247
deməməyim, açıqdan-açığa özümü bildirməməyim isə aldığım təlim,
tərbiyədəndir. İndi mənə nə cəza istəyirsiniz verin. Ancaq bütün Rusiyanı sarsıdan
inqilabın
xeyrinə işləsəm, özümü xoşbəxt bilərəm. Keçdiyim yollara nifrət elərəm.
Güman edirəm ki, siz mənə aman verib öz xeyriniz üçün istifadə edə bilərsiniz…
Şadlinski susdu. Sözlərinin necə təsir etdiyini bilmək üçün gah ona, gah
buna nəzər saldı.
Gerasimov soruşdu:
- Yoldaşların kimdir?
- Mən əvvəldən tək olmuşam.
Gerasimov bayırda dayanan qızıl əsgəri içəri çağırıb dedi:
- Dustağı aparın.
Öz hiylələri ilə ölümün ağzından neçə dəfə çıxmış Şadlinski bağırdı:
- Bolşeviklər, amandır, mənə rəhm eləyin! Ruslar rəhmdil olurlar, balalarıma
yazığın gəlsin, komandir!..
- Gedək!.. – deyə əsgər onun qolundan tutdu.
Şadlinski dartınıb Comərdin ətəyindən yapışdı:
- Comərd, axı nə qədər pis olsam, yenə sənin öz millətindənəm!..
Məni xilas
elə, Comərd! Bu yaxşılığı heç vaxt unutmaram.
Comərd ətəyini onun əlindən çıxardaraq dedi:
- Sən mənim millətimin bayquşusan! Müsavatçı, alçaq!..
Şadlinski özünü güllənin qabağına verməmək üçün son hiyləyə əl atdı:
- Ah, ürəyim ağzımdan gəlir!.. – deyə o dəqiqə tirəmeş yerə uzandı. Bütün
bədənini əsdirdi…
Qızıl Ordu hissələri Dığ və İnzerak tərəfdən Zəngəzura hücuma keçmişdi.
Zəngəzur partizanları Gerasimovun komandir olduğu polkla birləşmişdilər.
Üç gün idi ki, şiddətli müharibə gedirdi. Bu müddət ərzində bir çox kənd
daşnaklardan azad edilmişdi. İstiqamət Gorusa doğru idi. Qızıl əsgərlər durmadan
irəliləyirdilər. Lakin buna baxmayaraq, Karonun komandası altında daşnak qoşun
hissəsi inadla vuruşurdu.
…Gecə bir
qədər sakitləşmiş döyüş, bu gün erkən yenidən qızışdı. İyul
günəşi çeşt yerinə qalxana kimi, Keçəldağ və onun sağ-solundakı kiçik dağlar,
təpələr, düzənlər qırmızıların əlinə keçdi. Bu yerlərdən Gorus əl içi kimi
görünürdü. Komandanlığın göstərişinə əsasən, şəhər dağılmasın və əhalisi
qırılmasın deyə, topçular mərmiləri onun ətrafına yağdırırdılar. Düşmən mərmiləri
isə qırmızıların səngərlərinin yan-yörəsində partlayırdı.
Hər iki tərəfdən atılan güllələrin vıyıltısından, pulemyotların şaqqıltısından,
topların gurultusundan qulaq tutulurdu.
Qızıl əsgərlər səngərlərdən hücuma qalxıb tutarlı bir
zərbə də endirsə idilər,
daşnaklar bəlkə də mövqelərini buraxıb qaçmağa məcbur olacaqdılar….
Lakin bir təpənin döşündə səngərə girmiş partizanları mühasirəyə almaq
üçün daşnaklar sağ cinahdan hücuma keçdilər.
Əlində tapança olan bir daşnak zabiti nə isə çığıra-çığıra qabağa yüyürəndə
Surenin güllələri onu yerə uzanmağa məcbur etdi. Lakin o, yenə qalxdı…
Əri ilə bir səngərdə, çiyin-çiyinə vuruşan Siranuş təlaşla dedi:
248
- Ora bax, yenə düz bizə tərəf gəlirlər, Suren!..
Suren arvadına gözucu baxıb dedi:
- Yoxsa qorxursan, Siranuş?
- Özümdən yox, səndən… Kaş bu davadan sağ-salamat qurtaraydın!..
-
Nə mənim fikrimi elə, nə də öz fikrini. At! At!..
Hər ikisi zabiti nişan aldı.
Zabit küləkdən yellənən bir budaq kimi irəli əyilib geri getdi, sonra şalban
təkin şappıltı ilə arxası üstə yerə yıxıldı. Onun dalınca ayağa durub hücuma
keçmək istəyən daşnaklar tez yerə uzandılar…
- Zabiti sənin güllən öldürdü, Siranuş? – deyə Suren gülümsündü və tez
tüfəngini patronlamağa başladı…
- Yox, sənin güllən…
Onlar yerə yatmış daşnak əsgərlərini gözdən buraxmayıb
güllələri onlara
tərəf yağdırdılar…
Levon sürünə-sürünə gələn iki daşnak əsgərinə qışqırdı:
- Hara gəlirsiniz, ilanlar! – O, birini nişan aldı. Ondan bir az aralıda uzanmış
Camal da tüfəngini ikinci daşnaka yönəltdi. Onun nişan aldığı əsgər o dəqiqə
yerində balıq kimi partladı… O biri əsgər yerdən qalxıb dalına baxmadan qaçmağa
başladı. Bunu görən Yusif onu nişan aldı. Vahan Yusifi ürəkləndirmək üçün:
- At, balaca partizan! – dedi. – At, gözünə dönüm! – Vahan özü də
səngərdən çıxıb sağ dizini yerə qoyaraq, qaçan daşnakı gülləyə tutdu…
Hayk, Rüstəm, Qiyas, Sergey, Qurgen əkshücuma
keçmək üçün hərəsi bir
səngərdən, bir daşın dibindən ayağa qalxdı. Əyilə-əyilə addımladılar. Lakin
qarşılarında bir mərmi partladı. Onlar toz-duman içində itdilər…
Bir gözü düşməndə, bir gözü isə aralıda, qayanın dalından daşnaklara güllə
yağdıran ərində olan Növrəstə, daşnak əsgərlərinin arxadan oğrun addımlarla
Şahmərdana yanaşdığını gördü. Əsgər süngünü onun kürəyinə sancmaq üçün
yuxarıya qaldıranda, Növrəstənin gülləsi açıldı. Daşnak səndələdi,
tüfəngi əlindən
yerə düşdü, özü isə aşıb Şahmərdanın qabağına sərildi. Şahmərdan çevrilib geri
baxdı, təkcə Növrəstəni gördü. Növrəstə dillənmədi. Şahmərdan da heç bir söz
demədi, lakin həyatını ölümdən qurtaran Növrəstəyə ürəyində təşəkkür etdi…
Növrəstənin də xəyalından bir şey keçdimi? Şahmərdanın heç olmasa bu
ölüm-dirim meydanında onunla barışmasını arzuladımı? Kim bilir. Amma o,
Şahmərdanı keçmiş əri olduğu üçün yox, azadlıq uğrunda çarpışan bir mübariz, bir
kommunist kimi sevirdi…
Ara getdikcə qızışır, döyüş getdikcə şiddətli və dəhşətli bir vəziyyət alırdı.
Güllü-çiçəkli dağlara, yamyaşıl yastanlara
daha çox qan tökülürdü, səngərlərdən,
daşların dibindən, düzənliklərdən inilti, sızıltı səsləri ucalırdı. Adama elə gəlirdi ki,
bu qanlı döyüş meydanından bir nəfər də sağ qurtarmayacaq; əlinə silah alıb
davaya girmiş insanların həyatı sanki bir tükdən asılı idi…
Elə bil ki,
gecə ilə gündüz, fəlakətlə səadət üz-üzə durmuşdu…
Gurultusu dağlara, dərələrə düşən «ura» səsi yüksəldi. Zəncir kimi açılıb,
düşmən üstünə yeriyən rus əsgərlərinin qabağında təcrübəli komandir Gerasimov
gedirdi.