– Bilmirəm, deyə bilmərəm. Əgər Bazil təcrid olunmağı seçibsə, bu,
onun öz
işidir. Əgər o, ölübsə, onda onun haqqında düşünmək belə istəmirəm. Ölüm
yeganə şeydir ki, mən o barədə düşünəndə qorxuram; mən ölümə nifrət edirəm.
– Nə üçün axı? – Dorian tənbəlcəsinə soruşdu.
– Ona görə ki, – lord Henri sirkə flakonunu burnuna aparıb iylədi, sonra davam
etməyə başladı, – bizim zəmanədə insan ölümdən başqa hər şeyə dözə bilər. Ölüm
və bayağılıq! Bax bu iki seydir on doqquzuncu əsrin adamına anlaşılmaz və
izahsız görünən. Gəl gedək, qəhvəmizi musiqi zalında içək, Dorian! Şopendən bir
şey çalın mənim üçün! Mənim arvadımın qoşulub qaçdığı adam da Şopendən
yaxşı şeylər çalırdı. Zavallı Viktoriya! Mən onu çox sevirdim, onsuz ev boş
görünür. Əlbəttə, ailə həyatı yalnız vərdişdir, çox pis bir vərdişdir! Lakin
insan ən
pis vərdişindən belə çətinliklə ayrılır. Daha doğrusu, ən pis vərdişdən əl çəkmək
daha çətindir. Onlar insan şəxsiyyətinin ən mühüm hissəsidir.
Dorian heç nə demədi və durub sakitcə o biri otağa keçdi, piano arxasında oturub
barmaqları ilə onun ağ və qara dilləri üzərində gəzişməyə başladı. Qəhvə içəri
veriləndə o dayandı və lord Henridən soruşdu:
– Harri, sizcə, Bazili öldürə bilərlər? Bu heç ağlınıza gəlirmi?
Lord Henri əsnəyib dedi:
– Bazil tanınmış adam idi, həmişə də Voterberi saatı taxırdı, ucuzvari bir saat idi.
Onu nə üçün öldürsünlər ki? Siz deyən ağıllı adam da deyildi ki,
düşmənləri çox
olsun. Əlbəttə, o, çox istedadlı rəssamdır, lakin Velaskesi çəkə bilən böyük
rəssam... kütün birisi, darıxdırıcı adam da ola bilər. Bazil, doğrudan da, cansıxıcı
adam idi. O, cəmi bir dəfə mənim marağıma səbəb olub, bu da çox illər bundan
qabaq. O zaman Bazil mənə etiraf etdi ki, o, sizi çox sevir,
siz onun ilham
pərisisiniz, siz onun yaradıcılığına stimul verirsiniz.
– Mən Bazili çox sevirdim, – Dorian kədərlə bildirdi. – Deməli, heç kimin ağlına
gəlmir ki, onu öldürüblər?
– Bəzi qəzetlərdə bu versiya yazılıb. Mən isə buna inanmıram. Parisdə, əlbəttə,
şübhəli yerlər var, amma Bazil elə yerlərə gedən adam deyil. Onda öyrənmək
həvəsi, demək olar, yoxdur; bu, onun əsas çatışmayan cəhətidir.
– Harri, əgər desəm ki Bazili mən öldürmüşəm, nə deyərdiniz, hə? – Dorian bu
sözləri deyərkən gözlərini lord Henriyə zillədi.
– Deyərdim ki, əziz dostum, siz özgə rolunda çıxış etməyə çalışırsınız... O
xarakter sizə münasib deyil. Bütün cinayətlər qeyri-əxlaqidir, bütün əxlaqsızlıqlar
da cinayətdir. Siz, Dorian, cinayət törədə bilməzsiniz, buna
heç qabiliyyətiniz də
yoxdur. Bağışlayın ki, belə bir qənaətlə sizin mənliyinizə toxundum, amma sizi
əmin edirəm ki, bu bir həqiqətdir deyirəm. Cinayətkarlar hər zaman aşağı
təbəqənin adamları olurlar, mən onları da heç mühakimə etmirəm. Mənə elə gəlir
ki, onlar üçün cinayət nədirsə, bizim üçün də incəsənət elədir. Yəni sadəcə, həm
cinayət, həm də incəsənət bir vasitədir, güclü hiss və duyğular bəxş edən vasitə!
– Güclü hiss və duyğular bəxş edən vasitə? Deməli, sizin sözünüzdən belə çıxır
ki, insan bir dəfə cinayət etdisə, ikinci dəfə də etməyə qadirdir? Boş şeydir, Harri!
– Oh!
Kimsə bir şeyi tez-tez edirsə, deməli, ondan ləzzət alır... – deyə lord Henri
güldü. – Bu da həyatın ən vacib sirlərindən biridir. Bununla belə, qətli həmişə
səhv bir addım hesab edirəm. Nahardan sonra insanlarla danışa bilmədiyin şeyləri
heç vaxt eləmək lazım deyil! Nə isə, gəlin zavallı Bazil söhbətini bitirək. İnanmaq
istərdim ki, onun sonu sizin güman etdiyiniz kimi çox romantik olsun. Lakin hər
halda, mən buna inanmıram. Bəlkə də, o, omnibusdan Sena çayına düşüb və
konduktor da bunu camaatdan gizlədib ki, başağrısı olmasın. Hə, düşünürəm ki,
elə belə də olub. İndi,
Allah bilir, o, Senanın lilli, yaşıl sularının dibində uzanıb,
üstündən ağır yük gəmiləri keçir, saçlarına da uzun yosunlar ilişib. Bilirsiniz,
Dorian, onun təsviri incəsənətdə bundan sonra nəsə yaratmasına inanmıram. Son
on ildə onun yaratdığı əsərlər çox zəif idi...
Dorian cavab vermək əvəzinə ah çəkdi; lord Henri isə durub otağın o biri küncünə
sarı yeridi və orada bambuq şüvülünün üstündə oturan nadir Yava tutuquşusunu
tumarlamağa başladı. Onun barmaqları bu boz qanadlı, çəhrayı kəkilli və
quyruqlu iri quşun belinə toxunan kimi ağ pərdəli göz qapaqlarını qara güzgü
gözlərinin üstünə salladı və dala-qabağa yellənməyə başladı.
– Hə, belə işlər, Dorian, – lord Henri döndü, cibindən dəsmal çıxararaq söhbətinə
davam etdi. – Onun
şəkilləri, demək olar ki, çox zəif idi. Nəsə çatmır onlarda.
Görünür, Bazil öz idealını itirib. Siz onunla yaxından dostluq edən dövrdə o,
böyük rəssam idi. Sonra bu dövr qurtardı. Siz nə üçün aralandınız? Yəqin, o, sizi
boğaza yığdı, hə? Əgər belə olubsa, Bazil bunu heç vaxt bağışlamazdı; çünki
bütün darıxdırıcı adamlar belədir. Yeri gəlmişkən, onun çəkdiyi o gözəl portret
necə oldu? Sizin portreti deyirəm! Bazil o şəkli çəkib qurtarandan bəri onu bir
dəfə də görməmişəm. Oh! Yadıma gəlir, bir neçə il
bundan qabaq siz mənə
demişdiniz ki, onu Selbiyə göndərmisiniz, nəsə o şəkil ya yolda itib, ya da nəsə
onu oğurlayıblar?.. Belə bir şey eşitmişdim sizdən... Tapılmadı, hə? Heyif! Bax
əsl şedevr o portret idi! Yadıma gəlir ki, mən onu almaq istəyirdim. Heyif, o vaxt
onu almadım. Gərək alaydım! Bu əsər Bazilin şah əsəriydi. O, bu əsəri
yaradıcılığının çiçəkləndiyi bir dövrdə yaratmışdı. O vaxtdan bəri onun çəkdiyi
şəkillər bir elə marağa səbəb olmayıb; o da ingilis təsviri sənət
nümayəndələri
kimi qarışıq şəkillər çəkir, yəni xoş niyyətlə pis işin qarışığından yaranan sənət
nümunələri. Portretin itkin düşməsi barədə siz qəzetə elan vermisiniz? Gərək
verəydiniz...
– Bilmirəm, yadımda deyil, Harri, – Dorian cavab verdi. – Deyəsən, vermişdim.
Amma düzünü deyim, mənim o portretdən heç xoşum gəlmirdi. Ona görə nə
qədər pozada oturdum, təəssüf edirəm. Bu barədə xatırlamaq belə istəmirəm.
Bilmirəm bu söhbət niyə ortaya çıxdı?! Bilirsiniz, Harri, mən portretə baxanda
həmişə hansısa pyesdəki misralar yadıma düşürdü; deyəsən, “Hamlet”dən idi...