qoşunlar elə döyüş başlayan kimi darmadağın edildilər". Saat 22.00-da ingilislər gəmilərlə
evakuasiya olundular.
15 sentyabr - 15-nə keçən gecə QİO-nun qoşunları hücuma başlayaraq şəhərin əksər hissələrini tutdu.
Saat 10.30-da Sentrokaspi Diktaturası kapitulyasiya təklifi ilə çıxış etdi. Bakı şəhəri azad edildi. Azərbaycan
hökumətinə qələbə barədə teleqram vuruldu.
16 sentyabr - Bakıda Qızıl Qışla adlanan yerdə QİO-nun hərbi paradı keçirildi, ondan sonra QİO
komandanlığı və Azərbaycan hökumətinin üzvləri şəhərə daxil oldular.
16-17 sentyabr - görülmüş tədbirlər nəticəsində şəhərdə talançılıq və özbaşınalığın qarşısı alındı.
18 sentyabr - Nuru paşa Bakı əhalisinə "Əmrnamə" ilə müraciət etdi. Azərbaycan hökuməti Bakının azad
edilməsi və onun cümhuriyyətin paytaxtı kimi fəaliyyət göstərəcəyi barədə bəyanat verdi.
20 sentyabr - Bakıda möhkəmlənmək üçün hərbi qüvvədən istifadə etmək qərarına gələn almanlar dəmir
yolu vasitəsi ilə Tiflisdən qoşun göndərdilər.
21 sentyabr - Azərbaycana gələn alman hərbi hissələrinin qarşısını almaq üçün Ənvər paşanın əmri ilə
Azərbaycan-Gürcüstan sərhədindəki korpü partladıldı, sərhəd boyunca türk-Azərbaycan hissələri yerləşdirildi.
Nəticədə alman qoşunları geri qayıtmağa məcbur oldular.
Sentyabrın sonları - Qarabağda Azərbaycan kəndləri və şəhərləri özünümüdafiə dəstələri yaradıb
düşmənin qarşısını aldılar, lakin onu tam məğlub etmək üçün zəif idilər; QİO-nun Azərbaycan hissələri
Qarabağda qayda-qanunu bərpa etmək, erməni quldur dəstələrinin təcavüzünün qarşısını almaq üçün yürüşə
hazırlaşmağa başladılar. QİO-nun türk hissələri Dərbənd və Port-Petrovsk (Mahaçqala) yürüşünə hazırlaşmağa
başladılar. Qoşunların bir qismi Bakının dənizdən təhlükəsizliyini təmin etmək üçün (ingilis qoşunları Xəzərin
cənubunda, Ənzəlidə möhkəmlənmişdi) şəhərdə qaldı.
25 sentyabr - QİO-nun 1-ci Azərbaycan firqəsi (türk və Azərbaycan hissələri) Qarabağa daxil oldu,
erməni dəstələri ilə döyüşlər başlandı.
8 oktyabr - əksər erməni dəstələri məğlub edildi, 1-ci Azərbaycan firqəsi Şuşaya daxil oldu.
8 oktyabr - Biçeraxovun rəhbərliyi ilə rus qoşunları məğlub edildi, Dərbənd şəhəri türk hissələri
tərəfindən tutuldu.
23 oktyabr - Osmanlı Ordusunun Baş Komandanlığının Ərkani hərb rəisi Əhmed İzzət paşa Qarabağda
əməliyyatları dayandırmağı əmr etdi.
30 oktyabr - Mudros müqaviləsinin şərtlərinə görə, I Dünya müharibəsində məğlub olmuş Osmanlı
dövləti Azərbaycandan öz qüvvələrini çıxartmağa başladı. Qafqaz İslam Ordusu ləğv olundu; sırf Azərbaycan
hissələrindən təşkil edilmiş 1-ci Azərbaycan firqəsi (komandir general-mayor İ.Usubov) Qarabağda
əməliyyatları davam etdirdi.
8 noyabr - Biçeraxovun rəhbərliyi ilə rus qoşunları məğlub edildi, Port-Petrovsk şəhəri türk hissələri
tərəfindən tutuldu.
10 noyabr - Azərbaycanı tərk etməyə başlayan Osmanlı qoşunlarının şərəfinə Azərbaycan hökuməti
rəsmi vida ziyafəti təşkil etdi.
15 yanvar 1919-cu il - sonuncu türk qoşun dəstəsi Azərbaycan ərazisini tərk etdi.