- 66 -
NAXÇIVAN DÖVLƏT UNİVERSİTETİ.
ELMİ ƏSƏRLƏR, 2018, № 1 (90)
NAKHCHIVAN STATE UNIVERSITY.
SCIENTIFIC WORKS, 2018, № 1 (90)
НАХЧЫВАНСКИЙ ГОСУДАРСТВЕННЫЙ УНИВЕРСИТЕТ.
НАУЧНЫЕ ТРУДЫ, 2018, № 1 (90)
VİDADİ SALMANOV
KÖNÜL SALMANOVA
Naxçıvan Dövlət Universiteti
UOT:13
EKOLOGİYA VƏ MƏNƏVİYYAT
Açar sözlər: ətraf mühit, cəmiyyət, təbiət, müharibə, vandalism, şüur, mədəniyyət
Keys word: environment, society, nature, vandalism, consciousness, culture
Ключевые слова: окружающая среда, общество, природа, война, вандализм,
сознание, культура
Yer kürəsinin maddi aləminin əsas tərkib hissələri insan və təbiətdir. Təbiət insan şüurundan
asılı olmayaraq zaman və məkan daxilində mövcud olan sonsuz bir varlıqdır. Təbiət həm insanın
yaşamasını təmin edən vasitə, həm də onun fəaliyyəti, eləcə də mövcud olması üçün əsas şəraitdir,
mühitdir. İnsan öz növbəsində yalnız bioloji növ olmayıb, cəmiyyətin inkişaf qanunları əsasında
mövcud olan sosioloji varlıqdır. İnsanın bütün varlığı, yaşayışı, məişəti və həyat tərzi ətraf mühit,
onun tərkib hissələri və amilləri (torpaq, su, hava, mikro və makrofauna və flora, kosmik və Günəş
şüaları, biosfer və onun bütün amilləri) ilə əlaqədar olmaqla, bilavasitə onlardan asılıdır.
Ətraf mühit dedikdə insan fəaliyyətindən asılı olmayaraq onu əhatə edən canlı və cansız
təbiətin məcmusundan ibarətdir və onun mühafizəsi bəşəriyyətin ən əhəmiyyətli problemidir. Təbii
ətraf mühit amilləri insanı həmişə özündən asılı vəziyyətə salmış və onunla dialektik vəhdət təşkil
etmişdir. Bu amillər insanın yaşamasında, uzun ömür sürməsində, sağlamlığında, bir bioloji varlıq
kimi fomalaşmasında və ümumi inkişafında çox böyük rol oynayır. Ətraf mühit amilləri həm də
insanın əsas bioloji və sosial iqtisadi tələblərinin ödənilməsini təmin edən ən başlıca mənbələr
sayılır. Hələ qədim dövrlərdə insanlar zərərli və təhlükəli ünsürlərdən özlərini mühafizə etmək
məqsədilə təbii ətraf mühit amillərindən geniş istifadə etmişlər. Bu amillər həm də insanları
sığınacaq, yaşayış vasitəsi, yeyinti məhsulları, dərman maddələri, geyim və əmək alətləri ilə təmin
edən xammal mənbələri hesab olunur. Həmin xammal mənbələri müharibə və münaqişələrin
yaranmasının əsas səbəbi olmuşdur.
Deyilənlərlə yanaşı dünya ekoloji mühitinin korlanması bəşər insanını dərindən düşünməyə
vadar edir. Vaxt keçdikcə insanlar dərk edirlər ki, təbii ehtiyatlara qeyri-elmi münasibət, havanın,
suyun, torpağın çirkləndirilməsi insanın özünün sağlamlığı və yaşayışı əleyhinə yönəlmiş bir
fəaliyyətdir. Bildiyimiz kimi, ölkəmiz gözəl təbii şəraitə, zəngin təbii sərvətlərə, inkişafda olan
sənaye sahələrinə malik olan bir dövlətdir. Ətraf mühitin tərkib hissələri bəşəriyyətin inkişaf
tarixinin bütün mərhələlərində insanın antropogen təsirlərinə məruz qaldığı üçün get-gedə özünün
təbii mövcudluğunu itirmiş və ekoloji disbalans hökmranlıq etmişdir. Həmin ekoloji disbalansın
yaranmasında, təbiətin normal ahənginin pozulmasında və ətraf mühitin çirklənməsində
müharibələr və milli etnik münaqişələr müstəsna rol oynamışdır.
İnsan yer üzərində
yarandıqdan sonra
müxtəlif silah növlərilə saysız- hesabsız müharibələr
etmişlər. Bu müharibələr əsas etibarilə torpaq tutmaq, təbii sərvətlərə yiyələnmək, ərazi
genişləndirmək, din və ərazi ayrı-seçkilikləri əldə etmək və s. səbəblərdən baş vermişdir. Təkcə XX
əsri götürsək həmin əsrin I yarısında iki dünya müharibəsi tarixdə misli görünməmiş təbii, ekoloji,
siyasi
və
iqtisadi
nəticələrilə
tarixə
düşmüşdür.
II Dünya müharibəsində bəşəriyyətin bu vaxta kimi
görmədiyi silah və sursatdan istifadə edilmişdir. Görünür elə bu aramsız müharibələr, kütləvi
xəstəliklər, irili-xırdalı müxtəlif dağıdıcı təbii hadisələr (vulkan püskürmələri, zəlzələlər, sellər,
okeanlarda sunami dalğaları, fırtınalar, qasırğalar, tornado, səhralaşma kimi problemlər) hər bir
ictimai formasiyada özünəməxsusluğu ilə seçilmiş və öz təsirini göstərmişdir.
- 67 -
Həm dünya müharibələri, həm də milli etnik münaqişələr zamanı təbiətə, onun sərvətlərinə
ağır zərbələr vurulmuş və neqativ ekoloji təsir göstərmişdir. Ümumiyyətlə, müharibələr və etnik
münaqişələr təbiətə çox böyük dağıdıcı təsir göstərməklə, torpağın, suyun və havanın tozlarla, tüstü
və kimyəvi zəhərli maddələrlə çirklənməsilə insan sağlamlığına çox güclü neqativ təsir göstərmiş və
cəmiyyətin ümumi inkişafına ciddi maneçilik törətmişdir. Müharibələr zamanı xeyli insan tələfatı
olmuş, insanların sağlamlığına güclü neqativ zərbə endirilmiş, xəstəliklərin sayı, uşaq ölümü və ölü
uşaqların doğulması artmış, anomaliya halları çoxalmış və bəşəriyyətin ümumi inkişafının
ləngiməsinə, normal ahənginin pozulmasına zəmin yaradılmışdır.
Lokal ekoloji müharibələr həmişə daha güclü dağıdıcı, bərpa olunmayan, yaxud
çox,
çətinliklə bərpa olunan aşağıdakı ekoloji təzadlara səbəb olur: tükənən və bərpa olunmayan
enerjiresurslarının - neft, onun məhsulları, təbii qaz, oduncaq,
kömürün normadan çox istismarı və
istifadə olunması nəticəsində ətraf mühit güclü çirklənməyə məruz qalır; bombaların partlaması
nəticəsində torpaqda dərin çatlar, yarğanlar əmələ gəlir, ərazinin təbii relyefi və coğrafi mövqeyi
pozulur, torpaqlar eroziyalaşır, təsərrüfat əhəmiyyətinin itirir; müharibə gedən və ona qonşu olan
ərazilərdə ətraf mühit güclü təsirə malik olan kimyəvi zəhərləyici maddələrlə çirklənir; müharibə
zamanı ekosistemlərə çox ciddi zərər vurulur; quruda və dənizdə minalar, kimyəvi zəhərli
maddələrlə dolu olan partlamamış mərmilər ərazidə məskunlaşan insanların kütləvi ölümünə səbəb
olur və s.
Müharibələrin və etnik münaqişələrin təbiətə, ətraf mühit amillərinə və təbii sərvətlərə
vurduğu ağır ekoloji zərbələrin neqativ nəticələri dünya alimlərini «ekoloji müharibə», «ekoloji
terrorizm», «meteoroloji müharibə», «geofiziki müharibə», «biosid» - bioloji varlıqların, flora və
faunanın nəslinin kəsilməsi və s. kimi beynəlxalq terminləri etiraf və şərh etməyə məcbur etmişdir.
«Ekoloji müharibə» termini əsasən Vyetnamda gedən müharibənin ölkə ərazisində və qonşu
ərazilərdə ətraf mühitə göstərilən çox güclü ekoloji zərbədən sonra dünya ekoloqları tərəfindən
işlənməyə başlamış və hazırda ekoloji aləmdə ilkin
yerlərdən birini tutur. Ekoloji müharibələr, bir
qayda olaraq, ərazinin səhralaşması və xarabalığa çevrilməsi ilə nəticələnir.
Bakterioloji və kimyəvi
qırğın silahlarından istifadə edilməsi, onların sınaqdan keçirilməsi və heyvanlar üzərində
ekspermentlərin aparılması ətraf mühiti, xüsusilə torpaqları, su mənbələrini və havanı patogen
mikroorqanizmlər və zərərli kimyəvi maddələrlə çirkləndirir, dəhşətli epidemiya və epizootiyalar
başlayır.
Müharibələr bəşəriyyətə ölüm, fəlakət və dağıntı gətirdiyi üçün onun qarşısının alınması
həmişə çox mühüm dünyagörüşü və fəlsəfi- qlobal problem olmuşdur. Qədim Yunan filosofu
Heraklit ədalətsiz müharibələrə qarşı çıxaraq demişdir: “Müharibə, hər şeyin allahı və hər şeyin
şahidir... O,
birini qul, digərini isə ağa, azad insan edir”.
Müharibələr zamanı atom (nüvə) bombalarından istifadə olunması cəmiyyətin inkişafının
normal ahəngini pozan və bəşəriyyətin tarixi yaddaşına qara hərflərlə həkk olunan, heç zaman
yaddaşlardan silinməyən, unudulmayan fəlakət kimi dəyərləndirilməlidir. Atom (nüvə) silahı
zəncirvari nüvə reaksiyaları zamanı qapalı mühitdə kütləvi miqdarda ayrılan nüvədaxili enerjinin
hesabına yaranan partlayış törədən silahlar olmaqla, bu zaman maddənin kütlə vahidindən ayrılan
enerji adi partlayıcı maddənin yaratdığı enerjidən 20-80 mln dəfə çox olur. Atom partlayışı
radiasiya, işıqlanma, zərbə dalğası, elektromaqnit dalğası və zəhərləyici təsirinə görə digər
bombalardan çox böyük gücə malikdir. Bu növ silahlardan kütləvi qırğın məqsədilə, xüsusilə əsas
hərbi hissələrin və silahların kütləvi surətdə toplandığı əraziləri, raket bazalarını, inzibati
mərkəzləri, sənaye obyektlərini dağıtmaq, ətraf mühiti zəhərlənmək, çox güclü yanğınlar törətmək
və s. məqsədilə istifadə olunur. Bu zaman insanlar olduqca güclü neqativ psixoloji və mənəvi
təsirlərə məruz qalır, ağır stresslər keçirir.
Bəşəriyyət tarixində qara səhifə kimi həkk olunan ən dəhşətli hadisələrdən biri, həm də
insanlığa xas olmayanı, vəhşi, qəddar, dağıdıcı olması ilə səciyyələnən və heç vaxt unudulmayan
vandalizmdir. «Vandalizm» almanca «vandal»,
«barbar» sözündən götürülməklə vəhşilik, mə-
dəniyyətsizlik, talançılıq mənasını daşıyaraq tarixi, çox qiymətli təbiət və mədəniyyət abidələrini
uçurub-dağıdan, məhv edən, vəhşi və qəddarlıq deməkdir. Özünün vəhşilik dərəcəsinə görə
Ermənistanın və erməni daşnaklarının Azərbaycana qarşı dəfələrlə həyata keçirdiyi vandalizm